|
02-10-2011, 05:21 AM | #1 | ||||||||||
|
أولاد الشارع فهرس لي كل ........
اقتراح *************** او مت شهيد .. الرائع عاطف خيري ما تتضارى ورا الدعوات وما تتلبسي فرح الفات يسكن فيك النغم الزايف ويسرق حاسة شوفنا الواقفة على رجلين جوانا نحنا الهاوية .. والمتطامن من الأرض آه من نحلك ساعة يرحل ولمن يكتب فينا الحنضل ويختم عمرو بفعل الشهد قال الجدول : طلوع النخلة .. مرور الريح .. واحد لكن الريح بعانق حقل ونحن بنطلع نخلة .. وننزل ونكتب فى ذاكرة الصفق الأخضر سجنا الريح فى الورق الأبيض وجهناها ضد التمر الناعس يسقط زى قبعة الحارس زى الكان بيناتنا ..و فات قالت غيمة : بين قوسين (غيمة لئيمة) أولاد الشارع فهرس لى كل المدن التهرس جوفك بالأسمنت قالت ريح : شوف الناس قنديل لو ما نور يحرق كوخ .. وباقى الحلة تنور أو يتفجر جوخ او ينزل بوخ يقول للنسمة الزايفة .. أقيفى لو تتفرد ريح .. تتشرد ريح .. ريح الخوف لو تتفرد ريح تبدأ تفرتق ضفاير المدن الكاذبة تعيد تسريحتك يوم سمايتك .. شكل قامتك كيف تموتى .. وتحيى تانى ويوم قيامتك .. هو البيدينا الثبات يا مجلوبة فى قافلة رق ما بستحمل صدرك رصاصة ظلم يا صابت رحم الفال يا قطعت حبل الحلم يا كنا نبيعك .. يا نسرق إخترنا النار .. الضلها يحرق طمنـّاك إنو الدنيا بخشها ضو يجرح جلد العتمة دم الليل قربان فجرك يا بت يا نيل لو نامت قمحة على الأبيض وإتشرت زيو وزاد الأبيض فى غيو ومدد رجلو اليسرى ما كان الكسرة .. جاتك من برة صفرا .. ومنكسرة زوجناك الشهدا وِلاد الكد الماتو عشان الشعب زوجناك ما عندك ضرة زوجناك ما جاتك ضرة ما إنشاف ماعونك فى الحلة يساسق ويلقى فـتات قال الأبيض لى الأزرق: يبقى ضد الانتباه وضد تواريخ التمازج بينى .. بينك ما البشوفك فى مراهقة الخرائط وفينا من وجع المسافرين واطه .. ما لاقت هوية رد الأزرق: مطر الحبش لو كان نبش جواك سقف و هد حيلك فى الدواخل وشدّ عصبك فى المداخل صوت مراكبى وإيد بتسأل فى القمح وفينا من فرح المسافرين قصة الشمس .. القضية يا أعشاب النيل الأبيض ما تتضارى ورا الدعوات ما تتلبسى فرح الفات أقرا تاريخك .. وأخاف أسأل جبين الفجر .. ألقى الفجر مطعون فى القفا هل سافرت فى دمك المحقون رجا حبة غضب ما شلنا جمرك .. و إنطفا جوانا نارك .. والمطر جايين .. جايين بالكتابة .. وضربة الناس المهابة لو هز نخلك باشبوزك ما غادرت تمرة السبيط وما ساور الطورية شك إنو الأرض أنثى .. وبتحمل بالحلال مين اللى قال إنو المسافة البينا بين الشمس طاقة أو مياه النيل بتدخل فى عروق السنبلة المسقية بى عرق الجعانين .. والمساهرين بالبطاقة أقرى تاريخك .. وأقيف جواكى .. والزمن النضيف جواى .. من جواك غضب سلم مفاتيح السؤال جيل الشمس .. موكب حريق واقف على باب الدخول بيناتو بينات الوصول .. لحظة شهيق بيناتو بينات الوصول لحظة شهيق .. لحظة شهيق
|
||||||||||
02-10-2011, 05:35 AM | #2 | ||||||||
|
لوهز نخلك باشبوزق ما غادر التمر السبيط وماساور الطوريه شك انو الارض انثي وبتحمل بالحلال دائما مايهز احلامنا باشبوزق ما اي عسكري مغامر فيجعلها تتقصف وتتحطم فيدوس عليها غيرآبه مدخل جديد هل يمكن ان ينتابنا احساس بان الشعر في أزمه بعد قراءة عاطف خيري مدخل تاني الم يأخذ الشعر منحي جديد بعد عاطف خيري وقبله الصادق الرضي رغم ان كل منهم له اداته ولكننا نتحدث عن الشعر كانه اتخذ مسارا جديدا بعدهما قد يكون يجعل استمرار هذا الضرب من الادب بنفس القه وانسكابه العذب في دواخلنا ممكنا ولا اظنه بمعزل عن محيطنا او عن العالم بل هو امنداد لما يدور حولنا علي ايدي هؤلاو الذين اجروا جراحه معقده للقصيده يمكن للشعر ان يظل ديوان السودانيين الرابط الاساسي بين الشاعر وهموم الناس لم ينفصم ولكن الاداة طرأ عليها بعض التغيير نتحسسه في الكلمات او التراكيب او تداخل في طعم القصيده تماما كطعم اللالوب بعد قراءة قصيده لعاطف خيري احس بالطعم المتداخل في مدخل استيعابي ولكنها اي القصيده تهش نعاسا بدا ينتابني مع الشعر المداهنه علي كل حال هو تجريد فريد الي اين يفضي اظن ان القصيده الان بدات تكتسب هذه الملامح التي اصرعليها عاطف خيري ورفاقه لااعرف بالتحديد هذا النهج متي بدأ ولكني اصطدمت به اول مره مع عاطف خيري ولكن قصيدة عاطف افضل عند تزدرها دون منكهات ترويجيه عليك ان تستمع اليها فطريقة اداءه تجعلك تنبهر وهو من خلال اداءه لديه قدره خارقه لتثتبيت المعاني في وعيك كمداميك تؤسس لرؤيه قادمه مما يعيدنا الي ان الشعر في مقبل الايام وبالذات الدارجي سيطوي صفحة الوسيط بين المتلقي والشاعر وسيعود الي بداياته التلقي المباشر ليتم التفاعل دون عوائق قد تكون دعوه لسوق عكاظ سوداني مخرج انه هذيان يخص القصيده التي انتابتني هذا الصباح لا عليكم |
||||||||
|
|
|