|
|
08-31-2011, 12:14 PM
|
#1 | ||||||
|
زائر
|
خاص للمغتربين
كيف شايل همك وشجن الغربه وآهة شوقك وطول الليل كيف شايف دربك ودمعة حزنك بين اهدابك وعمر السكه اللسه طويل ياالشلت جراحك بقجة ذكري منوسره وتنتح في اعماقك يومي تسيل كيف خليت الغربه تسوقك وانت المزروع طيبة نخله في خصر النيل كيف وقعت بطاقة فقدك جوه عيون مليانه محنه وجوه قلوب رايداك بالحيل مالك يازول ادمنت الغربه وزدت همومك وكنت وحاتك جمل الشيل يازول معجون بالطيبه قليبك مامشتاق لي موية النيل؟ مامشتاق يازول يانيل؟ مامشتاق لي قعدت جبنه وريحة كسره وحفلة حنه هوايد الليل مامشتاق لي صوت اصحابك وضل الشجره الحاضن بابك وشاطئ النيل مامشتاق لي شيلة سفره في عرس اخوانك ومرقة فاتحه علي جيرانك وصرة زول زعلان وجميل مامشتاق لي رشة مطره وصوت حوليه ودقة نوبه وصدي تهليل لوما مشتاق الناس وحياتك ليك مشتاقه وصورتك لسه في اعماقهم فنجري راكز اخو اخوان سوداني اصيل_ كلمات ود الشيخ تخريمه: مامشتاق لي عيد في فطيس "ولو ان العيد في اي مكان اصبح له نفس الطعم والمصيبه الاعظم ان تحس بالغربه وانت في وطنك لذلك عفوا ود الشيخ هذه الاشياء الجميله زمانا فات وغنايا مات" نعيب زماننا والعيب فينا... |
||||||
|
|
08-31-2011, 02:16 PM
|
#2 | |||||||||||||
|
المدير العام
|
Quote:
ارتعد أوصالي...وانا اقرا تعقيبك يا ام رهف لانني كنت بتونس مع احد الأصدقاء في الفيس بوك... وهو بقول نفس الكلام دا هذه الأشياء الجميلة ذمانا فات هل فعلا هذا الشعور ملا كل الفراغات.... الشعور بان الناس إتغيرت ليس أبحث عن إجابة .... لانني مؤمن بأن البساطة... والحنية موجودة رغم غطاءات العولمة التي يظن الجميع بانها غيرت تركيبة المجتمع ليس هذا قريب من الحقيقة طالما الناس.... بتفرح في وكت واحد.... وتحزن في وكت واحد طالما ان عمود الأكل لاذال موجود ............ السلام لي ناس البلد.....وعيدكم مبارك وربنا يحقق الاماني
|
|||||||||||||
|
|
|
09-01-2011, 11:45 AM
|
#3 | ||||||||||
|
خاص بالمغتربين
عيدنا أجمل ــ بالسودان ــ وأجمله في عيون الأطفال بتلك الزينة المترفة والمترعة بالجمال .. كالجبين يرفل حسناً وبهاء يلوي الأعناق بالنظر والفرجة تلامس نسماته الوجوه لتعبر بعمق الوسامة .. عيد عاد وبه كل مقومات الفرح والحبور والعودة للطفولة .. دخول دون أستئذان وولوج دون طرق ولا أطراق .. فرح بدأ عندنا كما أنتهي عند الذين من قبلنا ــ وشجن وأسي تركناه عند الغربة ــ نفرط حتي الشبع في اللحظات القسيمة الوسيمة ونفيض بهجة وحبور لا يصيبنا اليأس ولا يتملكنا الغضب .. أودعناها الآن في دهاليز بعيدة موغلة في البعاد بعيدة المنال والمكان والزمان .. فالوقت من فرح ننهل منه حتي التجشؤ والشبع والارتواء فاللحيظات الآن مبرأة من كل عيب .. الأن غاية همنا النهل من كل الحبور ونؤدي فروض الأوقات السعيدة بكل وقار الصغار نلبسه كباراً ..طموح مشرع للبهجة في كل بيت وكل شارع وكل أبتسامة تغسل كل رهق السنين وعذابات الأيام .. ففي الدواخل ما زلنا أطفال أدبنا الزمان فأحسن تأديبنا وصنفنا بالحسني والرضاء .. وما زالت الأماني طفلة ، ولم يتمرد الليل ولم تتبرج الثريات ولا الثري وما زال اليقين المبارك وصدر مشرع ومنشرح ... الغربة حاااااااااارة وهمها يومي وفي كل لحظة ورغم ذلك نلتزم أدب وموروثات الوطن .. ففرحنا في وجودنا بين أهلنا وناسنا الطيبين ليكون العيد عيدين بل أعياد مع ناس يحترفون الفضيلة ومترعين بساطة ونقاء في سرائرهم ومحياهم .. لم يقتل الحرمان فيهم التوادد والتراحم أثرياء أتقياء أنقياء بقلوبهم الطيبة مفتوحة كشرفة ومنارة تدل التائهين .. يحبون الناس وتحبهم الناس .. ينسون المرارات وليس للخصام سبيل اليهم الما عيد في السودان ـــ والكلام ليك يا منطط عينيك ــ طبعاً كل واحد بتخيل انو هو المقصود .. ما عيد والله .. وفي البال الأعياد في الغربة الصعبة .. لا توجد مقارنة البتة .. كل الأصايل هنا متعسجدة بأطراف السماء ويتخضب لون الأفق ذهباً .. وكل القسمات ممعنة في الجمال والروعة والبهاء وتقاطيع تتسامي في أحتراق نبضات الزمن الجميل .. والله السودان حلو والعيد فيه أجمل .. وأسألوا كل عايد للبلد من الغربة وعيد مع اهلو وكل عام والجميع ــ أينما كانوا ــ بخير وربنا أحقق أماني الجميع وكلنا تامين لامين في وطنا .. وطن يرفل في الامان والرخاء والسلام آآآآآآآآآآآآآآآآآآآآآآآآآ آآآآآمين
|
||||||||||
|
|
|
09-01-2011, 12:59 PM
|
#4 | ||||||
|
زائر
|
خاص بالمغتربين
التحيه ليك استاذ عارف وكل سنه وانت تنعم بهذه الاحاسيس الجميله بين اهلك واحبابك. واكيد (المنطط عيونو) دي انا علي العموم انبسطت جدا لكل هذه المشاعر الجميله واتمني ان الجميع يري العيد بعيونك واتمني ان اكون مخطئه في تصوري الذي لم تعطشه الغربه لتلك المشاعر. وكنت اتمني ان يكون كلامك هذا ردا لموضوع خاص للمغتربين لانه حتما سيكون اضافه له حتي لو ماعجبك كلامي. "رائي خطأ يحتمل الصواب وراي غيري صواب يحتمل الخطأ " واتمني فعلا يكون مافي تغيير في مجتمعاتنا وان يظل كل شئ علي ماكان عليه جميلا . ومره اخري كل سنه وانت طيب |
||||||
|
|
|
09-01-2011, 02:04 PM
|
#5 | ||||||||||||
|
المدير العام
|
والله انا مع كلام أم رهف.... لأنو فعلا بكون إمتداد للموضوع وكلامك سمح تب يا عارف لا بحتاج لتعقيب ولا حاجة
|
||||||||||||
|
|
|
09-01-2011, 03:47 PM
|
#6 | ||||||||||
|
لك التحية أم رهف وكل عام وأنت بخير .. والله بالعكس كلامك جداً جميل وهو الذي حرضني لكتابة هذا الموضوع .. وهو في مكانه .. وأردت أن أوضح مابين السطور والفرق مابين هنا وهناك .. وأظن الكل منطط عيونو .. ولك العتبي .. وعشان ماتزعلي برجو من الاخ عبده تحويل موضوعي كاضافة ورد لموضوع اختنا ام رهف .. وكل عام والجميع بخير ..
|
||||||||||
|
|
|
09-02-2011, 06:30 AM
|
#7 | ||||||
|
زائر
|
التحية ليك الاخت أم رهف المشتاقين ليهو كتير والجرسة حاصله والقصيدة جدا حركت فينى الكتير الكتير وانا بصراحة زول مكسور ضلع فى فطيس شوارعه مدارسه مطرته مشاكله 00 لكن القيد مانعنى وكلمة القيد هذه طبعا تحمل معنين 00 حتى اننا اصبحنا زى الشيخ حياتى وودسعد المادحين وظللت أردد ( متين يافطيس نطول سوقك علي كل يوم يزيد شوقك ) بجد ام رهف القصيدة تذكرة عودة مجانية للبلد نشتم منها ريحة البن فى حوش مرشوش 00 لك التحية |
||||||
|
|
|
09-02-2011, 01:05 PM
|
#8 | ||||||||
|
زائر
|
قد عدت ياعيد والأحباب دونهم مهامةمن ظلام دونها الخطر.... قد عدت ياعيد والذكرى مؤرقة والهجر أثكلها والبين والأثر ..... هل جئت تسأل عن أصداء ضحكتنا !،قد انكرتنا فلا سلوى ولاسمر..... أساهر النجم والآمال غافية "..... ولست أدري أيحي ذكرنا القدر...... ابيت اسأل أيامي وذاكرتي عن بيوت كانت بها الصور........ أين الليالي التي كانت للذتها شراب أنس فلاشكوى ولاضجر..... كنا بها نرتوي والذكر غايتنا نشدو بأنس فلا طول ولاقصر...... ياغربتي..... أيعود الأمس مبتسما" أم أنه سيظل الدهر يستعر...... ليت الليالي التي ولت تعود لنا..... وليت (ليت ) تلبي ليس تعتذر..... .................. ده بلسان مغترب زمان مامغترب مكان!!! يكفينا من عيد هذا الزمان فرحة" نراها في عيون الأطفال وهم يتقافزون فرحا"بملابسهم وألعابهم الجديدة وبكم القروش التي يجمعونها كعيديةمن الأجداد والحبوبات..... ................. وانشالله أعيادكم دايما"عامرةبالفرح والسعادة |
||||||||
|
|
|
09-12-2011, 10:23 AM
|
#9 | ||||||
|
زائر
|
خاص للمغتربين
ياغربه ياغشاشه يابكايه يامستهبله تغرينا بي درهم قروش ووراه قنطار بهدله جيناك نقعد بس سنه وحاجاتنا ناقصه نكمله نبني بيوت في العاصمه ونفرش اثاث اخر حلا وكرولا حاره نرسلها اصلو التنقل مشكله ونكمل الدين بي مهل والسمحه جاهزه نحصله غير القروش للاهل عبر الشهور حانرسله والباقي يدخل في البنوك ونشوف دباره نشغله ناس فكرت تجني العلم وتبدا الدراسه تواصله احلام كتيره وشيقه وامال كبيره مدنكله لكن حسابتنا الغلط في كل عام بنرحله مرت سنين من العمر بنعزها وبنفضلها والحسبه وصلت طاشرات امكن نعيش وندبله وتعال نحاسبك ياوهم من غير رقم او اسئله كان للقروش نجري ونحوش لكن تقول بنشاكله ماراضيه تقعد في الجيوب وتقول حرامي بينشله لكن بترقد في الضهور بي ديون تقيله متلتله ممحوقه مابتقضي الغرض واقل حاجه تكمله كملانه بطحاء وحق وزن ومجاملات مستفحله وضرائب ابعاج المشي والزامي حمدي نحولها واحلامنا ديك صبحت سراب نمشي ونجري مانحصله ياريت اكون هم القروش ياالغربه فيك المعضله لكن تعال شوف الهموم الماافتكرنا نقابله ذله ومهانه واحتقار خل النفوس متململه سجنا كبير فيهو الكفيل سجان قيوده مكبله اشغاله شاقه ومؤلمه ودائما تكون مستعجله امراض كتيره بدت معاك عايزه الفحوص مستعجله مرض الضغط والسكري ومرض القلب ووجع الكلي مصران وقرحه واكتئاب ونفوسنا مامتحمله وبقينا كيمان من لحم جوه الهدوم متندله واكيد يكون اكل المعلب والمجمد عاملا وعدم رياضه وكونديشن لابد يكون ليهم صلا وكمان تعال شوف المعادله الماقدرنا اصلا نعدله سجن العيال جوه الشقق وفراق الاهل والعائله جيب العيال بي جيوبنا مال وجيوبنا غيرو مميله وصغارنا صبحت بالزهج متوحشه ومتجفله لاقادره تلعب في خلا ولا ضل شديره يضللا لاقادره تدرس بي نفس من الدروس المذهله تلقي الولد غالبو الكلام والبت كبيره مريله كل الضغوط سوا ماقدرنا حتي نقلله في كل طرف تلقي القرف تلقي الخيوط متداخله ياغربه اديناك كتير ادينا خاطرك اسهلا خلينا نرجع بالفضل نلحق حياتنا نعدلا امالنا فيك بدري اتنست الا الرجول متوحله وبقينا ذي اهل القبور لا البره عارف يدخلا لا الجوه يرجع لي وره يحكي الحقيقه يوصلا لكن خلاص هان الخلاص عدك نزل مهما علا وان شاءالله نحيا نودعك وتكوني ذكري نغازله ياغربه ياغشاشه يابكايه يامستهبله |
||||||
|
|
|
09-12-2011, 12:13 PM
|
#10 | ||||||
|
زائر
|
خاص للمغتربين
رد علي القصيده الشاعر محمد الزبير محمود عذرا تمهل في الحكم الغربه لاغشاشه لابكايه لامستهبله شطر الكلام ماهو الصواب مايستقيم دون تكمله نصف الذكرتو كلام صحيح كانت ثقافة مرحله الغربه تخطيط منتظم ضبط الحكايه من اولها الغربه ذي موية المطر في الرمله مابتحصله الغربه عايزه مؤهلات تطوير شديد دون ململه الغربه كم ربت يتيم مسحت دميعات ارمله في الغربه ناس تركوا الخمول عرفوا الصلاح درب الصلاة بالغربه ناس فتحت بيوت حفظت صغارا من البلا بالغربه كم حجوا الكبار دفعوا التذاكر في الغلا الغربه كم سندت ضعاف اضحت امورها مسهله بالغربه كم مديون مهان سدد ديونو وحلحلا بالغربه ناس عملت بيوت مفروشه اثاث اخر حلا في الغربه ناس حازت علم طب واقتصاد مع صيدله في الغربه ناس درست فقه حفظوا المتون من اولا الغربه كم دعمت امام شيد مساجد للصلاة الغربه كم زرعت حقول روت العطاشا الفي الخلا قصة عيال جوه البيوت في دا الزمن ماشكله ليه الولد غالبو الكلام والبت كبيره مريله ليه مافي تربيه واهتمام ليه العيال متبهدله لو انت مشغول بالعمل دور الامومه مكمله تهوي السهر نوم النهار خلت عيالها مهمله سوق الدهب ونسات حريم طبعا اكيد ليهم صله علم الشوارع مابيفيد في البيت هوايتو يحصله ضل الشديره ده كان زمان وكت البيوت مترهله كل البيوت صارت شقق مضروبه بوهيه مقفله في البيت في انترنت بجيب كل الخيوط متواصله ليه للقروش تقعد تحوش بالاولويات نزلا رتب حوايجك بي عقل ماتسيبها ماشه سبهلله طور معارفك بانتظام اصلو المنافسه مذهله الواسطه قبل الامتحان مااظن تحل المسأله خلي المجامله في حدود والواجبات مامعضله والغربه منحه من الكريم تستاهلك وتستاهلها بس ابدا بي تخطيط سليم من دون كلل او ململه حصل قطارك مايفوت بي سرعه من غير فرمله سيب اكتئابك والملل كتر دعاك وقت الصلاه فارق الشلل لعب الورق سهر استراحات بطلا اصلو الزمن دوار شديد لحظاتوا ماها مطولا وادعو الكريم ساعة السحور للمعضلات يسهلا بس حسن اعمالك كمان بي نيه صافيه من اولا تلقي المراد يوم الحصاد كل المحطات توصلا... شاركنا برائك انت مع القصيده ام مع رد القصيده؟؟ |
||||||
|
|
 |
|
|
 |
 |
 |
Linear Mode
