[نضال احمد]

يعيقك الله يا مجرم
وكيف اسع تسرقني
وتسرقك بطنك ان شاءالله وتخليك ديمة متألم
حضيري ان شاءالله يبراكا وفلساً للجيوب يخدم
والعطش اليحرق الجوف يخلي الفقراء قايمي وقاعدي ليك تعزم
تعيقني انا...
يعيقك الله يامجرم وبي مدفع كلاشنكوف يواليك في المسيمع عاد
يخليك لا سمع لا شوف
يجيكا عميل من السوفيت مرسله ليك قورباتشوف
شايل حقنة حارقة معاه يحرق ليك قلبك وكبدك وحتى المعدة والشرشوف
تعيقني انا ..
يمين بالله لو سألوك نان عميان من الاسواق ..
تسوق اروتّي في ساقي تورها يقطع الخنّاق
تسوق ليك داف تدقشه ترلة في عقبة يخليك لا ضهر لا ساق
نان بالله لو سألوك ماتعرف القروش بي وين..
ناس بانين عمارات كيف وناس راحات وناس تخزين
حكمت تجيني انا المسكين البلقط بي قرش وقرشين
تقرشك عقرباً تلقاك فوق الريق يكون جسمك مرطب تب ..
تقرشك عاد سموم الصيف تخلي وشيك قائم حب
وِقرْشاً يبلعك يسرِع يلف بى جدة و الصومال و يجيبك لينا تانى هنا
ويرميك فى الرصيف بيجاى ويسلب لحمك الفوقك يخليك بس عضام و عصب
تعيقني انا ..
تطرشق لي برنامج اخطط فيه ليّ سنين
يطرشق فيك كمبرسون يخليك انت بس ساردين
ويطرشق فيك بوتجازاً يكون جنبك صفيح بنزين
وترقد ما نشوفلنا زول يقولنا ماشي في تحسين
تعيقني انا ...
كمان تسرق ملاياتي المن كيسها ما انفكت
ولا عارف نقوشن كيف
يفكك مننا الله اليوم قبل باكر
يخليك لافّي صيف وخريف
يفك ضلعك تفارق عقلك تسك الماشي فوق عدلك
زي جملاً غشاه الزيف
تعيقني انا ...
نفسك فاتحة ترقد فوق ملاياتي ؟؟
ترقد يابا في عنبر نصيحه يشابي كايس ايده
ترقد يابا في قبراً اعوذ بي ربي من هوله وعذاب سيده
ترقد يابا في غرفة تكون مفروشة بالصُرفة ونملها يخمو بالقفة
لا تشوف جنّة بي عينك ولا بي العتبة تتعتّب
عشان عملك تملّي كعب
تسرق الجيب تسوي العيب
انت حرامي ود .......