بلادي أنا بلاد ناسا" مواريثهم كتاب الله حصان مسروج وسيف مسنون حداه درع كتاتيبهم تسرج الليل مع الحيران وشيخا"في الخلاوي ورع وكم نخلات تهبهب في جروف الساق وبقرة حلوبة تتضرع وليهاضرع بلادي أنا تشيل الناس وكل الناس وساع بي حيلا وليلا يسع وتتدفق مياه النيل على الوديان بياض الفضة في وهج الهجير بيشع بلادي سهول بلادي حقول بلادي الجنة للشافوها أو لي البرة بيها سمع بلادي انا بلاد ناسا" تكرم الضيف وحتى الطير يجيها جعان ومن أطراف تكيها شبع...
بلادي انا بلاد الصفقة والطنبور وجاراتا"تنق بالليل وبنوتا"تحاكي الخيل يشابن زي حدي الريل بلادي امان وناسا حنان يكفكوا دمعة الموجوع وبيدوا الغير على زاتهم يقسموا اللقمة بيناتم ويدوا الزاد حتى ان كان مصيرهم جوع يحبو الجار يموتو عشان حقوق الجار
يضوقوا النار عشان فد دمعة وكيف الحال لوشافوها سايلة دموع ديل أهلي البقيف في الدارة وسط الدارة وأقول للدنيا ديل أهلي عرب ممزوجة بي دم الزنوج الحارة ديل أهلي ودي قبيلتي لمن أدور أفصل لي البدور فصلي أقول بعضي
الاقيهم تسربوا في مسارب الروح بقوا كلي الاقي قلبي والاحساس سافر في بحار شوقهم زمان عقلي محل قبلت القاهم معاي زي ضلي انا لوماجيت من ناس ديل كان وآ أسفاي ومآساتي وا ذلي تصور كيف يكون الحال لوماكنت سوداني وأهل الحارة ما أهلي ! ‎