د.عادل الصادق المكى - الباب البجيب الريح
عيـــد الدلاليـك
.من د.عادل الصادق المكى - الباب البجيب الريح في 03 سبتمبر، 2011، الساعة 11:53 مساءً.
زيي وزي اي مواطن سوداني.... العيد وهدوم العيد شالت الوارهو والقدامو.... وبقى حبيس البيت... خاتي علبة الحلاوة وشيالة الكعك قدامو وحارسها يجي زول يبارك العيد... ويشيل منها ويمشي... وارجع اشيل الريموت..واقعد اعاين للقنوات السودانية... غايتو السنة دي ناس القنوات نبحو الدلوكة نبيح شديد وشالو حسها.:-
-..... في قناة امدرمان نادية عثمان مختار وسمية حسن جابن دلوكتن...ومعاهن شيالات... لكن بصراحة يا سمية دلوكتكن انتي وبناتك مطرطرة... ودايرة تتحمس في النار شوية.... ناس امدرمان ديل ..خلاص طفو نارهم واللا شنو؟....
-افوت ناس امدرمان امشي علي قناة قوون القى الجقر جايب دلوكتو برضو..وجايب معاهو دلوكيات... واحدة فيهن.لابسة ليها خاتم قندول عيش في اصبع ايدها العيسرا من الله خلقني ما شفت لي خاتم قدر دا... وتهبد في الدلوكة... دق الدلوكة وهبدها ما هاميني كتير مع اني متعاطف معاها.... قعدت اعاين في النصيبة الزي الكعكول اللابساها المرا في اصبعها.... وبصراحة شلت هم لي اي زول تنشبك فيهو... اقل نضم بُنية في نخرتو ويرعف ودمو يصفا....
_ ناس النيل اللزرق برضو ..دلاليك وهيصة... لكن بصراحة كدي وصلاتي علي النبي وعيني باردة...ما لاقتني دقاقة دلوكة ضعيفة في القنوات دي كلها....كل واحدة تقول للتانية زحي غادي.... ما بعرفن دخلن من خشم باب التلفزيون كيفن؟ يكونو اتناولهن بالحيطة؟.... الواحدة فيهن مليانة دهب وكوليسترول ومالية الشاشة...ولما البرنامج ينتهي..التلفزيون يشهود ويقول( لا اله الا الله محمد رسول الله النسوان ما قطعن ضهري.... آآآآآآح الحمد لله! هم ونزل)...
_ ما زال مقدمي البرامج مصريّن يجو بي عكاكيزهم و يقابلونا.... تلفزبون الخرتوم.... اول مرة اشاهدو واشاهد فيهو برنامج ، مقدم البرنامج وضيفو كل واحد بي عكازو... مقدم البرنامج ما شايل عصاية كريزة لزوم القيافة ..لا..لا شايل ليهو عود راسو عديل كدي( جار عودو)....والله لما شفتو قلت يا ربي الاستديو دا دخلو كلب والزول دا شال عودو دا عليهو ..وسكاهو؟.... انا ما عارف ناس الهدف الفي خشم باب التلفزيون ديل بيخلو الناس دي تدخل بي عكاكيزها كيفن؟... المحيرني ترباس ما عندو عكاز.... حقو يسعى ليهو عكاز ويغني لينا(انت المهم...و حرم الناس جميع ما بهموني....وان كترتا قللتا انت زاااااااتك ما بتهمني..هيع).......!!
_ ولد سيد خليفة برضو جا واحدة من القنوات دي لافح عودو ويبشتن في غنا ابوهو....وبعدين دقو للعود كعب واشتر...كدي يا ولدي اديني اضانك دايرك في نضم سر:- انت يا ولدي ما سمعت بي بر الوالدين؟.... عليك الله بر ابوك دا، وما تغني ليهو تاني... سمح؟؟؟
قفل الباب:-
لّما رأيتُ الوردَ في خديكِ
وشقائق النعمانِ في شفتيكِ
ونشقتُ من فوديكِ ندّاً عاطراً
لما مشتْ كفاكِ في فوديكِ
وسمعتُ حولكِ همسَ أرواحِ الصبا
عند الصباحِ تهزُّ من عطفيكِ
أيقنتُ أنَّكِ جنةٌ خلاَّبةٌ
فحننتُ من بعدِ المشيبِ إليكِ
منقول جداً جداً
|