[عارف عبد الرحمن]

العنوان لأخونا عبده نورين .. وتذكرت موضوعه بنفس هذا العنوان وانا أتصفح جريدة قوون ووجدت هذا الموضوع الشيق

{ مرة كان عندنا عرس.

{ زمان وقت يكون في عرس ..بتسمع ناس يقولوا ليك اهم حاجة تحجز (التلج) من بدري.

{ تقول البلد فيها مشكلة (تلج).

{ ما عارف اهمية (التلج) شنو في المناسبات.

{ يمكن عشان الناس بخافوا من (الموية الحارة).

{ العرس البتكون مويتو (سخنة)...الناس بشيلوا فيه حال (العريس).

{ عشان كدا (العريس) المفتح بكون ليه (تيم) قوي يتابع موضوع (الموية الباردة).

{ ناس مهمتها في الدنيا دي (يتموا الناقصة).

{ الابريق (المطرف) بجيبوا.

{ البرميل البنقص...يتمو.

{ التلج البقطع بلحقوا.

{ زمان كان بتحصل حاجات غريبة في الاعراس.

{ بيت العرس من قبل 6 شهور بتعرفو.

{ هسع بيت العرس (دلوكة) ما فيه.

{ تقول عاوزين يعرسوا في (السر).

{ العروس تشوفها في النادي ...والعريس تاني يوم تلقي قاعد في الشغل.

{ حنة ما ظاهرة فيه.

{ المهم دا هسع ما موضوعنا.

{ مرة كان عندنا عرس.

{ الحلة كلها تتكلم عن ..الحفلة بي منو؟.

{ زمان كانت في تقليعة بالشكل دا.

{ وكان ناس العريس والعروسة ما بتكلموا عن الفنان الذي سوف يحي الحفلة.

{ أي واحد تسألو من اهل العريس...يقول ليك ..والله نحن الموضوع دا ما عارفين عنو أي حاجة...نحن حدنا (الحنة).

{ تمشي تسأل اهل العروس وتقول ليهم (حفلتكم بي منو)...اهل العروس يقولوا ليك ...نحن فنان الحفلة عاملنو (مفاجأة).

{ نظام شنو؟.

{ نظام ما بتكلموا.

{ في ناس كدا (الغتة) عندهم كبيرة ...الفنان لمن ينتهي من الفاصل الاول ما بتعرفو منو.

{ فنانين الزمن دا ما بتعرفوا من (الكترة).

{ الحفلة تلقي فيها (الفنانين) اكتر من الجمهور.

{ والله مفروض (الفيفا) تدخل في الحتة دي.

{ مفروض يحسموا لينا الموضوع دا.

{ والله (الفيفا) دي لو دخلت في أي حاجة تنظمها لينا.

{ مفروض يدخلوا لينا في حركة المرور.

{ وفي تصاريف الخريف.

{ اصلو الجماعة ديل ما بخافوا إلا من (الفيفا).

{ هسع دا ما موضوعنا.

{ موضوعنا حفلة العرس.

{ مشينا الحفلة ...وكلنا (عيونا) فوق حواجبنا.

{ كلنا عاوزين نعرف الحفلة بي منو؟.

{ جابوا لينا (العشا) ...ما اشتغلنا بيه كتير.

{ لكن طبعا في ناس ما بسكتوا.

{ في ناس طبعهم كعب.

{ بشيلوا حال العريس.

{ يا ولد تعال هنا ...(الصحن) دا ما فيه (باسطة).

{ يا ولد تعال هنا نادي لينا خال العروسة ..الصحن دا ما فيه (جبنة).

{ ام العروس وين؟...الصحن دا ما فيه (زيتونة).

{ يمكن يحصل طلاق عديل في موضوع (الزيتونة) دي.

{ ضرب.

{ الدم حدو الركب.

{ عليكم الله هسع دا صحن بشبع ليه زول.

{ الصحن زي (مقياس الرسم).

{ من أي حاجة فيه عينة.

{ شمومة بس.

{ المهم موضوع العشا انتهي.

{ اتفتح لينا موضوع (البارد).

{ عماتك ديل ما شربن (البارد).

{ الموضوع دا طبعا متزامن مع اول يوم في رمضان ...عشان كدا موضوع البارد والعشا دا اكيد بكون (بضايقكم).

{ والعجب لو جبت ليكم في العمود دا (شاي)...او (قهوة).

{ بتجرسوا...عارفكم انا.

{ انتهي موضوع البارد ...(الكلام دا في الحفلة طبعا).

{ اتفتح موضوع ...(الحفلة بي منو؟).

{ انت يا جني الجماعة ديل جايبين منو؟.

{ يكونوا جايبين (اللحو)...حفلات الجعليين اصلها كلها باللحو.

{ من تلقي علي اللحو بغني في (الكنينة)...اعرف طوالي العريس (جعلي).

{ لكن الجماعة ديل ...عشاهم كعب ...عشاهم ما شايل نفسو...اللحو ما بغني ليهم.

{ علي اللحو ما بغني في حفلة (ما شايلة نفسها).

{ العشا لو ما فيه (ضلع)...اللحو ما بغني فيه.

{ واحد يطلع ليه من ركن ...شايل ليه (كاميرا).

{ نظام أي حاجة بوثقها.

{ نحن أي حاجة عندنا بالتوثيق.

{ الزول ابو كاميرا دا ...بقول : الحفلة بي (سيف الجامعة).

{ العريس عندو صاحبو بعرف سيف الجامعة.

{ يعني أي عريس عندو صاحبو بعرف سيف الجامعة ...ح يجيب سيف الجامعة للعرس.

{ يا جماعة دا كلام شنو؟.

{ المهم الناس بتتكلم كدا...(الفنان) ظهر.

{ دا منو؟.

{ دا من (نجوم الغد)...وإلا من (اغاني واغاني).

{ اول مرة نشوف الفنان دا.

{ احتمال يكون (سرور).

{ يا زول سرور رحل من الدنيا دي من الاربعينات.

{ طيب دا منو؟.

{ يكون الامين برهان.

{ الامين برهان رحل في نفس السنة الرحل فيها سرور...الغريب كرومة ذاتو رحل معاهم.

{ يعني الثلاثة ديل رحلوا في سنة واحدة.

{ طيب الفنان دا منو؟.

{ كدا ننتظر الفنان دا يغني ...بعد ما يغني بنعرفو منو؟.

{ لكن الفنان دا ظاهر عليه فنان صيني.

{ الصينيين كتروا في البلد دي.

{ والله انا خايف (العريس) ذاتو يكون صيني.

{ لكن الفنان الصيني دا عاوز يغني لينا شنو؟.

{ حفلتكم دي العاوز يقعد فيها منو؟.

{ حفلة بي فنان صيني ليه ...(كارتية) هي.

{ نحن ناقصين.

{ شوية كدا ...الفنان الصيني دا طلع المسرح.

{ الجماعة كلهم قعدوا يصفقوا.

{ نحن موقفنا بقي شين...نحن ذاتو قعدنا نصفق.

{ نعمل شنو يعني؟.

{ لو ما صفقنا بقولوا (حاقدين).

{ الزمن دي كلمة (حاقد) بتسمعها في أي مكان.

{ لو ضربت جرس الباب شديد بقولوا عليك (حاقد) عشان ما عندكم (جرس) بالمستوي دا.

{ هسع الجرس ذنبو شنو؟.

{ الفنان الصيني مسك المايك ...والفرقة حقتو عملت مقدمة موسيقية.

{ مقدمة طويلة بشكل...تقول مقدمة ابن خلدون.

{ النسوان الكبار ناموا.

{ انا ذاتي ما عارف النسوان الكبار ديل البجيبهن الحفلة شنو؟.

{ بس فالحين يقوموا (الاولاد) من كراسيهم.

{ يا ولد قوم لي (عمتك).

{ عمتي البجيبها الحفلة شنو؟.

{ ما في داعي تحضر ليها حفلة.

{ الفنان الصيني قالوا اسمو (كونغ).

{ كونغ دا وقت دخل ليك في الاغنية الاولي ..ما فهمنا منو أي حاجة.

{ كونغ قعد يغني (كربتي شاويا ..لاو يا كولدا).

{ قلنا ليهم دي شنو دي كمان؟.

{ قالوا لينا دي من اغاني (الحقيبة) في الصين.

{ ناس الصين كمان عندهم (حقيبة).

{ انا قايل (الحقيبة) دي حقتنا برانا.

{ عشان كدا الصينيين ديل حايمين في شارع عبيد ختم بي عين قوية.

{ الجعليين طبعا الاغنية الاولي دا ما عجبتهم.

{ الجعليين ديل عاوزين اغنية (يدقوا) فيها.

{ ما معقول جعلي يدق في اغنية حقيبة (صينية).

{ كونغ بعد الاغنية الاولي دخل في اغنية ...(شولوتي كاتي بان هاو)...قلنا دي شنو كمان؟.

{ قالوا لينا دي (الطير المهاجر) بتاعة الصين.

{ عرفنا ناس الصين عندهم (اغاني حقيبة)...ناس الصين كمان عندهم (الطير المهاجر).

{ والله يا كونغ (وردي) يسمعك بتغني في (الطير المهاجر) يقومك من البلد.

{ يفتح فيك تصريحات لما تفهم حاجة.

{ غايتو ناس الصين ديل عندهم جنس (طير مهاجر).

{ شوية كدا كونغ دخل ليك في (ترناما ملوايا شولتي فات).

{ دي شنو كمان؟.

{ قالوا لينا دي (عشة صغيرة).

{ يا جماعة ..معقولة الجماعة ديل عندهم برضو (عشة صغيرة).

{ برضو عندهم (بلابل).

{ نحن قايلين الموضوع (بترول) فقط.

{ دا الموضوع كبر اوي.

{ اوي ..اوي ..اوي.

{ كونغ بعد شوية غني لينا (شنغري فاوسا)...ناس الركشات ..ناس الامجاد ...ناس الحفلات كلهم نزلوا الدارة.

{ قلنا دي اغنية شنو؟.

{ قالوا لينا دي اغنية (تقوم بينا العربية).

{ تقوم بينا العربية كمان وصلت الصين.

{ واحد من الجعليين الموضوع دا ما عجبو.

{ كتب ليه ورقة للفنان كونغ ومررها ليه.

{ الجعلي كتب لي كونغ الاتي ...(سوروتي كمانغ ساونغ)..يعني سخن لينا الحفلة شوية ...غني لينا اغنية حماسة.

{ كونغ ما كذب دخل ليك في (توربتي كونوتي لاو شونغ).

{ الاغنية دي يا جماعة هي اغنية (سمعنا لينا خبر في الهلالية خمستاشر جواد سكن خمسمائة).

{ لكن انتوا فاكرين بعد الاغنية دي في جعلي قعد.

{ الجعليين ديل كلهم دخلوا الدارة.

{ اشمعنا يا جعليين فهمتوا الاغنية دا.

{ قبيل ما كنتوا عاملين فيها ما فاهمين.