(18)
أها يا الزينين ...
مشيت علي بيتنا لقيت الدنيي صاني...
الاتغدى اتغدى والاخدلو تكيي اتكى..
دخلت علي الصالون وفتحت الدولاب ماني عارف محل اخت المنديل وين...
غتستو وسط العراريق وبي كدي ضمان مافي زول حا يجي يلفحو...
لأنه القمصان بيتلفحِن... أخير العراريق مافي زول شغالبهن...
اخدتلي حمام ومشيت علي أمي (رحمها الله) في التُكُل لقيتها تحسب في قروش الختي (الصندوق)...
- كدي جيبلك ورقي وقلم تعال سجلي النسوان الدفعن من الما دفعن...
- والله يمة جننتينا بي ختتك دي....
- يا ولد أنا أصلي علمتك لي شنو...
- هسا انا قرايتي كلها لي ختتك دي... كان كدي القراييي تطير...
- (تضحك) عليك الله يا ولدي ما تكتر الحِجي... وخلي اللّت والعجِن دة..
- سمح...
- اكتب: أم النصر (رحمها الله) دفعت
حسنة مرت علي دفعت
خادم الله قالت بتجيبن بكرة باقي الأيام دي مزنوقي في عرس ولدها
بت حاج طه قالت لي دفعت وانا قلتلا لا كدي خلها لا بعدين لامن نحسب القروش
حاجة مدينة دفعت
- دي مالك ما نقنقتي فيها عشان صاحبتك
- أقولك شي أكتب وقوم شوف أصحابك علي برة ما تغلِبني..
- أها....
- اكتب: فطين (رحمها الله) يا ربي جابتن... أيي رسلتن قبيل مع البعيو
رقية بت أبنعوف دفعت
حواء بت الطريف دفعت
نفيسة السمحة قالت عندها أوضة زنكيها يكُب دايري تصلها لكن بتجيبن باكر
فاطنة الجعليي....
- هسا يمة إنت كان قريتي ما كان ريحتينا...
- يا ولدي الله لا تجعلها ندمِي أمي الله يرحمها حمتني... يمين إن كان قريت أبوك مافاضي فيهو...
- إيييي كيفن الكلام دة..
- أبوك وصل الوسطى مجننا... يمين إن كان قريت سلام الله ما أديهو ليهو....
- أريتك يمة كان قريتي... كان الليلي نجدتيني...
- مالك آآآوليدي... أوع تقولي عايز تغبا غبا عوض...
- لاني عايز أغبا لا شيتين.... أنا قلبي من بعد صلاة الجمعة حشيتو بي منجل...
- يا ولد إنت مالك وشك دة ما ياهو.... الفي شنو...
- يمة مافي شي... إنت يمة عرستي أبوي دة كيفن...
- إنت الليلي مالك ماك نصيح...
- عليك الله قولي... خصمتك بالنبي...
- يا ولدي كيفن تخصمني بالنبي... أبوك كان صاحب أخوي محمد (رحمه الله)
جاء قال عايزني... كلموني... بعد شهرين عقدولنا ومشيت قعدت معاهو عند ناس جدك
- يعني لا حب لا شيتين...
- إييي حباك برص حب شنو... في شهرين حق الله بق الله لقيت نفسي متزوجي...
- والله يمة سوري ليك يعني لكن حياتك ضايعي...
- هي ضاعت من هسي ياولدي... الله يغتيكم ويحفظكم شي تاني آآآبعرفوا...
- يا ولد إنت نضميك مالو كُتور... باقيلي حبيت عند نسابت عوض...
........
كضاب إن قلتلك لا... كضاب إن قلتلك البنيي ما بتتراد....
وحاتك يمة المغسي كاتلاني والعبرِي واقفالي في حلقي...
أنا عايز أعوعي رسمي...
ما بعرف ليه اتذكرت حبوبتي نفيسي بت بُغداد (رحمها الله)... كان العايزة تسوي... تسوي...
يوم في البركل نزلتها من فوق وقعدت وسط الرجال أندادها وقالتلي جيبلي سجاري
وأملالي الحُقي دي من دكان العوضابي... صعوطو سمح...
لامن جيت لقيت عم عوض السيد كنيش (الله يرحمه) ميت من الضحك: قُلتي كيفن آآنفيسي الله لا تكسبك
- قلتلك جيت مندَلي لا تحت ماشي أجيبلي برسيم للنعاج لقيت ود عمكم نازل سلمت عليهو وقلتلو:
إنت مرتك ماتت ليها سني بقيت تحد متل النسوان كمان...
ضحك قالي عندك لي عروس...
قلتلو: أنا مالي ماك شايفني ما بتعرَس (تضحك)...
- الله لا تكسبك... أها (يضحك).
- قالي تعرسيني يا نفيسي...
- قلتلو الكلام لا يبقى ضُراط... هسا بمشي أكلم أبوي بس بعدين لا تنط...
- الله يقلعك يا الخرابة... أها...
- قالي كلميهو... مشيت لقيت أبوي يحفرلو تحت تمرايي وقتلو:
يابة ود ناس الطيب قال دايرني دحين نجض معاهو الكلام بعد صلاة العشا وحديثك لا يبقى ني...
ضحك وقالي سمح... وأنا طالعي قابلت ود عمكم وقلتلو الكلام لا يبقى فسو ساكت أبوي كلمته..
- الخرابة أتاريك قاهري....
- والله يا عوض السيد أتاوق لي جية أبوي والعشي بقالي طويل خلاص... لامن جاء سألتو
قالي: الكلام طلع صِح أها شن قولك
وحاتك فقعتلي زغروتي لامن حسي إنقرش وعرستو ومليتلو البيت بُطان...
- الله يقلعك... قهرتيهو لامن مات....
- إيييي موتو أجلو... العرس ما قاعد يكتلو زول...
رحمة عليك يا نفيسي... هسا أنا إن بقيت سويت زيك كدي مالووووووو؟؟؟؟؟