[عبدالمنعم]

(15)

ضربنا يا الحبان الوليمي الزيني دي...
رجعنا تاني للاوضة الكنا قاعدين فيها...
وجابوا الشاي وريحة القرفة والهبهان ما تديك الدرب...
عوض قالهم طارق ما قاعد يشرب شاي... جابولي كبايي ألت عصير منقي..
راس الكبايي فيهو شيتا محَترَب كدي وملون علي الصنفرة... وأنا بشرب في العصير
أختلي منه ضُوقي فيه.. لقيتو سكر... قادر الله... ودة ضرضروهو في زيق الكُبايي دي كيفن ماني عارف..
- خالة البنيي: يا طارق البنات ديل قالن انتو اكلكم مختلف عن حقنا...
- إييي أكل شنو... هو نحن عايشين.... نحن مانا في كله كله.... جملة الإيمان نحن مانا عايشين... النبي فوقك خليني ساكت
- كيف ياخي انا مشيت شفت بيوتكم وعيشتكم والله زي العجب...
- نحمد الله... نحن نقدر نقول شي غير نحمد الله...
الغايزني وفاقع مرارتي عوض قاعد يتونس تحت تحت مع جكسيهو... ومرة مرة تضربو في يدو
الزول الدُمق دة قاعد يقولها في شنو ولا العاجبها فيهو شنو... شئ يعلم به الله...
شويي جات داخلة الخرابة المغتغتي ديك... والله يا الحبان عندها أكل غريب خلاص
تشيل اللُقمي وتدخلها من تحت (الشملي) الدارعاها فوق راسها وتاكل... يمين بس فيل...
- السلام عليكم
- أنا ما برد على النسوان....
النسوَّان ديل انفقعن ضحك...
- ياخي أنا قلت ليك الجمعة الجاية بنتناقش..
- يا زولة هوووي أنا ماني فاضي لي جنس حديثك دة وحاجة واحدة العارفها... الدين يسر وبس..
أم البنيي اتوهططلها في كرسي مطرف بعيد كدي وتشوف فينا... باقيلي عندها فهم
ولا كمان مستغربة في بتها البتحب الطُلبة دة...
شويتين الحريم شربن شاين وبدن ينزرقن لا جوة واحدة وراء التانية...
جكس عوض قامت وقالت لي عوض تعال عايزاك ودخلوا لا جوة...
- خالة البني: عن اذنك يا دكتور عندي قطيعة مع اختي دي... اتونس مع سحر دي بجيكم هسا...
- سمح.... يا ود الكرسني...
البنيي صنقرتلها في كرسي قدامي وما خلتلي طريقي لا أتلفت هني لا هني... وحاتكم بقيت زي البتفرجلي في
كورة تنس عيوني يمشن لي قعر الأوضة من اليمين ويرجعن تاني للشمال ووقتين اقابل عيونها في النص لامن أتنهد..
- شنو يا دكترة إنت حا تسكت كدة كتير..
- ياخي هي ونستي شن طعمها.... أنا كل البعرفه الطوب والأسمنت والرملة وهسا كمان الأرانب والجداد والبقر..
- ممكن أسألك سؤال؟؟؟
- أتفضلي...
- إنت مرتبط...
يا ود حسونة تفكني الليلي...
- طيب خليني اعكس السؤال إنت مرتبطة؟؟؟
- لا... ليه؟؟؟
- يمين أولاد أهلك ديل الكتاحة في خشمهم...
- ليه يعني؟؟؟
- يعني أنت زولة سمحة وفيك كل المواصفات الممكن يتمناها أي راجل وأولاد أهلك ديل ما شاء الله مرتاحين
يعني ما ناقصهم إلا يفاتحوك... و...
- يعني إنت ما مهم عندك أنا أكون عايزة واحد من أولاد أهلي ولا لا....
- لا طبعا دة حقك... بس الله عرفوهو بالعقل..
- ياخي أنا من حقي اختار الزول الانا عايزة اعيش معاهو حياتي ولا شنو
- أكيد .. أكيد...
- بس أنت ما جاوبتني..
- والله أنا ما مرتبط... في حالتنا دي الارتباط صعب جدا...
- ليه يعني إنت فرقك من عوض شنو؟؟؟
- مافي أي فرق.. الظروف ياها نفسها... بس عوض مقامر شوية...
- يعني إنت ما مقتنع بالخطوة العملها ولا شنو...
- شوفي عوض بيحب أختك شديد.. وشايف إنه حياته كلها متوقفة على قصة نجاح حبهم
وهو اتصرف على هذا الأساس... بس أنا شايف الطريق طويل وظروف عوض تختلف تماما
عن ظروفكم هنا... ياخي نحن عندنا حِلِم واحد من ولدونا... نقرأ ونتخرج ونشتغل عشان نشيل أهلنا...
- ما ممكن تعملوا الاتنين مع بعض...
- صعب... صعب شديد...
يمين يا الحبان البت دي عيونها فيها كمية من الحزن تحير عديل...
- يعني انت ما عندك عزيمة عوض
- أنا اختلافي مع عوض... انا بشوف الواقع وببني عليهو حاجاتي..
والله يا الزينين بقيت كلي ماشي موية رغم انه صوت المكيف مالي الدنيا...
والبنيي القدامي دي وحات الله الما يريدها يبقى غبيان... علي العقل
بيقول الريدي دي محكوم عليها بالموت... ماني عايز اتشعلق زي صاحبي...
- دقيقة وبرجع ليك..
البت جات شايلالي منديلا سمح كدي ومطرز: من زمان كان نفسي أديك المنديل... وما تسألني ليه..
والله يا الحبان وقفت علي طولي وشلت المنديل منها وعيوني جن في عيونها...
وحاتكم كنت عايز اكورك باعلى صوت عندي: وووووووب ... وووووووب... ووووووووبين علي...

نواصل.......