[عبدالمنعم]

(14)

ماني عارف... بس أنا باقيلي الناس ديل شايفننا أرقوزات...

اتونست معانا خالة البنية ودخلت لا جوة...

انا فشان اتفكى من الزرزير وقعتلي الخرابة المغتغتة دي في جرح...

وبيني وبينكم أنا عايز احاججها لامن الفطور يطلع ونمرق سالمين من هِني...

- هسا إنت شايفة سلامك لينا حرام...

- يعني غير مستحب...

- شوفي أنا ماني الشعراوي... بس أفشوا السلام بينكم...

- دة حديث في غير موضعه...

- إييي موضع شنو... سلام عليكم وحق الله بق الله دايرة تدخلك جهنم..

- ياخي انت بتبسط الأشياء بشكل غريب ومن غير أسانيد...

- ياخي ما تقعدي تحوقصي شي... وتمرقيلنا في الكلام الغلاد دة..

دحين سلامك علينا لاهو داير يغنينا ولاهو بيدخلك مع أبو لهب...

- شوف الجمعة الجاية إن شاء الله نخصصها للنقاش دة...

- يا سيدي الحسن هي فيها جمعة جاييي... أخير زرزيرنا...

جملة الإيمان عوض دة فقعلو ضحكة سنيني زي طير السُقدِي لامن صنا أضاني...

- يا طارق ياخي انت ما عندك منطق...

- إييي منطق شنو... يا سحر عليك الله هَوِّينا وعوض صاحبي دة إن بقى جاع شديد

يمين بطنو تقعد تكورك واغ ويغ بس الشافع الماسكلو حنبوكة يبعبص فيها...

دحين أمك دي شايفلي نسوان منفخات كدي دخلن معاها لي جوة لا يبقى حَتَّلَن اللحم الفي الحلة كله...

- (ضاحكة بشدة) يا دكتور ما تخاف إنت بس تأمر وكل العايزو بنعملوا ليك...

إنتو نظامكم كيف في الفطور... يعني سلطة أول وبعداك المين دش...

- المين دش... قادر الله... شوفي يا بت الحلال هِن أصلهن صنفين مافي غيرِن..

إما قراصي وحولينا بصلا أخدر... وتسمعي في القَرَشي: كُرُم كُرُم... قرَش قرَش علي عجلات القطر

لامن السكة تكون ملياني رملة والعجلات يضرُسن فيها...

وكمان إن بقى فول بي زيتو تسمعي في الجلَق جُلُغ جلَق جُلُغ بس متل الدلو لامن يقع في البير....

تقومي تقوليلي المين دش...

والله يا الحبان البت دي ضحكتلها جنس ضحكا يمين دموعها جرن... والله بسألني

الدمعايي تنقط زي عسل خشم القربة لامن يصفوهو... موش زي دموع عوض زي اللبخة

لامن تقطعلك منها وَرَقي...

- خلاص يا دكترة نستعجل الفطور وبعدين نتونس...

- أنا الونسة دي ياها ذاتا الخايف منها...

- كيف...

- لا مافي شي، بس شوفيلنا الفطور دة...

اخدنالنا حنكين مع جكس عوض ونادونا للصُفرة....

عوض جكسيهو ساقو من يده وقدمو وانا خالة البنيي جات مسكتني من يدي:

- إنت البنات ديل كنت بتقولهن في شنو لامن جن يضحكن كدي

- والله ونسة عادية...

دخلنا يا الحبات على الصفرة ... قادر الله... دة الكلام... الطربيزة ملياني...

في الأطراف كدي صحانة صغار كدي علي صفق المنقة فيهن زيتون أسود وشيتا

أبيض ملولو كدي علي عِمَمْ سواقين اللواري قالوا اسمه الجبنة المضفرة... وبيناتن

صحانة فيهن سلطة خضراء وفي الاطراف سُباتة فيهن العيش... وفي النص لحمة

مكبورة وتلاتة سراويس مليانات شيي من الله خلقني ما شفت زيها... لحما مدخلنوا

في عيدات ألات خشب كدي وزانقنه في بعضو بي بصل كدي بس رُكاب قطر كريمة

في الدرجة التالتة وشنط المنقة والبلح بيناتم... صلاتي علي محمد... المهم شي سلطة أسود

وحاجات تاني لي هسا ماني عارفها شنو...

أول ما قعدنا عشان ناكل عوض شال ليهو زيتونة وعاين لي وضحك... خالة البنيي حلفت

إلا تعرف عوض ضحك ليه... قام قالها خلي طارق يحكيلك...

- شكيتك علي الله... أنا عارف نفسي جيت معاك أرقوز... شوفوا يا الحبان

عندي عمة لي اسمها أم الخير كان عندها ولد بيحضر برة لمن جاء جاب معاهو زيتون...

قامت عمتي قالتلو: مُحمد إنت دة شنو المُر دة...

- يمة دة الزيتون أكل أهل الجنة...

- نان بعدين واااحناضلنا...

كأنها ضمنت الجنة خلاص...


نواصل....