إهدا إلى أجبتي أصحاب البوست
وشعراء العسل الصافي 100%


يا عابرة مشتاق للبــــلد
شوق الغفار الجافة لي صوت الرعـد
للروعة في أيام زمان وشليل وشـد
للوقفة فوق درب الورود والصيــد ورد
لي زول يدودر للشراك في قينقرد
يدعوها يابت الملوك بحرك شـرد
لي صوت حنون بينادي في صبح السعد
ماتصحا يا زين الجنيات شايك بـرد
حبل الصلات البينا أقوي من المسد
لولا مناشير المشايخ والعمد
فجعوني في ريدي القديم لما إتفقد
يوم فقدو كان يوماً عجيب هزاني جد
باعوهو لي زولاً غريب شالو وشرد
خلاني في غمرة شقايا بلاسند
حسيت إني فقد هنايا إلي الأبد
في لحظة عِن ساعة الصفاح لُمان عَقد
طارت سحايب أحزاني بالشوق والكمد
غطت سماي الفيهو نجمات بالعدد
الحالة ياست العيون مابتنشرح مهما سرد
يعلمبها الرافع سماهو بلا عَمد
عالم الغيوب الخمسة بي جاهو إتفرد
الباسط الباري البديع صادق الوعد
قلبي الوراك أنفق سنين ماليها حد
رحالة فوق جمل الهجين طالبو الأمد
وآخر كلام ياعابرة قدامك ولد
راييو الأخير الموت ولا العيشي النكد