[عبدالمنعم]

(12)

أصبحت يا الحبيبين ومشيت قفرت البناي ولقيتو شغال في أركويت..

ظبطنا أمورنا وبدينا الهركي من جديد....

يوم الخميس بالمساء جاني عوض ومشينا نظبط بوشنا مع بُطان الحلة..

ضربنا زين لامن إتنْبَلنا وبقينا ندشى وجينا لي حجارنا قدام البيت..

- هسا بكرة كيف..

- يا اخوي هوي انا الاسبوع كله شغال سهرات وعضامي قايمات علي

دحين تمشي براك وتشوف نسابتك ديل... الله يسهلَك..

- يا طارق انت عارفني ما بقدر امشي براي ياخي كدي عليك الله باركها..

- مالك... مطهَر... ولا فوقك الوِرْدي (الحمى)...

- ياخي بس امشي معاي بكرة وانت معزوم وتاني ما تمشي...

-هسا يا عوض البت دي حا تعرسها متين...

- ما عارف لكن ما اكتر من خمسة ستة سنوات..

- هاالله هالله... باقيلي ابوك ود الجبل وماني عارف

- ياخي انت عارف بكرة حا يحصل شنو...

- ماني عارف بس عارف الله ما شافوا بس عرفوا بالعقل...

اقولك شي قوم نوم والله يعدلك خطوتك..

- بكرة بصحيك فجر...

مشيت علي عنقريبي لقيت ملايتو تهبهب وحاتكم صليت العشاء بس

وانبطحت عضامي يطقطقن وكلي مملخ..

.................

فجُر عوض جاني ناطي وشايل كبابي الشوب بي لبنا مقنَنْ ومعاهو اللقيمات

- بدينا في الرشاوي

- ياخي كدي قوم استحمى وباركها

ضربنا شاينا وقعدنا نتونس شويي وبيني وبينكم حنني عوض شديد..

شكله كدي ماهو قادر يمشي براهو ومهضلم تقول ماسكو الهيم (مرض يصيب الدجاج)

.. اتهندمنا وسرقنالنا ريحي من عمكم جبيرين ومشينا...

وصلنا جنب الباب وعوض قلبو يضرب تل تل تل وعرقو يخر

- انت مالك ضارب الجرسي من هسي

- يا طارق عليك الله روق وجوة لا تهضرب شي

ضربنا الجرس... ترن ترن ترن ترن

جا السواق فتحلنا الباب...

اتفضلوا اتفضلوا... دخلنا..

لقينالكم ابو البنيي قاعدلو في كرسي مهيل كدي في السِعْدي (النجيلة)

لابسلو ردا وفنيلة حمالات وكرشوا ناصلي من الفنيلة

ومدلدلة فوق الردا زي البخسة...وقاعد يقرالو في جريدي...

والخرابة تقول مزرّعلوا فتريتة في صدرو وتحت يدينو...

الشعر قايم احمر احمر في الصدر وتحت يدينو تقول قاعد يحننوا...

اخدنالنا قعدتاً جنبوا وهو يسأل في عوض وعوض مدنقر كأنه في امتحان شفوي...

جات أم البنيي... صلاتي علي محمد.. المساير يلمعِن والشبشِب تستخسر عليه

المشي في التراب... مرتاً سمحي ومهندمة... ماها طبوج...

- اهلا يا شباب اتفضلوا تعالوا لي جوة..

عوض لكزني: ياخي اتنحنح ولا صفق قبل ما تخش

- اييي نخنيح شنو اصلي داخلي مستراح... بعدين المرة قالت اتفضلوا

دخلنا علي صالة كدي ريحة البخور فيها تقول يا ليل

البت الشغالة شايلالها بطانيي تشهيك البرد

- معليش يا شباب حبوبتكم كانت راقدة هنا وقالت عندها حمى

... اريتها حمتي كان دي بطانية حبوبتنا... تعالي شوفي بطاطين ناس عوض

إن غتت رجليك ما تغتي راسك تقول ضاربها شيطان وريحة الكركار تدقشك

من خشم الباب...

... وفجأة تظهر جكسوية عوض... قادر الله.. الشعر فايت نص الضهر

... سلمت علينا بي يدين يمين زي حلاوة قطن مرطبة وناعمة...

- كيف يا شباب... اهلا يا دكتور...

- والله تمام والحمد لله

- ماما نسيتي البريل كريم حقك والأتريكس

البريل كريم عرفناهو.... علي الأتريكس دة يطرشنا....

- هي امك بتستعمل بريل كريم....

- أيوة عشان ما تجيها قشرة...

- قادر الله.... جملة الإيمان خالتي سكينة إن بقوا حكولها راسها بي منجل

القشرة تملالها كوريي...

... من العيد للعيد تقعدلها يومين في سوات الكركار

وترسل لي حسنة بت خليل عشان تمشطها... والخرابة غيليدي

تختلا تلات مخدات وتقعد فيهن وتهجر خالتي سكينة تحتها وكوريي فيها كركار

وقشر ليمون في الطربيزة وكوز الموية الكبير داك موهط

وبي سلك كدي تبعبص في راس ام عوض من تصبح لا عند المغرب

وما تخليلا مرة ما تقطع فوقها حتاً تكمل... وخالتي سكينة تسمع فيها وتقولها:

قبيل أنا أم النصر لامن مشيت عزيتها في أمها وأبت تشيل معاي الفاتحي قالت ما جيتها

في ود عمتها... أها هسا تكيل الرماد فوق راسها مافي زول بيجيها...

- لكن هي ماها طالباكي خمسين قرش في طهور مصطفى...

- برسِلن ليها مع فخرتاج... إييييي خوتها تطير...

ولامن ينتهن من مشاطن وقطيعتن.. وتشوف خالتي سكينة لافة المساير تحت أضانا

تحلف تقول سماعة كمبيوتر وشغالها بيها شات في الهوت ميل...

... سبحان الله شي شغال بريل كريم وشي كركار والدنيا كدي ماشي وكدي ماشي

وعوض يقولي يضع سره في أضعف خلقه... الأم بي بريل كريمها ويقولي سره...

... إيييي سر شنو...

... وفجأة تظهر سحر.... واااااااااااااااااااااضيق ي أنا..