بعيد يا اخوانا بذكر
حلاوة الماضي من اول
وحلاوة الذكري لما تهف
وفي اعماقي تتحكر
بعيد يا اخوانا بذكر
لمة بيتنا كل صباح
وقعدة يمه في البننبر
تدي داك حبة شاي
وتدي الشاي وما بتفتر
نفمه نغيشها كل صباح
حفظنا القعده والمنظر
بعيد يا اخوانا بذكر
شوارع الحلة والدكان
ولون الشارع الاسمر
وحاجة تبيع تسالي وفول
تحت نيما ظليل اخضر
نخطف نجري نحن هناك
وهي المسكينه ما بتقدر
حليل الخور يفرحنا
ومويته تفيض وتتبعثر
نبني بيوتنا من طينو
ونجري نسيبها تتكسر
نجري اهلنا فرحانين
نفتش علبة السكر
ونسال يابا تعريفه
دحين يا بوي ما بتقدر
يحلف والله والله
ونزعل نحنا بي رقة
ودموعنا الغاليه تتقطر
نلعب نحن فرحانين
وما عارفين مصيرنا
يكون وكت نكبر
نلقي الدنيا مرة الدنيا
لما تضييق وتتعثر
الاخت وفاء ال60 دقيقه كان ما كملت كلميني النتم الباقي