أهل الفرحة جينا
لا المدامع وقفتنا
ولا الحكايات الحزينة
لما درب الرايحه جابنا
جابنا فى هادى المدينة
ياولدي الدروب شقاقا بحر التيه
ليك درب ولا دربين
مساك الدروب ضهاب
ليك قلب ولا بالين
سواى القلوب كضاب
ليك ضهر ولا سرجين
ركَّّاب السروج وقَّاع
شق يا ولدى بحر التيه
بتتدردر وتتودر
ولامن يوم على تايتنا ديك ترسى
نعزك بالقبيل داخرنو ليك
الشوق بحر يا ولدى بحراً تيه
قت العليك ادرابو لا تنغش
ولا ترضابو لا تنغش
فى الزمن الزمين والكى يسوقو خلاف
عشان النى
عليك الدور .. وتصريف الليالى بدور
تشيل ما شلنا من الهم
ولا من دمعه ترمى الدمعة فوق دربك
روح يابا ..
وابق قفاك لا تعاين
ولا تعاين على موطاك
ولا تندم على خطواً تملي مشيتو لي قدام
وابقى العاتى زى سنطتنا زى صبرً
نلوك فوق مُـرو زى الزاد
لا شيتاً نزل فى الجوف
ولا برجع ولا بنزاد
واركز للبجيبها الريح
تقيف انت ويشيلها الريح
وابقى العاتى والدرب الوراك مسدود
وشيل شيلتك ... بقيت للنص
لا حلما بجيب البر ولا حدود
وإن بليتا أخَـتا الرمله ما تقع البكان الهش
هى الممطورة ما بتبالى من الرش
النعمة بتعرف عاطيها
والجمرة بتحرق واطيها
بالكيلة أعطانا وما لقينا
فوق جمر خطانا وما لقينا
يوم الوعد ..
يا حليوه فيك الدنيا ما كانت شروق
إلا الأرض متكشفه ومتبلمه
نعمنو من خير الخريف لا فحالها شال
يوم الوعد ..
والفرحة خضرا
فرحة دوب تتشابى لى عين الشمس ....
يوم الوعد ...
والبت حليوة النفس بيضا كذا الحليب
والروح مشحتفة فى البلود الفيها ريحتك
للبعود من فزعة الغربة البساسق
فوقها مو راجع ولا بالحيل قريب
الروح مشحتفة فى الحبيب