سلسلة الأمثال الشعبية
(حزمـــــوني ولزمـــــوني خلـــــوني النشــــــــاكل )
والمثل ده بطابق المثل البقول الكداب وصله الباب؛ وكلمة حزموني مشتقة من كلمة الحزام وهنا مش معناها الحزام المعروف في زمنا ده ؛ كان زمان عبارة عن عمة الواحد كان بربطها في نصه ويشدها مظبوط عشان ملابسه ما تضايقه ولزموني كلمة برضو جاية من كلمة لزوم وهي الاشياء المطلوبة لعمل حاجة معينة او هي التجهيز وزمان معروفة طريقة الشكل والعراك وبكون مثلا مشكلة بين الفرقان في الحلة وتلاقي النسوان يزغردوا والاطفال يشجعو والرجال يتشاكلو وهم محزمين ومربطين وجاهزين من كله اها الزول لو ماجاهز ما بشاكل والمثل بضربوه للزول البتحجج بالحجج الواهية عشان ما يعمل حاجة معينة مفروض يعملها لكن لو جهزوه وجابو ليه كل المطلوب بقولوا ليه ( اها حزموني ولزموني خلوني النشاكل )
الله لا جاب المشاكل وياريت نتحزم ونزيد همتنا ونشوف البهمنا ونسال الله يوفقنا ولحدي ما نجهز لينا مثل تاني فتكم بعافية وودعتكم الله.
|