شيباك/ سكرفي/ أهلاً /فوكمنقــة
دبايوا/ دليب وكوجا وتمر ومنقة
شوايقة/ زغاوة/ أرتيقا/ وددنقا
***
دي إلفة قديمة ليها قرون طويلة
دي ما بتنهدّ ما بين يوم وليلة
إذا ما جاتنا عُسرة سوا بنشيلا
وإذا صابتنا فتنة سريع نزيلا
***
أسود/ أحمر/ اصفر واخدراني
دي ألوان في الجلد ما في المعاني
ولوحة جميلة مافي مثيلا تاني
***
نجوع ناكل مرس/ كابيدا/ بافرة
سلات وكجيك ومندي وكسرة وافرة
محل تنزل تجيك صينية دافرة
كرم سوداني فيهو سماحة سافرة
بعد ما شبعنا ديك وازاتنا برّة
نغم طمبورنا ناخد فيهو جرّة
نحاسنا يدقو نايل ونقارتنا كِرّة
ونعرض عرضة سودانية حرّة
***
كراسي كنيسة جم برش المصلّى
شمالي/ جنوبي/ غربي/ وشرقي/كلاّ
كوال/ الدومة/ هُمّد دين وبلّة
***
وختمي وسلفي وانصاري وجهادي
هم الوان طيفنا أصحاب المبادي
نخُت أرضاً سلاحي معا سلاحك
واخت أرضاً رغيفي تجيب ملاحك
تشيل من زرعي وآكل من مراحك
خالد أبو سليمان