يوم الخميس كان صفقة ورقيص ويوم ما بتنسى نسانا سنين الغربة وراجين اليوم الكبير واسبوع تانى عشان تعود الفرحة لينا وتضوى ليالينا -
يوم الجمعة مر زى السلام عليكم وجا اطول يوم فى الدنيا يوم السبت ونفس للشغل مافى تب وجرجرة بعد ليل شلناهو سهر - وانا فى وسط الضجيج والازعاج داخل المصنع اسمع رنة جوالى وفى وقت زحمة شغل والواحد غرقان داير بتين يتفك من البلاوى القدامو عشان يريح واريت راحة عدوك تقعد فى المكتب دقيقتين تلاتة تجئ كبة تانية ومرات يحبسك الشغل لمن الواطة تليل وكمان مرات تلاتين ساعة ما تشوف راحة وعينك ما تشوف نوم ما نحن زى الماكينات البندور فيا يستلهكونا زى الصابونة ولمن نبقى بروة يقولوا لك مع السلامة وين تقبل ما تعرف
التلفون دا من عمنا قريبى وعملت طناش خليتو صامت وهو تانى يشيل يدق - الزول دا مالو مصر كدى ياربى عندو شنو - خلاص ارد عليو واقول ليو انا مشغول حبة وبرجع بكلمك تانى - افتح الخط
-الو
- احمد كيف حالك
- كويس
- يااخى والله انا ما عارف اقول شنو
- خير انشاء الله
- إنت زول مؤمن ......
قلبى وقع فى ركبى وجاتنى خلعة شديدة
- المات منو؟؟؟؟
- يازول قول بسم الله ما فى زول مات
- الحاصل شنو
- والله نسيبك تعبان شوية وجاتو جلطة ونقلوا للمستشفى
- لاحول ولاقوة إلابالله
- والكلام دا بتين
- قبل شوية وقع فى العمل ونقلوا بالاسعاف
- وانت منو الكلمك
- اصلو اتصلوا على اولادو، واولادو اتصلو على عشان اوديهم ونحن هسع ماشين ليو
خبر يالله - الزول دا ياهو ركيزة الاسرة وياهو سندا وربنا يجيب العواقب سليمة
وقت مافى والزوغة من الشغل واجبة والبحصل يحصل وطز فى الشغل وصاحبى راجندران الهندى يهزهزلى فى رويسو يقول
- مشكلة مافى صديق انا فى ترتيب - انا كلو معلوم ، بس انت روح شوف بابا
والله حالتو صعبة الزول فى الانعاش وشكلو كدى جاوا شلل وربنا يلطف و ندى برغم المصيبة والدموع فى العيونا هى وامها صابرة ومحتسبة والواحد ما عارف يقول شنو غير يواسيوم وياريت الواحد يقدر يعمل شئ يمسح بيو دموعم بس إرادة ربنا يوم فرح ويوم كره وغير الصبر مافى شئ . المهم لمن شوفنا القعدة طولت بالساعات وديل ولايا براهم اصرينا لازم امشوا البيت ونحن بنقوم بكل شئ وبعد ضغط شديد وبعد ما الدكتور طمنا على صحتو وانو حالتو بقت مستقرة رجعو للبيت - بس الشلل دا علاجو طويل وبحتاج لعلاج طبيعى