بحر الموده
شوفي الزمن يا يمه ساقني بعيد خلاص
دردرني واتغربت واتبهدلت وريني الخلاص
ساقني القدر منك بعيد لاذايا كاس جرعني كأس
يا يمة يا نور الصباح وكتين يطل
يا يمه يا فيض الحنان الما كمل
يا يمه يا بدري البشع دايما يهل
وآشري يا زينوبة ولدك في بحور الشوق كتل
محروم من الحب والمحنة وراك همل
يا يمه يا بحر المودة وكتين يفيض
يا يمه يا شعلة امل زاددت وميض
يا يمه يا عنقود كلام منظوم قصيد
يا يمه يا نغما حنين بالشوق يرن
وافكاري فيه بيرتعن... دمعاتي شانو بينزلن
واتذكرك يا يمه في الدغش النسايمو يهبهبن
قايمي الصباح متكفلتي شايلي الحليلي علي المراح
والساعة ديك يادوب ديكنا بدا الصياح
والطير صغارو يغردن
جبتي اللبن بي انشراح
واتذكرك يا يمه في وكت الهجير
صالياكي نار الدوكي عستيلنا الفطير
رشيتي قلتي اكلوهو خير
واتذكرك يا بسمة الطفل الغرير
وكت الخلوق ترقد تنوم واسهر براي ارعي النجوم
والشوق يرف جنحينو فوق لي يحوم
واهتف باسمك في الخيال
طيفك كمان بي فوقو جال
واتمني لو لحظات يدوم لكني فجاءة القاهو زال
واتذكرك يا يمه ساعة الناس يجونا من البلد
ناعم ترابه علي جسيماتن رقد
ريحة التمر فوق الهدوم
ولون الخضارخانس لبد
والشوق اوارو بيشتعل
كان ظني فيهو يكون خمد
واتذكرك يا يمة والناس قالو راجعين للبلد
رصوا الهديمات عدلو ركبو اللواري وقبلوا
خلوني وحيد بلا انيس
كيف انفرادي اتحملو
شالو السلام من عندي ليك
وانشاء الله عندك يوصلو
يا يمة ساعة يوصلوا ويقولو ليك
شفناه في بلد الامان
انبسطي يا نبع الحنان
وانا حالي يشهدبو الزمان
يا يمه رسلي لي عفوك ينجيني من جور الزمان
|