التحضيرات ماشة تمام والشباب همة ونشاط والجيب شغال والباقى بنتم ديون ياها الحال نباصر بى جاى جاى وانشاء الله تنستر معانا بعد داك. واحد من الشباب اصر إلا يعمل لى حنة اصلو هو الفردة قبل ما يعرس ويسيبنا نناجى نجوم الليل برانا :
- يازول انا رتبت ليك حنة كاربة
- انت ما نصيح حنة شنو كمان فى البلد دى انتو دايرين يقول علينا شنو .
- يازول دى ساهلة تب
- كيفين الكلام دا
- موش الحنة الخايف منها دى والله فد يوم بنطلعة من يدك بعد العرس - العلم اتطور ياخوى
- يازول كدى نشوف الحاصل شنو وبعدين برد عليك
- بعدين شنو؟ انا حجزت الاستراحة خلاص - مافى ليك طريقة
- استراحة ؟؟؟؟؟؟
- نان نحتو معاك كيف كما ضربنا الخلا دا
- يازول الشغلة دى بتودينا التوج هسع كان ناس الهئية مروا علينا ساى والله مع الحنة دى يطلعونا شئ تانى
- يازول العالم دى كله شغالة كدا - هى الاستراحات البرة دى سوا لشنو ما لجنس دا وبعدين اخوك علاقاتو كويسة ما تشيل هم وكان حصل شئ بتحلا بس خلينا نهجج شوية فى البلد المامعروف ليا رأس دى
-يازول مشكلة مافى .
- وكمان اقول ليك حاجة نسوى فيا عازومة ونقطة مرة واحدة
- نقطة شنو- دى انا ما بسويا ابقى زى الشحاد .
- يضحك ، يازول ماعلى كيفك ابقى بعيد بس
سكتنا وطوالى قال :
- خلاص يازول اتفقنا الخميس الجاى وخلى الشباب يعزموا جماعتم وانا بعزم جماعتى وبالبركة
الزول من فات والجماعة بدوا النقاش :
- يازول سوى العرس كلو هنا وانسى السودان خلاص
- اى والله وامشى دبى مع البنية شهر عسل اقعد معا اسبوعين تلاتة
- والله دى فكرة كويسة وتشوف شغلا كيف إمكن تلقى ليك شغلا هناك وتقعد معا .
- اه شن قولك
اعاين فيوم كدى واسرح شوية اصلو الفيوزات بدت تضرب عندى واقول فى نفسى : هوى ديل بتلكموا ساى ودى ورطة بنت كلب صرف شديد وكان قعدت تلاتة سنة ما تكفينى سداد ديون .
الشباب فهموا حيرتى و نقشوا الفى رأسى
- يازول انت خايف تنقطع
-الدنيا ما معروفة ياجماعة والبلد داك مابعرفوا كويس
- يازول انت كان خايف من السكن فى فندق - انزل معا فى سكنا إنشاء الله غرفة واحدة
- كدى امورك ظابطة يامعلم كان قعدت شهر ما فارقة - سوى حجزك من هسع وخلى التردد بتاعك دا
- والله ياجماعة عرسى دا شغلكم شغلة
يضحكوا
- يازول انت هين
- خلاص ، الواحد على الاقل يتفسح فى الدنيا دى شوية
كان كدى ياجماعة نعدل البرنامج
-كيف
- الخميس الجاى الحنة العاملها عصام والخميس البعدو نسوى العرس ويوم الجمعة السفر
- اه شفت الزول كان قال بسم الله كل شئ بنتم .
-