[عبدالمنعم]

كلمات الشاعر حدربي محمد سعيد

يا النازلة ماشة علي البحر

ساعة الحلب ... ساعة الشمس يا دوب بتطلع

. والشعاع من بين فتيحات الغصون

رقرق علي قش الدرب

ماع الندى ... ووقع

متل خرز السبح خيطو انقطع

يا النـــــــــــــازلة

*** . . . ***

السمحة بي وسط التمر ... دايماً تمر

يتنى بي فوقا الجريد

يلمس سبايب في الشعر

والقمري من عش ما بيطير

إعتاد عليها ووالفا

حتى السبيط مدّ الشخاليب وإبتسم

مرات تقيف منو وتشيل

ومرات تفوت مشغولة بي شيتاً كتر


شجر الطلح رمّ البرم

أصفر تحت اقداما مفروش قرمصيص

يا النـــــــــــــازلة

***. . . ***.
شوفي البحر يا السمحة ...

اتقطّع تٌرع واصبح بعيد

والترعة وسط الرملة

زي كبة عسل

جابوها في صينية لي فطرة عريس

واللوبا في صدر الجرف

من عرقو فجالا الدرب

وشوش وقال

السمحة جات ... السمحة جات

لما اتشبك نوارو في توبا الجديد

مالت بشيش السمحة مالت فكتو

شان لا تحت نوارو لا تقطع صفق

النــــــــــــــــازلة

***. . . ***


السمحة مهما كان تَرِد

حاشاها ما قالت بعيد

شان تسقي شتلات الحياة

وشان تسقي في البيت الأهل

يا النـــــــــــــازلة