تلفون الزولة دى لخبط رأسى وغير كل حساباتى وخلانى محتار حيرة شديدة خلاص وما قدرت اصل فيو لشئ وكت رأسى صدع من التفكير قلت يازول خليا على الله والبسوى الله بتبقى واعمل طناش من الموضوع
تانى يوم ندى تمسكل وتتصل لمن فترت وانا ماقدرت ارد عليا لانو ما عارف ارد اقول ليا شنو وبعدين ما كنت رايق عشان نتناقش فى الموضوع والنفسيات فى الواطة - وشوية اسمع ليك رنة الرسائل فى الجوال كان القا رسالة من ست قلبى بتقول : (محال انساك واسيب الريد وانسى هواك لانك فى قلبى وقلبى انت شلتو معاك ، شنو الجفا دا ) - الرسالة دى عملت فينى عمايل وولعت فى قلبى النار ودقيقة مافى اتصل عليا
- الو ندى كيف عاملة
- كويسة - شنو عامل فيا تقيل كدا
- والله ياحبيبتى كنت مشغول شديد و رأسى ما قادر احكو
- كان ترد لى وتقول لى مشغول
- معليش حقك على ، رسالتك تجنن انا كان عارف بتعملى كدى كان طنشت منك من زمان
- هووى يامستهبل ، تانى تطنش كان اضبحك
تسكت شوية :
- شنو يعنى ما رأجية ردك
- والله حيرتينى معاك و ماعاوز اكون عقبة فى طريقك
- يعنى موافق خلاص
- بصراحة كان قلت ليك خلى الشغل دا بتخليو
- والله عشانك ممكن
- خليك منى انا ،اها عشان نفسك كيف
- والله الشغل دا عاجبنى وبعدين انا قريت عشان شنو- موش عشان اشتغل
- هىىى انت قايلة الشركة دى شغلتك عشان شهادتك
- نانا عشان شنو
- هسع وينا خبرتك إلا كان خلقتك دى ودا المخوفنى شديد وقاطع قلبى
-هاهاها هع ههههههههههه
- هسع البضحكك فى كلامى دا شنو
- بتغير علىَ للدرجة دى
- كيف ما اغير عليك والله انا بخاف عليك من الهوا الطاير
- اطمن انا ما بكون لزول غيرك وانت كل حياتى
- خلاص عديلة وربنا يحفظك ، يلا مع السلامة
- مع السلامة
اقفل الخط بهنا كان تانى تجينى منا رسالة : (ورود الدنيا اخطفها وبشوق قلبى اغلفها ومع النسيم لأحلى حبيب أرسلها , الله يخليك لى )
فى المسا جانا ابو ندى وسلم على الجماعة وطبعاً الجماعة يوسوسو ساى ويراقبوا فينى ويشاغلوا ، دى مافرصتم كان قالو لى اعمل اى حاجة بعملا سترة حال وانا وشى عاوز يقع من الخجل ( النسيب ما عين شمس ) وبعد السلام براحة سحبنى من يدى ،وقال لى : ياولدى البت ورتك بالشغل ورتنى بموافقتك وانت كان ما راضى وبتجامل فيا ساى انا هسع بعقد ليك عليا وانت وهى مخيرين بس اهملها كدى براها ما بسويا- أنا قدرت الموقف وفهمت سبب كلامو يعنى يامحمد الزولة دى لو ما عقدت عليا طريقة سفر ليها مافى وهو ما معترض علىالشغل بس دايرة تكون تحت راجل يحميا .
ودعت ابوالنسب بعد ما إ تعشا معانا بالقوة وبالضغط وحلاف طلاق من الجماعة فى البيت ودا حالم يهاظروا ويشاغلوا بس وكت الجد تلقاهم رجال .
بعد ما مشى وانا قاعد برة فى الصالة بالشقة نادانى عمنا صاحب نسيبى
- اقعد انا دايرك
- خير انشاء الله نعل مافى شئ
- خير ، طبعاً انت زى ولدى وبتكلم معاك كإبن
- مافى مشكلة الموضوع شنو
- بخصوص البنية خطيبتك
ويسكت شوية ويكمل : ابو البنية كلمنى قبيل فى الشغل وحكى لى الموضوع كلو وحتة الشغل دى ما راكبا ليو فى رأسو هو ومرتو إلا إذا بقت معاك اها ياخوى كان مستعد تعرسا هسع وتمشى معا لدبى الموضوع بقى محلول ولايمنعوها الشغل وقال لى : ياهو المرة فى النهاية للراجل وهما شفقانين عليا من شحتفة الغربة وانت شايف براك نحن الرجال قولنا الرووب عديل كدى .اه شن قولك
نفس تحليلى بالضبط والحسبتو لقيتو زى ماهو مفطس مفطس والكتلة جاتنى لين عندى .
- بس انت شايف الحال براك نحن ما تمينا شهر من الخطوبة وتكاليفا
- يازول ابوا ما داير منك شى بس تعقد عليا واقرب إجازة ليك تسوى عرسكم براحتكم
- ماهى نفس المشكلة برضو حاتتغرب وتتبشتن يعنى بس دايرنى اغير اسما من ابوا لإسمى
- لا ما نفسى الشئ هى لمن تمشى عزابية ما زى تمشى مربوطة ليا فى راجل وممكن بعد فترة تلحقا
- والله ياعمى كلامك سمح بس جوَط رأسى جوطة شينة
- يازول إنت رأسك براهو جايط ، هسة فى زول لاقى ليو فرصة زى دى
-كدى خلينى افكر فى الموضوع براحة
- ياولدى البت ما عندا وكت لازم بعد اسبوعين تسافر لشغلا
-خلينى ادورا فى رأسى واحسبا
- ما تنسى ابوا حايسافر معا دا لو وافقت ويقعد معا الفترة الاولى دى كلا لحدى ما تكمل هى إجراءاتا وكمان اجراءتك حسب العقد ولازم طبعاً تكون قسيمة الزواج معا
- وابوها حايخلى شغلو ولا كيف
- لا حايشيل إجازة - اصلو خمسة سنين ما شال إجازة ولانزل السودان.
يعاين فينى وشاف حيرتى
- خلاص انت فكر برواقة - وابشر حرم الناقصة بنتمها ليك بس ما تنفذر لينا وكمان البنية حاتشتغل بختك مرة سمحة ومعا قروش
- هسع وين القروش
- والله راتبا السمعتو قدر راتبى مرتين