رجعت لشغلى زى اول ورجعت ريما لحالتا القديمة وكل شئ كويس
فى يوم ندى مسكلت لى وقمت دقيت عليها
- عاين يا احمد انا جاتنى فرصة شغل
- خير انشاء الله شغلت شنو الفى السعودية كمان !!!!
- لا الشغل دا ما فى السعودية
- وين
- فى دبى
- فى دبى؟؟؟؟؟؟؟
- اى اصلاً انا من كذا شهر مقدمة لشركة طيران عشان اشتغل فيا والحمد لله الليلة اتصلوا على وقالوا لى نحن اعتمادناك معانا وحايشغلونى فى مكتب دبى
- وهسع رأى اهلك شنو
- أنا بهمنى رأيك انت قبل اهلى
- انا ماعارف اقول ليك شنو اه هسع لو مشيتى دبى بتسكنى كيف وانت بت
- إنت لسة مع الحاجات دى عادى الشركة عندها سكن وكل شئ مرتب
- والله انا خايف عليك من الغربة والبشتنة
- الشغل ما فيو مشكلة وكان على الغربة نحن من قمنا متغربين
- لكن ياندى انت المرة دى براك وما معاك اهلك
- ما إنت حاتكون معاى
-اكون معاك كيف ؟
- عقد العمل فيهو السكن عائلى وكل شئ على الشركة
- واها بعدين اقعد ليك فى البيت ساى ولا كيف !!!
- لاطبعاً ، ما حاتشوف شغل وبعدين انا وانت ما واحد
- نحن واحد ما قلت شئ بس الحكاية دى دايرة ليها تفكير
- دى فرصة عمرنا وما بتتكرر
- انتى هسع محتاجة للشغل ولا ساى
- كيف ما محتاجة للشغل وانت عارف ابوى خلاص كبر والحمل بقى كتير عليو
- كدى يازولة خلينى افكر وبرد عليك
- خلاص ما تتأخر على انا فى انتظارك