[اخوتي الكرام عبدو عوض خضر عارف اعرف انني لم اقم بالرد على أسئلتكم كلها وذلك نتيجة لظروف العمل
واختم جلوسي على الكرسي الساخن بهذه القصيدة التي كتبها اخي مبارك ابراهيم
الغربة دائرة يلف حولها المغترب شنط شحن خروج وعودة ..............
أمرك عجيب يا معـــــترب
شايل حقايبك ماشي وين؟؟؟؟؟؟
ما الغربة طالت يا مسيكين
وانته في نص الدرب
والناس هناك ما شايله هم
لا هم حكومة ولا لحم
سكته ليه يا مغترب؟؟؟؟
حاول اجب
الناس وراك دفنت ألوف
وانته جالس تنتحب
الناس هناك
هزمت طوابير الصفوف
وازدادوا نجمات في الكتوف
وانته جالس زي خروف
لا فيك لبن لا فيك صوف
شعار جميل مكتوب حروف
زول مغترب
لا ليك ارض
لا ليك رأي
لا خطة اسكان لا حزب
انته عند حزب واحد ... اسمه حول في الشهر مرتين
ود اللمين جاهو المغص في الكليتين
يا خوي حول ما تطول
وجيب معاك طقم العشاء
ودهب الكضب
وانت جالس يا مسيكين .... الغربة طالت
وانته في نص الدرب
مرت سنين فوق السنين
لا اشتريت قطعة ارض
ولا سقفته الغرفتين
والحالة طين
يا خوي صلي ركعتين
بعد الفرض
يا خوي حول جيب قروش
وخاتم الجنيه للسيدتين
ام العريس وأم العروس
ولا تقول فلنفترض
أضرب خماسيك في سداسيك
وأضرب الطول في العرض
الغربة طالت
والعيال كبرت وجالت
وانته حالك يا مسيكين والله تغني عن سؤالك
والفكر مشغول وشايل هم عيالك
وين بتقرأ
والغريب كل الحكومات في البلد تنكر نضالك
وحتى العيال في الجامعات
يا مسيكين
بدل الجنيه تدفع ريالك
ومهما تكتب أو تقول
هذا اختيارك
لا ليك رأي ... ولا هناك من يرد ليك اعتبارك
شد حيلك واشتغل
عشرين شغل خارج مجالك
شد حيلك والثغور راجياك كتيرة
ألم اقل امرك عجيب يا مغترب؟؟؟؟؟؟؟؟
جيت شاب تلبس خفيف
حتى في عز البرد
بعد السنين الجلود اتكرمشت
واصبحت ود عم القرد
وآخر المطاف السنين صارت عجاف
شالوك مقفل في طرد
وآخر المطاف السنين صارت عجاف
شالوك مقفل في طرد
|