محمد الحسن ابنعوف مسدار الحقيقة
"ياريس بلدنا ايانا نحنا شبابا...
وراينا نقولو فى راس اليدور واليابا...
امن تقرع الناس التلوها خرابا...
ولا بنمرق الشارع نسيها حرابا...
**********
يمين ما رضعنا من اماتنا لبن الخوف...
ولا بيتنا فى غبنه وحريقة جوف...
نحنا ان بقت القهبونه حره وفوف...
عيوننا مكحلات بالضكره قبل الشوف...
**************
بيوت الجنزره المسروفه امن وكلاب...
مابهرشوبها ود الفى المحن تلاب...
البلد الطلع زيتها وملا العلاب...
ما بمسك قرونها وناسك الحلاب...
************
القيد والسجن وعد الشنق والويل...
دى ما بهرشوبها ود كباس دهايم الليل...
قول لى حكومة الفسده الوليدات ديل...
شرك الفره ما بقجوهو تحت الفيل....
************
ناصحناك وانت اديتنا اضان الحامل....
وفى سودانا عقبان اصلو ما بنجامل...
دام جعفر مشيرك فى الشباب العامل...
امن نحنا با طلين ولا شعبك هامل...
************
سيادة المجلس المفروض يحاسب الدوله...
اصبح زاتو هسع بالمحاسبه اولى...
دام نوابو نايمين لافهم لا حوله....
من حق الفساد يكسب وافوز با الجوله....
**************
يا نافع المضر وكت انقلاعتك قرب....
وانا خابرنى فى عوبت المحاصه مجرب...
هسع لملم الغوش المعاك وادرب...
قبل ما تلقى بهمك يا المغفل سرب...
***********
كيف سموك نافع وانت متلف وضار...
عسته بلدنا عوس عوجه ومليتها مضار...
قبيلا سكتنا ليك كان الحديس خدار...
واسع جاك سم ود الصوى الودار...
**************
ملف الشركتين والكبرى و الدربين...
ومال شركات محمد يا كلب من وين...
مشروع سندس ابقى نهايتو يوم الدين...
والسد المناصير والشريك لا متين...
*************
بنك الثروه والمال الغفيرو الوالى....
مدينة الكوره والنهب الصبح طوالى....
مشروع حلفا تعدين الدهب فى بالى,,,,
جايب دفترى وجاييك مانى مبالى....
*************
حليل جيشنا اللكان عسكر جرارقو اسوده...
وسيفو يفرتق الدرع ابحديد والخوده...
بعد يا عبد الرحيم ادوك رسينتو تقوده...
اصبح قربه يا بسه مطرطره ومقدوده..
************
ياريس وزير الثروه والماليه ...
هردو قلوبنا بالاسعار قلونا قليه...
البلد الكبارو بقولو وجع وبليه...
رموهو الواطه كل واحد خرتلو شليه...
****************
أما دفاعنا واخيبه وزيرو الفاشل...
إضينه مغبى من حال الحدود و الحاصل...
عمارة الرباط قبال وقصة باسل...
أما خليل حكايتو ؟..فهمته ولا أواصل...
************
عباد الشمس والمبيد الفاسد....
المتعافى يا ريس عناها وقاصد...
تصدير (الاناث) امات مراحنا الراصد....
نحنا زرعنا ياكين ما عرفنا الحاصد...
************
وانا كان مته واحد والبلد بى رجاله...
برجوك الخرش ضكرة وثبات ورجاله....
الدفتر ملان والمحن خجاله.....
اصبر لى بفسر ليك وهادى عجاله....