ام رهف مساء رايع عليك :
لك التحيه استاذ ياسر وشايفاك نشيط ماشالله عليك ......
خليها ياسر ساكت .
دا من زوقك .
هاك الاسئله الخفيفه دى مانتقل عليك من البدايه .......
واسئلتك التقيلة كيف ياخي دي انا مرة اقيف ومرة اقعد ومرة ابرك عديل كدا عشان القاء لي اجابة مناسبة غايتوا جنس حك .
مامدى علاقتك بالكتاب ؟ واى الكتب تستهواك ؟ وهل ترى ان الانترنت اصبح يغنى عن الكتاب ؟
كانت زمان كويسة اما الان فغير موجودة بالمرة .
تستهواني نوعية الكتب الفكرية ( دينيا او سياسيا او علميا ) بمعني التي يكون فيها جانب التامل والتفكير اكثر من السرد التاريخي او الديني ويكون جانب التحليل فيها اكثر للوصول لنتائج .
يعني بصورة كبيرة ممكن ان يكون ( نعم ) نسبة لان النت بوفر الكثير من الكتب المكلفة اذا الواحد اشتراها وثانيا لاننا موجود امام الشاشة بصورة شبة يومية ولا نجد وقت في المنزل للاطلاع نسبة لوجود الاطفال واحتياجات البيت .
هل يمكنك ان تُكون انطباعا عن الشخص من خلال كتاباته ؟ وهل تستطيع ان تميز ما اذا كان الكاتب رجلا او امراه وخاصه فى المنتديات ؟
زي ما بقول المثل الكلام مغاريف الداخل ( بشتنت المثل مش ) يعني كلامك بحتوي علي دواخلك ومن هذة الزاوية يمكن ان احكم علي الكاتب بما يكتب .
والله اسلوب المراة وتفكيرها بختلف شوية من الرجل واهتماماتها ايضا بتختلف لذلك يمكن التميز ( في المنتديات صعب شوية لكن في الفيس بك سهل شوية وكتير ما لقيت ناس لابسين تياب ما حقتن ومن الصفحة يمكن ان تحكمي علي الشخص هل هو رجل او امراة ) .
هل تعتقد او تؤمن بوجود صداقه بين الرجل والمراه ؟ والى اى مدى ؟
دا سؤال كبير والاجابة علية ما ساهلة
العلاقة بين الرجل والمراة يمكن ان تكون زمالة او جيرة او علاقة رحمية او ود بلد في الاطار العام لكن صداقة كدا زي صداقة الرجل للرجل دي صعبة شوية طبعا في الفيس تسمي العلاقات صداقات ودي الجايبة المشكلة حدودها ما لا ترضاه لاختك لا ترضاة للاخرين .
جيل اليوم رغم كل المعطيات .....تعليقك ؟ وكيف نجعله يشعربالمسئوليه اكثر ويترك الاتكاليه ؟
جيل اليوم جاء في زمن شبة صعب والظروف صعبة بالرغم من انوا الظروف زمان برضو ماساهلة ولكن الاتكالية دي اعتقد انها تربية فالواحد اذا تربي من صغير علي الاعتماد علي الذات وعمل الاشياء بنفسة بالتاكيد بكون واحد كويس وبشيل نفسوا والاخرين عند الكبر لذلك التربية ليها دور كبير .
لماذا لم نرى (ام ساجده) ضمن اعضاء المنتدى ؟ وهل لك تحفظ فى ذلك ؟ وهل ترى ان ثقافة المنتديات والانترنت عموما تناسب مجتمعاتنا ؟
والله ام ساجدة العليها ما شوية وثقافتها الالكترونية مش ولا بد لذلك انا وجدتها فرصة وقلت بلاش وجع راس .
ليس لي تحفظ في مشاركتها بالتاكيد .
والله كل شي لية سلبياتهوا وايجابياتهوا وبالتاكيد ايجابيات المنتديات اكثر من السلبيات لذلك لايمكن ان نمنع الكثير من الايجابيات مقابل القليل من السلبيات .
وكان الله اراد بجيك راجعه .......
كفاك خلاص ما قصرتي دخلتي فيني عشطة زي عطشة رمضان الساعة خمسة ونص مساء .
بكرة ياجماعة الخير سوف نعلن العريس القادم فترقبوا الاخبار
|