Originally Posted by ياسر مهدى

عندما كنا صغار في بداية الثماننيات احتمال 1983م كانت هنالك انداية في فطيس بالقرب من المدرسة المتوسطة سابقا والمستشفي الحالية والانداية لمن لا يعرفها هي مكان شد المريسة والعرقي وازكر بانة قد تم اخراجنا من المدرسة الابتدائية وداهمنا تلك الاندايات ومنا من فلق ومنا من معط السباليق ومنا من هدم المبني المكون من الجالوص ومن ثم اخدنا بعضنا واتباقصنا كان هذا في تلك الفترة السابقة الذكر والايام دي ما شايف الانداية دي احتمال بقت طرمبات حديثة .
اها نجي للحديث عن المريسة ودا وصف احتمال يختلف من شخص لاخر ودا راجع للوصفة فقد قيل انة يتم عمل عصيدة من العيش الفتريت او ...... الخ المهم عصيدة ويضاف اليها الزريعة وممكن تكون زريعة مطحونة ولكن الافضل زريعة وتمزج المقادير اعلاه في برمة ( زير الموية المعروف دا ) وتغلق لمدة يوم او يومين بعد صب الماء وتحريكها جيدا وبعد يومين تفتح وتصفي بقماش في جرادل .
اذا تمت يوم واحد وصفيت تسمي مريسة فقراء ساكت يعني ما كاربة والمصفي الاول دا وليها رغوة كدا تسمي دقة وهي تعتبر درجة اولي زي الفنجان الاول في الجبنة .
نجي للعرقي قيل انة يوتي بالبلح ويغسل زي نصف كيلة ويضاف الية هين من الخميرة وتغلق في جركانة وتوضع في حتة مظلمة وتغطي بشوال وبعد يومين تفتح براحة براحة لزوم التفيس وتوضع كل الاشياء في حلة وتسخن ويكون للحلة راس كدا زي الخراتيش لزوم التقطير ويعباء في جركانات او قزاز واذا الشخص موجود يبرد لة بماء او تلج وبالهناء والشفاء .
هنالك الارزونا وهي من المرايس والكجموروا وهو قيل من السمسم والطحنية ولكن كيف يعمل ؟؟؟؟؟ دايرين واحد ادينا الوصفة .
ديل مشاريب محلية هنالك مشاريب عالمية وحتي اسافر لبلاد برة واجيب ليكم خبرهم اترككم مع المحلي وسيبوا المستورد اها كدي النشوف القيروانة دي مليانة ولا فاضية .