مرثية الشاعر اسحق الحلنقى فى صديقه ورفيق دربه الفنان محمد وردى له الرحمه والمغفره
وانت ياوردى المشاعر ياالبقيت للموجه مرسى
كيف يقولو عليك مفارق وانت عائش فينا لسه
يااعز الناس حليلك وانت حاضن العود تغنى
وقلبى سارح فى الغناوى الطالعه منك وشايله منى
عندك انت الفن رساله تزرع الايام تمنى
ياحبيب كل الغلابه غبت وين الليله عنى
غبت ياالطير المهاجر وانت لابس الشوق حرائر
غبت ماشفناك بتشرب من عسل احساسنا زائر
وانت لو دارت عليكا ياوليف عمرى الدوائر
زهرة المقرن بتلبس من حروف اسمك ضفائر
ياسمح يازين حليلك فى السمح بعد السماحه
العصافير ليك تهاجر وبيك تعود ابيض جناحه
الجراح الفى قلوبنا بالنغم داويت جراحه
ومنك اتعلمنا نغزل من دموعنا النازله واحه
نحن مابنمسك دموعنا لما نسمع لو بهمسه
اما نور العين غرامنا مالو لو اهدتنا لمسه
وانت ياوردى المشاعر ياالبقيت للموجه مرسى
كيف يقولو عليك مفارق وانت عايش فينا لسه
قلت ارحل وجيت رحلت وما رحل ابدا مكانك
السحابه الفوق بتسقى وردة الاحزان عشانك
اوع تمشى تقول مفارق انت اسطورة زمانك
انت ليك انغام بتزرع فى القلوب ازهار حنانكl