وكالعاده عندما يريد علي ان يتخذ خطوه جديده في حياته يلجأ الي جيمس
تحرك ناحية الشاب الابنوسي الناحل
جلس قربه وجد امامه اكوام من العمل والكشك المكتب لايكاد يخلو من اصحاب وسائل النقل او السائقين
ابتسم في وجهه من بين ازدحامه ثم اشار اليه ان ينتظر قليلا
ولكن علي اشار اليه انه سيعود لاحقا
وبالفعل ولج الي الكشك بعد ان عاد من وسط البلد
وجد الزحمه خفتت قليلا
اعتذر جيمس عن انشغاله وسأله عن امه وعن احوالها
ابتسم علي وقال
- الحمد لله بقت مافاضيه مشغوله بالكشك والزبائن والتحضير لليوم التاني
- كويس والله وانت اخبارك شنو
- ماشي الحال بس كنت عايز اشاورك في موضوع
- اتفضل
- ياخي بديت افكر في العرس
اتسعت ابتسامة جيمس حتي شملت كل وجهه
ثم قال
- ياسلام ياعلي ياخي دا كلام جميل
ثم صمت لبرهه واستطرد قائلا
- اخيرا فكرت ياعلي والله انا كنت قايلك ناسي الجانب دا من حياتك خالص
- ما ناسي بس ياخي الفتره الفاتت ماكان مناسبه
- مفهوم اها امورك كيف
- انت عارف دا مجرد تفكير عايز اخد رايك فيهو ولما اكون جاهز ببدا اتحرك ولارايك شنو
- تمام بس عينك علي عروسه معينه
- لا لا والله لسع ماعارف اقبل وين لكن لم اكون جاهز ربك بحلها
- ياخي معقول البنات الحايمات ديل كلهن مافي واحده عجبتك
- هو انا قاعد اشوف بنات والله الا البركبن معاي ديل
ضحك جيمس وتساءل
- وامك رايها شنو
- لسع ماوريتها
نواصل
|