الحدائق العامة حدث ولا حرج كمية من البنات والأولاد جالسين قالوا مذاكرة ؟ ألوان طيف ملابس كيف والأوان شنو ومكياج ككيف واتنين أتنين . أو دوائر واحدة وواحد واحدة وواحد .. بنتك وين ياحاج فلان .. بتي في الخرتوم في الجامعة .. وكلهم البتشافوا ديل أولاد ناس لقمة العيش تكاد تكون معدومة .. ولكن تشفوهم تقول أولاد وزراء ..ياخي ودوكم للقراية عشان تنفعوا أهلكم والسودان .. تمشوا تعلموا لي شوية كلمات وفرد الشعر .. ( طبعاَ الكلام في الخرطوم جنب ناس الحكومة الحارسة الحكايات دي وتحت نظر الجميع .. وطبعاَ أخوكم أتلفت زي البعاين ليهو في بنج بونج .. فاغر الفم وفاضي الفؤاد ومفنقل العيون ومرخرخ الجضوم ومرهف السمع أبحث عن كلمة يلا .. أجدها زي دعاية إنترنت زين .. تأتيك ضخمة وصغيرة ومن بنت وحرمة ورجل وولد وشافع وكمساري ومطرب وحلاق وغنماية كمان بس بقدر ما أستفزتني .. كيفتني عشان كلمة عبيطة مرمية في أي مكان .. شنو ليكم يلا ولا ما يلا ؟؟؟
طبعاَ الموضوع طويل وعريض وبدأت دون ترتيب وأسبقية بس موضوع يلا دي حارقاني بالحيل قلت النبدأ بيها .. والأمور طبعاَ ليست كلها بالقتامة والنظرة التشاؤمية .. هناك بالتأكيد أشراقات وأيجابيات وحسنات وتلك من سجايا الشعب السوداني .. بس في متغيرات لا تعجب .. وبعض الشباب قول زمنا غير زمنكم .. ؟ مبررات واهية وضعيفة ما بتدخل الدماغ .. بس ربنا أصلح الحال .. وأتمني أن أكون في وضع نفسي مريح عشان أكتب ــــ زي ما قال جرجور نحن في أنتظارك ــــ الواحد لسه فاقد توازنو ولسه في البال مشاعر ونسمات السودان والواحد ما قادر أتخلص منها .. وبواصل بأذن الله
|