منو القال الرحيل آخرك
بشوفك في الزقاق ترياق
وفي ضل البيوت ضحكات
طاعم ذي فرح حَراق
وقعدات لا هوايد الليل
وشاي المغرب المشتاق
ايا شاق الطريق بالليل
علي اللمه بتشد الحيل
مضرضر في العيون اشواق
دحين هسع بتفوت دون صوت
نطارد فيك زقاق لزقاق
وتتدفق تعبي البور
كانك موية المطره
توزع حلمك الدفاق
متين ماكنت صوت صافي
متين ماكنت ضل دافي
متين قولك صبح فراق
ارح نتضاري في ضحكك
من الدنيا البقت رقراق
ايا داخل علي الاصحاب كصوت طمبور
ايا مارق من الونسه الابت تكمل
تعال نتلم في ضل البيوت شتلات
نتاوق للضحي الساساق
|