هجروا ولا رحلوا من فطيس
 

الهجرة معنها في اللفظ هجر الشئ يعني ترك والذي يترك مكان ويذهب الي مكان اخر يكون قد هاجر والناس الهاجروا وتركوا فطيس كتار من زمان , الهاجروا خارج فطيس وخارج السودان ديل دارين موضوع براهم اما الذين هاجرو ا او رحلوا الي مدن السودان من ناس فطيس او من ا لناس العاشوا في فطيس سنين عديدة فاصبحوا منها ديل رحلوا لاسباب عديدة منها اسباب خاصة جدا , وبعضهم رحلوا لاسباب منها الوظيفة , تحسين الوضع , وجود فرص التعليم من الاساس الخاص الي الجامعات , الخدمات الصحية ,وغيرها الكثير من الاشياء الضرورية والمهمة الغير موجودة عندنا في القرية ونزكر منهم علي سبيل المثال , حسن مهدي , محمد عبد القادر , الخليفة عثمان , سيد احمد محمد صالح , عبد الله النور , ميرغني محمد صالح, التاج جبارة , والقاسم الشيخ وغيرهم القائمة طويلة رحلوا ولكن دائما نجدهم بيننا في كل مناسبة فلهم التحية جميعا وانتمني ليهم كل الخير . ديل بعض الرحلوا والعندهم النية كتار الناس بقت همها قطعة ارض في الخرطوم انشاءالله تشوف العاصمة رهاب المهم بعد عشرين سنة بتلم علي الخرطوم , ويا بختو العندو قروش وقادر اشتري بيت او قطعة في حي معروف ودي كلو عشان الاولاد يلقوا فرص احسن في كل شي , يعني موسم الهجرة للمدن لو كانت مدينة كبيرة زي العاصمة ولا صغيرة مستمر ومازال , مفارقة قريبة الناس العايشة في المدينة يحبوا يجونا ويرتاحوا من الضجيج والزحمة والهواء النقي واهم شى مواصلة الاهل , سبحان الله في اروبا ويقال في المانيا الناس تتسابق عشان تسكن في الريف للحاجات الموجودة عندنا واهمها الهدؤ, يارب نشوف اليوم دي يارب يا كريم

شوفي ياختي أم محمد أنا غايتو من فطيس لو أدوني قطعة أرض في هنولولو ما ببدلا الماش اللمش .. عليك الله وين تلقي ليك أهل زي ديل .. يعني الواحد أقوم جديد أصاحب ليهو ناس جداد ..دي طبعاً صعبة جداً .. وين تلقي ناس زي ناس فطيس .. معاك في الحلوة والمرة .. ربنا أصلح حال فطيس وناس فطيس .. ونكون أحسن بأذن الله ، وتحياتنا لكل أهلنا الهاجروا ورحلوا من فطيس ..وزمان ونحن صغار كان عندنا جيران ناس عبدالغفار تاجر بالسوق ومنزله الآن منزل محمد النضيف .. وجار آخر هو عبدالحليم العياشي عليه الرحمة وفضل العياشي عليه الرحمة وزوجته خادم الله علي سوار برضو رحلو وحسن بابكر واذكر أبنه عبدالفتاح المتواجد الآن بأم بدة وأخيه عادل بالشمالية أو الحصاحيصا .. وأسرة تامراب ، الموضوع دا لو أستلموا عبدالله خير الله بجيب ليك كل الأسر التي رحلت من فطيس .. موضوع حلو يعيد الذكريات واسر كريمة كانت بيننا التحية لهم أينما كانوا والرحمة للذين رحلوا الي رحاب ربهم .

الاخت ام محمد والاخ عارف
السلام عليكم ورحمة الله
في الحقيقة الموضوع دق علي وتر حساس فينا
اجمل ذكريات عشناها كانت بين اهلنا الطيبين اهل فطيس
اجمل مراحل حياتنا كانت في فطيس
مرحلة الطفوله مرحلة الدراسة ومرحلة بداية الشباب كانت هنالك
ملعونه المدينة التي بلعتنا في كرشها
وجعلت اسم فطيس مجرد ذكري حلوه
عندما قررنا الرحيل كان احساسنا بالفراق كبير لذلك اتخذنا استراتيجة ان ننسحب بهدوء وذلك حفاظا منا علي مشاعر الاهل والجيران
بالفعل رحلنا دون ان ناخذ كوب ماء من اثاثنا ومتاعنا
تسللنا ان صح التعبير وكاننا نخشي شيئ
ولكن كنا نخشي مشاعر الاخرين
اذكر المرحومة الحاجة فاطمة بت يوسف نسال الله ان يسكنها جناته ويجعل لها مقعد صدق بين المخلصين والابرار عند مليك مقتدر
حينما خرجت الوالده تودعها لانها ذاهبه الي الخرطوم مجرد اجازه لابنائها
بكت الحاجة فاطمة بكاء حارا وقالت بالحرف الواحد (يا بتول بتي الله اعلم يتلم شملنا مره اخري
لم تكتب الزياره مره اخري للحاجة بتول الا وهي ذاهبة للعذاء في حاجة فاطمة بت يوسف
الذين رحلوا عن فطيس كثر وما زالوا مرتبطين بها وجدانيا
انظري اختي الي هذا المنتدي
من هم النشطاء فيه انهم ابناء المهجر الداخلي والخارجي
الاخ عبد المنعم الاخ عوض خضر الاخ مامون عبد الله النور والقائمة تطول
كم تنمنيت ان اعود الي حضنك يا فطيس
وكفي
محسود يا عارف علي قوة انتماءك الي هذا البلد الطيب

مشكور علي الاضافة وجميل انك ذكرت الناس ديل ونتمي من الاخ عبدالله خير الله المساهمة ويكون مشكورا

فعلا موضوع يحتاج إلي وقفة ... بتفاصيل
لان الذين هاجرو لا زالو جزء من النسيج الإجتماعي للقرية ... بتواصلهم الذي تم ذكره في المشاراكات

موضوع جميل خالص وزكرتونا باخوانا الرحلوا وهاجروا مننا بالرغم من قساوة الهجرة ومرارتها والذي نحس بة نحن وتراني من اكثر الذين يعانون منها .
ربنا يخفف علينا حرها وعلي كل الذين منكوين بنارها الفي الخليج الفي اروبا الفي اسيا الفي الداخل ( اصبروا ............ اصبروا .............. اصبروا ) البكاء ما بجيب شي ،،،،،،،،،،،،، وتبكي بس ،،،،،،،،،،،،،

بالتاكيد٠ظروف
الحياه هي التي فرقت الناس
ولكنهم يظلون يحملون اجمل لحظات عمرهم بين اهلهم واحبابهم في فطيس

فدعونا نخفف عليهم لوعه الفراق
ونتمني لهم دوام الصحه والعافيه
والتوفيق في شتي ضروب الحياه
وانكم ستظلون محطات يصعب تخطيها في نسيجنا الاجتماعي بالقريه
وربنا يجمعنا بيكلم في ساعه خير

لك التحيه ام محمد وحقيقي الموضوع بهبش وتر حساس لمعظم الناس.
ظروف الحياة هي التي تفرض علي الانسان الانتقال من موطنه الاصلي، ولكن في رائي الشخصي افضل ان اسكن المدينه وذلك لاضمن لابنائي حياة افضل لوجود الخدمات المتكامله من صحه وتعليم وغيرها من متطلبات الحياة.