|
أشعـــار شــــوايقة
الشاعر/السر عثمان الطيب هو تاج السر عثمان محمد الطيب من مواليد منطقة القرير 1951 حي الشاطئ مراحل التعليم القرير الابتدائية القرير الاميرية الوسطي مدرسة محمد حسين الثانوية معهد اعداد المعلمين العالي جامعة الخرطوم كليةالتربية لغة انجليزية وفرنسية الحالة الاجتماعية متزوج واب لاربعة بنات وولدين عمل بالتدريس بالمدارس الثانوية ( الاحفاد بنات ) الحصاحيصا الحكومية بنات سافر الي المملكة السعودية 15/9/1976 وعمل كمترجم عمل ايضا بالتدريس في الجماهيرية الليبية 1980 عاد الي السعودية مرة اخري نهاية 1981 واخيراً حط الرحال بسودانه الحبيب في 2006 يعتبر اول من كتب عن الغربة في اشعار الشايقية له ثلاثة دواوين مطبوعة آه يابلد ضُل الغيمة اناشيد الصعود أستحلفك بالريد أستــــحلفك بالـــريد أوعـــــــــك تفـــارقنى لاتســـبينى فى الاحــــزان أبحر تغــــرقنى ياروحـى مشغول بال مــحتار أنا ومـــحتار مابهـون فــــراقك يوم ألــــم الفراق تـــاوار يا المستحيل بُعدك يا الحار فــــراقك حـــار قــــلبى الحنين أصبح مـــوطن هـواكا ودار دنيايا غير عــينيك ليل مســـــدل الاستــــار فيهو القى روحى بلاك مسجونة دون أسوار انت المعـــاى أنغـــــام داؤود بلا مزمــــــار تسكر حنايا الروح من كأس ندى الازهــــار أستـــــحلفك بالفيــك والفى مــــــوقد نـــــار بى صرخة فى الاعمـــاق دار تفضح الاسرار بى دم دمــــوع عينى بى دمــــــعك المدرار يـــــرويك ويــــروينى ويتخنق غنا الأوتار بـــــالالفة حــــلفتك بالخوة حــــق الجــــار أوعـك تسيبنى تفـــوت تـــرمينى للأقـــدار خـــايف عليك وعلى من جـــور زمن غدار خـــايف من الايـــــام ودولابــــن الـــــدوار لالا لا ترحــل كــــوس للقعــــاد أعــــــذار دابن خطاى وخطاك فى الريد بدوا المشوار |
السر عثمان الطيب بحـر المـودة شوفي الزمن يا يمه ساقني بعيد خلاص دردرني واتغربت واتبهدلت وريني الخلاص ساقني القدر منك بعيد لآذيا كاس جرعني كاس يا يمه يا فيض الحنان الما كمل يا يمه يا بدري البشع دايماً يهل يا يمه يا نور الصباح وكتين يطل وآشري يا زينوبة ولدك في بحور الشوق كتل محروم من الحب والمحنة وراك همل يا يمة يا بحر المودة وكتين يفيض يا يمة يا شعلة أمل زادت وميض يا يمة يا عنقود كلام منظوم قصيد يا يمه يا نغماً حنين بالشوق يرن وأفكاري فيهو بيرتعن … دمعاتي شانو بينزلن واتذكرك يا يمه في الدغش النسايمو يهبهبن قايمي الصباح متكفلتي شايلي الحليلي علي المراح والساعة ديك يا دوب ديكنا بدأ الصياح والطير صغارو يغردن جبتي اللبن بي إنشراح وأتذكر يا يمه في وكت الهجير صالاك نار الدوكي عُستيلنا الفطير رشيتي قلتي أكلوهو خير وأتذكر يا يمه يا بسمة الطفل الغرير وكت الخلوق ترقد تنوم وأسهر براي أرعي النجوم والشوق يرف جنحيهو بي فوق لي يحوم وأهتف باسمك في الخيال طيفك كمان بي فوقي جال وأتمني لو لحظات يدوم لكني فجأة ألقاهو زال واتذكر يا يمه ساعة الناس يجونا من البلد ناعم ترابه علي جسيماتن رقد ريحة التمر فوق الهدوم ولون الخضار خانس لبد والشوق أوارو بيشتعل كان ظني فيهو يكون خمد واتذكرك يا يمة والناس قالوا راجعين البلد رصوا الهديمات عدلوا ركبوا اللواري وقبلوا خلونى وحيدى بلا انيس كيف إنفرادى إتحملوا شالوا السلام من عندى ليك وإن شاءالله عندك يوصلو يايمه ساعت يوصلوك ويقولو ليك شفناه فى بلد فى بلد الأمان انبسطى يا نبع الحنان وانا حالى يشهدبوا الزمان يايمه رسلى لى عفوك ينجينى من جور الزمان |
يايما رسل لي عفوك ينجيني من جور الزمان
معروف هذه القصيده تحدد معالم علاقه مثاليه بشكل حاذق تجعل صوت نحيبنا وانينا يتوجه ناحية العشق الذي لا بعده ولاقبله تجعل منا اطفالا يمدون ايديهم في دهليز طويل مظلم بارد نحو بؤرة ضوء في اخره يعتقد كل منا جازما ان امه تقف هناك تمارس الوميض لتزيل كآبة الغربه الطمبور وصوت محمد جباره يطفي علي هذا الكلمات المزيد من الحنين التحيه لك ولهذا الشاعر المفعم بالحنين ولطمبور محمد جباره |
|
سطاشرات الظلم يلا يا نيل يلا ... دفق لينا كب خيراتك .. أدلق الجروف .. عطشاني ضُمّه المحل ... في دارنا عمّ ... أروي يا نيل أروي ثم في مسارك .. هد سجون سطّاشرات الظُّلمِ ..غرّق *** في البيوت نصبو المشانق الدّغيش ... صلبوا الطفولة داسوا قيمة ابن آدم .... والتسامح .. والفضيلة .... كتفوا الوردة البريئة وفي احتفالن بي ذبولا جابوا رصولا الجحافل شان بتتفلت ..... تناتق أروي يا نيل أروي ثم في مسارك .. هد سجون سطّاشرات الظُّلمِ .... غرّق *** ختوا مرودان مَحَمَّى فوق ضهر وطناً ممدّد عضَّ لامن صبروا دَمَّم لحظة تب ما انصر غَمَّد بالعنج جلاّدو واقف ليل ... نهار .. يدِّيهو جَوَّد الملح لي نزفو مَرتِق .. والقيود في إيدو جرتق أروي يا نيل أروي ثم في مسارك .. هد سجون سطّاشرات الظُّلمِ ...غرّق *** ساطوا عين عين الحقيقة لفوا أعناق الحقيقة .. خمسة فوق اتنين حِداشر وخمسة من عشرين حداشر الرصاص جوه المدارس الكتاب تحت المدافع ... السحاب بالواطة يجري الجداول يابسي طايري الكتر .... سَمّوهُ زهره حتى سَمّو .. " الليلي " بكره .. تسرق الايد البتحكم .. وتحكم الإيد البتسرق أروي يا نيل أروي ثم في مسارك .. هد سجون سطّاشرات الظُّلمِ ...غرّق *** شطبوا من قاموس بلدنا كل دالة على ا لرجالة ... طرطشوا الشافع المدردح علَّموهو على الدغالة والمصاقر الشمس يبني والبشيل المونه يقنت جروا من تحته السقاله بدلوا الكان إيدو تزرع .. شهري صار يرجا الحواله من جنا الفي الغربة يشرب من شقا المر للثماله اللصوص ... غدروا العروسه الكلاب ... عَرَّت جمالا شان عريسا .... البكره سيرتو يبقى يوم فرحو استحاله من عبرتو اللقمه تزرد ...حلقه ماب تندلا .. تخنق .... أروي يا نيل أروي ثم في مسارك .. هد سجون سطّاشرات الظُّلمِ ...غرّق * * * قصوا جنحات الخُداري دسوا قوقاي القماري كبوا في قدح المحنَّه سم عقابيل المظنَّه ضيعوا الذات والهوية خموا من كومنا الشويه خَتُّوا بالن لي قمحنا باعوا قبال ما ننورق أروي يا نيل أروي ثم في مسارك .. هد سجون سطّاشرات الظُّلمِ ...غرّق * * * الذئاب مطلوقه تنهش .. ... يابا ... عنوان االقصيده . تبرز الأنياب تكشِّر في وشي الفكره الجديده ... تقرُش .. اللوح .. والدوايي .. والحروف تقطع وريدا .. قاعدي للتاريخ تغالط ... مادي ... للمنطق لسانا .. تشكي من تُخمة بطونا ناطّي ... فوق معلاق عشانا فاكري انه الليل مكتَّف .. ومستحيل .. الشمس تشرق أروي يا نيل أروي ثم في مسارك .. هد سجون سطّاشرات الظُّلمِ .... غرّق * * * ولما روح الصَّبرِ .. ضاقت .... ضُمَّه من صبر الغلابا .. قامت .. المكتوله تدبي ... وسمعت الكوراك ... في غابه الشِّويفعي .. الدَّابا ... يافعي طنطنت .. جدعت كتابا والمرق كايسلو لقمه .. صدَّ .. والفي ... إيدو سابا التِّمير... العودا عوبَسْ ... قال : " محال ... انشق " جرابا التقاوي .. أبا .... حتى .. يطلع زرعو .. من بطن السَّرابا القِميره .. انضارا نورا ضَلَّمت ... درعت حِجابا بلعت الأوتار .. نغيما دومَسَتْ سكتت ربابه " نُص رجب " حلفت تصومو .. بايتي عطشاني السحابه ... والسؤال ... " لمتين "؟ مسمَّر في انتظار.... فرج الاجابه والإجابه دون معاد .. الكون تفجَّر .. في وشي " الحربا " .. وصحابا الجموع .. بي قوه هتفت ... زلزلت ... عرش العصابه ... هادره .. والعصيان سيوفا .. ومطلق الإيمان ... حرابا .... " ثورة .. ثورة " " ثورة ... ثورة " ثورة ... كل ا لشعب قائد ... سكَّة أكتوبر مَشَابَا دك .. " أمن الطغمه " أقسم تؤخذ الغايات غِلابا وفي سبيل العزَّه .. أهلا .. بالرصاصه .. ومرحبابا .. ضحى .. بي شهداهو .. صمم .. دق للحريه ... بابا .. أصلو لمّا ... الشعب يأمر .. تبقى .. لازمه الاستجابه .. " والوصيَّه ... الوصيَّه " القصاص .. لا بُدَّ مِنُّو .. ونبقى .. ميَّه على بلدنا ... ونبقى ميَّه على ترابا |
معروف يلا
دفق انت طمبور محمد جباره المتفرد جعل صباحات الغربه اجمل |
معروف طبعا انا اعتقد ان محمد جباره افضل من تعاطي مع الطمبور بعد النعام
وفي هذه الاغنيه تناغم غريب بين الكلمات والطمبور والصوت المفعم بالحنين للمؤدي |
Quote:
|
تـــــراب بلـــــــــــــــــدي .. انا وآآآ مغستي رحل تلوت الليل شقاوتي رحل تلوت الليل مسالكي ضلمه ما بتنشق سكت روح نويرة الفرقـة جـــوة الجـــوف تســـوي الـــبق مشيت لا زاد أشيلو معاي ولا زولاً مـــــعا اترفــــق ولما خلاص بقيت مارق نجيم الليل مــشي إتفــــرق بكيت وبكيت، طريف العين متمسح بالدموع رقـــرق عشان مظلوم، زماني الليلي شتت للشمـــــل فــــــرق بسوي الووب نحاس احزاني جــــوه قليبي ينقـر دق يوهدبني يلوعني واخــــاف من المـــــصير واشفـــق اوادع الناس وافوت مجبور يجيني نغيم من الطنبور اشوفلي جني وقف صفق ينط لا فوق يـــــــــطير ينــدق واطـــير وانـــدق وادنقر فوق تراب بلدي أخم بي إيدي فـــــي رحـلي اقول يا ليل وافارق الدار اجر فوق الوداع مستــدار أنــــوني أنــــوني شـــاق الـــواح محــال ارتــــاح ادخل إيدي في رحلي تراباً فيهو تســــوى الكــــون تــــراب بلـــــدي اشـيل مــــنو اشـــم وارتـــــاح اشـــم طـــــيبة اهــــلي مـــــــــــــنو تفوح ترد الروح عويناتن تلـوح وتلـــوح عــــــراريقن طـــواقيهـن طــــــــواريهـــن سواقيهـــن انين الســــاقي لــــما تنوح حــــسيس البربخ المفتـوح واعاين يا تراب بلدي اشوف فيك صورة ماب تنشاف واشم ريحة الكُليت والشاف بنات بلدي بنات بلـــــدي طريحاتن مناديلن رقيصاتن شبابيلن حـــليلي حـــليلي يــااااحليلن واشيل من زادي واتكرف واشوف فيك يا تراب بلدي الحنين المـــابي يتوصف سماح ناساً حلاة ناساً بلا السكر طعم قراصه في قدحاً من الدبكر كواريك شفع المغرب يقلبوا في الجمــــر قنــــقر ولاد بلدي نقاقيرن طنابيرن جـــبابيدن سنــانيرن وافوت يا ناسي في دربي أقول يا أهلى واغلبـــي خلاص ريدكن ملك قلبي منو الغيركن بشيل حبي تراب بلدي بنات بلدي ولاد بلدي |
بت البلد وبلا خبر وبلا خبر طق الخبر مالي البلد قالوا العريس قام بالأحد والحلي جاطت والحريم يتهامسن جاي الولد يا بختها وااا شوقنا نحنا الفينا جمر الشوق وقد كل الحديث الليلي فوق بت البلد ****** وهناك بعيد بي غادي في آخر الديار راكوبة ضلها احر من حر النهار كوم من بروش وجريد تمر عيدان صغار ودلوق هدوم موروثة من زمن الكبار وتلات عناقريباً صغار كرابة متقطع نزل والنوم من البي فوقا روح تب جفل راقد هناك كوم من ضياع مركب مسافري بلا شراع واحلام مسافري بلا وداع ودموع ضياع تنجارا من غير انقطاع احرف انين ما خطتن ايد بي يراع وليلاً نجومو يودعن خلاص مسافرات هن سراع ****** بت البلد عبراتا سدت في الحلق تبكي وتنوح تشرب دموعا وتنشرق لامن حسيس نقارة جاها من الشرق اتوسدت ايدا وبكت قامت علي الحيل صنقرت وبكت بكت شالت طريحتا للدميعات كفكفت واتذكرت كانت تقوم فجراً صباح لمن يقومو اهل الصلاح وابوها شايل السبحي صاح ياشافعي سوي الشاي سريع شدي الملاح شيلي المناجل وامشي قدامي الجرف اتذكرت كانت تسبقو وتمشي تنزل بي تحت تمسك سبيط التمرة بي ايدا وتحت تقعد تحش اللوبي لي الكاويق تقش تصل البحر والموج يداعبا فوق هدوما ينط يرش بعدين تشيل القش تفوت واليوم يفوت وتفوت سنين وتمر سنين يكبر عمير بت البلد ويكبر معاهو كمان حنين وبعد تمر كمين سنة في يوم صباحو صباح هنا واحة عبير نغمة غنا ريحة لبيني مقننة مر الجنا وسلم علي بت البلد وزي عادتو سلم وابتعد تابعاهو عين بت البلد ****** بت البلد يوم داكا تب ما جاها نوم كيفن تنوم مادام خيال ود البلد يمشي ويحوم بين الخيال شافت وجيهو الهاش وباش شافت عيونو الفيها فيض احلاما عاش شافت سحاب الريدة فوق واديها راش بت البلد سمعت ضريبات القلب يا الله مالو دا ها القلب بعد الثبات كيفن خرب!! والغي سهامو عليها جات شاقي الدرب بت البلد عرفت تحب ****** واتذكرت قول حاج محمد والدا حالف يمين ود البلد ما ياخدا لو كان ركع قداما صل ويعبدا واتذكرت قول حاج محومد والدا وصف العريس الجاي بي قطر الاحد كتر محاسنو وعددا واحد موظف وعندو مال ياويكي في بيت الحلا ل تبقيلو ي امو العيال مافيش مثيلو ابدا محال ****** واتذكرت لامن ابت قول حاج محومد والدا قاليها ما عندك أدب تعبان سنين فوقك تعب واديكي لي زولا كعب واتذكرت كيف نهرا ومزرزرا وحالف كمان بيودرا لو مارضت بالجاي بي قطر الحد ****** وبكت بكت بت البلد لم الخبر زاع في البلد انو العريس قام بالحد والحلي جاطت والحريم يتهامسن جاي الولد يا بختها وا شوقنا نحنا الفينا جمر الشوق وقد كل الحديث الليلي فوق بت البلد لكنهن ما عرفن الشوق كيف وقد وما عرفن انو هي شوقا تب ماليهو حد مو ليس العريس ليهو الحبيب ود البلد دا الراح وفي زحمت ضياعو هو ما اتوجد يا حليلك انت يا بت البلد ويا حليلك انت يا بت البلد ****** |
شمعة ما مات بين ضلوعي هواكي .. حي ..رغم الجراح والدمعة مهما الليل طواني ظلامو ... ماب تطفي الرياح الشمعـــــة *** حالف ــ شان اصونو هواكي ــ بالخلق السماوات سبعـــة من دربي المشيتو معاكي ... لاخوف ، لا حياد ، لا رجعــة *** إنتِ النخلة شايلي غرامي ، في أحشاها ، تسعة وتسعــــة لا انتكى من تُـقُـل عرجونا ،لا اشتكى عودا ،يوم،من وجعة *** ما بِخلت على شتلاتا من فيض الحنان ، بي رضعـــــــة لا عوبَس جريدا وكشَّ .....لا قمريها طار من فزعــــــة *** مدت ضلها المترامــــي ، لي قيلـــــــــة النفوس والهجعة ضُلاّلة القلوب .... و رهينـــي .. للدنيا المقددة ، رُقعــــة *** شايلي من البلد حن ناسا .....ماب ترجا البَصيح للفزعـة إن قصَّر جنا ، اتغاباها ... عندها ليهو حق الشُّـــفعــــــة *** لو شحَّ الحصاد ...عطَّاية ....لا مَن ..لا رياء ..لا خدعة كان ما هِي .. القساسيب تبقى...علَّمت الله،من فد دقعــة *** تــربالك أنا ، الكادنـــــــــت حوضــك ، من سموم الأفعى من نيل المحبـــة دلقت سُقياك ...... ما مقطّعة ترعـــــــة *** مِـنِّـي ، وفِيِّــي حبك شبَّ ... ما كُــستو ورميتلُو الودعــة في النَّفَس الطلع واندلَّى...حاسَّبـُو ، ساعت اغبِّى وأوعى *** في الروح إنسكب ترياقو .... يشفي من العلل بي جرعـة نعمة من الوهبني وأعطى ، ما كان يوم جريمة وبدعــــة *** حب ، نيرانو موقدي ... أثافيه وِهّيطة الشجن واللوعـــة برداً بي سلامو يدفِّـي ... فاض ، غمر الحواس مجتمعـة *** الزول في جري الفي الدنيا.. كُلْ راسمالو سِيرة وسمعـة سيرتي وسمعتى المدخورة ... منك تستمــد الروعــــــة |
لمّا بُحتَ لمّا بحتَ ... وبحتِ ليَّ ..إكتسى الصبح الوسامة الشمس رسمت ضياها ، فوق وشي الكون إبتسامة ** لما بحتَ .. وبحتِ ليَّ إنطلق وقع الخطاوي ... فوق دريبات السلامة ... وسكَّة الشِّفا والتدواي ** لما بحتَ .. وبحتِ ليَّ للحزن قامت قيامة ... سهروا سمّار الليالي ... والمغنين والنُّدامـــــــا ** لما بحتَ .. وبحتِ ليَّ الكليمات الحميمة ... والحروف البيني ، بينك ، هن مراسيلنا الهميمة ** لما بحتَ .. وبحتِ ليَّ إندحر زمن الهزيمة .. إنكسر سور الموانع ... وانتصر عصر البسيمة ** لمّـا بُحتَ .. وبحتِ ليَّ في ظروف قاسية وأليمة إرتضينا ندوسو شوكا .. أو نحلِّق فوقا غيمــــة ** لما بحت .. وبحتِ ليَّ للغيوم النخلة شابت .. إتفدع وخدَّر جريدا ...فوق سبيطا تمورا طابت ** لما بحت .. وبحتِ ليَّ فاض وزاد النيل عذوبة المراكب وضفّتينو ... الشراع والخضرة توبا ** لما بحت .. وبحتِ ليَّ غنت الحبوبة حجّت .. منتكي وسهراني ليلا القماري معاها وجّت .. والبُطان لمَّت شليلا ** لما بُحتَ .. وبحتِ ليَّ في فيافي الغربة دوبا طنبرابيكي المشلهت .. رسَّل الألحان طروبة ريدة من غير ريدتك إنت ..تاني ماب بسلك دروبا |
حـأكتب لـك لآخر شهقة في نفسي الأخير .. بكْتِب لآخر زفرة في حزني المرير .. بكْتِب لآخر قطرة في دمعي الغزير .. بكتب ** حأكتب لك .. لآخر لحظة ، ما بين الوجود والموت مسجَّى على قفاي مبهوت أعاين في فوات الفوت واشهِّد في غنايا علَي بآخر صوت ** حأكتب لك .. واظل مفتوح عليكي كتاب حروف ترجاك على الأبواب وغيرِك ما لقت أصحاب ولا غيرِك لقت أحباب ولا كانت بلاك فرحة ولا اكتملت على صفحة معاني الإلفة والترحاب ** حأكتب لِك .. إلى ما شاءَ فعلُ الحب إلى ما ناء بحمْلُو القلْب إلى ما لانهاية الدَّرْب بكتب لِك ** حأكتب لِك لآخر شمعة في وجه الظلام والريح تقاوم ، وتحترق لوعة وأسى وتبريح وتفرد كم شراع للنَّوْ وتدِّي الليل أغاني الضو وتفتح للشمس منفذ بلا تصريح ** حأكتب لك .. لآخر موجة في بحر الهوى العاصف تشيلني مع الرحيل المر ، جرح نازف على شط الأمل برجاك ... وما عازف ولا أصوات نداي كلَّت ولا بيرجع صداي آسف. ** حأكتب لك .. إلى أن .... ترتمي الصخرة بحضن الغنوة والأوتار إلى أن .... تكتسي الزهرة نداوة الغيمة والأمطار إلى أن .... يحتوي المنديل مرارة الدمعة والتذكار إلى أن .... تكتفي الضفة ، من السفر المع التيار ** حأكتب لك .. إلى أن .... تستفيق نسمة من الصمت المباريها إلى أن .... تنعتق نجمة من الليل المضاريها إلى أن .... تفترق بسمة من الهم المواريها إلى أن .... تنطق الكلمة ، وحروفا تقول معانيها ** حأكتب لك .. إلى أن .... أن إلى أن .... أن لآخر أن .. حأكتب لك لآخر أن .. حأكتب لك |
بِسْم الأَرِِض بِسْم الأرض واللوبي ، والعيشريف ، وأطيان الجروف وندى الصباح والحِنـــِّي ، والطنبور ، ولمعان السيوف بسم الوجوه السمرا دي شايلي الحنان والطيبة والريد والوفا تدِّي القلوب كل الأمان من كلِّ خوف ** بسم الشمامير والضراع مفتول يشق جوف التراب شان تحيا ناس وقع الطواري حلاتو لما يمازج إيقاع الحياة ونقر الدفوف ** بسم البحر وكتين يلين ويجي النسيم يرتاح الموية والشفّع عرايا يدفرو طوف وبإسمهم لمان يروِّحو "ود عِجِل" أو " سيدي أحمد" في صفوف ** بسم التمر بركاوي ، قنديل ، والمدين وكتين يسوِّي أم راس يزربوه من العوين قلب التمر ، ضفر البروش ، قطع الجريد ... ونقريشو لي ضُلاَّلة أو واقود وكت في بلدنا ناسنا يسووا بوش ** بسم السبيط طبطابة والآشميقة والمسّيرة والحبل المبيَّع بالإيدين ..... مليان بَرِم مكسور تلات مرات يجيبلو تلات قروش في السوق – عشان ربط الدحوش – ما يخربن البرسيم ونوَّارو النِّجِض ** بسم الأرض والكمتر الشالوهو مقلوع منقرض والبوغة والموية التّدفِّق تنكسر وطير البقر دا الماهو داير يتنهر ** بسم الهجير .. والصيف وحبّات العرق والفي الشمال ... رغم الضنا ورغم العنا قام هبَّ من البيت مرق وعاد المغيرب للبيوت .. غمران رقد طعم الكفاح باقيلو أحلى من الشهد ومرتو اللي جات شايلي الكبابي ملاني شاياً بي لبن هي تقول له : قوم .. الشاي برد وأولادو جنبو : أبويا قوم هيي ... لا تنوم دايرلي قرشين ... يابا قوم ديرلي نعلين ....... يابا قوم دايرين طِرح ... يا يابا قوم بسم الفرح ... تلقاهو قام وبسم الفرح أنا داير أقول : ** بسم الرتاين الفي الديار متوهجي عاينوها جهرت "ود هناي" يا أمُّو شيلي ورقِّدي ما الدارة ذاتا معجّجي خلق الله لا تتحاججي أنا قولي لسّع ما كِمل ** بسم القمر وكتين يهل بسم القرير دا ، غني وفقير كبير .... صغير ** بسم الحفير حتى الجداول وكل بير بسم الدلو وساعت النشل بسم الخلاوي ، وشيخنا "ابراهيم" ولد "شيخنا العوض" بسم الكتاب الآيتو تشفى من المرض الأردواز شدر الحراز حتى الطلح وريحة الطلح والدومي والخرومة والبرم السمح والساقي والقادوس وسنبلة القمح ** بسم التُّكُل ودخانو فوق الدار تعوس سوَّالو ضُل والصاج وصنقيرة البُقُل حتى اللَّدايات والدُّقُل والكسري والقراصة لاعند العجين الزادو موية لأنو مر ** بسم البلد دي ... شبر ،،، شبر الفاس مع القدُّوم ، كمان والكونشبِــر والطير جميع أصنافو : قمري ، وقنيقرَد حِمِّير ، وطير الجَّنِّي ، والكُرجي و"حسين كضَّاب" جنا الوزين يعوم ... والليل برد ** بسم الشعر من عِنْ "حسونة" ولا "محمد" حتى "ود زينوبة" .. "قوتة" ... "بت ود محاري" وفارس الحوبات "حسن" بسم الجمال والخضرة والوجه الحسن غنّالو يوت "حُمَّد سعيد" عبر الزمن {زولو الوسيم }.. { طيفو الرَّحل } ... ... و {قلبو الجريح }... { طيرو البخافلو يجينا بي جاي يتخمل } ... و{ أخو العزيز} يحيى الولوف ، والعيد كمان وقولو السمح : {أهدي السلام لي أهلي ديك حبان قساي داني وبعيد } وقول الخلوق الفيهو يوقد النار يقيد شان قالوا : عايش كيف سعيد ؟ وان شاالله يا حُمَّدسعيد ، تصيح سعيد ** بسم المشاوير اللِّي عشتها شايل الأفراح معاك لي كلِّ زول سهران ... زمن غلبان ..... زمن كم حول وحول وتحوم ، تجول لا قُتْ فترت ، ولابتقول ذاكر الأهل وتغني دايماً للأهل خلَّد إسم ناس "بت بتول " ** ومع الزمن يخلد كمان إسمك يمين متل الشديرة الصامدي فوق "قوز أم شديرة" سنين سنين تدّي الحياة معنى الحياة ، وكل الصمود الماب يلين ** بسم القرابة ، وإلفة ، والريد الشديد ونغم الطنابير الترن تعزف نشيد دقّت على دف الزمن إيقاع جديد رسمت على طين "القرير" ألوان "حجر بت الرسول" يتراقشن متل الحرير ويمازجن لمعان هلالك يا عريس يا خوي وأخوي حُمَّدسعيد أعذرني .... أبيات القصيد خذلتني ... ماب أقدر أجيد ما إنت وحدك في دروب الفن بقيتَ أمير وسيد ونحن التلاميذ الصغار من فيضك إتْ نكبر ... نزيد واعذرني داير أستمر لو كان يطاوعني الشعر أنا كت بقول : بسم الملأ الليلة بعلن للملأ : {الحزن تحت المقصلة ... الحزن تحت المقصلة .... يا كرنفال أفراحنا طوف كل البيوت واحضن بلادنا وغازلا ويا عشّهم ظلِّل سحابة خير عليهم ورشّهم بي كلْ عديل بي كلِّ زين وان شاالله بالرفا والبنين وبسم الوجوه السمرا دي حبوبة : قومي وزغردي حبوبة : قومي وزغردي |
إتنكــرى إتنكرى سوى البيبقالك عديل لى فى صدودك كترى اوعك تحنى على تيهى ...واغدرى زى ما صحابك قالوا ليك انسيهو ما تتذكرى انسينى ما تتذكرى وتابعى الوشاية واغدرى اتنكرى وبكِّى العيون ما ترحميهن ... وسهرى ماب تقدرى وعارفك بلاى ماب تقدرى شيلى السعادة ..عذبينى ودردرى وخلى الدموع فوق الخدود يجرن جرى اوصيك ما تتكبرى وعارفك بلاى ماب تقدرى ولوتقدرى فى يوم لقانا اتاخرى كان ثانية بس اتاخرى واتعذرى لكن محال حا تبدرى وبلقاكى واقفة تفكرى ومرات براك تتحيرى يسرح خيالك فى لقاى تتذكرى بالك يغيب وتودرى ولمان اغيب تتكدرى تبكى وتوصفى ..(مزدرى) ليلك يطول بيك تسهرى *** عارفانى عذرك بقبلو وتتعذرى وعارفانى بغفر ليك كمان تستغفرى تستغفرى وتتعذرى يا سمحة لمان تكبرى حا تعرفى ليه ما بتقدرى وعارفك بلاى ما بتقدرى والله احلف ليكى وبيك ما بتقدرى |
خالد شـــــقوري http://www.rayaam.info/news_images%5...105650AM1.jpeg خالد عباس احمد علي شقوري .. من مواليد كسلا 1968 .. تربي وترعرع بها .. بدأ دراسته بكلية الفنون الجميلة .. عرف باسلوبه الخاص ونفسه الشعري المميز .. يمتاز شعره بدقة التصوير والبراعة والمفردة الخاصة .. كتب في مجالات عدة ولكنه برع في الشعر الوطني .. عمل بالاعلام السوداني وقدم العديد من البرامج في الاذاعة والتلفزيون القومي واذعات ولائية مختلفة .. تغني بشعره عدد كبير من الفنانين في ساحة الطنبور والاغنية الحديثة لاتنجع يا الشايل شمسك في جواك خليها تبين للناس تطلع يا النازع فرحة والده هناك غير حس آهاتك ما بتسمع *** يا الناسي اللبقة المفتوحة دي بلاك طوريتك ما بتقرع المنجل في راس التمرة ناسيهو وامك ما بتطلع الكتقة وقعت والحملان في اللوبي بقت تجري وترتع والزير الفي بيت الضيفان حرمان لا نزّ ولا نقع *** يا السبت عقابك وروحت وحيات عز بلدك لا تنجع الشتلة تقولك لاتنجع الواطة تقولك لا تنجع الحوض الما رفعت سرابو ينادي يقولك لا تنجع الحبل الما تميت وسيرو يهاتي يقولك لا تنجع والنيل الفي واطاتنا ترع بيقولك ازرع ولا تنجع *** ماك فاكر يوم داير ترحل وابوك الحاج شايلو عصا لا حيلو وقف طقش الابريق اندفق سال فوق المصلاة قام بارى الحيطة واتوكل ويقوم فد مرة ومية يقع ويقولك يا المبروك ارجع *** ارجع ارجع يا زول ارجع غير ارضك عاد ما بتلقى بطاح شن داير في بلدا والناس ما فيهن حاس وما فيها صباح الليل الويل مليان اتراح الويل الليل مليان اتراح بياع بيقول افراح افراح زي البيقول تفاح تفاح *** مجلوبة الفرحة ومفروشة من ضحك الناس دايرين ارباح لو كان في ايدن ملك الكون كان لمّو عبير الزهر الفاح كان علمو نفس الزول العاش في سدر الليل داير يرتاح كان حجزوا الغيم في واطاتو وكان آمسكين باعو الارواح *** وين تلقى الفرحة وتتهنى في دارا ضيقي ومافي براح جم ناسا من عين العطشان تخطف ومضات البرق اللاح *** سايب اهلك ونخلك راحل قول وين ماشي وين آ صاح الشمس النايري ابت تطلع النيل يا زول اصبح رحراح الضل قصر ما غتى رويس ولدا ساكب عرق الكتاح الواطة ابت تديك الخير ولا انت عليك ما هابي رياح *** قولي وين ماشي ووين غاشي ولي شن سايب بلد الصلاح النسمة ان جاتك بتجيك ملياني عبير عند الفياح الموية ان داير تلقاها نقاعا واطيب من الراح ان درت نغيم الموج تلقى وان درت كمان الطير صداح *** ارجع ارجع يا زول ارجع الضحكة هناك من جوة الجوف الفرحة هناك ما فيها الخوف الشقى ارحم في ضل النيم وبعيد من ناسا واقفة صفوف جم ناس حبان تلقى المكسور مشيول في كتاف واحد مكفوف الجن الاحمر فاقد الحيل في خلوة حاج الخير مكتوف دكان الشيخ فوق الواطة كيمان كيمان ما فيهو رفوف |
مسافة السكة
كنت بقصِر المشوار لو عارف متين أرجع كنت بحدد الميعاد وأبقى من الزمن أسرع إلا مصيري في الأيام هي البتقول وأنا البسمع ******************************* وما لاقاني يوم في الدنيا زولاً حظو كان فاتو مسافة السكة وأرجع ليك معايا الشوق وغُنواتو أنا البهواك وقلبي عليك وأنا الزول البِحب زاتو ******************************* مسافة السكة مهما تطول برضي مصيري أرجع ليك ألم حزن السنين الفات وأقيِّل في ظلال عينيك ألمِّع بالحروف دنياي وأخاف أحزاني ترسى عليك ألِِم باقي العُمر تحنان وأقول للناس حِكاياتو ******************************* ما يهِمك كلام الناس وحاتك إنتي ما ناسي أنا البحسِب عشان ألقاك ثواني الفرقة وأنفاسي وعارف لوعتك يا روح كيفن إنتي بتقاسي وأعمل إيه مع الأيام مع قلبي وصباباتو ******************************* مراسيك وين عشان أرتاح وأعِوض قلبي عن صبرو معاك بحصِد من الأفراح حصاد زولاً زرع عُمرو أنا الراجيك ولي جِراح مُناي بي إلفتك يبرو والآقيك في زمن نشوان تصُب للحب غماماتو |
أم الحسن وقفت بعد حلبت لبينة الشاي تكورك يا الحسن يا ام الحسن وينو الحسن!! لمن صفت رغوة شخيبات اللبن في حلتا المبني من طبق السكن واقفي في حوش البهايم ولسع تكورك يا الحسن جاها حساً من بعيد مارق من القاطوع ورا قال ليها خير يا الحاجي خير قالتلو خير تعال لي جاي دايراك تعنون لي جواب يا الراسي لي ولدي الخدير لا تبقي زي شافع السرير يقول لي زين آيمة زين وزين تبقي بعد شهير وان جاني يكتب فد سطير اقولو يا سجم السجم انا زي قرايتك ما قريت لكن عويناتي بيفرزن الوريقة البيضاء من لون القلم بعد المغيرب بي شوي جاها الحسن تعبان يسير العشى غنمو من الدرب سرقت ندي وشو الهجير سوتلو شاياً بي لبن قرض معاهو حرف فطير قالتلو بسم الله قول وأكتب وصيتي انا للخدير الزمن يا ولدي ماحقاهو السنين البعيش في الدنيا ما بعيش مرتين العمير فاضلي بس منو اليقين وانت طوّل في البنادر يا الحبيب لا متين تعال اوريك حق ابوك الجم حقيق حاج اللمين ان عرفتو بلا عمار يقولو ولدا عندو طين العلاج لا تنسي رسلو لي دحين العوينات آجناي شوفن ضنين سلامنا ليك مطرز للبنيات والبنين ولو الارض يا ولدي تنشال في الايدين انا كت برسلا ليكا في لوري الخزين |
Quote:
لوحة مبالغة ........فيها بساطة ثلاثة الأبعاد..........تتحسسها في كل سطر الله يديك العافية وانت دايما تجيب لينا السمح |
Quote:
لمن صفت رغوة شخيبات اللبن في حلتا المبنية من طبق السكن تتذكر حلة اللبن يا عبده؟ توضع على النار صباح مساء ولها شكل مميز من الداخل والخارج |
Quote:
|
صبرية طفت اطراف الفيافي شلت صبحي وليلي حافي مانسيت ارد القوافي زي طعم صبريه مافي زي عشم صبريه مافي زي نغم صبريه مافي *** شافعي من عربان بلدنا منها وفيها الوداعه شتله في قيزان بلدنا قايمي بي إيده وضراعه القديم اللافه طرقي زاهي في روعة طباعه البسيمات في وجيها الباهي من زمن الرضاعه فاقعي زي شمس العصاري في العمر باقي له ساعه في القليب الشايله صافي زي صفا صبريه مافي في الهجير راحت تدقق في النهارالحار تورق للهدوم بالليل تلتق *** في الجرف زارعالا حوض راجي قبل الحين يبتق والبِسالمه من بلدنا هي تقولو انشالله عافي زي كلام صبريه مافي وزي سلام صبريه مافي في كريقة خالا احمد شايله ليله وايده تنبح شوكي لاقته في زريبه لما كان بالمعز تسرح نامت المسكيني تقنِت والفوينيس زادو روح باقي تمتمه في خشيمه تسال الله المسره تنجح ماله مال المسره الا شان حبيب روحا يفرح *** دي البنيه الريده وافي زي غرام صبريه مافي زي شعور صبريه مافي زي غرام صبريه مافي رادت الناس السمر رادت الصفا والعكر رادت الموج الهدر ردات الحله وبيوته *** في عيون صبريه طلت ريدة الخلا للبحر نافري من قيلة الكرارق وخايفي من قولة السفر والرحيل السرو خافي في قلب صبريه مافي في زمن صبريه مافي وفي خيال صبريه مافي *** والنهايه المن فصول سيرة البنيه لما عادت للبيوت الكانو قبل المغربيه مالقت غير الزوامل شايله احلام الصبيه شايلي عيدان الكرراق في الصباحات والعشيه ضاربي بطن الوادي زفه لمت الناس والسعيه والمطيره الضاربي قبلي لاقت الدمعه العصيه *** والرحيل عز البوداي الرحيل وجع البنيه زي رحيل صبريه مافي ِ زي سفر صبريه مافي زي حلم صبريه مافي |
يا بانه يابــانه مابتصلى الســحاب بالله لاتـتطاولى ايه الجنيتى بلا الخراب ليك كم سنين بتحاولى قبال يرضرضك الزمن مش كان أخيرلك تسألى وتعرفى سر قلبو الصبح من الندم صليان صلى يابانه غشاهو الأمان خدعو المقام المخملــــى ورغم الزمن وراكى وين لكنو قاسى تحصلى ماأصلو قبلك كان بريد نجمايه فى قــلب السما يرجاها من عصرا بعيد فى تقنت الشوق النـمـا يشقى ويشق صدرو الاسف تبقى دنيا مغيمه وكان الفرح يملاهو يوم يلقى القمر غاب وأحتمه ماقصدو بس داير يشوف النجمه واضحه معالمه يابانه كان بالجد قنوع تكفيهو شوفت الملهمه من الظهور حتى الإفول عينيهو ما بينومـه كان من بعيد بيسالمه فرحان سعيد بيكالمه لكن محال ينتم حـال جه الشوق ملك قلبو وعمه وبدا الودار يومو القال النجمه لازم يوصله يابانه لاتستغربى بالله بس شوفى الحــصـل حضر كليمات الحنان زادو الغنى وشوقو الرحل وأول محاوله للوصول داير مع النسمات يصـل لكنو يركب فى البساط يلقى البساط مـنو اتمصل فكر وقال عند المساء يرجاها فوق راس الجبل وفى حلكة الليل الطويل يابانه لم الليل دخـل شاف النجيمه معلقه وشاف روحو فى توب الجهل براحه لملم أنتو فى ليلو واندرج نــزل الشى العــجيب رغــم الفــشــل لامله يوم لاحتى مات فيهو الأمـل وآخر محاولة للوصول كانت رحيلو مع الشعاع إستنى فى الليل القمر ساب الأرض مقدار ضراع وإستنى قارب الهم رسى فى مشرع الشوق المطاع مسك الشعاع وبدا الطلوع بين الغيوم كان خبرو شاع جات غيمه من بلد الندم سايقاها عاصفه من الوداع قطعت خيوطو الماسكه واتهاوا فى لجج الضــيـاع وعشان بريد من قلبو جد لقالو فوق اللجه طـوف عيدانو من شجر الوفاء وحبالو من غالى الحروف وداهو لى ساحل الندم وراهو فى العشاق صـنوف قاليهو فكر ياقلب قاليهو عيد الماضى طــوف إتواره غاب طوف النجا خلاهو فى إيــد الظـروف فتح عيونو مع المساء شاف النجم دانى القــطوف بكى وابتسم وعرف صحيح انو البعيش لابد يشوف لو كان صبر يابانه يوم وإتمده فى ضـل اليـقــــان لو كان رجى الأقدار تجى وخلى القياده على الزمان لو كان عرف انو البسير فوق الدرب يوصـل ضمان مكان شقى القلب الودود و يابانه ماكان اللكـان وصيتى ليك لمن يقوم غصنك جــديــــد إتــمهـلى أوعك تكررى محنتك أوعك كمان تستعجـلى بلاتروحى وتتعبى الغـيث يجيــكى من العـلى ولو انتى مــديتي الصـبر حتى النجــم تتناولى |
أمي أمي البتصحا مع الفجر وتندلي لاطرف الجرف وتجينا لاعند الضهر تفرش بشنتيقا وتجر نما تمسربوا الصبر وقداما لوبايات خدر تقعد قصادن للعصر ولا حيلا كب تنهض تقوم وبلا كسل توقد الجمر وتجيب حليلتا دي الزمان كانت تشد فوقا النذر وتكرد قعيرا من المكرتب فيها عاد من كم تشر وترمي البليلي وتزردا بي ألمي تب لامن تخر وترميلا بصلاتا قلاد الحلة من تقلن تتر وساساقا لا عند العشي ولا من يأذن بابكر وقتين خلاص تبقي إستوت ترميلا فيها هوين تمر وتملأ الصحين للحاج أبوي دايما تقسم بالكبر وتنده علي بت الخزين الحاجي أمنا أم نصر وتملأ الكويرية وتخب لي ود علي الحامي العذر ونحنا البطان تملالنا عاد قدحا يمين ماشاف فقر توقد لنا اللمبة أم ضنيب وترميلنا تاني هوين تمر وبلا وصية نغرفوا تب ونجقم الميهية ضر يغلبنا مانقدر نقوم نافخين بطيناتنا السمر فوقا السياييل والغبار تنجاري من حد السدر كاتل عويناتنا النعاس نصل العناقريب بالجبر وأمي البتصحي مع الفجر تلقاها لاعند الفجر تنده علي سابل الستر زيد الأجر زيد الأجر زيد الأجر |
عوض خضر الابيات دي من اشعار الشوايقة (كاتبها قريرابي ) وا عجبتني جدا........
الحمـــــد لله الخــلقـــنا شـــــوايقــــه وما سوانا من خلقو الكتيره الضايقه أدانا القرير أرض المحنه الرايقه الغــبش.. التــرابله.. الطيبتم متلايقه.... بلد رايقة ( دي مني)......ههههههههه |
| All times are GMT. The time now is 02:54 PM. |
Copyright ©2000 - 2024, Futeis.com