|
مطبخ ام محمد
نفتح لينا مطبخ ونشوف تجارب الناس ونستفيد من بعض
وكل انسان عندي فكرة ولا حاجة جربها ونجحت وزبطت اجي يخش المطبخ بدون احم ولا دستور ما تقولوا قوقل مليان نزيد والبحر ما بيبا الزيادة ..... نبدا بي اكل رمضااااااااان صينية رمضان ... عصيدة . ملاح تقلية ملاح نعيمية ملاح روب (ابيض , احمر ) .. قراصة .. سلطة زبادي .. شوربة (انواع ) .... تحلية.. وفطاير ... عصيرات ... حلويات( لقيمات ..باسطة.. بسبوسة..وغيرها بليلة ( عدس , كبكبي , وفي واحدة فيها انواع مشكلة ) .. فول .. طعمية ... اها جوعوا ساااااااااي الخير راقد بجي امسك كل واحد براو اها فتكم بعافية بجيكم صادة ان شاء الله تعالي |
غايتو بنجي نتاوق....ونطمطق....أم محمد.... دايما في الوصفات ركزي علي خيارات المقادير والمواد
كان نقدر نتابع وعندنا طلب خاص (ملاح الويكاب وأم تكشو) |
سلام ام محمد
جابني شمار المطبخ دا خصوصا جاء في وكتو رمضان علي الابواب وكدا وياريت كل زول اجي اتاوق ادينا طبخه وماتستهيني بخبرات الرجال في الطبيخ يعني حتي هم الكلام ليهم. يعني واحده بواحده مثلا كان في شخص عاوز وصفة ام تكشو لازم ادينا وصفه غيرا حتي ننفذ طلبو. يلا ابدي علي بركة الله وياريت تركزو علي اصناف العشاء لانو صينية الافطار اصنافا ساهله ومعروفه. امشى اجهز لي كم وصفه واجيك راجعه. |
Quote:
غايتو يا قول ام رهف متاوقة وتمطق مجااااان نهي نهي بي جاي مافي جيب ليك وصفة خاصة مجربة وان شاء الله ربي يقدرنا ونشوف حكاية المقادير دي لانو نحنا شغالين بالتقدير كلو جايين عليو ويكا ب وام تكشو ..انتظروا افتتحاح مطعم ام محمد قريبا |
Quote:
شوفتي كيف خوف شديد من رمضان خلااااص التفكير كلو بقي في المطبخ فكرتك حلوة اتمني نستفيد من خبرات بعضنا والناس دي كلها دخلت المطبخ وشاطرين جدا فيو .. وزي ما قلتي العشاء مهم ومرااات كتيرة نشرب موية في الفطور ويغلبنا الاكل عشان كدا العشاء مهم شديد اصناف الفطور ساهلة عشان كدا نبدا بيها يلا منتظرة وصفاتك ما تتاخري علينا ومرورك والله بالجد اسعدني ا |
نبدأ بالعصيدة مسمار القلب
تلات انواع ...... عصيدة بالذبادي .... عصيدة فطيرة ........ عصيدة خميرة بالذبادي راقية وحقت الراقيين والناس الخفاف الما بالحيل علي العصيدة منظر وشكل وتكون حاجة كدة وسط حاجات كتيرة يعني جزو من كل المقادير .. من الاول كباية الشب ( حقت الجبنة السايلة .. او اتنين كاسة الشاي السادة تعادل 220 مل كباية ونص دقيق ابيض كباية ذبادي كباية موية ... رشة ملح نخلط الدقيق والذبادي مع الموية والملح كويس وفي الحلة نضع موية شوية تغلي ونضب المخلوط دا في الموية مع التحريك المستمر ( عشان ما تكرضم ) ومن ما تتقل وتبدأ تفك بالاطراف من الحلة معناها استوت ونجضت ونجيب قالب ونمسحو بشوية زيت ونكب العصيدة في الغالب وبس وبالهناء العصيدة الفطيرة دي حقتنا المعروفة بنفس الكباية الشب عجين خمير مقدار كدا معقول ويكون قوامو تقيل اتقل من حق الكسرة كوبين من الماء تغلي في النار ونصب عليها العجين الخمير شوية شوية مع التحريك المستمر بشكل دائري من اليمين ومما تتقل قوامها نخفض النار ونضيف موية شوية ونغطيها مدة بسيطة ونجي نحركها ونعرفها نجضت نبل الاصبع في موية ونضعه في العصيدة طلع نضيف معناها خلاااص جاهزة نصبها في الغالب بعد ما نمسحو بالزيت او شوية موية العصيدة الفطيرة كمية من الموية زي ست كبابي موية شب تغلي في النار ... دقيق ابيض ,,, او اسمر ملح شوية زيت الطريقة نضيف الدقيق للموية البتغلي بعد ما ناخد منها موية قدر كباية شب والدقيق يكون اكتر من الموية يعني سميكة وقوية وبعدين نضيف الموية الساخنة دي ونغطيها لحدي ما تنجض .. ونكون خافضين النار( عشان ما تقنن) ونعرفها نجضت من العجين يفك من الاصبع ونقطعها في القالب وبالهناء .................................................. .................................................. ........... العجين الخمير بالنسبة للناس المغتربين .. في ناس بتعمل الكسرة الخميرة لو عندهم في الفريزر يعني يختوها في الموية البتغلي وفي ناس بجيبوا كسرة ناشفة معاهم من السودان شكلها زي الابري الابيض |
أول حاجة نقول حمدلله ع السلامة أم رهف...(أمسك يا عارف ..دي من الناس الكانت غايبة)
ثانيا....سبحان الذي جعل للعصيدة أنواع (تطور شديد) سؤال... الدقيق دا كلو دقيق عيش....ولا برضو اتطور |
حمد الله علي السلامة أم رهف وجيتا جيتي ومعاك أكلات رمضان وجرسة ام محمد من دلوقت .. خليه أجي والنشوف فيهو شنو .. بس لو الجو بارد القراصة حكاية وحكايات .. في الطبيخ نهائي ما عندي فكرة بس متزوق خطير ومسفسف بارع ..
|
كترو الاكل بس.....الامساك عندنا الساعة اتنين....والافطار الساعة عشرة
كباية ونص دقيق؟؟؟؟؟؟ حرام عليك....ركزي علي الملوة...والكيلة...يا ام محمد |
Quote:
العصيدة بالزبادي بالدقيق الابيض القمح الصافي والفطيرة بالقمح الابيض او الاسمر (البُر) الخميرة بدقيق الذرة (العيش) ملاحظة جميلة مشكور عليها وفي حاجة تانية في العصيدة الفطيرة بعد ما تستوي وقبل ما نقطعها نكب شوية زيت ونحركها بتتقلب بسهولة والحلة بتكون نضيفة |
Quote:
كدي يا شيخ قول كلام غير دا والقراصة دي مهمة بندخل عليها مباشرة بعد العصيدة كدي النعوس اول بعدين نشوف الملاح وكدا |
Quote:
عبدو كباية ونص دي للجماعة الراقين بس انت كب بالشوال وتعال هنا انت بتضحك علينا ولا شنو .. وانت قاعد مع الخواجات ديل الشكية لي الله ما تعلمت منهم حاجة جديدة ومبتكرة ان شاءالله بيض مسلوق في حليب هههه جيب لينا منهم حاجة خليني نقشر بيها في رمضاااان خلي ملااااح بسم الله دي (الويكاب ) ولا ام تكشو |
ملحق بسيط للعصيدة ممكن تتعمل من بالليل وتتخت في التلاجة
وعادي تتسخن بالمكرويف مع موية بسيطة قدر فنجان او علي النار في حلة نعمل ليها حمام موية سخنة تكون قدر كباية كبيرة . القراصة او ملكة المائدة المكونات دقيق قمح صااااااااافي ملح دي ناس الشمالية تخصص دقيق وملح وموية تتضرب ضرب مٌبرح وبس وفي ناس تعملها بالخميرة مكونات نص كيلو ( دقيق ابيض صافي وممكن ناس تعمل الاسمر براو وممكن اسمر مع شوية ابيض ) معلقة صغيرة خميرة ........ رشة ملح . الموية نختها في مكان دافئ .. ونعجنها بدري شوية قبل ما تختي الملاح في النار ونغطيها ولما حجمها يتضاعف خلاص نجي نعجنها نديها ضربتين تلات هنا في ملاحظة نخلط الدقيق مع الخميرة قبل نضيف الموية ناشفات نضمن الخميرة اتوزعت تماااااام وبعدين تكون سميكة وتقيلة ما نكتر الموية نسخن الصاخ شديد في الاول وبعدين نقصر علي النار ونمسح الصاج بالزيت ونكب قدر كباية مقاس معقول حسب مساحة الصاج ونفر د القراصة وعشان تطلع لينة شوية بعد ما نقلبها نمسح القراصة بشوية موية لو العجين سميك وتقيل بتطلع قراصة خمسة بوصة ولو العجين سايل كدا قريب لعجين الكسرة بتطلع قراصة رهافة ... |
Quote:
ولكن فعلا ....إضافة اللبن للبيض...دي ما اظن كنا بنعملا بس اتعلمناها هنا الحكمة شنو ما عارف بس اضافة لبن في البيض..ثم خلطو مع بعض ........ بجيك راجع بي حاجات تانية .....كان لقيت |
المطبخ جوعنا وجاتنا الريحه جينا نفتش كان القي لي ملاح لوبه ظريف كده وعندي خبره في ملاح الويكاب بكل الانواع باللوبه والبصله المحمره واللبن |
Quote:
نحنا زاتو دايرينكم تجوعوا عشان تجو بي جاي اللوبة جاية حاااااارة بعصيدة وسمن كمان والظاهر بنبدا بالويكاب دا سوقو حاااااار . وانت ورينا طريقتك منكم نستفيد ..مشكور لمرورك ودخولك المطبخ |
ملاح الويكاب
في كم طريقة وكل زول عندو طريقة يعني مافي وصفة ثابتة يعني في ناس بتعملوا باللبن (الحليب)وفي ناس بالموية ... دا اتفاق من الاول في ناس بتحب اكلو بالكسرة وناس بالعصيدة .. الويكة هنا بتلعب دور حسب القوام تقيل او خفيف ويكاب لبن (حليب) ودا ساهل خمسة دقايق لتر لبن يغلي في النار اضافة مكعب ماجي ومن اللون يتغير ويبقى اصفر نضيف الويكاب المبلول في نص كباية شاي بعد مانصفيو ونقصر النار ونلايقو بالويكة تلات دقايق وخلاص الشطة .. السكر .......... رشة حسب الرغبة .................................................. ................................ ويكاب لوبا لوبا نضيفة كباية كبيرة ...... حليب (لبن ) مقدار كبايتين ... ماجي ...دكوة معلقة كبيرة ...بصلة واحدة.... ويكة زيت شوية البصلة تشويح وليس تحمير نضع اللوبا مع موية وهنا نضع الويكاب طوالي بعمل عمل العطرون بخليها تستوى بسرعة نضيف الحليب والماجي والدكوة بعد ادبتها في شوية موية ونلايقو بالويكة وخلاص ( الويكة مهم شديد شوية شوية لكي نتحكم فيها ويكون قوامو مناسب ) في ناس بتعملو بالفول السوداني المدروش وبالهناء |
الكريب
دا عندو جهاز وهسة الناس بعملوا بيو القراصة عادي بشتغل بالكهرباء ( غلبني انزل الصورة ) الكريب ود عم القراصة حقتنا كوب دقيق 2بيضة كوب لبن (حليب) لو دايرة زيادة تضاعفي المقادير ونضعهم في الخلاط بجي شكلهم سايل كدا زي النشاء الواحدة دي نضع شوية زيت في الطوة ونصب في وسطها شوية دايرة كدا ونبدا نحرك الطوة وتكبر الدائرة وناخد المقاس المناسب معانا وتضعي عليو الحشوة لو حلو ولا مالح مربة ....عسل .... قشطة......... نقانق مبشورة ..تونة .. سلطة خضار مسلوقة مقطعة صغار .. وغيرو حاجة ساهلة وسريعة وبالهناء |
ملاح النعيمية
دا ملاح وسط كدا بين ملاح الروب والتقلية مكوناتو .. بصلتين .... علبتين زبادي 1000جرام....لحمة مفروم ولا شرموط (اللحمة الناشفة ) قدر كباية ولا200جرام....ويكة معلقة ص .. دكوة معلقتين ك ...صلصة دقيق ابيض قدر فنجان .....بهاراتك ( فلفل اسود.. كزبرة ..شمار ) الطريقة / نحمر البصلتين تحمير تحمير دهبي كدا وناشف ( مانخلي يحرق ) نضع اللحمة المفرومة ولا الشرموط والصلصة وموية نغطي بيها اللحمة المفرومة ونضيف الملح والبهارات ونخليهم لما تنجض وتعمل وش كدا نشيل الوش دا نحتاج ليو بعدين .... وهنا نخلط الزبادي مع الدقيق بالكنش(المفراكة )حقت اليد احسن من الخلاطة وحقت الكهرباء بتخليو سايل شوية ونخلط الدكوة في موية شوية ونضيفهم على النار شوية شوية مع التحريك ونلايقو بالويكة لو حبينا وبس نصب القدحة القبيل (وش الملاح ) وعلي العصيدة ولا الكسرة وبالهناء الله يديكم الصحة والعافية واللقمة الدافية |
مكرونة بالباشميل
مكرونة 500جرام .. الباشميل .. بطاطس 3حبات متوسطة محمرة حلقات رهاف (شبس) لحمةمفرومة 400جرام اسود محمر حلقات ... الطريقة / نسلق المكرونة في موية وملح وشوية زيت ونصفيها بموية باردة بعد ما تنجض اللحمةالمفرومة علي النار مع البهارات وشوية موية تقليب بسيط وتستوي نحمر البطاطس والاسود الباشميل / زبدة فنجان ..علي النار كباية شاي دقيق ونحرك , ونضيف حليب (لبن) مقدار مناسب ونطعمها (ماجي ) معلقة كبيرة جبن سايل ( شكلها زي نشاة الحلبة ولا خفيفة ولا تقيلة ) اي بهار لو حبيتو فلفل والوقت دا كلو الفرن يكون شغال ... نجيب صينية الفرن ونخت زبدة شوية ولا زيت ونرص المكرونة صف واحد نفرشها علي الصينية ونغطيها باللحمة المفرومة نرص البطاطس والاسود ونضع الباشميل وتاني طبقة مكرونة ولحمة مفرومة وبطاطس وباشميل ونبشر جبنة ( ولا جبنة سايلة طبقة خفيفة علي الوش ) وعلي الفرن تاخد زي 20 دقيقة كدا ( حسب الفرن ) وبالهناء |
هو بالله دي بقول ليها مكرونة بالبشمل
دي حا تكون أول التجارب........في رمضان لك كل الإحترام والتقدير ورمضان كريم |
السلام عليكم ام محمد ام رهف اخونا عارف ومديرينا عبدو اولا التحية للاخت ام محمد ومجهوداتها يا ريت لو تدونا وصفة ملاح اللوبة العادي لوبة بيضاء
طبعا الاخ عبدو ما بيعرف غير البطاطس انا متاكد من كدا اسالوهو عنها محمرة او مجمرة او مشوية او مقلية اي نوع فهو خبير فيها |
الأخ عبدالعزيز...رمضان كريم....وربنا يتقبلو بي صيامو وقيامو
..................... انت عارف عيبنا نحن السودانين.....من ما تبدأ حياة العزوبة..أول حاجة بتتخصص فيها "حلة القطار قام" واخوك خبرة طبعا بالإضافة للبطاطس ...زي ما قلت ..لأنها فرضت علينا فرضا ولك التحية دايما |
Quote:
اللوبه البيضاء (لوبه عفن) اي بقوليات نبلها في الموية اقل حاجة 6 ساعات عشان تطير القشرة او القشرة تبقى لينة ويسهل هضمها (فول مصري ..بليلةعدس.. كبكبي.... لوبا ........و) 2 كباية كبيرة لوبا بهارات ... بصلة ,,, 2معلقة كبيرة دكوة .. لو داير ويكاب شوية نغلي اللوبا في موية وفيرة وبعد ما تستوي نحمر البصلة شوية والدكوة والويكاب وملح نكبهم في اللوبا البيضاء ولازم تموت يعني تموت ونلايقها بشوية ويكة ناعمة شديد وبس بالهناء والعافية اللوبا (العدس المبشور ) مقدار منها 2كباية كبيرة لوبا مبلولة بصلة ..بهارات ملح (او ماجي ) .. ويكة ناعمة .. شوية عدس مصري .. صلصة الطريقة .... نحمر البصلة دهبي كدا .. ونضع اللوبا والعدس ونحمسهم شوية في الزيت والبصلة دي ... وبعدين نغطيهم موية ولما تنجض نضيف الملح او المرق والصلصة ورشة ويكة وبس وبالهناء |
الفتوش
الفتوش في كلمات كدا عاجباني ولما افتش فيها القها ليك حاجات متوفرة عندنا وعادي ممكن اي زول اعملها في خمسة دقايق .. قال فتوش قال سلطة ,,وخبر طماطم مقطعة صغار ..عجور (خيار ) بصل ابيض ( او بصل اخضر ) خص (جرجير) اي خضار ( ورق الفجل) المهم في الموضوع السلطة العندك في البيت مقطعة دقاق وقطعة خبر مقطعة صغار ونحمسها في معلقة زيت ويبقى لونو دهبي وبس الاكل جاهز اخر شي نضع الخبز المحمص عشان ما يشرب من موية السلطة ويبقى مقرمش وملح رشة وخل او ليمون بسيط والزيت (زيتون .. سمسم ) وخلاص |
رمضان كريم
وان شاء الله ازمة الغاز دي ما ثرت علي الشغل وين السلطات وين الحلويات كدي حلة جداد كاربة كيف ( اللهم اني صائم ) |
التحيه ليك ام محمد وانتي دايما ما تاتي بالجديد والمفيد وتحاولي انعاش المنتدي انا حاولت اعمل ملاح التقليه والحمدلله الفكره نجحت بس داير اتاكد المقادير من الخطوات العملتها سليمه والراي لي ست المطبخ المقادير ربع لحمه بقري مفروم (في الوضع الراهن بتعمل حلتين ) 4 بصله كبيره فنجان صغير زيت ملعقه ونص صلصه كميه الويكه (تعتمد علي الويكه وجودته) 3 فصوص توم +فلفل اسود +ملح +(شطه حمراء حسب الطلب ) طريقه العمل وضع الحله ونضيف الزيت ونتركه حتي يسخن ونضيف البصل المقطع شرايح (وتسمع صوت البصل عند وضعه في الحله) ونقلب البصل حتي يصير لونه ذهبي وبعدها نطفيه (اي نضيف كميه من الماء تغطي البصل)ونتركه يغلي بعدها نضع اللحمه المفرومه ونضيف ملعقه من الكسبره وبعدها يتم كتل البصله بواسطه الكنش (المفراكه) ويتم اضافة التوم والفلفل والملح والصلصه ويحرك جيدا حتي تدوب الصلصه وتترك لكي تستوي لدقايق بعدها تضاف الويكه وتحرك بسرعه عشان ما( تدردم ) وبعدها نتركة لفتره بسيطه (اذا طالت المسافة الويكه بتنقطع ) |
Quote:
لا الحمد لله المطبخ شغال عاملين حسابنا عندنا هيتر صغير ما عاصرين على الغاز كتير الحلويات جاية والسلطات ان شاء الله خليك قريب في الضل حق المطبخ الجداد دا بجيك ليو برواقة خليك من الدمعة والسبكة وما تنسى شعار المطبخ مجان مافي جيب ليك حلة وتعال |
Quote:
حلتك دي مئة المئة ما فيها كلام بس نضيف ليك حاجة بسيطة كدا الصلصة ختها طوالي مع اللحمة المفرومة والبصلة دهبية لو حمرنها شديد طعمها بظهر مر في الملاح ايييي يا عمار الملاح النار الكتيرة بنقطع ولو غطينا الحلة وهو حااار كمان بنقطع ( اي ملاح مفروك لو غطينا وهو حار بنقطع ) شوفتا كيف يا عمار دي فوائد السفر والغربة بقيت طباخ ماهر هههه |
مشكوره كتير ام محمد ما قصرتي وانشاء الله نعمل بالشي الاضفتي ومنكم نستفيد والغربه ما قصرت ادتنا وشالت |
السلام عليكم والله انتو مطبخكم دا طلع صحي صحي تابعت ليكم المكرونة بالبشمل لشئ في نفس يعقوب ولقيتك يا ام محمد ختيره بس ماتسمعي الكلام دا تحاولي تفرضي علينا رسوم وكدا حقيقي مطبخ مهم جدا جدا وشامل جدا وممتع جدنين انا غايتو ما عندي ليك اي حاجه اقدمها بس بعرف اكل والله فريز في الاكل دا كيف ذي التقول بعرف اعملوا |
ام محمد رمضان كريم طبعاً ماكنت عارفة في مطبخ شغال بي جاي والا كنت جيت من بدري وقعدت في الكراسي القدام عشان اتعلم منك
وعشان ما اكون جيت ويدي فاضية ح انزل ليكم طريقة عمل البيتزا (( ده لإني بحبها جداً)) أولاً: مقادير العجينة : 3 كوب دقيق 3 ملاعق كبيرة زيت ملعقة صغيرة سكر نص ملعقة صغيرة ملح ملعقتين صغيرة خميرة نص كوب زبادي بيضة الطريقة : اول حاجة نخلط الدقيق والسكر والملح والخميرة مع بعض بعدها نكب ملاعق الزيت والبيضة والزبادي عليهم ونعجنهم كويس ونضيف قليل من الماء الدافئ حتى تتماسك العجينة بعدها نغطي العجينة و نتركها لمدة ساعة حتى تتخمر وبعد ما تتخمر نفرد العجينة دي في صينية فرن مدهونة بي شوية زيت او سمن بسمك 1 سم ونجي لمقادير الحشو : صلصة , فلفل أخضر , زيتون , جزر , فطر , ممكن نعمل سجق او لحم فرانكفورتر وفي ناس بحبوها بجبنة الموزاريلا او الجبنة التركية والخضار بس المهم اول حاجة حنضع الصلصة في وش العجينة المفرودة بعدها نبدأ في وضع حشوتنا البنحبها وندخلها الفرن بعد ماتقرب تستوي نطلعها نرش الجبنة وندخلها تاني لما يكتمل النضج ,,,, وبالهناء والشفاء ,,, |
Quote:
عمار الغربة ادتنا وشالت الحمد لله على كل حال ما تنقطع من المطبخ .. المطبخ مطبخك .. ونحنا منتظرين كم حلة كدا |
Quote:
صحي دا ان شاء الله ونتمني ذلك لاكن مع الماجي المتهمة بانها ما مضمونة والدكوة كمان ربي يقدرنا نقنع منهن نهائى .. ويكفينا ربي واياكم امراض العصر دي اما الرسوم والله فكرة وداخل علينا العيد تساعد شوية نحاول ندرس الموضوع بجدية وقصة ما عندك حاجة دي صعبة .. والحالة شوفناك وفرحنا قلنا ود البدوي جاب الحلا صينية كبيرة مشكلة مع طريقة عملها بمناسبة رمضان |
Quote:
بركة في المطبخ الجابك لينا وعرفتك ما بتجي ويديك فاضية ومشكورة على صينية البيتزا وما تنقطعي طوالي بجاي وانت عليك الفطاير ساهلة وخفيفة لقيتك ان شا ءالله مرة والنسوان ورا المطبخ تحت تصرفك في اي وقت ..مشكورة على دخولك بقوة |
التحيه ليك ام محمد صاحبه المطبخ الراقي انا ما عارف الحاصل لكن شايف الناس كلها قلبت علي المطبخ عشان رمضان والا المطبخ كارب انا عندي طلب بسيط بالنسبه للكيك وطريقة عمله والمقادير خليها بالكوباية والمعلقه بدل الجرامات ودايرك تشوفي طريقتي في عمل الكنافه المكونات كنافه (جاهزه في البقالات ) سمنه بلديه سكر مكسرات (فول سوداني - زبيب -.............) الطريقه فرد الكنافه وذلك باستخدام سكر وقليل من السمنه مسح الصينيه جيدا بالسمنه وضع طبقة من الكنافه علي سطح الصينيه وضع المكسرات وضع طبقه اخري من الكنافه (وهكذا حتي تصل سمك مناسب) وضعها داخل الفرن ومراقبتها (لا تحتاج لوقت كتير ) حتي يصير لونها ذهبي اثناء ما هي داخل الفرن نجهز التسقيه وهي عباره عن سكر وماء وقرفه ونقط من ليمونه ونحرك حتي يدوب السكر ويصير في شكل عسل بعد ما تستوي نخرجها من الفرن ونضيف ليها التسقيه في انتظار التصحيح |
Quote:
أكبر همنا ههه.... والكلام بالاخضر دا نحاول ان شاءالله عشان نسهل للناس كنافتك مافيها ولا كلمة وما دايرة تصحيح انت كفيت ووفيت ودايما بتزكرني بحاجة نلفت انتباه الناس فيها وبكون جربتها كم مرة وظبطت معاي التسقية ( الشيرة او القطر ) دي المقاس فيها مهم الموية نص مقدار السكر لو السكر كباية الموية نص كباية ونص ليمونة ومعاهو اي نكهة قرفة,, قشر برتقال ,, ماء ورد ,, فانيلا نغلي السكر في الموية وبعدين نضيق عصير اليمون ونحرك ونتركها مدة عشرة الي ربع ساعة في نار هادئة وبس ... ما تنقطع الحكاية امكن تكون فيها رسوم وانت بقيت شريك في المطبخ منتظرين مساهماتك القيمة جدا يا عمار مشكور ( نحنا طماعين وانت كريم) |
كيكة بسيطة وساهلة ومضمونة ان شا ءالله
اول حاجة تاكيد علي صلاحية المكونات ووخاصة وخاصة الباكنج باودر والا انسو تكون الكيكة هشة وخفيفة وكمان ....... الترتيب مهم في طريقة العمل المكونات 1/ كباية شب حليب (لبن) 2/ نفس الكباية زيت تلات ارباع 3/ السكر تلات ارباع الكباية 4/ كباية وتلات ارباع الكباية دقيق ( قريب الكبايتين ) ابيض متعدد الاستعملات الدقيق منخول ..( يعني نصفي بالصفاي عشان يدخل فيو الهواء وبعدين الكيكة تنتفخ ) لكل كباية دقيق معلقة صغيرة مليانة باكنج بودر 5/ معلقة كبيرة فانيليا 6/ تلات بيضات الطريقة .......... اول نشغل الفرن لو غاز ولا كهرباء خلي شغال 180 درجة الخلاطة او مضرب اليد بشغل الخلاطة وبضع التلات بيضات وهنا نقطة خل عشان ريحة البيض واضربهم فيها مدة خمسة دقايق وبعدين الحليب والخلاطة شغالة والسكر وبعدهم الزيت والفانيليا والدقيق معاو الباكنج بودر مخلطين مع بعض نجيب قالب الكيك وهنا مقاس القالب مهم لو دايرة ارتفاعها متوسط ولا عالية حسب مساحة القالب العندك لو صغير بتكون مرتفعة ولو كبير بتكون متوسطة كدا بش هشة وخفيفة نمسح القالب الزيت معلقتين كبار كدا وبعدين نرش في الزيت شوية دقيق وندخلها الفرن .. وما نفتح الفرن النار من تحت لي نشم ريحة الكيكة ربع ساعة الي عشرة دقايق حسب الفرن وبعدين نقفل النار من تحت ونشغل الفرن من فوق ومن لونها اتغير دهبي كدا نقفل النار وما نقطعها الا تبرد براها كدا وبالهناء والشفاء |
أم محمد تحية ورمضان كريم .. أنا بجي بقرأ وببلع ريقي وبرجع .. وزي أخوي عاطف البدوي فريز جدا وخطير .. بس دردمي وانا بهدف .. رمضان كريم كان الود نشارك بحاجة.. لكن غير السلطة ما بعرف حاجة ودنكلة الفول
|
السلام عليكم ام محمد
قسم رائع جزاك الله خير |
| All times are GMT. The time now is 11:55 AM. |
Copyright ©2000 - 2024, Futeis.com