ام محمد رمضان كريم طبعاً ماكنت عارفة في مطبخ شغال بي جاي والا كنت جيت من بدري وقعدت في الكراسي القدام عشان اتعلم منك
وعشان ما اكون جيت ويدي فاضية ح انزل ليكم طريقة عمل البيتزا (( ده لإني بحبها جداً))

أولاً: مقادير العجينة :
3 كوب دقيق
3 ملاعق كبيرة زيت
ملعقة صغيرة سكر
نص ملعقة صغيرة ملح
ملعقتين صغيرة خميرة
نص كوب زبادي
بيضة
الطريقة : اول حاجة نخلط الدقيق والسكر والملح والخميرة مع بعض بعدها نكب ملاعق الزيت والبيضة والزبادي عليهم ونعجنهم كويس ونضيف قليل من الماء الدافئ حتى تتماسك العجينة بعدها نغطي العجينة و نتركها لمدة ساعة حتى تتخمر وبعد ما تتخمر نفرد العجينة دي في صينية فرن مدهونة بي شوية زيت او سمن بسمك 1 سم
ونجي لمقادير الحشو : صلصة , فلفل أخضر , زيتون , جزر , فطر , ممكن نعمل سجق او لحم فرانكفورتر وفي ناس بحبوها بجبنة الموزاريلا او الجبنة التركية والخضار بس
المهم اول حاجة حنضع الصلصة في وش العجينة المفرودة بعدها نبدأ في وضع حشوتنا البنحبها وندخلها الفرن بعد ماتقرب تستوي نطلعها نرش الجبنة وندخلها تاني لما يكتمل النضج
,,,, وبالهناء والشفاء ,,,

عمار الغربة ادتنا وشالت الحمد لله على كل حال

ما تنقطع من المطبخ .. المطبخ مطبخك .. ونحنا منتظرين كم حلة كدا

عاطف البدوي مبارك عليك الشهر

صحي دا ان شاء الله ونتمني ذلك لاكن مع الماجي المتهمة بانها ما مضمونة والدكوة كمان ربي يقدرنا نقنع منهن نهائى .. ويكفينا ربي واياكم امراض العصر دي

اما الرسوم والله فكرة وداخل علينا العيد تساعد شوية نحاول ندرس الموضوع بجدية

وقصة ما عندك حاجة دي صعبة .. والحالة شوفناك وفرحنا قلنا ود البدوي جاب الحلا صينية كبيرة مشكلة مع طريقة عملها بمناسبة رمضان

وفاء مبارك عليك الشهر
بركة في المطبخ الجابك لينا وعرفتك ما بتجي ويديك فاضية ومشكورة على صينية البيتزا
وما تنقطعي طوالي بجاي وانت عليك الفطاير ساهلة وخفيفة لقيتك ان شا ءالله مرة والنسوان ورا

المطبخ تحت تصرفك في اي وقت ..مشكورة على دخولك بقوة

في انتظار التصحيح

عمار سلام كلامك انت عارف القصة رمضان وفي رمضان المطبخ هو الكل في الكل والحالة يا عمار نحنا نردد في سرنا اللهم لا تجعل المطبخ في رمضان

أكبر همنا ههه.... والكلام بالاخضر دا نحاول ان شاءالله عشان نسهل للناس


كنافتك مافيها ولا كلمة وما دايرة تصحيح انت كفيت ووفيت

ودايما بتزكرني بحاجة نلفت انتباه الناس فيها وبكون جربتها كم مرة وظبطت معاي

التسقية ( الشيرة او القطر ) دي المقاس فيها مهم
الموية نص مقدار السكر

لو السكر كباية الموية نص كباية ونص ليمونة ومعاهو اي نكهة قرفة,, قشر برتقال ,, ماء ورد ,, فانيلا

نغلي السكر في الموية وبعدين نضيق عصير اليمون ونحرك ونتركها مدة عشرة الي ربع ساعة في نار هادئة وبس ...

ما تنقطع الحكاية امكن تكون فيها رسوم وانت بقيت شريك في المطبخ

منتظرين مساهماتك القيمة جدا يا عمار مشكور ( نحنا طماعين وانت كريم)

كيكة بسيطة وساهلة ومضمونة ان شا ءالله
اول حاجة تاكيد علي صلاحية المكونات ووخاصة وخاصة الباكنج باودر والا انسو تكون الكيكة هشة وخفيفة

وكمان ....... الترتيب مهم في طريقة العمل


المكونات

1/ كباية شب حليب (لبن)

2/ نفس الكباية زيت تلات ارباع
3/ السكر تلات ارباع الكباية

4/ كباية وتلات ارباع الكباية دقيق ( قريب الكبايتين ) ابيض متعدد الاستعملات
الدقيق منخول ..( يعني نصفي بالصفاي عشان يدخل فيو الهواء وبعدين الكيكة تنتفخ )
لكل كباية دقيق معلقة صغيرة مليانة باكنج بودر

5/ معلقة كبيرة فانيليا
6/ تلات بيضات


الطريقة ..........

اول نشغل الفرن لو غاز ولا كهرباء خلي شغال 180 درجة

الخلاطة او مضرب اليد

بشغل الخلاطة وبضع التلات بيضات وهنا نقطة خل عشان ريحة البيض واضربهم فيها مدة خمسة دقايق

وبعدين الحليب والخلاطة شغالة والسكر وبعدهم الزيت والفانيليا والدقيق معاو الباكنج بودر مخلطين مع بعض


نجيب قالب الكيك وهنا مقاس القالب مهم لو دايرة ارتفاعها متوسط ولا عالية حسب مساحة القالب العندك لو صغير بتكون مرتفعة ولو كبير بتكون متوسطة كدا بش هشة وخفيفة

نمسح القالب الزيت معلقتين كبار كدا وبعدين نرش في الزيت شوية دقيق
وندخلها الفرن .. وما نفتح الفرن النار من تحت لي نشم ريحة الكيكة ربع ساعة الي عشرة دقايق حسب الفرن

وبعدين نقفل النار من تحت ونشغل الفرن من فوق ومن لونها اتغير دهبي كدا نقفل النار وما نقطعها الا تبرد براها كدا

وبالهناء والشفاء

أم محمد تحية ورمضان كريم .. أنا بجي بقرأ وببلع ريقي وبرجع .. وزي أخوي عاطف البدوي فريز جدا وخطير .. بس دردمي وانا بهدف .. رمضان كريم كان الود نشارك بحاجة.. لكن غير السلطة ما بعرف حاجة ودنكلة الفول

السلام عليكم ام محمد
قسم رائع
جزاك الله خير