امثال سودانية ولمن تقال:.:
 

من خرج من دارو قل مقدارو

ويقال للشخص الذي يترك منزله ثم يتعرض للبهدله

*******
الموز بجيبك ياقرد
كراع البقر جيابه

ويقال لمن له حاجة عند اخر

*******
التسوي كريت تلقي في جلدها

ويطلق علي من يفعل مكروها لاحد ثم يعود له ومثله من "حفر حفرة لاخيه وقع فيها"

******

يدوك ليها مملحة تدورها يابسه

ويقال لمن يعطي شيئا ويرفضه ثم يندم علي رفضه ويبحث عنه مجددا او غيره

*****

جني الفار حفار

وبقال لمن يشبه ابيه في الفعل ومثله "ابن الوز عوام"

******

زريبة المك .. البره داير يدخل والجوة داير ينفك

ويقال لمن لايرضي بماناله من نصيب

*****

ناس كفوت وناس لفوت هو يجي من الخلا وهي تجي من البيوت لايدن قوت ولايخلو كلمة تفوت

ويقال للمرأة التي تقضي كل يومها في بيوت الاخرين وتنسي بيتها وواجباتها ثم تكون في مناقره مع زوجها عند عودته

******

جهولة ام سكاسك

ويقال للمرأة الكبيرة في السن وتقلد النساء الصغيرات في تصرفاتهن

******

الأخ مصطفى بالجد عجبتني أمثالك وخاصة مثل ناس كفوت وناس لفوت ده وقلت أغشاك وأرمي معاك شباكي اديك شوية وأرجع لبيتي هناك
شافع العرب إن شاف الأكل يقول جعان وإن شاف الموية يقول عطشان وإن شاف الفراش يقول نعسان لو قالوا ليه فوت يتقطع زي خيط العنكبوت ولو قالوا ليه أكل زي النار في التكل
المثل بضربوه للزول الطبعو شين اي حاجة يشوفها يقول عايزها.
ومثل التسويه كريت طبعا المقصود بكريت هي الغنماية ومعرروف الغنماية بتاكل من الشجر وهنا المقصود شجر القرض (السنط ) يعني التسويه كريت في شجر القرض تلقاه في جلدها شجر القرض البتاكله ده بعدين لما يضبحوها نفس القرض الكانت بتاكله بدبغو بيه جلدها

شكرا على المرور واعذرني على التاخير