فطيس ... تاني .. وتالت ورابع
 

أنشأناها مدينة للسجم والرماد .. في زمن الجراد الوافد من غرب الجهات الأربع .. توافدت الناس زرافات ووحدانا .. كـأن لم يكن هناك أرض ولا سماء .. فقط هذا اللون الطيفي ..من هنا كانت البداية .. ولم تتقدم حتي الآن قيد أنملة ... في أنتظار الدفع الرباعي ...
أخونا عاطف وصف ناس الجنوب بالمناضلين .. حلو .. طيب لماذا لا ننتفض نحن ونناضل وننهض ونحرر ونتحرر من بؤسنا ومواتنا القديم والجديد ..الذي أستوطن فينا وزرع كل أنباته ونباته وجانا بطوريتو وكدنكته و.. ياخي لماذا لا نتعلم من الآخرين ـــ وهنا لا أقصد الجنوبيين . لأنهم نموزج بتال (بطال) ــ لزوم الترجمة علي الشريط ــ حتي النمل يبني أوطانه .. ونحن الأجدر والأحق بذلك .. كرامة الأنسان ورأسه المرفوعة أن يؤسس لدنيا بها طيب الحياة ولو بالقليل ..نتعلم كيف ندأب ونؤثر ونحب الجماعة .. لماذا لا ننهض ببلدنا حتي نستطيع أن ننفخ كضومنا ونتكلم عن السودان النص والسودان الكامل ..
ظللنا ننادي وبالصوت العالي بأن تعالوا لنلتقي في فهم واحد .. وننتقي أفكارنا وتجارب الآخرين ونؤلف ما بين الهدف والمضمون .. ونركز جهدنا في تحقيق طموحات ولو بالقليل تحقق للبلد ولو جزء بسيط .. وهذه حق البلد علينا ودين نحاول تسديده ولو بالتقسيط المريح أو المزعج .. غصبا عن الفلس والحاجة .. ونهمس في أذن أخواننا الذين لا يحركون في الأمر ساكن ..دي بلدكم يا ناس ومافي زول غيركم ممكن أنهض بيها ولازم أكون لينا دور .. ودور مؤثر وجدي وفعال .. وما عيب تدفع ولو 50 ريال .. بس العيب في الخنوع والتلبد وعدم الأحساس بالمسئولية تجاه بلدك .. والألف ميل تبدأ بخطوة .. ومن سار علي الدرب وصل ..وأظن كلنا تهمنا البلد ومافي زول داير عزومة واجيبوا ليك بيبسي وحلاوة وموية باردة وبعدين تكشف وتتجشأ ملء روحك ماسحاً علي كرشك ـــ أن وجدت أو قل صلعتك بالعدم ــ بأنك قدمت لفطيس في كشفها وأتبرعت .. سائراً بتباهي وخيلاء أنك مهم .. مافي زول أكبر من وطنو ..ونحن لازم نجيب بخور تيمان نتبخر بيهو عشان نزح الجن الواقف بين الأرادة والعزم ونشيل العجز المكوم في المفاصل ومانع الاصابع تنفر وتدي الناس تحية كاربة تصفق ليها الناس وهم في صلاة عيد ..
أنتو عارفين السنابل المليانة مدنقرة .. والفاضية مصنقعة في السماء .. عشان كده عاوزينكم سنابل ملأي بأكواب الخير .. ونتواضع عشان بلدنا ونؤثر ولو بنا خصاصة ..
كلامي بقي زي حجوة أم ضبيبنة وكلام حامض أهرد اللسان .. مش أحسن من أن تمتلئ الكراسي بالفريجة ولا نتفق علي أي من مضامين الفهم والرأي .. ونختلف وبشدة في من أسس أسطتبول دي ـــ انا ما قلت فطيس ــ خلاص وصلت وداير أفرتق فرتيقت أم لبوس للدرب تكوس في يوم عبوس .. ينوء القلب بهم الجماعة والأتحاد .. وفطيس تناديكم ياولاد البلد تسلم أياديكم وجيوبكم كمان .. أستاذ حمدان بينكم أهل الرياض أكرام وفادته تمشوا ليهو لحدي عندو وتدوه العليكم من مستحقات البلد .. وما تخافوا الأمير أبو صلعة عندو الموية الباردة والشاي المنعنع والأبتسامة المشرقة والصدر الرحب .. بس ادخلوا لجوه .. وربنا أوفق .. وبرجع ليكم بعد الثرثرة دي لو بقينا من بين الأحياء .. ولكم العتبي

الأخ الجميل عارف..........أب تفه.......كلامك دايما......بلا تخفي وتلفت...تبحث عن الجرح المؤلم وتكتح فيهو وون مان شوو
بحثا عن العافية
البلد محتاجة للناس البرة........لأن الناس الهناك بالرغم ضيق الحال ولكن......ما قصرو
والناس البرة فيها الخير.....ولكن محتاجين لكزة
وكتر خير الأستاذ حمدان الامير وهو يحاول كل الممكن.....لنقل الواقع الي كل مغترب في محلو
نسأل الله له التوفيق
يا عارف واصل والله يدي العافية

جرحنا ده يا عبده داير ليهو ديتول مركز أكون حار عشان الجرح يبري .. ولماذا اللف والدوران والطعن في ضل الفيل .. والفيل قدامي .. لو ما حسينا من تلقاء أنفسنا .. أبقي بلاش تحنيس وطبطبة .. ودا واجب كل واحد فينا ولابد من أن يكون لدورنا في العمل العام للجميع وهم الجميع .. ودمت

ابو عبد الرحمن لك التحيه
انت شابك الناس عشان فطيس
ياخي ما عشان فطيس اي واحد ادفع عشان رقبتو دي
لانو اي واحد لو امه تعبت ساكت وعايزين اودوها الحصاحيصا بدفع قدر المبلغ ده 50 مره
بالله مش عشان رقبتو اخير اجيب الدكتور جنب امه
امكن قاعد ازوغ من امه زااااااتا ... احتمال
وقد اسمعت اذ ناديت حيا .... ولكن لا حياة لمن تنادي

لك التحية أمير .. وياريت الناس تصحي وتنهر الكلال والتعب عن روحا .. وتحس بحاجة البلد للتضامن .. وزي ما قلت لو أمو ــــ لا قدر الله مرضت ــ الحصاحيصا 100 ما بتكفي .. ولا فاكرين المرض خشم بيوت كمان .. ؟؟ المرض بغشي القوي والضعيف .. وفي الآخر هو عمل خير قبل علاج أي أحد .. ولا مو هيك ؟؟

الاخ عارف لك التحيية موضوعك جميل واخلي الواحد يحس بي روح الانتماء
لقريتنا الحبيبة ولو انو مقصرين كتير فيما يخص القرية الحبيبة لكن ربنا يقدرنا
نسوي شي لي قدام ،، الشكر لجميع القايمين علي امر المنتدي لاعينهم الساهرة في
خدمة فطيس الله يديكم العافية.
محمد الجيلي ابراهيم
aljailyi@yahoo.com[/SIZE]

الأخ محمد لك التحية والشكر علي المرور وأمنياتنا للبلد بالتقدم والأزدهار وللجميع العافية