اسماء من منطقتنا (الأستاذ حيدر هاشم مصطفي)
 

مدخل 1: داخل الفصل:
اترزع ياود..
وانت ياطويل امشي جيب لي السوط، ولّا اقول لي حاجة خليني انا امشي افزع واجيكم ياخلايق...
مدخل 2: داخل البيت:
يا ابن خلدون عندك اي برنامج الليلة ؟
لو ماعند ك برنامج حقو نمشي نزور ست دار الجلال لانو المرة الفاتت لما جيت قلنا نمشي ليها بس ماقدرنا...
مدخل 3: مع الاصدقاء من الاساتذة والاقارب:
وينك ياشاب ماظاهر؟ ، اسمعني فلان دي حركات جيش منو بس، يافلان انت ماشي زي القرعة كدا مالك؟
مدخل 4: في السوق:
والله يااخواني الربع لو عارف ماشين يعملو بيهو شنو كان سوّى لي جنحين وطار..
فاصل:
اسم: حيدر هاشم مصطفى.
عمر: شهادة تسنين 55م، وبيني وبينو مرة قال لي 1952م..
مهنة: اب، مربي، معلم، .... معلم بالمرحلة المتوسطة 76-1992، المرحلة الابتدائية93-2003، موجه تربوي 2004- حتي الآن- معليش يابا لو غلطتا في واحدة من السنوات.
مدخل5: ماسمعت عنه من الناس..
ياسلام والله ابوك دا انت عارف زمان الواحد لو شافو بغير الشارع.... لكن اقول ليك شي كان من نوع الاساتذة الإنت بالجد بتحس انك مفروض تحترمو.
انت عارف استاذ حيدر دا موش كان بنخاف منو مووت لكن برضو الواحد بضحك في حصتو لانو لازم يعمل ليو نكتة نكتتين كل حصة..
والله استاذ حيدر دا كنّا بنخاف منو لكن لمن يجي الامتحان بكون اكتر امتحان ماشايلين ليو هم.
ابوك ياخ اكتر راجل نكتة وطرفة انا شفتو.
ناس استاذ حيدر ديل ناس واعين وكلّامين وبعرفو الواجب.
مدخل 6 : مااعرفه عنه:
احرص مايكون الّا يتسبب في ازى او ارهاق احد من اسرته..
لى درجة شنو اقول ليك؟!!
...ياخ اقول ليك عرفناهو ياابوي التمباك والسجائر والسوق مابترسلنا ليهن ، ياابوي انت حتى الدكان مادايرنا نمشي..
اعطف واحنّ زول :
ياابوعويض اجيب ليكم شنو طعمية ولا بيض ولا لحمة... ياابن خلدون- واحد من القابي في البيت- الليلة وشيشك دا ماعاجبني، عندك حمي وحاسي كيف؟
...يامنوية والله شفتا لي فسيتينات شكلهن بنفع معاك لكن كنتا لاحق الحصة والله لو رجعتا اكان اجيب ليك منهن واحد...
ملتزم لاتفلت منه كلمة منافية للذوق العام:
والله انا عمري العمير 25سنة بجوار الوالد ماسمعتو لعن ولاسب ولا اتلفظ بمالايليق بالحضور...
مدخل آخير:
لك التحية والشكر ....
...تعظيم سلام لي جنابك....
لك التجلّة والتبجيل فانت مربي وانسان ومعلم تؤدي في رسالتك بكل تفاني ونكران للذات..

بقلم/ د.خالد حيدر هاشم