|
رايكم شنو
الجمعه الفائته كنت حاضر التنوير بعد صلاه الجمعه بفطيس حيث تحدث بعضهم عن تقليل التكاليف والمنصرفات فى بيوت العزاء وبصراحه هذا الموضوع حديث الساعه بفطيس وكان هناك راى ان يكون الاكل فته عدس وشوربه وإرز، نسباً للظروف الصعب التى لا تغيب عنكم وتانى حاجه حركه اعمدة الاكل اختفت بقو ناس معينين بجيبوها وقال حسن شيخ الحله ناس ام دونه والمربيعه وتنوب ......... الخ ديل ما ضيوف اما الناس الضيوف البجو من بره يعنى ناس الخرطوم ....... الخ ديل نعمل ليهم اكل خاص، وانتو عارفين حسى البكيات بقت تكلف ممكن 18 مليون واكثر قليل لماذا هذا يعنى( ميته وخراب ديار) ايضاً تحدث قاسم الشيخ الزين والاستاذ عبد الله ود جده والاستاذ عبد الماجد وقالو خلاص الجمعه الجايه نجى ونشوف راى الناس شنو .... تخريمه والله لو شفتو الاكل ولا عرس شى محشى ولحم وبطاطيس وطعميه وحاجات وحاجات وكمان ما باقى الا الحلو( ارجو الحلو) والحفله بس الناقصه. ماهذا الذى يحصل والله حسى لو قلنا دايرين نعمل مشروع فى فطيس ينقصنا الماااااال (إن الله لا يغير ما بقوم حتى يغيروا ما بأنفسهم ) ........... صدق الله العظيم...................... رايكـــــم شنو |
التحية لك الاخ محمد والله سبقتني علي الموضوع الذي اثار ضجه في الجامع وفعلا الوضع صعب وانا شايف (في ناس بتطفئ نارا عديل ) وعندي كم اقتراح كده
- ممكن الناس تشارك بالمال زي ما قالو في الجامع (تكون حاجه بقيمة عمود الاكل لا اقل ) - استمرار عمود الاكل (في حالة ناس العزاء استلمو العمود ويتم تقديمو في صواني عشان ما اتبشتن ساي ) - الناس تقيف مع ناس العزاء فى اكرام الضيوف وتمشي تاكل في بيوته وتشارك بما تستطيع من مال |
التحية لك اخ محمد ويبدو أن الأمر قد تعدي حد المعقول
ويجب ان يكون هناك ... نقاش مستفيض في هذا الأمر حتي تصل الناس إلي إتفاق يضبط الصرف في كل المناسبات ويحدد أليه واضحة تحترم التعاليم الإسلامية السمحة ولا تتعدي علي معني التكاتف والتعاضد ولا تهمل الواقع الإقتصادي .................... قد لا يختلف الناس كثيرا في أن البذخ والتبذير...أمور لا تتماشي مع الواقع إن كان في فرح أو ترح ولكن هذه التصرفات ... تراكمية يفرضها المجتمع قبل أن يكون هناك خيار اخر وهذه ثقافتنا (السترة والفضيحة متباريات) فتجد القادر وغير القادر يتحاشي اللوم حتي لو يؤثر علي مدخراته سهل جدا الحديث عن هذه الظواهر ...ولكن تحتاج الي عزيمة للتخلص منها لأن وجهات النظر فيها أكيد ... بتكون مختلفة خاصة في التفاصيل فإن كان أحدهم يعتقد أن ناس أم دوانة وتنوب والمريبية ليس ضيوف فيمكن ان يكونولشخص اخر ضيوف. ............. أكيد هناك تجارب في المناطق التي حول فطيس ... ممكن الناس تستفيد منها والتوصل للحلول لازم يطلع من الناس القاعدة هناك لأنها أدري بكل ابعاد المشكلة ........... ونسأل الله أن يوفق الناس في ما فيه خير للناس و |
نحن برضو لينا رأي
الأخ محمد السلام عليكم جميعا
أها اسي موضوع العمود إختفي حتي النسوان مابجيبن عمود وفهمن إنو يوم التفريقة الأكل بكون راااقد أها راقد دي ذاتها المشكله إنتو ياناس الميت ديل سوو البسيط والباقي بتمو ناس الحله بس لا أنا أسوي وأسوي زمان كان الناس مابتأكل الصدقه وقالوا زمان بحمرو اللحمه بالطش الكبير زول بجي عليها ماف اسي عينك ماتشوف إلا النور بعدين جد في ناس يستاهلو الخسارة شنو بيض وقيم ولحمه وشعيرية في صواني البكاء والشي المؤسف كتير جدا الجثمان ما إتستر تلقي الجماعه ضبحو إستعجال شديد ،، _____ قدة كدا لو أي زول بعد الدفن مشي بيتو وجاب العندو مالوا |
والله يا جماعه ناس الحله أساساً أصحاب واجب أذا كان المشاركه بالعمود أو بالماده بس بالماده أفضل نسبة للاكل عند ناس الفراش متوفر جدا ...
|
اري ان تكون جميع الوجبات قتة ( شوربة عدس - وشوربة خضار ) + الشاي والجبنة
|
انها مبادرة طيبة ومحاولة للتخفيف من أعباء المناسبات الاجتماعية بما فيها بيوت الاتراح ولعلكم طرقتم هنا عدة محاور من بينها أعمدة الطعام التي كان يجلبها اهل القرية لبيت العزاء وان كانت عادة جتماعية تؤصل لمعنى التكاتف والتعاضد الاجتماعي الا انها بدأت تخبو كما ذكر البعض ومرد ذلك للظروف الاقتصادية الصعبة التي أثقلت كاهل الجميع لا تقصيراً منهم . أما بالنسبة للمظاهر البذخية التي بدت واضحة في بعض المناسبات فلا بد لنا من وثبة جادة لمحاربتها تحقيقاً للتوازن الاجتماعي المطلوب ,,,,,,,,, والله ولي التوفيق ,,,,,, |
| All times are GMT. The time now is 12:30 AM. |
Copyright ©2000 - 2024, Futeis.com