منتديات قرية فطيس - قصيدة / عازة زمان .... الشاعر عثمان أحمد سعيد

عثمان أحمد سعيد
كل زول عامل عزه حبيبتو
وياهو براهو البيغنيله
وياهو العارف سر أوجاعا
وعارف كل أوزان ترتيله
بس ما عرفنا
عزة منو البيغنو ليها ؟؟
وقادين راسنا بكل وسيله
دي عازه البحتت بى كرعينا
تراب السوق ودروب الليل
أم عازه التانيه الكانت هانيه
وكانت إسمها عازه خليل
ياخ جننتونا
لو بتغنو لعازة السمحه
البت القمحه
ست الناس المافى مثيله
عازه الكانت لمن تعشق
تعشق راجل عندو خصيله
وكان الشوق لما يفيض بيها
كانت تغزلو وفى منديله
طيره و ورده وحرف صغيِّر
يمكن بعض الشوق يهديله
عزه الكانت صوتا مخبّى
زي داساهو وبيهو بخيله
وهسع شاقِّى الصوت الحِته
كان فى الرادى وكان فى ليله
والصبيان الكانو بحرسو
آخر الليل يبقوله دليله
زى ما شايف إنت بعينك
الصبيان دايرين توصيله
عزه دى تاهت ما لقيناها
جينا نكوس لى عزة بديله
جينا نفتِّش لى أُمّاته
أُمها قالت عزة حليله
قلنا هى ماتت ؟؟؟؟
لا ما ما ماتت
بس دى طباعه بقت ما هيله
عازة الكان متْقَنِّعَة دايماً
ما شافوها الناس فى جيله
هسع ماشه وناسيه هدومه
أو متلفحة بى منديله
يمكن ديل قاصدين العازه
الغنّاله حبيبه خليل
عازه الحارب ود حبوبه
شان فى ترابه لَمَحْلُو دخيل
الإتْمَرْدَغ فيها تجانى
مَجَّد فيها السحر النيل
خليفة المهدى إتمدد فيها
ودلق الركوه قصاد السيل
ناس إتسجنت
وناس إتشنقت
وناس فى المدفع ماتو عديل
وينو شفيعا
وين قرشيها
وين الكتبو كفاح الجيل
وين تاريخنا المن ترهاقا
هل دا حقيقة أم تضليل
وهل الناس الهسي بغنُّو
بعرفو عازه بتعنى شنو ؟
ولّا بغنو عشان ما يقبضو
وما هماهم عازة منو ؟؟
غايتو بقول بصراحه شديده
فتشو عازه الدايره غناكم
عازه اللتنا دى ما هماكم
عازه اللتنا تراب ممتدى
حلفا تلودى جنينه وشندى
عازة اللتنا النيل والمطره
والجمام الرملو مندِّى
عازه اللتنا دى حاجه براها
دوم ونخيل لالوب وتبلدى