|
ماتشكرلي الراكوبه في الخريف- حوار خارج سياق البيات الحالي
احدهم - انت قايل البلد ذي أول ولاشنو
رديت ببرود- ما الجديد -ياخي البلد صارت احسن كلي شي ساهل كل شي في متناول اليد - ببلاش ولابي قروش - بي قروش طبعا في شي بي بلاش ياخي زمان بي قروشنا مالاقينو - انتو زمان كان عندكم قروش يعني - طبعا نحن كنا اغني من 00000 ديل القاعدين عندهم كانوبنتظرو جماعتنا عشان يشحدو منهم - بالله اسع نحن قاعدين نشحد منهم طول السنه - ياخي ظروف وبتعدي انت مالك متشائم كدا - لاماانت قلت البلد اتصلحت وكدا -لاانا بقصد انو نحن تقريبا بقينا قريبين من العالم حولنا -يعني شنو مافاهم نحن كنا مابنشبه الناس ولاشنو - مش كدا انت مافاهم ياخي الناس كانوا بنظروا لي بلدنا دي كانها غابه بدائيه - مافاهم كلامك يعني هي الغابه لازم يكونوا سكانها بدائيين - ياخي انت فاهم ذي جوع بطنك - اسع انا شايف الناس جعانه بس ماعايزين يعترفوا - جوع شنو يازول لافي رغيف بالصف لافي صف بنزين والعيش راقد هبترش - ممكن لكن عشان توفر اي واحد من ديل لازم نفسك ينقطع وتجي خاشي البيت بالليل وتكون شايت وجبه فطور قروض وتدغم العشاء في الغداء - ياخي مالو هو نحن نعدي عمرنا كلو سفسفه بس زمن سفسفنا سفسفنا - يعني انت معترف انو كان الاكل والشراب مامشكله في زمن مضي رغم البدائيه الاتكلمت عنها من قبل - والله انت زول بتاع تحريف بس ياخي شفتليك ازمة بنزين من فتره طويله - لا شفته ازمة حق البنزين وشفت ازمات صحيه وازمات تعليم وازمات فساد وازمات 0000 - طيب قاعد تدافر عشان تركب وتصل محل عملك او ترجع منو - هو وينو عملي البدافر عشانو نحن هنا بالملايين عشان مافي عمل ادافر ليهو -ياخي انا تعبت معاك قالوا المابريدك يحدرليك في الضلام انت الناس ديل شايلها معاهم بس انتهي الحوار لهذا اليوم قد يستمر هذا الحوار وقد ينتهي هنا |
عوض خضر يديك العافية:
العنوان مثير وقابل للتشكل حسب زاوية النظر... هذا الحوار/ الجدل يمكن أن يتدفق بلا انقطاع كما يتدفق الماء من راكوبة الخريف, طالما أن امطار "الواقع" تهطل بمثل هذه الغزارة... لذلك نأمل الا ينقطع هذا الحوار فحتي الان لم تتم اي عملية صيانة للركوبة... |
ياسر خليل يارائع خليك قريب
انشاء الله نتمو لحدي ماتصان الراكوبه او تتحول الي بناء من نوع يتحمل الخريف |
الاول متأففا - الدنيا دي باقي لي ضيقه خالص حاسي انو مافي مكان اقبل عليهو
الثاني متساخرا- قبل علي انا ياخي الاول- انا جادي زمان كنا بنلاقي مساحات واماكن ووجوه اسع دا كلو اختفي الثاني - الزمن ولا نحن او البعض منا سرق كل الاحلام الاول - ياخي ماتحرف لي كلامي انابقصد حاجات محدده ماتسيس الامور كعادتك الثاني - الامور اصلا مسيّسه بطبيعتها الاول- ياخي انت مابتاجز من كلام السياسه الماعندو طعم دا الثاني- طيب الكلام العندو طعم شنو الاول- كلمني عن ايام زمان واغاني زمان والعاب زمان وناس زمان وبنات زمان وووو الثاني - طيب الخليط الذكرتو دا مالو شايفك بتتباكي عليهو الاول- ايوا لانو كل شئ اتغير مابقي ذي زمان الثاني - طيب ليه اتغير الاول- والله ماعارف الثاني - طيب فكر في الموضوع وبعد داك بنرجع نربط الامور ثم استأذن الثاني وكان يبدو مغتبطا اما الاول فقد بدا ساهما بعض الشئ لكنه اضمر في نفسه امرا وواصل مراقبة الماره وتصنيفهم حسب انتماءهم من منهم ينتمي لي زمان ومن منهم ينتمي لي هسع |
عوض خضر ياود يا لزيز الحكي
اديك العافية بجد شدني الحوار واتمني ان يتواصل في المقارنة حتي الوصول الي الراكوبة في نهاية المطاف |
اب احمد الآخر كيفنك ان شاء الله طيب
اشكر لك المتابعه الواعيه |
الاول للثاني وهو مغتبط - انت عارف الناس البدافر في ناس الحكومه ديل قطرهم صفّر
بدا تساءل في ملامح الثاني ثم تحول الامر الي كلمات - مافاهم قاصد شنو الاول وهو يفرك يديه احتفاءا بنصر في خاطره - خلاص الجنوبيين شتتو تاني بتكلو علي منو الثاني وفي عينيه بدت بعض السخريه- ليه هم من زمان كانو بتكلوا علي الجنوبيين الاول- ايوا لما الجنوبيين ناس من بره الثاني - تاني جبت سيرة البحر كل واحد بقول بقم بتتهموا بالعماله للاجنبي الاول - ايوا لانو بقم في وقت ذي دا بتضر مابتنفع الثاني وعلي وجهه اثار ضحك - هي بقم عندها وقت معين ولايمكن تكون صالحه لاي زمان ومكان الاول وعلي وجهه علامات الاستياء وبصوت مرتفع -ياخي في اوقات الحرب والتهديد بالتشرزم تبقي بقم خيانه الثاني - اها طيب التشرزم سببو شنو زفر الاول في ضيق شديد ورمق الثاني بنظره بدت وكانها طلقه ستهشم راسه ثم قال -اوعك تخشي لي في متاهات التشقق والانفصال وهيمنة جهات علي جهات وجماعه علي جماعات الثاني بكل برود - ليه دي خطوط حمراء ولاكيف الاول ينظر ناحية الثاني بياس كانه يقول له انك لن تفهم مايدور ابدا- ياخي مادا كلام ممجوج وبقي ماجايب تمنو الثاني - هو تمنو شنو هل تعتقد انو تمنو دي بتعني قيمة الكلام نفسو اللهو التشققات والتشرزم وعلي فكره التشرزم دي انت طرقتها اول او بشكل اوضح الكلام ده بيساوي القدره علي النقد والرفض الاول يضرب كفيه علي بعض - سبحانك ربي اني كنت من الظالمين ياخي ماتصحوا من سكرتكم دي ثم نفض مؤخرته وهب واقفا لايلوي علي شئ |
حوار جميل وممكن يناقش كل القضايا من الكوره لي قفة الملاح بس بقترح يكون مجادعه يعني كل من عنده قضيه يطرحها بيه بالطريقه دي ويقول اللي في نفسه وكمان غيره يضيف اسئلة كانت او اجوبه او الاثنان معا
|
ياسلام عليك يا الخليفه دائما تعطي الطروحات عمقها
هذه دعوه للجميع لمواصلة الحوار بنفس المسار او الحياد عنه المهم ان يكون هناك حوار |
احدهم يبحلق في جاره الذي صارعه كثيرا عند مدخل البص
-والله الناس الزمن دا بقت مابتختشي بس بدا وكانه يفتح حوارا يتضمنه بعض الهجوم علي الجار الساهم لكن الجار سرعان ماعاد من شروده ورد بصوره لم يتوقعها الاول - حدد انت قاصد شنو بدا الرد كفتح افق اوسع للحوار او كمقارعه تشمل بعض التحدي الاول مع بعض الامتعاض - ياخي انت ماشايف البحصل دا الناس طالعها فوق بعض عشان تتوصل - والله دا جانب وفي جوانب اخري كثيره تشبه كلامك دا الناس طالعها فوق بعض عشان تنفذ مآرب شخصيه - لكن يعملوا شنو الواقع كدا لازم تصارع عشان تصل لي مبتغاك -بس الصراع بين الناس دا ما لهاهم عن صراع رئيسي مفروض يخوضو - والله الزول غايتو بصارع البقدر عليهو - لا انا قصدت الناس كلهم مجتمعين ما واحد واحد -والله وجهة نظر بس الحاصل دا الا رب العالمين - ونعم بالله بس دا استسلام وين الجهد حقنا نحن - لا ماكدا بس الوضع كلو ضبابي وبعدين البديل شنو - والله السؤال دا لوكان عشان نغطي عجزنا تبقي مصيبه ولو كان عشان قلقنا للجاي دا عدم ثقه في النفس - لا نحن ماجربنا كلو جربنا الذي القاعدين في حلقنا ديل والغيرهم وكلهم ذي بعض - ماذي بعض لكن مااظنك جربت الغيرهم لفتره طويله كدا عشان تشوف نتائج وبعدين ياخي ما الخيارات متاحه بعد نخلص من الهم دا وليه نحن عايزين نضع الامر في قالب من هسع نحن خايفين حتي من نفسنا ولاكيف - لا والله بس ياخي زهجنا من التغييرات الكتيره دي بلافائده بعدين ياخي الفاضي منو اسع الواحد فينا كان وقف يوم واحد من الجري اولادو بجوعوا - ممكن لكن احتمال تجي مرحله يكون الجري دا ماجايب تمنو والجوع في الحالين حاصل تنهد الاول قليلا ثم اشار للسائق بانه وصل محطته ثم التفت لجاره قائلا - ربك يقدم الفيهو الخير |
أخواني الطيبين واخوي عوض كيفنكم وانا كلامي في بطن كلام زولي النزل من البص ربنا يقدم الفيها الخير وبزيد عليه كلمتين من خشوم أهلنا القدام القالوا السايقة واصلة
|
اثنان تجاوزهم البص المكتظ وبدا عليهما الامتعاض وبدات الكتله البشريه التي كانا نواتها تتضخم بسرعه
والكل يترقب ساعته في تأفف التفت اول من توقف في المحطه الطارئه الي رفيقه في الانتظار وساله بصوت كالفحيح - ياخي دي مصيبة شنو دي وتسمع كلام الوالي تصدقو تشوف المواصلات تتعجب الثاني بدا وكانه كان ينتظر اي حوار ليتدفق - نحن شبعنا كلام شبعنا كذب نحن ادمنا الكذب لو لاقانا واحد وقال الحقيقه بنعتبر انو بره اللعبه وبنهرب منو تقول عندو جرب - ودي ياربي تصنيفها شنو الحاله دي - والله ماعارف لكن نحن تايهين خالص والدرب راح لينا - طيب الحل شنو -ياخي خلينا اول نشخص مشاكلنا وما نهرب منها بعدين الحل بجي انت ماشفت الرئيس في التلفزيون كان بقول في شنو - سمعت جزء من كلامو وبعدين الشفع ضايقوني في التلفزيون خليتو ليهم وطلعت -ياخي دا اول حاجه عايزنا نقعد كدا باوجاعنا دي لحدي اجل سماهو قريب عشان يستخدم عصاهو السحريه ويغير الوضع المتازم الغريبه انو ماعايز يستعمل عصاهو السحريه اسع ليه طالما ماهي متاحه - وبعدين كدي كلمني عن لقاء الرئيس - الاسئله كانت مهادنه لكن الواضح انو دربوا عليها لاسابيع وحفظوا صم بعض الاجابات الهي اصلا ماردود وافيه ياخي دا قال مافي فساد والفساد كلو في 39 حاله والمضحك قال العندو ادله يجينا وانو عندهم 90 الف اقرار ذمه طيب كافوري دي طارت من اقرار الذمه ولا العمارات السوامق والمشاريع والشركات اذا دي ماادله مقارنه بوضعهم من قبل الانقلاب طيب تاني شنو البنفع ادله ضحك الثاني بشده - بالله قال مافي فساد خلي يجي حينا ونوريهو حال واحد من جماعتهم اتربي معانا - وحدد ثمانيه سلع وبدا يتكلم عنها والله الصراحه انا قايلو بحلم صاحي السكر مافي مشكله راقد وفي متناول اليد المواد البتروليه كذلك القمح هم جاهزين حسب كلامو لتمزيق فاتورتو الغريب دا كلام بناقض تقارير حقتهم هم القطن واسعارو العالميه التي ساهمت في الحل هو وينو القطن - لاحول الله كان كدي النشوف لينا بلد نطير عليها ساي طالما الرئيس ذاتو ماداير يشوف الحاصل - لاوالطامه الاكبر المناصير ماعندهم مشكله بس استمرأوا تنازلات الحكومه والحرب هم ماسببها ومحسوبيه مافي والله الصراحه وانا بسمع فيهو بديت اسال نفسي ياربي اكون انا عايش في عالم موازي وماعارف الحاصل ضحك الثاني - اها قال شنو عن حلايب وشلاتين والفشقه - ولابقم هي الاسئله ذاتها ياخوي مظبطه قدر المقاس وبرضو ماقدر يرد عليها بصوره مقنعه - وقال شنو عن الطيران الاسرائيلي العامل اجواءنا اجواء للتدريب - ماجاب سيره ولاصاحبك مقدم البرنامج جاب سيره - لاحول الله الزول دا اكيد ماشديد او ماعارف الحاصل حولو حقيقه الاول بعد فترة صمت - عارف ذي جوع بطنو بس كترت عليهو الضغوط والمذكرات والهمهمات والتحركات والملاسنات وعايز ينوم الناس مغناطيسيا بي كلامو اللا بقدم لا باخر دا - الله يكضب شينه لكن بلد دا كلام رئيسها الله اعلم تمش لي قدام - ربك موجود خففت عربه نصف نقل من سرعتها بالقرب منهما وتوقفت تماما امامهما تزاحم الحشد للصعود عليها وجدا مكانا للتقرفص بين زكائب الطماطم المتقيحه ثم اطلق كل منهما لمخيلته العنان |
الأول جالسا علي بنبر امام ست شاي يرتشف الشاي بتلذذ واضح رغم العرق السائل علي جبينه كما يبدو هناك بعض البلل الذي تشكل علي شكل بقع ملتصقه
باجزاء متفرقه من جسده انتزعه فراغ الكوب الزجاجي من فاصل الرشفات الذي كان يمارسه غير مكترثا للمحيطين به مغلقا عينيه كأنه يحاول ان يحلق بعيدا عندما فتح عينيه تلفت حوله كمن يبحث عن سبب للعوده القسريه التي ضايقته وجد ان احدهم ينظر اليه بتطفل غريب ولكنه حياه بهزه من راسه فور تبينه ان الشخص في البنبر المجاور قد ثاب الي رشده لم يبادله التحيه ولكن الثاني تزحزح حتي كاد ان يلتصق به وبدأ وكأنه سيسر اليه بامر يحاذر ان يسمعه الاخرين حول ست الشاي قال الثاني دون مقدمات- والله ليك حق نحن فايتنك بالصبر بس تساءل الاول في البدايه بملامحه ثم اخرج صوتا كأنه يأتي من بئر عميق - ماذا تقصد الثاني- الاحوال ياخي الاحوال دايره الواحد يشرب برميل لو اتوفر ليه فطن الاول الي مقاصد جاره الفضولي وزاد ضيقه فرد بتأفف - من قال لك اني شربت غير هذا الشاي الثاني مع ابتسامه متكلفه - ياخي الشاي لو سرحت معاهو بدي نفس الاثر ضحك الاول متجاهلا تطفل الثاني عليه ورد - كيف دي الثاني - ياخوي من العلينا والله اسع انا قاعد هنا لاعارف ارجع الشغل ولا ارجع البيت ولا اقعد اجغم في الشاي دا لحدي ماتقوم المره دي من محلها الاول وقد لانت ملامحه قليلا - الحكايه شنو الثاني- يعني ماك عارف ياخي انا راتبي ماعارف اعمل بيهو شنو وكنت متمني ما اصرف اصلا والسلع اتضاعفت عشرين مره والغريبه انو الناس الماعندهم رحمه ديل برضو عايزيننا نتبرع ليهم ضحك الاول بشده وقال - يلقوها عند الغافل هو العندو منو عشان يتبرع غيرهم هم الثاني - المشكله انو الناس مجارياهم ومصدقه الافلام القاعدين يشوفوها في الاعلام دي الاول- كان قصدك هجليج دي اصلا ماسوره الناس كلها عرفتها الثاني - انت عارف الليله قريت مقال عنوانو بنج هجليج دا لسع مافك ثم ضحك بشده ضحك الاول بشده ثم اقترح علي الثاني دور ثاني من الشاي الثاني ساله علي استحياء - بتسف الاول - بعمل اي شئ يخليني بره اللعبه ثم ناول الثاني كيس التمباك |
الأول واقفا امام باب منزله وتبدو عليه امارات القلق
ويتنهد بحرقه اقترب جاره العائد من المسجد وهو يحمل مسبحه طويله ذات لون غامق منه ثم سأله - اها مالك تقول مقروص الاول مع بعض التلفت ناحية مدخل الشارع - والله الولد لسع مارجع من الجامعه والاخبار الجات من وسط البلد مامبشره بي خير الثاني بعد ان ادخل المسبحه في جيبه - منو القال ليك مامبشره بي خير الاول بتأفف واضح - ياخي الناس ديل واقعين في الاولاد هرس ومابعيد اعتقلوا كل الطلبه ماعدا ناسهم الثاني بابتسامه بدت متكلفه - طيب دي اخبار مامبشره الاول - ياخي انا خايف علي ولدي عارفو متهور وكان كشكشت ست شاي بطلع ويهتف ضد الحكومه الثاني - طيب والله دا ولد حاسي بي مشاكل البلد وازمات البلد الاول - وانا البحس بازماتي منو ومشاكلي منو الثاني - هي مشاكلك دي شنو بالله نظر اليه الاول مغتاظا - يعني ماعارفها ياخوي انا ماقادر اكل ولاقادر اعالج ولاقادر اقري ولاقادر اسع اقيف علي حيلي ذاتو الثاني - طيب دي ما مشاكل البلد ذاتها صمت الاول قليلا ثم قال يااخوي انا اسع قاعد ادعو ان ولدي يرجع سالم وبعدين نشوف الحاصل شنو في كلامك الفارغ دا الثاني - انشاء الله يرجع سالم وان شاء الله يرجعوا كلهم سالمين انت يعني قايل ولدي انا رجع فغر الاول فاه ثم نظر ناحية جاره وتساءل - يعني اسع انت بارد كده ومحمد ولدك مارجع الثاني - ايوا مارجع قبل ان يستأنفا حوارهما سمعا الكثير من الاصوات في المدخل الرئيسي للحي اسرعا ناحية راس الشارع شاهدا من علي البعد الكثير من الغبار العالق عاليا وشاهدا ايضا الكثير من الناس تهرب في جميع الاتجاهات كما شاهدا اضواء سيارات الشرطه كما سمعا صوتا مدويا بدأ كفرقعة رصاص |
جابت ليها رصاص كمان ما كفانا الفينا مكفينا .
|
ياسر ناس الديم امس شافوا وسمعوا شافوا الدم نتيجة اطلاق النار علي احد ابنائهم وسمعوا صوت الفرقعه المعهوده
|
شايف لي يو تيوب من الديم بتاع حرق عربية شرطة
|
شاب نحيف علي وجهه بعض الكدمات واقفا علي جانب الطريق يبدو منهمكا في التعامل مع هاتفه الجوال
يبتسم احيانا ثم يشرع في التعامل مع ازرار الجهاز بسرعه ومهاره بدا وكأنه لايحس بوجود الطريق ولا الماره ولايستنشق الغبار ولايبالي بلسعات الهجير كهل واقف تحت شجره قريبه مستجيرا بها من غيظ الظهيره يراقب الشاب بدقه مجهريه وبعد فتره ليست بالقصيره تسرب اليأس الي نفس الشاب الواقف قرب الطريق من ان تقله سياره فتلفت حوله واكتشف الشجره الملاذ والتي اكتظت بالذين التجأوا اليها حتي حاصروا بائعة الشاي التي اظهرت تأففها في شكل تنهدات طويله اقترب الكهل من الشاب وراقب شاشة جوال الشاب الذي سرعان ماعاد الي تواصله عبر الجوال بعد ان استظل بالشجره الكهل بتردد واضح- تلفونك دا كان بتلكم كان اشتكي ادي راحه شويه ثم اتبع سؤاله الذي بدا ( كتخريمه ) لم تأتي في وقتها بابتسامه عريضه لزوم التأثير في ردة الفعل رفع الشاب الساهم راسه قليلا وكأن السؤال انتشله من بئر عميق - قت كيف ياعمك - قت ليك الجوال دا بتم معاك شهر - اسع ليهو اكتر من سنه - شايفك عاصر عليهو شديد - نعمل شنو لاكين ياعمك ياهو الوسيله الوحيده البنتواصل بيها - انت طالب ولا شغال - ولا واحده في الاتنين لاكين خلي الموضوع حسب خيالك ياعمك - ما فاهم كيف حسب خيالي - يعني انا من نظرتك انت شفتني شنو شغال ولا طالب يعني بالعربي كده ياعمك البريحك ضحك الكهل بشده من طريقة كلام الشاب التي بدا فيها الكثير من الانصراف نظر اليه الشاب قليلا ولاول مره بدت علامات استغراب علي وجهه الذي تزينه كدمات حديثه ثم واصل الكهل حديثه متسائلا - انت اظنك ملاكم محترف الاجابه كانت نظرة استغراب اخري من الشاب الذي بدا عليه بعض الضيق من مقاطعة الكهل له -اقصد وشك مدشدش في كم مكان رفع الشاب راسه عن الجوال ووضعه في جيبه الضيق ثم التفت ناحية الكهل متفرغا وضع يده علي كدمه مسوده وقال - ديل الكجر ياعمك ردد الرجل الكلمه باستهجان - كجر - ايوا العساكر والامنجيه - وديل مالهم عليك -كيف ياعمك رفعوني من جنب الجامعه يوم ماسخنا الدنيا عليهم - ااااا - والله ياعمك اليوم داك سخنت لما الكجر ذاتهم اقتنعوا - واضح في وشك البقي ذي تربيزة اللحام دا ابتسم الشاب قليلا وواصل حديثه ياعمك نحن خلاص بقي عندنا مناعه ضد البمبان والسيطان والعصي ماتقولي بمبان ايراني ولاجن احمر - انا ما قتليك شئ لاكن ماشايفكم هازين شعره من الحكومه - القال ليك منو ياعمك ماشايفهم بقوا يتكلموا ذي المجانين البقول ليك الواحد بدخل 1800 دولار في الشهر وبعدين يقول في السنه والبقول ليك ديل اجانب والبقول ليك ديل صعاليك وكان ماهزينا شعره مالهم جاييين عساكر يغطوا الشمس - ماتبطبط ساي زول شغال بيكم مافي - ليه عشان نحن بنتعد علي اصابع اليد ولا عشان نحن اجانب ولا عشان نحن شذاذ آفاق - عشان انتو ماعندكم كبير يربيكم بس - القال ليك منو ياعمك ابوي قاعد لكن شكلو كدا اتحلحل - اتكلم معاي كلام افهمو - يعني لقي الحكايه مالافقه عمل ميت - برضو مافاهم - يعني بالعربي كدا نسي موضوع المسئوليات دا وبقي مابجيب شئ للبيت وبعدين هو ذاتو عكشوا لانو اتصرف وهتف مع جماعه جنب ابوحمامه - يعني هو قادر وماجاب - عشان كدا ياعمك نحن شغالين بنظرية سهر الجداد ولانومو - قتليك الجداد نايم وفي الفيها - ياعمك ارتفع شويه ياخ يعني نحن اسع عشرات لكن كلما تعصر والناس يشوفونا قاعدين نطلع بلقوا قدامهم حل واحد انو يساندونا - انتو قايلين الناس فاضين ليكم ولاشنو - ايوا الناس طالما قاعدين يجروا وما ملحقين احسن يفضوا لينا - امش اقنع ابوك بالكلام الفارغ دا - ابوي يادوب فكوا امس بالليل وحاسي بيهو كدا اليوم حايشوفها مولعه وين عشان يمشي عليها ويعكشوا تاني ويعمل ميت |
في رأيك هل سيتم ترميم الراكوبة أم سيكون بديلاً لها مبنى أنيق يجاري تلكم التي
في كافوري أم اننا نحلق خلف السرب وكما قال عمك الجداد نايم ؟؟؟؟؟؟؟؟؟؟؟ |
عوافي ازيك
خلينا نقول ان الصراع مازال يدور بشتي الطرق وان الغلبه للذين يبحثون عن الحريات وعن انقاذ وطن من الانقاذ ان شاء الله افكار عمك حاله منتشره وسط جيل كامل كبق الفراش لكن اظن ان الامر بعد شويه سيتجاوز التردد والمصالح الفرديه الضيقه في مصر منذ ان بدات حركة كفايه مناوشة النظام وحتي خروج الناس الي ميدان التحرير ردحا طويلا من الزمن والسايقه واصله المهم تكون في سواقه وردد معي كق كق ضاغطا علي لسانك حتي لوكانت علي شكل ضغط كثيف علي محاكم الشباب الثوار من خلال الحضور او الخروج في مجموعات صغيره في ليالي رمضان بدلا من الخروج لاسبارك سيتي يعني بالعربي كده سهر الجداد ولانومو الجداد بالتاكيد تفأجا بالتحركات الاخيره وردة فعله كانت تدل علي مقدار رعبه واتمني ان يأتي العيد بالبشاره فهذا الشهر الفضيل قد جعل تردد الكثيرين يذوب |
مجموعه من الشباب التفوا حول شاب تم الافراج عنه حديثا
الشاب المفرج عنه بدا مهدودا وكان يرفع جلبابه ليريهم اثار التعذيب علي ظهره وظل طوال الفتره يحدثهم عن سجون جهاز الامن والضباط وتصرفاتهم وطريقة الاكل والنوم والاحاديث التي يردودنها كاسطوانه مكروره لايملونها في التحقيق معهم والعبارات التي يطلقونها متهكمين احيانا ومهددين احيانا في احيان اخري محاولات بائسه لاختراق قناعات المعتقلين المجموعه كانت تستمع للشاب وكأن علي رؤوسهم الطير منهم من يدرس استراتجية الامنجيه من خلال احاديث الشاب ومنهم من ينتظر دوره في الاعتقال وبالتالي عليه معرفة التكتيكات واستنباط طرق صد جديده ومنهم من بدا الخوف يتسلل اليه فقرر في داخله ان ينأي بنفسه عن هذا الصراع ثم قرأ احد افراد المجموعه خبرا عن وصول وزيرة الخارجيه الامريكيه الي جوبا وبعد قليل قال اخر - جماعتك وقعوا تقول لي تسويه امنيه وقضايا عالقه الحكايه زنقات بس مافي شئ تاني رد اخر - ياخوي انت بره اللعبه وصلت كلينتون من هنا وتم التوقيع من هنا رد ثالث - ياتو مطرة سوت شو فرقوا غيمه الامريكان الاول - والله الامريكان ديل فرقوا فرفرتنا تب ماعارف العاجبهم في الحكومه دي شنو الثاني - عاجبهم فيها كلما مايكونوا دايرين منها شئ يعصروا عليها فتقدم تنازل جديد كان خط احمر منذ فتره ليست بالبعيده وطوالي تشغل الابواق عشان تغش شعبها رد واحد ظل صامت طوال الوقت - اها واسع خلاص حلم الثوره نفس ولاكيف الثاني - نفس كيف نحن يادوب ابتدينا ليه تقول لي انتهينا الثالث - والله الحكايه حاتبين بعد فتره طبعا اذا الدربات دي لو غيرت الضائقه الاقتصاديه يمكن في ناس يتراجعوا صمتوا جميعا لفتره ليست بالقليله حتي قطع الصمت الخارج من المعتقل قائلا -الله يكضب الشينه |
السياره تنهب الطريق الضيق يجلس إلي جانب السائق الذي يتمايل مع أغنيه صاخبه شاب يبدو وجهه قد تعرض للنفخ كما أن ( كرشه ) تتدلي
لترقد علي فخذيه الملتصقان تماما لون بشرته يوحي بأنه لم يتعرض للشمس مؤخرا وملابسه الأنيقه وعطره يدل علي عودته من غربه طويله كلما إقترب من هدفه كلما إزداد وجيب قلبه كل شئ حوله يبدو ( اغبشا ) مغبرا حتي وجه السائق الذي ينافس المغني ذو اللكنه الغريبه في أغنيته السريعه التي يصعب معرفة معانيها خشخش كيس التمباك في يد السائق وتسللت رائحة التمباك النفاذه الي خياشيم العائد رائحة التمباك مختلفه قويه مسيطره تسافر به بعيدا نحو فترة ماقبل الرحيل غمغم مقاطعا الأغنيه الصاخبه - لو سمحت ( ثم مد يده البضه السمينه ناحية الكيس الذي أوشك السائق علي إعادته الي جيبه ) نظر إليه السائق قليلا ثم ناوله الكيس دون أن ينبث ببنت شفه عندما أعاد الكيس الي السائق المنهمك في ترديد الأغنيه الثانيه كانت ( سفه ) ضخمه قد أعتلت شفته السفلي ومن عينيه طفرت نظرة إرتياح عميقه كلما إقترب من هدفه كلما إزدادت ملامح الطريق غرابه الطريق علي الجانبين لاتحفه شجيرات العشر والسنط والأعشاب الموسميه كما توقع وإنما أرض جرداء ظهرت عليها أخاديد تبدو كالشلوخ وتتجه نحو مجري النهر القريب حافلات نقل الركاب فارهه ضخمه مسرعه في الإتجاهين ترجلا حسب طلبه وقصدا مطعما في مدينه علي الطريق كل شئ يبدو متسخا الوجوه الايدي الأواني المياه الأرض الذباب يهاجم كل شئ بداية من الطعام وحتي وجوه الجالسين داخل المطعم لفت انظار الجميع وتابعوه حتي جلس ثم إنصرفوا الي طعامهم عافت نفسه الطعام لكنه حاول مضغ بعض قطع اللحم التي بدت له غير ناضجه حتي لايمتعض رفيقه الذي هجم علي الطعام بنهم واضح المياه الغازيه كانت جيده جعلت السائق يتجشأ بصوت عالي واصلا المسير وكثير من الرضا يبدو علي السائق الذي لم يخلو فمه من التمباك سافر العائد بعيدا خلف صبي حافي القدمين يحمل الطعام لوالده في الحقل القريب من القريه ثبت مخيلته عامدا علي الساقين الناحلتين وقارنهما بساقيه الضخمتان الآن عبرت السياره المدينه القريبه من قريتهم عنّ له أن يشتكي من ضعف جهاز التكييف في السياره لكنه تراجع تحت ضغط إنصراف السائق عنه عذبه إنصراف السائق حاول كسر الحاجز الذي صار سميكا الآن - هل تعرف هذه المنطقه -نعم قريتي لاتبعد كثيرا - هل تعرف أناس في قريتي - لا ولكن سمعت الكثير عنها وعن سوقها وقديما كانت بعض فتيات قريتنا تدرس في مدارسكم لاحت القري المجاوره تفرس في كل شئ البيوت التي تبدو تمارس قيلوله طويله الطرقات الملتويه المجاري المائيه المتدفقه علي الطريق الحقول المتقزمه كل شئ يبدو مختلفا في مثل هذا الوقت كان كل شئ يبدو مبتسما ثم غادرت السياره شارع الأسفلت الضيق الي طريق مترب الترعه تبدو وكأنها طمرت تحت أطنان الطمي الذي تحول الي تراب ناعم الحقول في الجانب المقابل للترعه تتمتد حد البصر هنا الخضره أكثر دكنه والنباتات تجاوزت مراحلها الطفوليه ثم لاح الكبري الصغير والمقبره الآن تكتنفها أشجار السنط تبدو خضراء وسامقه الشارع الرئيس ترك الخريف عليه اثار لن تمحي قريبا السياره تتمايل والسائق بدأ عليه التأفف صبيان علي جانبي الطريق يحدقون الي السياره أرتفع صوت الآذان عاليا مماجعله يجفل قليلا من بعيد لاحظ تزاحم الناس قرب السوق ازدرد ريقه بصوت مسموع والسياره تنحشر في الزقاق الذي يضم منزلهم امام البيت لاحظ صبيه تراقب الطريق ثم أرتفعت زغروده فيها الكثير من الفرح والترحيب كما أنها تمثل إيذان بإنطلاق فرحه الخاص الذي إنتظره طويلا |
منظر درامي رائع
مشكوووووووووووووووووووووو ور المبدع عوض خضر ولا اخفيك سرا انني اول مره اقعد تحت ضل راكوبتكم العامره دي كدي اكرمونا بفنجان جبنه وتمو الباقي |
ابشر بي بالشاي والقهوه شمالك ويمينك
بس إن شاء الله أوحت ليك ببدايه كويسه في السيناريو |
الكبري دا ما يكون الكبري المقدود
|
لا دا كبري المقابر
|
- في ذمتك
هكذا كان رد رزق الله صاحب عربة الكارو علي منيره بائعة الأكل البلدي وهو يحرك يده في الهواء حركات دائريه متتابعه ليقطع الخيط المتدلي من ( الملاح ) الأخضر الذي ترك أثاره حتي علي شعر لحيته النابت حديثا -أي والله قالوا ليك جابوا بين الميته والحياه ورموا جنب بيت أبوه القدامي في هذه المره أكتفي رزق الله بنظره محفزه ناحية منيره فواصلت سردها - ياخوي أولاد الزمن دا مابقعدوا ساكت وهوبيني وبينك باري ليهو اولاد من بره الحله هم السووها فيهو همم رزق الله بطريقه غير مفهومه وهو يحاول جاهدا رفع كم ثوبه بأسنانه إذ ان طرف كم ثوبه بدأ يتشرب باللون الأخضر أيضا رغم أن الثوب لم يتبقي به مكان للمزيد من البقع الدبقه بعد أن اكمل هذه العمليه التي قطعت تتابع تناوله للطعام قال لها -وبعدين - بعدين شنو ما شالوهو وودوا المستشفي وهسع أهلو ماشين راجعين المستشفي وبقولوا يمكن ما يرجع منها سالم -أصلو الاولاد المن بره ديل بسوا في شنو امسكت منيره ( بنبرها ) من الجانبين وسحبته للأمام وساهمت برجليها في الدفع لإتمام هذه الحركه ثم اقتربت بعنقها هامسه بعد أن تلفتت حولها - ديل بنبذوا الحكومه - ماينبذوها الحكومه الحكومه ماكلها نبذ -ياراجل إنت جنيت داير يودوك محل بودوا الأولاد ديل - حايودوني وين يعني مافي أسوا من الحته الودوني فيها دي - حتة شنو الودووك فيها يامطرطش - مطرطشه أنتي هسع ليك كم سنه تجابدي عشان ترجعي بيتك آخر اليوم وبرضو ماتلفق معاك - هوي يارزق أكل أكلك دا وقوم أختاني انا ماناقصه لي مشاكل -لا أنا الناقص مشاكل لكن بقي السكات صعب ثم صرف إهتمامه إلي طبق الألمنيوم وبدأ في عملية تنظيف لجوانب الطبق بجانبه كفه ليقوم بلعق المنتوج في تلذذ واضح |
شاب في مقتبل العمر أنفاسه تعلو وتهبط بشده والعرق يسيل بشده من وجههه ويبدو ظهره مبللا كذلك بالعرق يحمل في يده حجرا يبدو محتميا بحائط عند مدخل الحي إلي جانبه زميل له يبدو مشغولا بإرسال صور بالهاتف الجوال الأول يراقب الشارع مطلا برأسه عبر الزقاق المؤدي للشارع الرئيسي
وفي المره الأخيره التي أطل برأسه سمعا أزيز طلقه مرت بالقرب من رأس الذي يراقب الشارع علي بعد بوصات تبادلا نظرات سريعا وتحركا للجانب الآخر من الزقاق ثم تحدث الأول متقطع الانفاس محادثا الثاني الغارق مع جهازه الجوال - ياخي ماتسرع ماأنتهيت شكلهم كشفوا موقعنا لم يرد الثاني فورا - في شنو مافي شبكه ولاكيف رد الثاني في تثاقل واضح - اديني دقيقه بس وبعد مضي لحظات قليله التفت الثاني ناحية الأول وعلي وجهه علامات انتصار واضحه - يلا نلحق الباقيين خلاص الصور سافرت ياخي ماعارف ليه مابخلونا نرسل الصوره من قلب الحدث صفق الأول إبتهاجا ثم تحركا ناحية راس الزقاق في حذر ويقظه ورد - عشان الكجر حايستهدفوك فورا ياداقس انتي ناسي أنهم قاعدين يراقبوا من السطوح القريبه ومن كل مكان في مدخل الزقاق كان الدخان يغطي المكان وضع كل منهما منديلا حول اسفل وجهه وإقتحما الدخان ولم يمضي الكثير من الوقت حتي وجدا نفسيهما وسط رفاقهما والهتافات تدوي هادره كالرعد - الرصاص لن يثنينا وعلي بعد عشرات الأمتار كان يمكن رؤية سيارات شرطة مكافحة الشغب وبعض السيارات الاخري التي تبدو من غير هويه متراصه في مواجهتهم الغاز المسيل للدموع كان يبدو كثيفا لدرجة مخيفه والتنفس يتم بمشقه زائده أخترقا التجمع الهائل ناحية المقدمه أقتربا من احد الشباب في مقدمة الكتله الهائجه كان يبدو حريصا علي القطعه المبلله علي وجهه عندنا رأهما التفت ناحيتهما قائلا -آها أن شاء الله خير رد الشاب الذي يحمل الهاتف الجوال بفخر - الحمد لله أخوك مفتح كل الملف بقي عند الجماعه - الحمد لله اسمعوا الحكايه سخنت خالص وعايزين نفتح جبهه جديده مع الكجر من خلفهم الزقاقات جوه الحي كيف سالكه -أيوا سالكه التفت ناحية الشاب المنهك الذي كان يراقب الشارع وقال - اسمع سوق معاك مجموعه وافتحو معاهم جبهه من عند سوق الخضار تحرك الشاب دون ان ينبث ببنت شفه وبدأت علي وجهه علامات حماس مفرطه في هذه اللحظه تقدم مجموعه من الشباب صغار السن بذي المدارس الثانويه يحملون زميلا لهم تبدو ملابسه ملطخه بالدماء اقترب منهم الشاب الذي اصدر التوجيهات وقال لهم في مصابين تاني رد احد طلاب الثانوي - في واحد مات اصيب في الرأس بس الكجر ماخلونا ناخدو - عارفين اسمو وعنوانو - أيوا ( رد احد الذين يحملون الشاب المصاب ) بدأ الشاب الذي بدا مسيطرا علي الأمور يسجل بيانات القتيل وسجل رقم تلفون اسرته ثم وجههم ناحية سياره تقف بعيدا عن مواضع الاحتجاجات وقال لهم سيكونون في إنتظاركم وسيذهبون به إلي أقرب مستشفي أستمر الراشق طويلا الحجاره من ناحية المتظاهرين والغاز المسيل للدموع من ناحيه ثم بدأت اعداد المتظاهرين تئن تحت وقع الرصاص المطاطي والغاز المسيل للدموع إرتفعت معدلات الإصابه وصاح أحدهم من قلب المتظاهرين القتله يستخدمون الذخيره الحيه وفي خضم هذه المجالده المميته لاحظ الشباب تدني في معدل الغاز المسيل للدموع كما أن بعض الفوض دبت بين صفوف رجال الشرطه وبدا بعضهم يوجه سلاحه إلي جهه مغايره وكأن كانت هذه الإشاره التي ينتظرها الشاب المسيطر فقد طلب من رفاقه التقدم دون تردد نحو سيارات الشرطه المتراصه وتحت ضغط المتقدمين بدا بعض رجال الشرطه ينسحبون ناحية الطريق الوحيد الذي يفضي الي المنطقه البعيده من الحي مما جعل الشباب يسرعون ناحيتهم لم يمضي الكثير من الوقت حتي اشتعلت المنطقه وأخلاها رجال الشرطه وبدات الصيحات تتردد في الآفاق - يابوليس خليك بعيد بينا وبين تجار الدين يتبع |
| All times are GMT. The time now is 03:58 PM. |
Copyright ©2000 - 2024, Futeis.com