حجاب معاو طبلة
 

بسم الله الرحمن الرحيم

في لمة نسوان تجمعنا ومع الجبنة تونسنا وفي فش وفش غباين وقصص النسوان كل واحدة تحكي وتشكي وتبكي

من المشاكل . الراجل , والنسابة العصابة , والدايرة السعودية , والراجها مغترب والكفيل والاوراق دايرة حل , وعندو

محل وما في ذباين , والدايرة العرس, و ..... الشئ كتير .

قامت واحدة وشارت علينا وقالت الشغل دا داير فكي ولا شيخ ؟؟؟؟ هو الوحيد العندو الحل لكل الكلام دا

المهم اتفقنا على يوم عشان ندبر القرووش الشيخ داير مليوون يعني نجمع من مصاريف الاولاد ونمشي , والمشى

اليوم الفلاني بعد المغرب الليل سترة .

والفكي عندو طلبات وهي كراع نملة, قلب قبورة (جرادة) , ويد جعونجة , و عين هدهد , وقيس عليو بقية

الاغراض , ودخلنا عليو وكل واحدة شايلة حجابها انا حجابي دايرة فيو طبلة افتح واقفل عند اللزووم , كنت

خايفة من المحاية لانو واحدة جربتها في غنمايتها , قالت الغنماية بقت ماشة معها اي مكان كان بيت الفراش واقفة

ليها عند الباب , دا مشكلة كبيرة اخير لي الطبلة اتحكم فيها .

كلهن شايلات الربطت اخت زوجها في سبيب الشعر وكل واحدة حسب طلبها , وجينا البيت كل واحدة عايشة في

خوف وهلع شديد نختو وين في المقابر ولا تحت المخدة ولا تحت اللحاف ولا في الدولاب كلو معرووف تلات يوم ربربة شديدة

الفكي قال تلات ايام

مر اسبوع ومافي شئ ونشيل ونعاين في الوشوش ومافي حاجة التقول اخيير زمان الامور تعقدت

اكتر واكتر , والمليون هو الوجعة الكبيرة والفكي فصح ملح وداب , يعني ضحك علينا ضحكة عدوووك

الشكية لي الله واحدة عاقلة فينا مافي تذكرنا انو دا شرك بالله ومن اكبر الكبائر , ودا شغل الجاهلية

وتذكرنا قصة المرة بتاعت الكتابة مشت الحج وداخل الحرم وجنب الكعبة ولم تشوفها , سبحان الله وحديث النبي

صلى الله عليه وسلم الذي قال (اعلم ان الامة لو أجتمعت على اينفعوك بشئ لم ينفعوك الا بشئ قد كتبه الله لك, ولو أجتمعت

على ان يضروك بشئ لم يضرك الا بشئ قد كتبه الله عليك) .

العلم نور والجهل ظلام , التوعية مهمة شديد

واخيرا البضُرالناس الله بضُروو

الله يكفيكم شر الكتابة والجاهلات بالدين قولو آميين

ام محمد.....لك التحية...وانت دائما تطرقي اشياء تتعايش في مجتمعنا... حتي صارت عادة عند البعض
اشياء دائما اشبهها بالسوسة التي تنخر في "مرق البيت"...علي مهل...
نتمني ان تكون هذه مساحة لمناقشة هذا الفعل الذي لو نسبناهو للجاهلية..نكون قد ظلمناها
لك التحية دائما

هوووووووي يابتاعة الكِتب والبخرات والحجبات .
بالتاكيد والذي لا مفر منة ان هذة الاشياء موجودة وحقيقة ماثلة في مجتماعتنا ولها تاثير في الشخص المعين .
وهذة الاشياء متوارثة من زمن هاروت وماروت في زمن سيدنا سليمان ولي هسي وقد انزلهم الله فتنة كما زكر الله في كتابة وقد كانوا يعلمون الناس السحر ويفرقون بين الرجل وزوجة .
ومن هذة الاشياء عمل الربط ممكن يربطوك من امراتك ولا تستطيع اتيانها وممكن ان تكرهها وهنالك اشياء كثيرة اخري .
في عرق محبة إعملوا ليك تحبي حب خالص لا تشوبة شائبة .
وفي حجبات الطبلة المذكورة اعلاه وهي حجبات تعمل وممكن ان تحميك والجمبك في مسافة تقدر بكم متر كدا ولي حوالي 10 اشخاص معاك وهنالك حجبات السلاح ما امشي فيك والعقرب ما تلسعك والكثير المثير .
وقد اشتهرت بعض المناطق في السودان بمثل هذة الاشياء منها مناطق في الدمازين وغرب السودان ( تتميز هذة المناطق بعمل حجبات مضمونة وتعمل بكفاءة عالية ) ومن الذين كانوا يعملون هذة الحجبات شيخ حامد المذكور اعلاه والذي قام بعمل كتابة للمراة التي لم تستطيع رؤية الكعبة .
وهذا العالم عالم مثير وفية اشياء غريبة وعجيبة ولكن بالتاكيد القران يبطل هذة الاشياء كما ذكر شيخ حامد .