لساني واقع ومسيخ
 

خشمي مسيخ وقطيم ولي كم يوم كدا اقوم معسم وانوم معسم
جسمي مسخن وراسي لافي وعيني مزغلالات
قدر ما قلت اشوف لي ناس عرس ولا سماية ما لقيت
ضربت لي اصحابي قلت واحد اعزمني شية كلهم لقيتم مشوا الخرطوم
قلت النشوف لي دكتور افحص علي اللسان دا الاشوفوا مالوا الايام دي عامل كدا
مشيت لي الدكتور
قالي ارقد هناك
جر نفس طويل
جر نفس قصير
افتح خشمك
مد لسانك
افتح عينك اليمين
افتح عينك الشمال
خلاص قوم
انا ما حديك دواء لكن اعمل الفحوصات دي
طلعت طوالي مشيت علي بتاع العصائر الفريش
كبايتين لو سمحت
جيب ستة جنية
كرعي رجفن ولساني بقا ناشف دا شنو الورطة الوقعنا فيها دي
بلعت ريقي وقلت يازول الدنيا دي قليلا وكتيرة رايح
دفعت الستة جنية
وجريت ليك الكبايتين
ومشيت لي بتاع الفحوصات
طوالي ترزني في اصبعي ولا عاين لي وقال لي تعال بعد نص ساعة
بعد نص ساعة ندهوني وادوني ظرف
ومشيت لي الدكتور
جر قلم وورقة وكتب راجمات
واترجمت
ولسع لساني واقع
ومسسسسسسسسسيخ