|
الكــــرسي الســــــــاخن..يجلس عليه (-)
الفكرة معروفة للجميع...واحد يجلس علي الكرسي لمدة إسبوع.....وعلي الأعضاء ممارسة حقهم الديمقراطي في
توجيه كل انواع الأسئلة...مع مراعاة الاتي ---الإجتهاد في إجابة الأسئلة قبل إنتهاء فترة الجلوس في الكرسي الساخن ---من حق الجالس علي الكرسي الساخن عدم الإجابة علي بعض الأسئلة إن أراد ---علي الجالس في الكرسي الساخن ان يحدد من يكون بعده..... بيوم أو اكثر وسوف تقوم الإدارة بمراسلته. ---من الثلاثاء حتي يوم الإثنين....... ---اول ذول يدخل يحدد من يجلس علي الكرسي الساخن هذا الإسبوع ولكم مني كل التحايا |
الإختيار صعب
لكن خلونا نبدأ بي عارف عبد الرحمن
|
شكرا لك اخونا أبودبارة ............وخير الإختيار
|
إسئلة قد تكون معروفة للجميع ولكن لابد منها
الحالة الإجتماعية: مكان الإقامة: أخر مرة زرت فطيس: سياسيا: توقعاتك للإنتخابات القادمة: من الفائز: ولي عودة طبعا |
لا يا معلم سخنو اكتر
|
انا مدردقو ليك.......اصبر ليهو عشان ما إختفي |
احبتي الكرام شكرا لأختياركم لي وأتمني صادقا أن أكون قدر ظن أخي أبودبارة فيني وأوفق في الأجابات .. والله أقدرنا عليها بس خليكم حنان شوية أنا ما مذاكر كويس لان كراسة الذكريات أندفنت في كوم قش الصبابة والحنين وجرفتها غربة الذات وما قالت كش ... أتفقد الأرقام أحسب بعدالألف مائة بل ثلاثة مئات بل ثلاثة حاجات ماثلة ذات قوة مبيدة يعرفها ودالخضر...
الفكرة أن ترتبط ليلات الشجي والشجن بنهر كاد أن يجف وتموت فيه الأسماك وتموت من العطش ونشاف الريق وعوجة الطريق ... رهق قديم منذ زمن سحيق تورمت كرعيه من الحوامة بفتش لحواء لان منذ أن غازلته وقامت جارية صوف وقلبو يدق زي الطار لم يخبو توهجه وزال عن الأرض التعب وأمتلأت البحار ومقياس الرسم بقي جرجير واطة وبلكات طين دفن الليل اب كراعن بكدارة .. أنا متفأل جدا وبكره الشؤم وطائره ..بكره أسرائيل والعاوز أفرق بينا وحركات خاسر سجمان ... أحب السودان جدا.. ان جيت بلاد تلقي فيها النيل بيلمع في الظلام زي سيف مجوهر بالنجوم من غير نظام تنزل هناك وتحي ياطير باحترام وتعيد سلام علي نيل بلادنا سلام وشباب بلادنا سلام ونخيل بلادنا سلام مع تحياتي : أبو عبدالرحمن |
قال أدردقو قال .. تدردق منو يا دقوسة .. أنا زاتي عاوز ادردق روحي ... وأعمل لي درداقة .. أنتو عندكم مغلق وأنا ماعارف
|
يا عبدو حوي كان دي أسألتك ياني الجاي الأول ...
السؤال الأول : الحالة الأجتماعية متزوج والحمد لله ولي أبن عبدالرحمن وعمره 7 سنوات وزوجتي من مدني السيدة: نشوي أبراهيم نور بنت عم الأستاذ عصام محمد نور ( يعني العندو حفلة أمر علينا أول )لزوم الواسطة وكدي ... السؤال الثاني :مكان الأقامة مكة المكرمة . السؤال الثالث :آخر مرة زرت السودان . كان ذلك قبل سنة وخمسة شهور .وبنزل في رمضان كان ربنا سهل الفائز في الأنتخابات : الهلااااااااااااااااااااا ااااااااال والبحب الهلال جعلي جد ماهو زول نية رمزو الشجرة ومنو الغير البشير البحكم السودان .. وين باقي الأسئلة علينا جاي |
ماتجامل
تعطي هذه آلألقاب
- آوكسجين منتدى قرية فطيس..؟ - بسمة منتدى قرية فطيس..؟ - حكيم منتدى قرية فطيس..؟ - ملح منتدى قرية فطيس..؟ كم ريال في محفظتك حاليا ؟؟ وكم صرفت اليوم منها ؟؟هع بامانة لمن تقول: - طلبآتك آوآمر ..؟ |
سلامات يا عارف
لك التحية الاخ عارف والشكر للقائمين على المنتدى للمرة الثانية الذى اتاح القاء
سؤالى ساااااااااااااااااااااااا اااااااااهل موقف حرج جدا لا تنساه ههههههههههههههههههههههههه ههههههههههههه |
تحياتي أخي علي ولجميع الأهل .. أحاول قدر الأمكان أن أتذكر موقف محرج ... أمكن أكثرها أحراج كنت خاطب واحدة من مدني وأختلفنا . وكانت نقاط الخلاف كثيرة وكبيرة .. وما كان في طريقة للأستمرار .. المهم أنا عندهم وكنا لوحدنا وخرجت وفضلت جالس لمدة ليست بالقصيرة ومارجعت وافي زول كان موجود .. وبراحة مرقت أتلفت ومن ديك وعيك ..
|
جيتك راجع:
---في فطيس......شيء يزعجك جدا تتمني أن تمتلك السلطه لتغيره ---فطيس أم الصفا؟ ---(الإبتدائية, المتوسطة, الثانوية) أم (الأساس, الثانوية)؟ كفاك هسه الندي الجماعة فرصة |
لا يهم الأسم .. لوبيدي سلطة هناك أشياء كثير لا تعجبني مفروض أن تتغير .. وضع الشاب الموجود حاليا في الحلة سلبي لابعد ماتتصور .. النادي مهمل .. الميدان فيهو ناس ماعارف جو من وين .. الأجتماعيات بقت ضعيفة التكاتف والتآلف القديم بقي مافي ..الحلة وسخانة الشوارع الواسعة ديك بقت زقاقات .. شباب لسه غض يتناولوا المسكرات .. شكل السوق .. الأكشاك الكثيرة بالنساء صارت أماكن مشبوه تعج بالنساء من كل ونوع .. فوضي عجيبة وربك أستر
أما للسؤال الثاني أنا أفضل الأبتدائية والمتوسطة والثانوية .. يعني تصور طالب كاشنو 8 سنوات زول جايب ليهو خبر مافي وهو زاتو أنسي القراية |
أوكسجين ..أنا عندي نزلة اقوم أعاديكم .. بسمة دي كانت أسم واحدة بطلة في كتب الألغاز كنا زماااااااان نقراه محب وتختخ وعاطف وبسمة ..حكيم دي بخاف منها من زمان حسن فحيل أداني حقنة بنسلين ومن داك الزمن بطلت الطب اقصد أكون حكيم..أما ملح دي ياخي ريحني منها بزيد ضغط الناس ساي ... كان عندك حاجة غير ديل أكون كويس ..ديل كلهن ما مقاسي .. أظلتن كرعينا ساي
أما في جيبي حوالي 2575 ريال 2500 حقت صاحب العمل والباقي حقت أخوك شنو ليك ماترطيبة... وصرفت 20 ريال 10 بطاقة موبايلي و10 غداء والحمد لله .. وفي أنتظارك |
انت قالو بقيت مريخابى بعد ان توفى ايدهور صحى الكلام داااااااااا
|
عارف عبدالرحمن عضو الجيل الغارق في الرومانسيه المنصرف عن همومه الي هموم اخري تخصه المتمرد علي قوالب المألوف بقوالب اخري الان صارت تماثل المألوف
هل انت منصرف بدفن همومك في حضن التسلط ماالمهم الان في نظرك فوز البشير ام لملمة اطراف الوطن الدامي ما رأيك في اكتوبر وابريل وانتفاضات الشعب السوداني التي تكررت الغريب انك تحب الهلال والهلال مؤسسة ديمقراطيه استعصت علي التسلط دائما كانت تأتي بمن يديرها بشكل ديمقراطي ماهذا التناقض ما ماخذك علي القياده الجماعيه هل تعتقد ان استنجادك بصلاح احمد ابراهيم ووردي بحلك ممننا والله الا تقول واي حتي نفكك ودي يادوب بدايه |
الأح درش الرد لأسئلتك موجودة في مكان تاني .. يعني ماصهينته منك..
|
Quote:
|
عبده طبعا انا مستغل عامل البعد ونازل ليك في الراجل لكين اسع قاعد اكتب واتلفت يكون ركب الخطوط السعوديه وجاء ولا عض جلابيتو ساي وكتل
|
عارف البكاتل ده انتهي من زمن انتهت كورتو ........... اسي بالتاكيد عض جلابيتو
عارف موقف ما شاكلت فيهو واتمنيت الزمن ارجع بيك وتشاكل |
الأخ أبودبارة معليش أنا والله رديت علي أسألتك بس الظاهر نزلت في مكان تاني ..وأتمني ان اتذكر الردود :
أوكسجين أناعندي نزلة أقوم اعاديكم .. أما بسمة كنا نقراها زمان في الالغاز تختخ ومحب وعاطف ونوسة ولوسة وبسمة لو تسعفني الذاكرة .. أما حكيم دي أنا خليت الطب من زمان . شفت ليك عمك حسن فحيل واعبي في حقنة بنسلين ولما ترزا شفت الشرار في عيوني ومن داك الزمن بلاش حكاية الحكمة .. أما حكاية الملح دي بتزيد الضغط وسيبنا منها شوف حاجة غير الحاجات دي ..ماعندكم أسماء رومانسية كدي أما في جيبي صدق ولا ريال ماعندي ولسه ماصرفت .. واليوم صرفت آخر 5 ريال |
تعرف يا أمير ياخوي الواحد مابحب المشاكل لكن المشاكل براها مدرعانا ..أخوك جعلي ـــ وطبعا جعلي دي بتحرق جرجور من جوة ـــــ أنا ماداير الزمن أرجع عشان أشاكل بس لو لقيت لي لمة في خاسر سجمان ده .. أحي أنا يمين أوريه المكشن بلا بصلة .. وكمان قال داير أحكم السودان .. عشنا وشفنا .. كان فاز انات تاني ماراجع .. نشوف عقال من حسع
|
انت ياخوي مسئول من الخير الزول ده زمااان شارد من قضية قتل حسب علمي
الحصل فيها شنو؟؟؟؟ |
عارف جيتك تاني: اين موهبة التصوير الأن بعد ان تغير الذمان والمكان .................................... إذا كان الواقع يقف عائقا امام طموح الإنسان هل يغير الإنسان صموحو ام يسعي لتغير الواقع ................................... http://vb.futeis.com/picture.php?albumid=4&pictureid=24 لوحة بإسم احفر مصيرك بيدك...........وانا اخدت منها تكوين الشخصية من قرأتك لللوحة........هل هذا ممكن وما هي الأشياء التي سوف تحفرها بطريقة مختلفة وهل هناك إنسان ممكن تسلمو ادوات النحت هذه؟ |
عارف خلينا من السياسة تعال بي جاي ورد علي الأسئلة الفوق دي:
ودي أسئلة تانية: البنايات في الحله بقت عامودية أو بدأ الناس في بناء سطوح وغرف في السطوح بعد أن ضاقت الحلة ما رايك وهل هناك حلول لفك ضائقة الإتساع الأفقي .............................. إحصائية هجرة شباب فطيس الداخلية والخارجية ذات ارقام عالية جدا بالمقارنة مع عدد سكان القرية ماذا إستفادت فطيس من ذلك...........وماذا خسرت ............................... رد يا عارف وسيب الذوغان |
أعوذ بالله العلي العظيم رب العرش الكريم الصمد الفرد الاحد لم يلد ولم يولد ولم يكن له كفؤا أحد .. يامنجي نجينا وارحم وثبت قلوبنا .. وصبرنا ... ياخي تخليني أقوم هسع أكب ليك موية فول حارة في دماغك ... الله أديك العافية وما تكتر من أكل الفول باليل وتملا بطنك وتجيك هواجس أحلام ويتخيل ليك حكايات زي دي.. أنا المريخ ما شجعتو لما كانو فيهو فطاحل بشارة وبشري وسانتو وسامي والعمدة .. أيداهور مين ياعم أستغفر الله .. بلاش أستفزاز أقوم أديك بالعكاز .. بس خليتك لرب العالمين .. سلامي للجميع
|
أحونا عبده بيسأل عن التصوير .. طبعا التصوير عندي هواية وبتمرن حاليا علي بعض برامج الفتوشوب .. أشباع رغبة وكدة.. ولا يغير الله بقوم حتي يغيروا ما بأنفسهم ..والناجح الحقيقي الذي يتعلم من الفشل .. ولو لم يكن هناك طموح أكيد مافي دافع للتحدي والمواجهة ..
أما كيف لي أن تتوقع مصيرك .. هذه تهاويم مايسمي بالسريالية والميتافيزيقية والماوراءيات والامعقول .. فكيف لي أن أحدد مصيري وهذا مستحيل .. وأن كان ذلك ووجدت أزميل فدياس وروح عبقريا .. أحاول أن أحفر للنهر والنخيل والطين والناس والأشياء الممتدة بلا نهاية بأبعاد هلامية .. عشان تكون الأشكال رائعة ويجد الكل موقع .. ولو أمتلكت هذه الأشياء ممكن أسلمها لمن يهتم بفلسفة الشكل والمضمون .. أما عن التطاول في البنيان .. الناس عاوزة تشم هواء نقي بعد أن ملأت الزبالة حيشانهم وزكمت أنوفهم .. أو بقوا فلاسفة ومعتكفين عاوزين أنفردوا بأنفسهم,, وأنا كمان عندي غرفة .. بقت موضة يعني أنا عندي قروش وداير أظهر وكدة .. يعني بدل شنيق الطاقية ..والبلد بالتأكيد ضيقة ولازم الناس تتوسع أفقي أن شاء الله في الكور لأم صفقا عراض .. أما البلد بقت فاضية .. دي حقيقة والكل عاوز أخسن وضعو .. الحواشات بقت مابتأكل عيش والمسئولية بقت كبيرة .. الناس تغيرت والكل عاوز أسكن كويس ويأكل كويس والبس كويس مع الدخل المحدود الواحد مابقدر يعمل حاجة .. فكان لابد من الغربة والسفر عسي ولعل أن تتحسن أوضاعه .. وهذه مش مشكلة فطيس بس بل مشكلة الدول المجاورة أم دوانة وأم مليحة وتنوب .. وكل دول السودان تتأزي من الهجرة وأكيد البلد خسرانة وخروج لك الكفآت من جمع المهن .. لكن لازم نعيش .. يعني كدة أووب وكدة أووبين .. ربنا أصلح الحال .. ونرجع كلنا لبلدنا ولناسنا .. ونعيد صيانة وترتيب ما خربه الزمن بفعلنا نحن |
عارف عبدالرحمن السلام عليك والرحمة والبركة لديك منشاه جديدة بالقرب من اللؤرى متى يتم الافتتاح لاكين الاهم انو البلد خاليه من الاستديوهات ولا البلد ديك فيها قروش كتيرة وشكرا
|
اخي عارف كيف اخبارك منور المنتدى بي وجودك
السؤال الاول مكة الايام الفايته مع عدم وجود الاخ خمزه السؤال الثاني اخبار اخونا خمزه اتزوج ولسه السؤال الثاني متعلق بنادي فطيس اذكر وانا في فتره من الفترات تم ترشيحي للجنة النادي من قبلك في اي كانت هذه الفترة وعلي ماعتقد كنت اصغر عضوا في الجنة لك التحيه اخي عارف |
الأبن يوسف تحياتي لك ولناس البيت جميعا .. أما بخصوص الأفتتاح أسأل عمك جبار .. أما الأستديو كان مرحلة بالصدفة وعدت ..
|
الأخ خالد تحياتي وحمد الله علي السلامة .. والمنتدي منور بوجودك الرائع .. والله مكة بعد السنباطي مشي بقت ضيقة ورتيبة وكان مونسنا .. أما بحصوص زواجو لسه قال كايس ولايص وما لقي ليهو حاجة .. وكان عارف ليك حاجة الحقا بيهو ..أما بخصوص النادي أنا كنت جيت عمرة ولما رجعت لقيتكم أنتو مجموعة شباب وكنتو بتكرهو الجلوس في الباب .. والظبط مافاكر التاريخ بس تقريبا كم وتسعين ..
|
أخر أسئلة .........
فطيس مليانه شخصيات مرحة........شخصيات فرضت وجودها بسرعة البديهه والنكته الحاضرة أذكر لنا قفشات عالقة بالذاكرة ------------------------------ متي تكون الهجرة العكسية.............وماذا يعيقها عند عارف ------------------------------ صورة حديثة لعارف............أبوعبدالرحمن تخريمة يا عارف: بكرة أخر ليك يوم في الكرسي حدد ليك ذول يقعد بعدك.......عشان يتجهز |
الأخ عوض وصفني بالغارق في الرومانسية .. ولما لا الرومانسية تكون أحيانا كثيرة ترياق ومتنفس .. ولو لا الأمل والأحلام لصعبت الحياة .. والأحلام عالم جميل ـــ أجمل من زين ـــ نصنعه بنفسنا ونؤطر مؤسساته بما يليق بدولة الفضيلة .. مش دولة الأشعار والأغنيات وكتابات الظلام... تقدر تذكر لي دور لهؤلاء في تكوين شعب السودان المسلم ــــ ايهما أفضل أن تكون رأس لكلب أم تكون زيل لأسد ؟؟ ــ الهم بالجميع رسالة كل من يظن أن له دور مقدس أكتسبه بعلمه وعمله واحساسه بالبلد مش بالتوارث والجهوية والعقائدية ... لابد أن نتعامل مع الهم بموضوعية العلاج وقوالب فكرة لسبر غور المعقول دون الشطح في الأحلام والهروب الي الحفر كالجرذان ... ستين عام من الهروب والدخول الي الصوامع ولا جديد ستين هدت الخطي وأرهقت كاهل المنتظرين الحل من عند مفكر خائب أو شيخ مجرب أوأو او ... الحلم جزء من تركيبة الأنسان لرسم واقع جميل .. وأظنه حق متاح ومشرع للتفاؤل .. متاح في دولتنا الفاضلة وممنوع ,منع الآخرين من حرية التفكير والأختيار .. أنا أرفض أن أكون مقهورا .. فلن ارضي لغيري ذلك .. ذلك مبدأ أنساني راقي ولو علي الأقل في داخلك .. ودعنا من كلمة الديمقراطية المستهلكة المفروغة من مضامينها التي صارت شماعة لأخفاقاتنا ودفن الرؤوس ..
تعرف أخي عوض أن أمريكا لو لم تكن قوية عسكريا لما تسني لها حكم كل العالم ... وروسيا التي تملك ترسانة الأسلحة الجبارة وأفكار تدمير رهيبة وجل علماء تلك الدول يطورون في المنظومة العسكرية .. وتركوا لنا ديمقراطية الغناء.. لاننا شعوب لا تعي دورها ونتمسك بقشور الأشياء وهاك ياردحي ... شعوب سهلة الأنقياد لانها سلمت أرادتها لمستقلي الدين والشعارات الجوفاء ...الذين ينادون بدولة علمانية في بلد أعظم سكانها مسلمون وقدريون ويؤمنون بالقسمة والنصيب .. والدين لهم منهج وحياة .. مثل ما للغير الحق في أن يمجد فكرته ومن يحب .. ليس لكم الحق في أن تشتموا وتسبوا من لا تريدون وترضون .. هذي هي الديمقراطية التي تريدون ... من فعل في السودان من حروب في الجنوب ودارفور وأجج سعيرها ؟؟ البشير؟؟أرجو الرد وبصدق وبعيدا عن الأنتماء الضيق .. أكتوبر ولو تابعتم سلسة الحوار الذي كان مع الدكتور جعفر شيخ أدريس والذي كان وقتها رئيس أتحاد الطلبة بالجامعة لعرفنا حقيقة الثورة التي يحاول البعض أن يلبسها ثوبه .. وعلي كل حركة أكتوبر حركة لا ينكر أحد ذلك .. وكانت الأستخبارات الأمريكية موجودة ولها دخل في ذلك والكلام للدكتور جعفر وأرجعوا للحوار لمعرفة الحقائق .. أما أبريل ـــ وكنا وقتها طلبة بالحربية ــ لم نزق طعم النوم لمدة شهر.. بدأت شرارتهاوكان عرابها كما يعلم الجميع الترابي الذي يكرهه الشوعيين الذين يتحالفون الآن معهم .. وكلنا يعرف العداء السافر بين المتحالفين الآن .. يعني أعداء الأمس أصدقاء اليوم برغم أختلاف الأيدولوجيات التي لا يلمها حواء ولا آدم .. بس كراهية الأنقاذ .. يعني يالشعب السوداني نحن مايهمنا غير كرسي الرئاسة وانتوا في ستين داهية .. قالوا لو فاز البشير الأنتخابات مزورة .. وندعوا الشارع للخروج ولا تأجيل الأنتخابات .. الهلال وماأدراك ما الهلال جزء عزيز من تكوين هذا البلد بكل أفكاره المتناقضة التي لم ولن تلتقي يوما .. وبالك بأعداء الأمس أصدقاء اليوم الكرسي فقط الذي جمعه .. لان الذين يأتون بهم لا ولن يتستطيعوا المطالبة بحقوقهم لان الذين أتو. بهم ليس لهم حقوق بل ديل لأولاد شيوخنا ومنقذننا يوم الدين ناس درق سيدوا الله يرحموا وناس نظرة يالسمحة أم عجن .. لذا هؤلاء يعرفون سلفا ليس هناك من يحاسبهم ..لان النظرة لهم أنهم ناس مقدسين .. هل في الفترات التي يقال عنها ديمقراطية سمعت بوزير حاسبوه .. أو وزير قدم أستقالتو .. الصادق المهدي عندما فكر ينزل الأنتخابات نزل في أم كدادة .. ما نزل في الخرطوم .. عشان عارف أنو ناس الخرطوم ماممكن تتغشي فيهو .. عشان كدة مشي للغرب الناس العقائديين .. تعرف أخي عوض تفتح ذهني للقراية وحبها كنت نهم بصلاح أحمد وغابة الأبنوس أول ديوان شعر أقتنيه وعشقت وردي وعثمان حسين وعثمان مصطفي والعاقب وصالح الضي وعيييييك .. حبيتهم للطرب واستوعبت الكلام الجميل والتهاويم والرومانسية الفيهو يالعوض وفهمت الرسالة وبطريقتي وكل علي ليلاه أبرطع.. وفهمت اللغة لان من عرف لغة قوم آمن شرهم .. أنت تعرف أنا حبيت مصطفي مش غناء الثوريات والحاجات التانية .. لان غناء مصطفي جاء في زمن غلب عليه الغث والردئ من الغناء .. ومفردة جديدة ومدهشة وروح تاخدك وتوديك وتجيبك راجع وأنت لعسه ماشبعت .. كفاية ولا أزيد .. أخي عوض عدت لأكتب لك لان كلامك أستفزاني جدا .. وخلي الدم أفور في دمي أنا مش عضيت جلابيتي أنا قلعتها عديل وواقف زول خنق .. ولك العتبي حتي ترضي وعرفت من أين يؤكل كتفي .. |
لما آخر مره شفتك
قبل ما أودع وأغادر كنت حاسس إني خايف إني متردد وصابر داير أتصبّر أمامك داير أضحك وماني قادر بس دموعك لما فاضت ضيّعت صبري الشوية ؟ ؟ ؟ عارف ... بصراحة ... ده منو العمل فيك كده ومتى كان ذلك؟ |
عارف عبدالرحمن الواضح وضوح الشمس
الممتلئ بكل تناقضات تعاقب التسلط المتطلع الي البعيد دون ان يمد يديه ليكتب شيئا بمداد جديد في فحوي البعيد نحن نعرف خلفيتك العسكريه ونعرف ماهية المناهج التي تجعل من الضباط مشاريع انقلابيين ليس لدي ماخذ علي الرومانسيه الا اذا تحولت لانصراف غصت عميقا في تمددك المخبوء لاننا ابناء جيل ونعرف تماما جعري بعض عارف عبدالرحمن الذي تختلف معه في الرؤيه ولاتمتلك الا ان تعجب به عارف نحن جيل تربي في ظل دكتاتوريه طويلة الأمد فنشأنا كنباتات الصحاري نلعق الملح ونقتات الغبارا عدم قناعتك بالديمقراطيه اساسا لم يوفر ارضيه ثابته لفتح جدل واسع النطاق تخريمه الأنقاذ اخيرا اعتنقت الديمقراطيه معظم سكان السودان مسلمين علما بان الانقاذ لم نري لها سوي قانون الاحوال الشخصيه والتحرش بالمعارضين الا ان كان الحكم الشرعي يعني بيوت الاشباح والثراء الفاحش وقتل وتشريد واستباحة ارواح واموال الاخرين عارف من يستحق ان يحاكم علي حال البلد هي الدكتاتوريات فقد حكمتنا منذ 1958 حتي اكتوبر 1964 ومن مايو 1969 الي ابريل 1986 ومن يونيو 1989 حتي الان فبالله عليك من احق بالمحاكمه الشيوخ الذين تسخر منهم هم قناعة الكثيرين في بلدنا ذو الاختلافات الأثنيه والجهويه والدينيه واللغويه كيف يحكم بلد قاره كهذا بوضع اليد وبرؤية ضابط حالم مازال يعتقد ان فاطمه السمحه لن ينقذها الا البطش والتنكيل بالاخرين والرقص بكل اللغات والتلون بكل الوان قوس قزح لقد استقام الميسم اخي عارف بات الان السودانيين يعرفون من الذي جعلهم ينكصون علي اعقابهم بعد ان كانوا يقودون الشعوب حولهم عارف التحالف العريض بين الاسلاميين والشيوعيين والليبراليين يعني ان الهدف الواحد الان هو ازاحة الهم الجاثم علي صدر البلد من قال ان اتحالف معك سياسيا يعني ان اعتنق دستورك الاساسي واخيرا اخي عارف كنت ضيفا جميلا علي الكرسي الساخن جعلت تلك المساجلات التي لا تفسد للود قضيه تعود لقد اوضحت وجهة نظرك تماما ومع اختلافنا معك نحترمها ومع اختلافنا معك مازلنا نتصيد الفرص لكي نحادثك مع اختلافنا معك مازلنا نتوق لا ن نتسامر ونتجادل ونسمو فوق الخلافات لنضحك ملء الأشداق في حضرة تواجدك الوسيم لك الشكر والعرفان بقدرك ولك الأغنيات التي طرزها هؤلاء الذين اتيت علي ذكرهم ولك اخيرا كل الود |
عارف معليش شوية اسهاب فقد سقطت مني بعض الجزيئات الفتات وهانذا الان التقطها
لا اعرف لماذا تقيم اكتوبر عن طريق جعفر شيخ ادريس مع ان اكتوبر حركه جماهريه عريضه انتظمت القطر باكمله وهذا تقييم لاكتوبر لايحتاج لتقييم اخر ابريل اخي عارف كانت ضد العسكريين اصلا اما عدم نومكم كعسكريين فهذه محمده لتلك الانتفاضه وابشرك ان الذين صنعوا اكتوبر وابريل مازالوا ضمن اطار الفعل وممكن جدا يصنعوا انتفاضه جديده بس بادوات مختلفه والملاحظ ان اكتوبر وابريل لم يدعي احد ملكيتها انها صناعه سودانيه خالصه صنعهما الشعب السوداني بكل اختلافاته من اقصي اليمين لاعند اليسار وهذا داب السودانيين عند الاحداث العظام ومازلنا نغني لحريق المك في قلب الدخيل |
أخي الحبيب عوض لك الود الذي يبقي بأذن المولي .. أنا لا أويد الكتاتوريات كما يخيل لك بمعني الحرفي .. فقط من الذي يقود السفينة لبر الأمان والكل يتربص بنا الدوائر ... وشيوخك الذين تذكرهم ليس أختيار الشعب السوداني ... وأنت أدري العارفين بالطرق التي يسلكونها كي يدوسوا علي هذا الشعب .. ومن قال لك أن لا توجد دولة في الدنيا عايشة من غير أمن .. وهل كل من سجن برئ؟ ولابد من الشكيمة والحزم ..والا لصارت الدنيا فوضي يعيث فيها اللصوص والمارقين وقطاع الطرق والمخدرات والأفلام الخليعة والفساد الأخلاقي ..ووووو لو لم يكن هناك أمن لما أستقرت الدنيا أمريكا حكوماتها اتت بالديقراطية .. ولكن يحكمها منطق القوة والجبروت والبطش ..تأتي بالناس من أقصي الدنيا وتستعبدهم .. وتسجنهم .. مش دي أمريكا التي تستقوا منها المعلومات والأخبار .. ثم شنو بيوت أشباح القايمين فيها اليومين ديل .. وين بيوت الأشباح .. سجون عادية .. يسجن فيها كل مارق أو متهم في أي قضية .. والآن لو قدر لأحد هؤلاء الشيوخ أن يحكم السودان هل سيقفل السجون هذه ؟.. ثم هل سيترك كل مارق عن القانون يفعل مايريد ؟ الذين يروجون لمثل هذه الأخبار لن يستطيعوا أثبات مثل هذه الأشاعات ..سجن كوبر موجود من زمان ومرت كم حكومة كان عسكرية أو ديمقراطية وكوبر ياهو كوبر وجهاز أمن الدولة ..هو نفسه جهاز الأمن العام وقبله البوليس السري وكل دول العالم لها نظام أمني .. حتي هناك تبادل معلومات لتعقب المجرمين والمارقين .. ودا تنسيق معمول بيهو في كل دول العالم .. يعني الموضوع أخي الفاضل ماعندنا بس .. والشعب السوداني قد عرف وسوف يختار الرجل المناسب .. فما قولكم لو أختار الشعب البشير ؟؟ حنرتاح من حكاية الدكتاتورية دي ؟ ولا لازم أكون الرئيس من هؤلاء الشيوخ عشان تسكتوا ؟ وحنشوف حركات الظلام وكده ؟؟؟ وأقول ليس للود قضية أن أختلفنا في الرأي ... ولك العتبي حتي ترضي .. أن كان هناك مأخذ علي كلامي ..ولم يفهم مرماه ودمت وعاوز أخونا عوض أكون في الكرسي الساخن ودا أختياري فاهم ياعبدو
|
حابدا من الاخر ياعارف اشكر لك اختيارك اتمني ان يكون جلوسي في الكرسي خلاقا بمثل جلوسك
ثانيا البوليس السري هذه تسميه مرتبطه بالنازيه وهاانت تربط النظام بالنازيه اما جهاز الامن والمخابرات الوطني الذي يعمل لحماية البلد وسد الثغرات والذي لايستغل سلطاته بالتنكيل بالمعارضين فهذا نعم تواجد ابان الديمقراطيات وهو موجود بكل ديمقراطيات العالم الديمقراطيه التي تتحدث عنها هي من جعلت امريكا هي امريكا وهي كانت السبب الرئيسي في هزيمتنا من قبل الكيان الصهيوني اذ ان الانسان الذي يمارس الديمقراطيه يحارب بشكل مختلف عن الانسان المزلول المطارد بالبوليس السري المهدد بالابعاد والسجن والتشريد اما لوفاز البشير في انتخابات نزيهه دون تجاوزات فسنحترم ككل من يحترم الديمقراطيه خيار الشعب السوداني الظلام الذي تتحدث عنه اخي عارف ينشأ في ظل تكميم الافواه فخلي جماعتك يطلقوا الحريات العامه وبكون مافي ظلام اما ما تحدثت عنه من تدني في القيم العامه والله ياعارف كلنا نزلنا اجازات وشوفنا مايدور لا نريد ان نخوض فيه ولكنه اسوأ يكثير من ايام زمان ( ياحليلها عاد ) فالمشروع الحضاري لم يوفر لنا حتي ماكانوا يتشدقون به من انهم جاءوا لمحاربة الرزيله لك الشكر ومتحريك في الكرسي الساخن |
وعودة علي تعقيبك الأخير أستشهدت بجعفر لانه كان في قلب الأحداث والمسئولية والرجل محترم ويشهد له الجميع بذلك خصومه قبل مريديه ـــ أن جاز لي القول ــ وأن كان لا يتحدث الحقيقة .. لمذا لم يظهر أحد وينفي هذا الحديث .. لانه ذكر بعض الأسماء من خصومه ..وأولهم الترابي .. وأشار لأساس بداية العصيان ومسبباته .. وأهل مكة أدري بشعابها ..هو كان في قلب الأحداث وهو خير من يتكلم عن ذلك ..فمن تريد مني أن استشهد بكلامه وانا وأنت لم نعايش تلك الأحداث بل سمعنا .. وأرجع لكتاب أحمد سليمان (ومشيناه حطا كتبت علينا )وبالمناسبة أحمد سليمان من مؤسسي الجزب الشيوعي السودان وكان في مصر لان أخي عوض أنا أهتممت في يوم ما بهذه الأتجاهات ولقيتا لابوصلة لها .. لاطعم ولا رائحة ولا لون ــ دا طبعا من عندي أنا وما تزعل ــ عشان الدكتور جعفر رجل صادق مشهود له بالأمانة والصدق وكتاباته في الصحف وله كتبه وأستاذ ملء السمع والبصر .. فيخيل لي مافي أفضل من ذلك للشهادة .. أما أبريل أكون في علمك لو لا تدخل العسكريين في الوقت المناسب .. لكان وقع ماخطط له من فوضي وحرب ماكانت تنتهي حتي اليوم .. فقط حكمة سوار الدهب فوتت الفرصة علي عملاء الأستخبارات الأجنبية .. والذين يحاولون الآن مع السفير الأمريكي .. لأفشال الأنتخابات بشتي السبل .. ودونك ماقاله بتاع حزب البعث وأجتماع الاحزاب في السفارة الأمريكية . يعني كدة حكاية أصنعوا أنتفاضة جديدة داكان زمان .. زمن الغفلة والشعب المغمض ..الله يهدي الجميع لما فيه خير البلد ونحن والله لما نقول زولنا ياهو البشير .. لانو .. لو بطال برضو أفضل من الضلالية المنافقين .. بعدين أنتوا لا يعجبكم العجب ولا الصيام في رجب .. قلتوا دايرين أنتخابات .. أهي الأنتخابات قدامكم شنو الهرهرة؟ أثبتوا .. أنت مسعول من الخير بابكر النور وهاشم العطا وبابكر عوض الله وفاروق عثمان حمدالله الكانوا مع نميري واستلموا البلد من ناس الصادق المهدي وبعد شوية دخل معاهم معاوية أحمد أبراهيم ــأخو مقطوعة الطاري فاطمة ـ الشفيع أحمد الشيخ وواحد كدة ليهو دومات .. أسمو ضاع مني ..كانوا قايمين بحركة أنقلاب عسسسسسسسسككككككككرررررييي ية ما مدنية ومظاهرات وكدة وجو عن طريق ليبيا .. بأيعاز من الأتحاد السوفيتي المنكود .. ديل ياخوي ماكان من جماعة الديمقراطية ؟ ولا الزمن داك لسه الديمقراطية ما ولدوها..يعني الأنقلاب حلال هناك .. وحرام هنا ..ولعلمك الأسماء التي ذكرتها كانت علي رأس الهرم الشيوعي مش في السودان بل في أفريقا قاطبة بل دول العالم الثالث ..
|
| All times are GMT. The time now is 12:24 AM. |
Copyright ©2000 - 2024, Futeis.com