|
بله الشاعر ..... شاعر الحب الوله
كنا قبل فترة قد بدأنا التوثيق والكتابة عن ظرفاء فطيس لكن هناك خاطرة مرت بى ذكرتنى احد هولاء الظرفاء الا وهو اخونا بله الصديق المعروف ببله الشاعر
وطبعا الكثيرين من مواليد جيل الثمانينات لا يعرفون شى عن بله الشاعر ..... فشاعرنا ظهر فى الفترة من منتصف السبعينات حتى منتصف الثمانينات ثم بدأ نجمه يخبو والحقيقة ان شاعرنا بله دايما يذكرنى بالشاعر ادريس جماع لان هناك قواسم مشتركة بينهم مثل الحب والوله والحزن النبيل حتى فى مرة دققت فى صورة ادريس جماع التذكارية فوجدت ملامح شبه بينه وبين شاعرنا بلبل رغم ان جماع بديك احساس انو سااافى ... فى سنة 85 كنت فى اجازة بالسودان وكنت بصحبة الصديق ضياء الدين النمير فى منزلهم العامر وفجأة دخل علينا اخينا بله الشاعر فطلب منه الاخ دى دى ان يتحفنا بشى من اشعاره فرد عليه شاعرنا رايكم شنو اسمعكم قصيدة السانوى العالى وهى من اشهر قصائده ومن عادة شاعرنا بله انه عندما يريد ان يلقى قصيدة يغمض عين ويجعل الاخرى مفتوحة شاخصا بها للمساء بزاوية منفرجة ثم يتأوه طويلا ويبدأ فى الشعر وقد فعل اااااه يالسانوى العالى اللبنوك وفى فطيس ختوك والبلوم من كل البلود قصدوك وناس الجباقى وابوالتج بالبكاسى نقلوك وناس ودشمبول علا سورك ومن الخلوق حاشوك وعمى الريح وودالبدوى من المرقة حموك وناس ود عبدالرحمن باللكل النضيف غذوك وانا مستنى جرسك يدق ويفكوك بس بخاف عليل من الدروب وشلة النادى والشوك ثم عقبنا انا والاخ دى دى الله عليك يابلبل بالله واحدة تانى ثم عقب اخينا بلبل بقصيدة الحلة بفتح الحاء يعنى حلة ملاح راسه عديل جات شايلة الحلة ماشة ماسورة ناس فتح الله وكت الخلوق شافوها قالوا دى صيدة ولا هدية من الله قلت ليهم لالا دى نوارة فريقنا اللهارسه الناس وكاتله بله يومى اللشوفة يصبب عرقى وقلبى يسوى هلا هلا ثم اكمل القصيدة وعقب اخونا دى دى ياسلام عليك يابلبل بالله ادينا تانى واحدة مع الشاى الظريف دا رد شاعرنا بلبل طيب اسمعكم قصيدة الجردل قلنا ليهو جدا وبدا شاعرنا كالعادة بالاه ااااه جات شايلة الجردل قاصدة موية الجدول ياريت لو ماسورتنا كابة ودافقة زى الجدول وكت مرة بعلى دقات قلبى زادت وطعم حلقى بقى حرجل حرجل بعد ان خلص شاعرنا قلت ليهو بله رايك شنو تعمل ليك ديوان شعر قالى كيف يعنى وقلت ليهو يعنى تجمع كل قصايدك دى فى كراس واحد ونختار ليهو اسم وانا بخطها ليك ,,, قال لى طيب نسميهو شنو قلت ليهو والله يابله بما انو قصايدك اغلبها جرادل وحلل وفى فترة شح الموية انا بقترح نسمى ديوانك ( الماسورة قاطعة ) ضحك الاخ دى دى حتى الثمالة وكنت بجد جلسة مع احد ظرفاء فطيسنا الحبيبة |
قصيدة السانوي دي فيها إيحات الذمن الجميل
ذمن العيش البودوه بالكارو للمدرسة ذمن كانت مدرسة فطيس الثانوية قبلة لكل بنات المناطق المجاورة البساطة في شعر بله هو أجمل ما فيه لانه لا يتزاوغ من الموضوع يطرقو طوالي وأكيد شلة النادي كانت تشكل له هاجس شكرا لك يا يوسف للزاكرة القوية وتحية لبله الذي عرف دائما ببله الشاعر |
| All times are GMT. The time now is 11:15 AM. |
Copyright ©2000 - 2024, Futeis.com