منتديات قرية فطيس - مسدار النصيحة

هبت ريح نصايبك ياالمقولبة ضري
كتري في المحن من شينة ما تنصري
إن جيتك مدنقر وشي ماني موري
تبقى نضال معيبة وبت قرين مي سري
يا ريس صباح الخير تراها الحاله
خمسة سنين نجابد في القرايه رجاله
خلاص كمل الصبر بقت اﻹمور بطاله
نحن اوﻻد رواعيه وعقاب ترباله
قضينا الخدمة في الميدان كتال وبساله
ومضغنا الصبر في صي نسايمو علاله
بعد جبنا الشهادات البوظف شاله
ود ناسك مدير اﻹ الكفاءه عطاله
الدكتور وحاتك جوكي سايق الركشة
واب شنبات مصاقر البيت مع ناس عشة
يا حرسوا مسورا ﻻ كديب وﻻحشة
واﻻ إنقد بالسنبك تجيبو الكشة
أكلوا لحمنا ناس الحلة قالوا عطاله
مراتا طلب ومراتا كتار عتاله
بعد ما رضينا يا ريسنا نبقى عماله
فتحولنا الحدود للحبشه والبنقاله
بطانتك خمرت فوقنا القبيله فطير
واقع المقصة والقبنة الملازمو خطير
شبابك لزم العركه ام دوي وقسطير
بعد ماعيشو فرك ليش بتدي الطير

ياريس ياريس جزم شعبك رقد موجوع
وﻻ هاماهو تاني حضارة المشروع
الظلم والمرض علمنا لحس الكوع
والسد إبره في قش للمضايقو الجوع
جوامع الفشخره البتصلو فيها براكم
بتبنيلها كم مدرسة لي شعب جاري وراكم
الحرس المدجج هسع اكان ضاراكم
يوم البعث قابلني كان بقى باراكم
جت إستوزروا الكيزان وملكو السوق
ناسين ساقية الدنيا الدوام بتسوق
الصفاقه هسع والنقايزه عسوق
ما ببروك ساعة جرة الواسوق

ما بتتوظف ياالولد الحكومة إتخلت
شمالك ضهر ساساق ورحن انسلت
خﻼف الطلبه والمهن الحسابه مخلت
إن الجيش أباك ضعت وقنيصتك جلت
بنات العفه والعزة وسترة الحال
إن أبن العوج والشين تراهو الحال
اما إخودن العوجة ومشي الوحال
واﻻ تحفي ساساقا وجري وترحال
سيد المكتب الضروه وتلاتة سراير
عقب الباب مظلل نازله فوقو ستاير
بره تشوف سكرتيرتو ام صديرا فاير
قبيك كارن حبش وهسع زعامتو حراير
التعين قبيل فوقو الشروط منسجمة
شهادة وكمبيوتر فوق لغات العجمة
هسع شروط في كفن البصد الهجمة
والسوق إنزرد بالمسجور والنجمة
اول مرة تتمنع تقول مي دايرة
يوم يومين تلاتة ترى المريكب سايرة
هبشة وهبشتين وقلدة وتدور الدايرة
وال تشيل دبيليما وتقبل غايرة
عقبان صاحبتها ولمة بنات خاﻻتا
مرات فت فراش إتوسدن تﻼتة
البلد القبيل القايل حكمتو صﻼته
نحن بقلتك يا ريس وعد عتراته
يا بلد الوجع ما في الحكومة براها
حتنا نحن قولت الحق دي ما بنطراها
يا الدكتوره عيانتك قضت مسراها
وإنت مفسبكه وجادعه المريضة براها
في المستشفى موبايلين وستة شرايح
وتسمع قهقهات شنون دكاترة فرايح
العيانة تقند والدكيتر رايح
والبجي للحوادث ياحبايب رايح
بالليل في المكتب تلقى الف حكاية
النيرس المكبرته والمرفقه غاية
من مكتب مطرف يا المرمده جاية
في شن العرق والصقط فوفاية

وزير الداخلية سلام الليلة يوم منكورك
أوﻻد الكبار خربوه تب مشكورك
ما دام العوج والشين مرق من كورك
تبقى العوجة فيهم والا في عسكورك
عسكور المرور ادو البسوقوا إشارة
وقفوا وناضمن صحكو وقمتلو صرارة
انا والقاعدة جنبي العوجة ما بتضاره
قالت فوق قصد قايتو المعيشة بصارة
شرف الكاكي في الغرزة وحركتو عريشة
وتلقاهم جماعات في قهاوي الشيشة
أضان الشرطة طرشت والا عينها عميشة
اما الدولة فاهمه والمواطن كيشة
الدورية تمرق والعساكر شادة
والسارينا تنبح في الظلط مي رادة
اوﻻد الكبار بالثابتة في كم مادة
فت تلفون إدق ترجع تقبل صادة

التقرير بجيك كل يوم تمام يا ريس
والمؤمن فطن قالك رسولنا وكيس
هسع بقولك الحق إن لحقت العيس
قبل ما يمروق ابان دقون متيس
الهيروين زرد جامعاتنا عرض وطول
والفنان بغني مع الوزير مسطول
لوري البنقو يا ريس بخش على طول
قصر يد حكومتك والحكاية طول
شريف نيجريا مبسوط من ندى وصاحباتا
وفي مايدوقري فرشولهم شرفنا سباتا
بعد ماكنا في كرري أم لبوس همباتا
يات مافينا بقى ديوس راسوا تحت الباتا
في جدة ونواحي دبي بقينا حكاية
وجرن بنوت مهيرة على الرذيلة حفايا
جوازنا أبصقر كسرن جناحو بقايا
والسوداني قوادن غفير إندايا
وخابر ياريس نضمي بجيك في محلك
وراجين فوق جمر بندور نشوف راي حلك
يا فشيت غبينتنا ام ظﻼما حلك
وال نوارك الوجعة ونصد ونخلك

واسندي علينا يا بلد أم تنايا نصايبك
وعضي علينا في ساعة الوجع بي نايبك
أقدلي وشيلينا هموم صغيرك وشايبك
رجال في الشينة والوجع المغبي حبايبك
ما بنفوتك إن بخلت واطاطك وجفت
وما بنزحزح إن تقلت يمين وخفت
كراعا مامشت في حر هواك وإتحفت
إنكال الرماد فيها ضحيوة وسفت
وابينا السفر واﻹغتراب في جدة
وعهدا يا وطن إنشاء الله ما في مردة
بنوم في التراب ونخت ضراعنا مخدة
بنعيش في هواك إنشاء الله ناكل ردة

محمد حسن إبن عوف.... مسدار النصيحة