|
حكايه للصحو
هذه مساحه للفضفضه
لاتخص احدا بعينه ولاتحدها حدود وليست لها معايير ادبيه اوغيرها مساحه للحكايات والنقد او اي نوع كتابه يعن لا احد وسنحاول فيها اجتذاب الجميع فقد تكون هناك حكايه في تلافيف الذاكره لايعيرها صاحبها انتباها ولكنها ذات مغري ونتاج مؤثر وفي البدايه استطعنا استكتاب اخونا الطيب عبدالله الاحيدب او شعيبو كما اشتهر في شمبات وقتها او حدبدب واخونا الطيب رجل طريف يجيد حبك الطرائف واخراجها وقد كان قائد فرقه كوميديه شهيره في الجامعه وقت كان يدرس وستظل هذه المساحه مفتوحه للجميع سوي من العضويه اومن خارج عضوية المنتدي لا ترتبط بنمط معين اذ لانريد ان تبدو ضربة البدايه الساخره نمط يقيد حركتها ولكن دعونا الان مع اخونا الطيب الاحيدب |
حليل زمن الفن الجميل: .كل يمتاز بلونية يتفرد بها...... مثل زيدان وابو عركي ومصمفى سيد احمد ،بل ان بعض الفنانين اضافو رمزية......... وبعد للكلمات من امثال الخالد مصطفى سيد احمد .وبعض لاحمد شاويش ........ومن سار على الدرب. الحين موش عارف اميز بين الفن الشعبي والحديث ...إذا كان ترباس.....بداياته... بي ( رق)..... واليوم آلات حديثة وجيتارات (تولول).... وموش قادر اميز بين المطرب..... والفنان ....اذا كان ود اللمين فنان....... .ندي القلعة تطلع شنو؟؟؟؟!!. الا رحم الله الذوق السوداني ........ يبدو ان هنالك( فنجطة) فنية ثقافية علمية في الذوق الحالي. وممكن الجمهور يقول عاوز حنان بلوبلو او ندي القلعة بدل وردي او اي واحد من عمالقة الفن .........، يعني الواحد زمان بقعد بي ا دب ......عشان يسمع عثمان حسين........ وكيف بازرعة زرع في وجدانا اغاني خالدة...... كيف الكلمات الرقيقة... المرهفة...... الغير خادشة...... ومحتشمة... اما في الجانب الآخر...... الجمهور عاوز (يحت ) والحت رقيص لا يهتم بماذا يقول الفنان. ....... المهم فيه رجفة وليه عجاج وعرق.... في اغاني ندي وما شاكلها...... في اللونية والكلمات (الشوارعية) وما يتبعها من جمايكية وفنجطة ليها تراب. المهم الفن في نظري جاط وبالاحري ذوقنا جاط . الا رحم الله الفنان الجابري الذي قال (4 سنين عاشهم الحب) وعلي ابراهيم الذي قال (يا يمّة رسلي لي عفوكي ينجيني من جور الزمان) ويبدو اني محتاج برمجة عشان اساير الفن الحالي لانو ذوقي خلاص (فنجط) افيدوني ليه نحن صرتا كدة؟ .الكلمة الجميلة والصادقة المعبرة عن احساسنا تجاه الآخرين صارت خشنة ومبتذلة في فننا مثل زمان يا كلمات (انت كلك زينة وعايمة كالوزينة ويحفظك مولاك ) كما قالها وردي الفنان....... . اليوم كدة كدة يالترلة وقاطرها قندراني.. المهم قالها فنان يمكن( ابو داوود) واذا زعلتوا .... ما كلهم بيحملوا اسم فنان . بتاع الترلة فنان وبتاع الوزين فنان ... سُئلَ احد إخوانا المصريين ..قيل له ......هل تحب الفن السوداني ؟ قال :آه .قيل له ومن هو الفنان الذي تحب اغانيه؟ قال : واحد بيأول يا راقل روح ........ روح يا ....راقل...الله...دا انتا قاي تعمل ايه بعد ما بدلت ريدنا.... ما نسيناك .........نسيناك .......روح ياراقل الله لا يعيدك. انا من راي يكون في تصنيفات ...... بتاعين التراب والفنجطة براهم ....... وبتاعين الذوق الرصين براهيم .......وبتاعين الكلمات بعيدة المدي والرمزية براهم,,,,,,والهناقين براهم... وكل زول يعرف تصنيفو.. مثلا من الهناقين... في واحد طول الليل بهنق حمانا النوم .....في الصباح عرفت انه..... محمود عبد العزيز......... وحتى... اذا واحد طلب اغنية مثل سايق العظمة سافر.... ومش موجودة ،نقول ليه في اغنية سايق الفيات ...... اواللوري حل بي دلاني في الودي اني.........او اغاني الترلات.....والقطارة....اهو كله حديد في حديد..... حليلك يا عطبراوي..... يا بتاع اللغة العربية...... وحليلك يا ابوداوود ويا كاشق .........لو رجعتو لي زمنا دية حاتغنوا وااااااااا اسفاي الطيب اللحيدب |
الأخوة الكرام عوض والطيب قنبور كما كنا نسميه زمان في فريق الجعليين .. ودي ليك جديدة يا ود الخضر ( قنبور ) ضيفها لأسماء أخونا الطيب .. بس كمان في تصنيفات لفنانين فاتت عليه .. وبسألو عن الاصوات الحامضة والأصوات المخمرة والاصوات المعفنة ..والأصوات المطننة .. والفحيح والصهيل والعويل .. والكلام الشعر الركيك والكسيح وكلام من وين جاء ما تعرف زي لياس الزبالة في الحيطة المبنية بالدراب .. لكم التحية وكان لقيت لي وصفات تاني مزبلة بجيكم .. وفي حاجة كمان ما شفت كيف اللبس .. والألوان العجيبة كنا نشوفا عند ناس الكيتا ..بس اليوم أختلطت الحاجات والفهم .. منو البنت ومنو الولد كلو بقي واحد .. وكمان جابت ليها كريمات ومسوح وش الله أستر من الجايات
|
اخونا ابوعبد الرحمن نشكرك علي المرور الذي دائما يشكل اضافه وساترك الرد لاخونا قنبور
|
حليل زمن الفن الجميل : كل زول ممكن يكون فنان ..شوية حطب... عيدان ..اورقن ..... بحة صوت ...... والمقدرة على التهنق الطويل....ويختلف الناس في المقدرة هذه ...... فمنهم دون ذلك .... يعني جحش .... ومنهم فوق ذلك.... يعني..... هناق كبير.....ومن امثال ذلك مهنق عبد العزيز.... يعني الواحد ما بحتار في قيام حفلة .... من الكثرة ...... لكن المحيرني....... في هنيق..... سمح.........وناسو غالين شوية ..... فاتو ود اللمين ووردي في عداد الحفلات...... ونقابة الفنانين همها العداد .... موش الفن الجميل .... يعني الهناقين تهنق...... والناس تفنجط وتعجعج .. والعداد رامي ..... وهو كله فن ..........والهناق فنان......طالما بيدفع ضريبة للدولة ولاتحاد الهناقين . مرة ذهبت الى دار الهناقين بامدرمان وقلت لهم . عاوز ابوعركي ... قالو لي بي 3 مليون الليلة الواحدة .طيب كابلي قالو لي بي 2.5 مليون الليلة . طيب انا عاوز ندى القلعة ؟ قالو بي عشرة مليون . هنا طلبت استبدالها بي 3 فنانين وواحد شعبي برتتة ساااااااي ... المحيرني دار الفنانين كرش فيل لاما الكل ......... يعني سمك لبن تمر هندي....... عجور بامبي بامية يوسف افندي....... في شوال واحد. يعني الناس الدرسوا معهد الموسيقى وكليات الاعلام ...... ممكن يكونوا عازفين لندي القلعة .كما قال الفاضل سعيد في مسرحية (اكل عيش) وهي ما درست موسيقى ....... ولا جامعة ...... لكن سمحة ومقسمة كما قال خضر بشير (الزينة جات تتقسم) (ماشا على تتبسم) حلا وخفت دم شالت عني الهم....... بس عندها خبرة في الفنجطة الجسمية........... يعني البلم الحرامية حرامي ...... والبلم الهناقين هناق.. اللخبتة الحاصلة دي بتجوط المسميات لاهل الفن .....في دار اتحاد الفنانين (الهناقين) اتمنى ان يكون الناس بمسئولية العطبراوي وابو داوود والكاشف في حدبهم على الفن ويكونو (حقبنجية ) يعني بتاعين حقيبة موش( كرشنجية) بتاعين رقيص يا حاجة ما تدفي كاروشة وكل الانكراشات الجسمية. مرة في حفلة لاما وردي وبلوبلو وكابلي وود اللمين وهاجر كباشي,, يعني صينية دراويش مخموجة....... مرة يلاقيك كستر ملفوف بي كسرة ومرة عضم مقرشة ملان خضرة مفرومة .... طبعاً وردي رفض.... يغني مع مثيري الشغب والعجاج وقال واااااسفاي... وزي ما كان في حزب اسمو البهجة والمسرة جناح زيدان وعوض دكام ....بسرعة كونا نحن حزب البهجة جناح بلوبلو ... والدفاع عنها ........ طبعا الكيزان اتعبونا شديد....قالوا نحن.. .فارغين...وتافهين .وناقصين دين..... وهم فنانهم ود اللمين ....... طبعاً ود اللمين بقول .....يا معاين من الشباك.... يا احلى زول شفناك ...ارحم قلوبنا معاك...نحن هوااااااك (طبعا من ناحية اسلامية مفروض يجي بي الباب عديل..... دية شغل خيانة وعدم دين وخلق ) هل في واحد يقبل يعاينو لي اختو بالشباك؟ وبعدين الكلام دية فيه بوظان اعصاب ولا... لا !!! حنان بلوبلو قالت حمادة بوظ اعصابنا ........ تصريح ناتج عن حالة نفسية من اعجاب وغيره. اما وردي الذي قال .... وكت شفتك حسيت بالرعشة من صوف راسي لي كرعي .....دية نقول جن ولا ديه اندراوة .... و على ابراهيم اللحو قال .....كان رقتو .....انا بوصف الشفتو......شفت الشعر نازل لي حنتو التحتو (طبعا بالغ) لكن قال النهود تهتز ودية المجننا .....يعني تصريح بان هناك ناس كتار...جنو...جن كلكي... طيب احسن بوظان اعصاب بلوبلو..... ولا جن على ابراهيم...... ولا رعشة صوف وردي لي كرعيه.(بعدين في بوظان اعصاب ولا مافي ؟ وسببه شنو يا وردي في رعشتك رد على؟ حنان بلوبلو مظلومة نحن واقفين معاها وقفة رجال طول ماهي تاركة الفنجطة الصدرية والوسطية .... الطيب اللحيدب |
الطيب اللحيدب......إسلوب سلسل ....ساخر.......متعك الله بالصحة
وانا اقرأ الموضوع للمرة الثالثة....وفاتح قناة النيل الأزرق.....سمعت الفنانة حرم النور.....تغني للدود....وعجبت كيف يقرقر الدود وهل هي مرحلة الضحك...المضحكة ولا شي تاني........سمعت بضحك البقرة ..."لافاشكيري"...ودا الجنن البقر ... تخيل دودة بتقرقر.....وقطعت مصارينا من الضحك.....هو عندها مصارين... ولا قاصدة شنو بي قرقر يا ود اللحيدب |
الاخ الطيب اللحيدب...... كاتب معروف.... وقد قرأت له مذكرات قديمة كانت في البيت عندهم.... صدفة ووقتها كان بالجماهيرية.... وكانت عن فترته بشمبات الزراعية.... وكنت في زيارة صديقي متوكل.... فأكتشفت ان بشير قاري ممتاز لمجموعة من الكتب والكتاب.... والطيب كاتب ساخر جدا ولكنه مقل.... وتمنيت ان تكون بيننا جلسات ولكنها ظروف الحياة التي حرمتنا الغوص في هكذا تجربة..... متعك الله بالصحة والعافية اخ الطيب... نتمني عليك مواصلة الاسترسال .... يقيني انك ستثري المنتدي بذكريات وملاحظات قيمة.... لك ودي وكل سنه وانت والعائلة بألف خير....
|
حليل زمن الفن الجميل: سؤال تحب تسمع اللعوتة؟ ولا امدوانة؟ لا انا عاوز اسمع دمازين وكبوشية و نيالا ثم بعد ذلك ياحبذا سرحان والمعيلق..... يعني الحكاية صارت تمر نبق لبن بلح هندي ..جايطة المسميات .. زمان في الاسيد وعز الدين الدحيش والثعلب والضب........ يعني جنينة حيوانات ...وقاقرين ومازادا وهينو ...يعني سباق سيارات...بريمة وقلة ....بتاعين مويات...حتى في الفن الكروي اختارو اسامي موش كويسة مثل (شواطين) ..... شواطين ماش بالكورة .... طلع من الاول والثاني ......قووون ....... قوووووووون ....ينصر دينك ياشواطين (الله يفتح عليك) (ده كلام ده) .... نحن لسة فاقدين وعي ... ونحن كورتنا وفننا..... زي فنجطة في صحراء... العاوز يبقى فنان ويعرف( درب الضلع بي وين) سهل جداً .. كلمات والحان واداء يعمل عجاج وربة ....وفي العشاء طبعا حاجات مقسطرة وتحت تحت ممكن تكون في كمان مقطرة.... في فنانين(هناقين) بغنوا بعد ما يفقدو الوعي..... ويغلبهم المشي .....من المقطر طبعا ...في الحالة دي الجمهور بتعامل مع انسان غير واعي ....والرقيص في هذه الحالة.... يعتبرنوع من الفنجطة....مرات الفنان والجمهور يكونو خارج الشبكة ...... الكل شارب مقطر... واحد قال الفن ابداع والابداع حالة تقمص للنفس تنتج ما لاينتج في الحالة العادية للنفس. يعني واحد قال جاتني نزلة وزادت صوتي جمال : قالو ليه ربنا يديم عليك النزلات والبرد ..... الشيْ الموجعني شديد ومخليني مرات اكون برة الشبكة .....عدم مواصلة حسن حبيب ومحمد عبد الفضيل لمسيرتهم الغنائية .. كان ممكن يكونو اليوم ....جوار ترباس ......او على الاقل ...من اهل الضلع......المشهورين في زمن الفنجطة الحديثة. قد ينعم الله بثنائي العاصمة ويبتلي بعض الناس بود اللمين.....وردي .. في ناس لو سالتهم مين فنانك المفضل ... دون تفكير يقول ود اللمين (مع انو موديل 55 ) والفن ما بقيف على ناس معينة قبل 3 اجيال ....حواء والدة والطبيعة لا تقبل الفراغ........ في ود البنا عاصم ......عيبو شنو؟..حسن حبيب لو اتيحت ليه الفرصة زي كابلي ....وكذلك فيصل كوري... في ناس مظلومة لانها بعيدة من الاذاعة0.... واصواتها احلى من ناس كتار بهنقوا في الاذاعة لانها ما لاقية فرصة مع الجماعة الماسكين الاذاعات والتلفزيون. يعني بصراحة كل زول ممكن يكون فنان (وكلمة فنان تطلق على وردي وو د اللمين كذلك على بلوبلو وندي القلعة وكل زول عاوز يهنق. سئلت بلوبلو يوم ..... قالو ليها تغني بي 3 مليون ..... قالت ليه انا كابلي ...... غير 7 مافي كلام عشان كده ناس ضربو زنقرم واغاني التراث لا تسوي شي مع اغاني العجاج والرجفات الصدرية والوسطية ,,,,وكل البرنسات مكتوب عليها بلوبلو وبدل المدائج تسمع ندي القلعة .... او مثيري العجاج.... الهم طور فننا .... وباعد بين الهناقين ومصطفي سيد احمد .....ورقي اذواقن..... اهدي شبابنا الى الاستماع للكلمة ..وباعد بينهم وبين الفنجطة في الحفلات .....ورجعهم لي زمن الفن الجميل ...وكلام الحقيبة الاصيل .... الطيب اللحيدب |
الفنان حسن خليفة العطبراوي(وطنية واخلاص خمسة نجوم ) مات وليس في جعبته 10 مليون بس .الحين ناس القلعة وبلوبلو وما شاكلهم بكنسوا في الملايين كنس في ليلة واحدة . في وا
حدة فنانة راكبة همر (والهمر وما ادراك ما هو ( سيارة بي 300 مليون) رقم فلكي لمسكين في فطيس...العازفين والسواقين المع الفنانات كل يوم شبعانين.....( كلاب عرس) .... .. نقول شنو في الشاعر الذي قال ... تموت الاسود في الغابات جوعا ......ولحم الضأن تألكه الكلاب....يعني كلمات اغنيات...... الفنانات ديل....... بليغة ......ووطنية...... اكثر من العطبراوي ...... سبحان من خلق الناكوسي في القيم والفهم.... افتكر في ميول جماهيري نحو الاغاني( الهابطة من السماء ) بمعنى كل ما كانت الاغنية هابطة شديد .... كلما كانت مقبولة.....وتحت تحت..... بيني وبينك ....فنانين كثار عندهم قعدات تحتية نسمع صوت كاسات.... فيها شاي (الله اعلم.... شاي سادة....... ولاّ بي لبن......... ولاّ كبابي لي شيتاً كُتُر.. المهم ..الواحد يغني لي غاية صوته ما يصير زي صوت المسجل الحجارته ضعيفة...... والفنانات البشربن (الشاي ده )......طبعاً فنجطة بي ترابة....والناس تنقز زي بلوفة السيارة...... في اغاني العرضة .... في فنانة سمت نفسها نادية( لندن) .... يعني سرحان وكسلا ونيالا ....صارت اسامي قديمة.......ممكن بكرة نسمع فاطنة عجرم .....وكلتوم باريس......وعجبتي الخشاب..... ونفيسة الزغبي... والمحيرني انو معظم السودانيين بيبدو بي آخر حاجة سموها الآخرين .... كان اسامي ......كان سوداتل....على المستوي الحكومي...... والشعبي .... مثلاً عفراء مول ...... من الراشد مول في السعودية.....وهلم جريا وراء هذا...نحن بتاعين تقليد....وكضب شديد.....وادعاء بالمعرفة والثقافة...... والواحد بليد.... نحن بنحلف بي اي حاجة تلاقينا كما في فننا (بنحلف بالمشاعر والشعر الضفائر ) وحلفتك يا قلبي خليه الغرام (وحيات الشامة في محياك...وحيات كل بسمة عرف معناها ...كما قالها وردي الكبير....الذي قال ايضا ...دي ترباية حبوبتا الفي( جبل عرفات) وضعتها .... معذورة امها كان دستها........واهلاكي الناس شافتها......(الظاهر اخوانا الحلفاوين ما قاعدين في المسائيل الدينية يركزو شوية) معقول مراة في الشهر التاسع تقدر تحج .....مدافرة ....وكمان تلد في جبل عرفات يوم الوقفة .....وكمان سودانية ....الشاعر برة الشبكة .... والملحن..... والمؤدي........ والجمهور..راي الفقهاء شنو في الاغنية دي ؟...... في اغاني غير معقولة ..... شعرا واداءً ....لكن الظاهر زمان الفنانين كانو شوية ......عشان كدة....... شيء خير من لا شيء... الحين الفن صار مديح .... كل فنان عندو مديح........وصارت ساهور لسهر المداحين........ والمهنقين .......فيها ايضا خلطةعجيبة .......مهنقين بامتياز .........ما احب اذكر اسامي لكن في واحد حتى الالحان كل مدايحة فيها تهنق .... معقول نلم زي ديل مع الاستاذ المادح الحبر ..... واولاد الماحي ....و فيصل الصحافة......وفيصل دية فكي نص .......نص غنى ونص مديح .... كما قال الشاعر عادل امام... وتفنجط الافكار في وضح الدجي.............. فعلمت ان اصحابها كالبهائم تبرز للامام من السفاسف بطونهم............. والعقل المفكر فيهم ديمه نائم الطيب اللحيدب |
الله عليك يا احيدب منتهي المتعة بساطة العباره والثقافه الفلته ومزج جميل بين الماضي والحاضر والانفلات الذي اصاب كل شي فينا كشعب سوداني اصيل اشكر ثقافة والوان قوس قزح من زمرة فنانين عباقره خوفي ليطمرهم هذا الزخم من المهنقين واشكر حشدك لكل هذا الجمال بهذا الاسلوب الممزوج بالحسره والسخريه اكتب اكتب خلينا النرثي مشاعرنا معاك |
الاخ العزيز : عبده مصطفى
الاخ عبده مصطفى .....لك مني كل والود والاحترام والتقدير .
وقالو الدود قرقر حبس الدرب: هذه كلمات جميلة في قرقرة زمان : والقرقرة خشم بيوت .....يعني انواع ..... القرقرة ... عند اهلنا في الغرب...لا يعملها الا الحيوان اللابد للاصطياد ..... ونحن السودانيين من كرمنا في رمضان بنلبد بنحبس الشارع ونسدو عشان الناس تفطرغصبا عنها .......لانو كان قرقرناه بنخرب الطريق ... نكون لابدين برة بس...... والدود في الغرب هو الاسد ...... لذلك في الكمبوفي فطيس ......هناك على دود ......وسعيد دود ....اي الرجل الاسد الذي يسد الطريق لكرم الناس....... وتدعوا هذه الكلمات الديدانية ظاهرياً الى الكرم والقيم السمحة ......وتقول بعض كلمات اغنية قالو الدود قرقر حبس الدرب......... يا اخوانا بوصيكم عليييييييييي...... السيف السنين اسعو.......... بوصيكم عليييييييييييى ضيف الهجوع عشو... طبعا التشبيهات على حسب البيئة......... ومافي اجمل من الدود الاسد في الشجاعة وعدم الخوف ....الاسد مابخاف الموت ....... والكريم ما بخاف الفقر........ لكن اتجه بعض الفنانين الى الحيوانات الاخري في التشبيهات لاشياء اخري مثل .....(.تمساح) ابكبلو الضارب الليا(على ابراهيم)..... سمحة سمحة( صيدا) ما جارتنا بت حارتنا ..وبن رررريدا......( محمد مرغني) والبعض اتجه الى الفواكة.......لون( المنقة)( بلابل) واسال( العنبة) الرامية فوق بيتنا..(مع انو الشي المعروف الرمي للقيمات)......(تاج مكي) . والبعض الى الخضروات كما قال عثمان اليمني .....آسيا تبشة ولقت الرمال........ والبعض الى السكر ...قالو قطعة سكر...سكر... قلنا احلى وانضر(نجم الدين). والكابلي سكر سكر.... والبعض خالف خلاف جميل قال انا امدرمان انا الدر البزين بلدي .... وآخرون اتجهو الى القمر وزحل والثريا (كابلي وابو عركي). اما ان يتجه البعض الى كدة كدة يالترلة...... معناه ان الشاعر مساعدي..والملحن كمساري......والفنان سواق... والفن عموما دخل في نفق الكمسنجية...واي ست شاي سمحة ممكن الكمسنجية دول يجيبوها الاذاعة والتلفزيون كما في حالة...... ندي القلعة وما شاكلها...... اما حاليا كما قلت اخ عبده هناك قرقرة فنية سااااااي حتى نحن بقينا نقرقر لمن نسمع فنان كبير مشتكي واحد غير ستات الشاي طبعا ......ممكن مشتكي جرسون فني ....للشرطة عشان غني اغانيه ....نقول ديه عدم عدادات ؟؟..ولا غيرة فنية ؟؟.....ولا الفن دخل عالم الخصخصة ........؟؟؟؟ ومن امثال الفنانين البشتكو كمال ترباس ،وردي وحتى زيدان. قال: اشيل لي عكاز اضارب الناس البغنو اغاني بتاعتي ولا شنو؟؟ وحتى دعاياتنا ......ما اصلية ......لاباش كيري سارقنها .....والبقرة الضاحكة...والمحيرني ما عملو دعاية للويكة اصلو .....مع انو هي اكلة شعبية ....والشعوب لا تنسجم الا مع فنونها وتراثها واكلاتها.... واكلاتنا.... بس نستخدمها في النبز مع انو بناكلها ...... (لايوق (ويكة) بس) (بتاعين( شمار)) وحتى اللحوم (هوي يااا لحم الراس) مع انو الواحد بموت في لحم الراس وام رقيقة ام شمار نحن شعب لايوق (بمعني يحب اللواييق) وشعب لخبات (يلخبت القرع مع الرجلة والكمونية ويدوها موية ) نحن شعب بحب القرقرة والافتخار بالعندو كما قال ابو داوود ... وكماقال اسماعين حسن ....وا اسفاي وا ذلي ....... لوما كنت من زي ديل....ونحن ديدان الكرم........... والبقع بيناتنا بنسندو.. |
[align=justify]
الاخ عبده مصطفى .....لك مني كل والود والاحترام والتقدير . وقالو الدود قرقر حبس الدرب: هذه كلمات جميلة في قرقرة زمان : والقرقرة خشم بيوت .....يعني انواع ..... القرقرة ... عند اهلنا في الغرب...لا يعملها الا الحيوان اللابد للاصطياد ..... ونحن السودانيين من كرمنا في رمضان بنلبد بنحبس الشارع ونسدو عشان الناس تفطرغصبا عنها .......لانو كان قرقرناه بنخرب الطريق ... نكون لابدين برة بس...... والدود في الغرب هو الاسد ...... لذلك في الكمبوفي فطيس ......هناك على دود ......وسعيد دود ....اي الرجل الاسد الذي يسد الطريق لكرم الناس....... وتدعوا هذه الكلمات الديدانية ظاهرياً الى الكرم والقيم السمحة ......وتقول بعض كلمات اغنية قالو الدود قرقر حبس الدرب......... يا اخوانا بوصيكم عليييييييييي...... السيف السنين اسعو.......... بوصيكم عليييييييييييى ضيف الهجوع عشو... طبعا التشبيهات على حسب البيئة......... ومافي اجمل من الدود الاسد في الشجاعة وعدم الخوف ....الاسد مابخاف الموت ....... والكريم ما بخاف الفقر........ لكن اتجه بعض الفنانين الى الحيوانات الاخري في التشبيهات لاشياء اخري مثل .....(.تمساح) ابكبلو الضارب الليا(على ابراهيم)..... سمحة سمحة( صيدا) ما جارتنا بت حارتنا ..وبن رررريدا......( محمد مرغني) والبعض اتجه الى الفواكة.......لون( المنقة)( بلابل) واسال( العنبة) الرامية فوق بيتنا..(مع انو الشي المعروف الرمي للقيمات)......(تاج مكي) . والبعض الى الخضروات كما قال عثمان اليمني .....آسيا تبشة ولقت الرمال........ والبعض الى السكر ...قالو قطعة سكر...سكر... قلنا احلى وانضر(نجم الدين). والكابلي سكر سكر.... والبعض خالف خلاف جميل قال انا امدرمان انا الدر البزين بلدي .... وآخرون اتجهو الى القمر وزحل والثريا (كابلي وابو عركي). اما ان يتجه البعض الى كدة كدة يالترلة...... معناه ان الشاعر مساعدي..والملحن كمساري......والفنان سواق... والفن عموما دخل في نفق الكمسنجية...واي ست شاي سمحة ممكن الكمسنجية دول يجيبوها الاذاعة والتلفزيون كما في حالة...... ندي القلعة وما شاكلها...... اما حاليا كما قلت اخ عبده هناك قرقرة فنية سااااااي حتى نحن بقينا نقرقر لمن نسمع فنان كبير مشتكي واحد غير ستات الشاي طبعا ......ممكن مشتكي جرسون فني ....للشرطة عشان غني اغانيه ....نقول ديه عدم عدادات ؟؟..ولا غيرة فنية ؟؟.....ولا الفن دخل عالم الخصخصة ........؟؟؟؟ ومن امثال الفنانين البشتكو كمال ترباس ،وردي وحتى زيدان. قال: اشيل لي عكاز اضارب الناس البغنو اغاني بتاعتي ولا شنو؟؟ وحتى دعاياتنا ......ما اصلية ......لاباش كيري سارقنها .....والبقرة الضاحكة...والمحيرني ما عملو دعاية للويكة اصلو .....مع انو هي اكلة شعبية ....والشعوب لا تنسجم الا مع فنونها وتراثها واكلاتها.... واكلاتنا.... بس نستخدمها في النبز مع انو بناكلها ...... (لايوق (ويكة) بس) (بتاعين( شمار)) وحتى اللحوم (هوي يااا لحم الراس) مع انو الواحد بموت في لحم الراس وام رقيقة ام شمار نحن شعب لايوق (بمعني يحب اللواييق) وشعب لخبات (يلخبت القرع مع الرجلة والكمونية ويدوها موية ) نحن شعب بحب القرقرة والافتخار بالعندو كما قال ابو داوود ... وكماقال اسماعين حسن ....وا اسفاي وا ذلي ....... لوما كنت من زي ديل....ونحن ديدان الكرم........... والبقع بيناتنا بنسندو..[/align] |
حليل زمن الفن الجميل:
جضرت كيتات كتيرة .. وكانت جميلة ......بي طرادة...توقف الكيتة كلها.... تحية لك .....وتكون هنالك اذاعة لاسمك ...والمبلغ الذي دفعته لكل الملأ ...وعلاقتك بالفلاتة ومهنتك ايضا تذاع... وكنا نحن اولاد( الارب) ننظر مبهورين لكضوم صاحب زمبارة الكيتة المنتفخة و الذي لا يكل ولا يمل من اخراج الالحان الجميلة وحسان الفلاتة يرقصن والنقارة التي لا تحتاج الا الى تسخين للجلد قرب لهب من اعواد القصب او حطب القطن..... ولفت نظري تواضع هذا الفنان الذي لا يحتاج الا الى عشوة متوسطة ليست ندي قلعوية او ود اللمينية .... والتي تحوي اللحوم الحمراء والبيضاء وكل الوان الطيف الغذائي ..... الكيتاوي لا يحتاج الا الى ديك ويا حبذا لو كان معاه (بلبوط او قرموط سمك محمر بالزيت) او (قدو قدو) ... وهذه الاشياء لا تلكف كثير العناء حتى لأمسك المساكين.... لو دفعت خمسين قرش .... ينظر المذيع المقدم نظرة اعجاب لهذه الخمسين قرش كانها من كوكب آخر... والتي تساوي يومين عتالة او 3 مع( صحبة الكدنكة) لكي تستلمها..... وتساوي ملاح يومين للاسرة...... وهنا يقفز الى اعلى فرحا كأنه وجد كنزاً .......ويصيح صيحة توقف صاحب الكيتة من التزمير.... والنقارة تختم بنقرة تحية .. ويصيح المذيع معلناً ......ادريس أبد الردي ......سواق لوري.....نُس اتالة بتائين فلاتة يأتلو......مآهو في اللوري........من هلة الارب...... دفا خمسين قرش تهية للكيتة وهلة فلاتة ......وكل من حضر من حلة (الارب )فتيس يعرف ان ادريس شارك بي خمسين قرش......والخمسين كتيرة.....(70 تشتري عتود او عنبلوب) وكنا نشتري التسالي بي تعريفة........ الحين تغيرت الاحوال...والمزاجات......صار هناك فنانين من امثال عوض زكريا الذي تغني في المريبعية واللؤوتة .... ومهمد آدم الذي يغني لابراهيم عوض .....حى اننا حضرنا له .....كام حفلة ......ويعزف عود زي الهلاوة ...... وهو مظلوم .... مع الآخرين لانو .....الاذاءة بتاءة الارب (فيها خيار وفقوس) لو كان فيها تشكيل ... كان هو وعوض زكريا اليوم....من اهل الضلع..انا احب اسمع محمد آدم....اكثر من فنانين في الاذاعة ......لانو صحيح بغني لي غيره ...لكن اختياراته موفقة .....واحسن من هناقين كثار........وصوته جذاب ...ما فيه حموضة ....فيه حبة سكر شوية .....(.حلاوته في اللجنة لمّن بي هناااك.....) انصهرت الحواجز بيننا فصرنا مثال للتعايش الجميل الراقي فهم في مناسباتنا في الافراح والاتراح ونحي هذا ونتمنى ان يحذوا الآخرين مثلنا حتى نكون نبراساً على ضوئه يهتدي الناس للوحدة في السودان عموماً..... ونحن نري ان الفلاتة لهم اسهامات فنية في الوجدان السوداني ....ويكفي عشة الفلاتية ..وابو داوود...وغيرهم ....ممن لايحسون بحرج او نعرة في غابة القبائل السودانية .... بل ابو داوود اضاف النكتة ..... لكي لا يكون الطرب وحده الذي يدخل السرور.... بل ان الفن للجميع ....لذلك اري ان اخوانا الفلاتة الفنانين كما نسميهم في فطيس وهم في( الاصل برنو) ....مظلومين...... (ظلم بلوبلو من وردي)......... المواهب موجودة....لكن ما فيش غربال في الاذاعة والتلفزيون لغربلة وتذرية ناس العجاج ..والحت ...والرجفي..والكشف... مافيش مواصفات واسس فنية راسخة وواضحة لفننا مع فنانيه لكي نحافظ عليه او نطورة في الجيل الحالي ...... الطيب اللحيدب |
الاخ عارف عبد الرحمن
الاخ دفعة :عارف عبد الرحمن .
لك مني كل الود والاحترام والتقدير بالمناسبة : انا كنت ملقب بي (اب قبنور) عندما كنت صغيرا وقنبور هو لقب جدي الطيب ود البشير سليل الجعليين الاصليين.......(اولاد نمر.... احمد الله على تلك النعمة) الذين هاجرو من شندي والمتمة......... وعموما دون تفاصيل في الانساب لاهلنا....... هم كلهم اهل........ ينحدرون من سالم ود محمد والبشير ود محمد ، وعندما اتو من المتمة سكنوا في ابو طليح اولا والبعض منهم سكنوا في فرج الله ..... وهذا قبل قيام مشروع الجزيرة ..... وكانت لهم علاقات وطيدة مع الفرجلاب في ذلك الزمن ........ والسكن مع الفرجلاب كان لوجود بئر الماء في ود فرج الله القديمة ......... وللفرجلاب علاقة دم مع ناس فطيس للذين يعرفون الانساب........ اما الجيل الحالي الذي يعتبر( الفرجلاب) محتلين ولا بد من ارجاعهم الى حدود 67 ....ولا يعرف رد الجميل لتلك الاستضافة لبعض اسلافنا سابقا و لا يعرف شيئاً عن علاقتهم الرحمية الوطيدة مع ناس فطيس .... وهذا يحتاج الى معرفة الانساب والغوص فيها لمن اراد ذلك.... اختار اجدادي المكان العالي الرملي في فطيس وسكنوا فيه....... وسكن غيرهم بعدهم في الجزء الطيني ... وهذا يعني ان اجدادي اذا ارادو الوصول الى الجزارة بعد نزول المطر ......يلبسون مركوب جلد نمر .....ويصلون دون بلل بالماء .....اما غيرهم فعليه الخمجي ...( والخواضة) حتى يصل وهو حاملا نعليه او حافياً .....وآثار ارتفاعات المياه.....والخمجي..بادية على رجليه....وكلما كانت الساق مليانة طين .....كلما كانت الدلالة اكبر على ان هذا الشخص اتي مع المشروع بعد الجعلين او برلوم جديد في فطيس......هناك منطقة تحتاج الى مراكب في الخريف قرب االبئر وشرق بيت حجازي.....دلالة على الوطاوية لاستقبال موية خريف الجعلين... واسألو سكان المنطقة الشمالية الغربية ....والغربية .....عن المعاناة ....حين وصولهم لاقرب منطقة للسوق..... والناس البقولو لينا جدكم نمر جري ..... جدنا جري بنفسة عشان الانتقام ما يكون في القبيلة ويقطعوها من الوجود .....جرية فداء لي زول بخاف بهادل قومه..ونحن كما قال المثل (الموية الحارة موش لعب قعونج) جدنا حاااار ...... وحرارتو خلتو يكتل اسماعيل باشا.... كدي وروني زول حااار زي جدنا كتل زول زي اسماعيل وجري ؟؟؟؟( يمكن يكتلوه اهله قبل ما يجري)..... ما اظن تلقوه في القبائل التانية...الحرارة بتكون منخفضة ....لو اي قبيلة تانية .....بيكون ناس القبيلة كلهم جارين لي هسع....والجري ذاتو داير زول طويل النفس ...داير فراسة جري ...... ما الحرامي سرق وجرى ....ولمن سكوه وقالو ليه الليلة حدك القضارف بس ....جدع القروش ...لانو ما عندو نفس جري للقضارف...... جدنا نمر نفسه للحبشة ....فراسة ولا لا؟؟...... وهناك تفاصيل جاري التحضير لها في انساب الجعلين والقابهم..........وفتح تاريخ فطيس وتسمياتها المتعاقبة....... |
الاخ عاطف على البدوي |: لك مني كل الود والاحترام والتقدير
اشكرك على الثناء الذي لا استحقة ... لست متخصصا ولكني اكتب كسوداني غيور على (الفن ) صحيح كل زمن بي رجاله :لكن في حاجات ثابتة ولو تغيرت في الرجالة بتعمل خلل....يعني حارس المرمي ما ممكن يخلي القون فاضي وهو موجود... لو ترك القون فاضي يصير وجوده عدم....كلك اللغة العربية .....نحن الحين لو تكلمنا بها وهي لغتنا .....بقولو بنحكي مكسيكي مدبلج.. اذا كلامنا بي لغتنا يصير عدم في ظل وجودنا ... كذلك تركنا لفننا بلغتنا يصير عدم .......يعني لو سحبو كل اغاني الحقيبة من الاذاعة والتلفزيون وخلونا للجيل الحالي .....بيكون في شنو؟؟ .......تسمع شل ....شل .....كب لي جالون...نرجع للمساعدية وبتاعين البنزين.... ونكون تحت رحمة شوارعية الفن .....بيكون ما في ارث ثقافي يدينا دفعة ....بنكون زي الواقع من السما ...وعاوز يمسك في الهوا..بيكون في اعراسنا حاجات عجيبة معجعجة.... وحانمشي في خط مستقيم لي ورا...... اللغة دائما تسقي مختلف المشارب......يعني اخوانا الشايقية في طمبورهم ابعاد بلاغية ..وحنان مهذب لمناجات الام والاب والمحبوبة بادب ..وبشوق المرضعات الى الفطيم ....وكلام غير خادش للحياة ....وكلام تحسه بخاطبك وبمثلك .. وانت عاوز من دواخلك تقولو... ناهيك عن طمبورهم الحنين.... عثمان حسين الشايقي ...ومصطفى سيد احمد الشايقي.... تكون مُجبر على احترام هؤلاء القمم ....لم اسمع بحياتي من هؤلاء كلمة خادشة..... حتى في حق هناق....زهدوا في فنهم....فصارو اولياء فن...... في الحياة ... في ناس تحت التراب .....افضل من الماشين فيها ....لانو الماتو تركو ارث فني للغير اما الحيين بوثقو في فن الفنجطة والكلمات التي تخاطب الغريزة الحيوانية والشوارعية في القرن الواحد والعشرين...تسمع يا قمرية ركي في زنكية .....وتسنطي القضية.. دية محمود تاور من الجيل الحالي .والموسيقى راب... راب ...طاخ.... والعجاج قايم من الرقيص...الجمهور برة الشبكة...... طبعا في استفادة كبيرة جدا..... الجمهور فنجط والعداد رامي (ممكن خمسة مليون) دية الجنن ود اللمين ووردي...... حليل الفن السماعي ...الموش للربة......زي لو كنت تبعد في زحل .....لا بد من يوم ليك اصل ......واشرب براي عسل النحل.....هناك بعد للمحبوب ....وسجع بلاغي ...ولحن يجبرك على سماع الكلمة اولا....وما بدي فرصة للفنجطة ....والبفنجط في الكلام دية .....يكون فاطي سطر فني..... يعجبني عبد القادر سالم ...بغني بي لهجة كردفان ...لي اهله وكذلك لينا ...يعني (دبل) ابداع وكذلك عبد الرحمن عبد الله وابراهيم موسى ابا من غرب النيل ووردي نوبي وعربي ايضا (دبل ابداع )......كدي وروني ندى القلعة فنانة شفتها في اكبر جهاز اعلامي ....قالت الشريف مبسوط مني .....عشان انا بريد فني.....بتخاطب منو؟ دية اغنية وناس اكل عيش بعزفو ليها ... وفي جمهور عامل عجاج.......وكمان غنت في دول الخليج....والمغرب العربي ...ونيجيريا ... وادوها التذاكر للسفر مع انحناءة تقدير واعجاب والتأشيرة بكل ادب واحترام ناولوها ليها ...يعني مثلتنا والجماعة انبسطو شديد من الفن السوداني ......برة حتى السودانيين قالوا للخليجيين لو عاوزنها تغني ليكم ما في اي مشكلة ........ممكن في تلفزيونكم القومي..... لانها بتعكس مدي تطور الفن السوداني......والجمال السوداني...... وهي مثقفة شديد وكلامة عن تاريخ فننا ...وخاصة السلم الخماسي ....وممكن تغني بالسباعي .......ولو عندكم عشاري بيكون كمان اجمل.. الخليجين قالو عندها (كشف) ممتاز تحرك كل جسمها خاصة المناطق الجنوبية والشمالية أي الصدر مثل الحبش تماما ... وهذا يدل على التأثر الثقافي الجميل ....ويا سلام على فنكم... المتطور دوما ......... الطيب اللحيدب 0[/b] |
حليل زمن الفن الجميل
كل الفنانين الذين اثرو الحياة الفنية ......كبار في السن........تعدو السبعين ......يعني كل من دخل الاذاعة سنة 49 و1950 وهلم جرا...... الحين صار جد لاسر كثيرة امثال ....حمد الريح وود البادية ،وردي،كابلي ،ابوصلعة ود المين.......وغيرهم مما زال مصراً على الغناء بعد ان اشتعل الراس شيبا .... لكن ادوه صبغة ... المشكلة في فنانين ما عندهم دقن ولا شنب وصاروا صلع .....ديل الا نعرفهم من الكرمشة ... وهم مازالو مصرين على احتلال الساحة الفنية وعدم ترك مجال للآخرين ...... مرة في السوق الشعبي الخرطوم ........ واحد ساكنو جماعة ومعاهم بوليس......والرجل تنفسه متقطع ويلهث....... فعرفت ان هناك بلاغ من وردي ضد هذا اللرجل الذي تغني ببعض اغانية... وهو مطالب بملايين كثيرة حقوق شاعر الكلمات ووردي والملحن.....المهم بعد ان يرجع الفلوس لازم يعمل اتفاقية مع وردي ...... يغني بالنص او الثلت او الربع او العشر ..الله اعلم هذا متروك لوردي.....شغل يومية....يدنقد منه سنة غنائية.... الله اعلم.... كل الجيل القديم (الجدود) يتهموا الصغار بانهم مرتزقة فنية.....يكنسوا الفلوس...ويتركوهم في كنبات الاحتياطي الفنية..... وفي ناس لسانهم حاد خاصة اخوانا الفنانين من المحس.... عمري ما شفت واحد جعلي ساكيها كدة ..... انا خايف من حاجة واحدة......يجي يوم من الايام ... ونطلب من ود اللمين او وردي اغنية ...يغنو لينا ياحاجة ما تدفي كاروشة..... يكونو خرفو خلاص...... والخرف موجود وبما ان الفنان يمثل ويعكس احاسيسنا ومشاعرنا في كل المحافل.....فانا اطالب بايقاف كل فنان تخطى السبعين ....لانو بعد كدة مافي ضمان من الخرف......والفنجطة الفكرية.. وفي واحدين من كثرة البق.....من عروقهم الدم شرد....الواحد ما يغني الا بعد يشيلوه ويتكلوه ...هو يتلت ويقولو ليه .....امسك؟ ديه المايك في يمينك؟ خلاص بعد كدة غني....؟ طيب ايه الضمان من النوع ده وهو برة الشبكة يقول كلام تحت تحت بالمايك للجمهور...او كلام غير مسئول على الهواء......والنوع دية لو خرف بيكون (دبل رفسة) الجيل القديم عاوز يعمل فراغ فني ....... رافض التواصل مع الابناء ويتهمهم بالارتزاق مع ان عمر الجزلي كرّم الكثير منهم .....لكن يبدو ان نكير بطل التعامل معهم.. هناك ايضا فنجطة ذوقية في السودانين اسبابها العجائز دول ........ مثلاً......سودانين مشو اليابان سنة 2010 قالو ليهم عازين شنو ؟ قالو بكسي موديل 78 او 81 ......هنا قال الياباني .....الجماعة ديل خارج التاريخ ولا شنو؟ ممكن اسبيراتو وقفت ؟ كذلك الحال في فننا .......... يا فنان قدييييم صلعة او مصبغ وداسي شنبو ودقنو..... او معدومات......يا واحد آخر موضة الشعر سبيبي وملفلف دوائر راسية...وشاب صغير يقوليك ...فناني ود اللمين(زي بكسي 78..... يعني مفروض يكون في تقاعد فني.......وتكون هناك تدرجات فنية ... براعم....ناشئين .... اشبال..مؤديين ....مطربين ....فنانين..... معاشيين. وراي ان تكون في لجنة انضباط فني او بوليس اداب فني ...اي فنان ببق...اوبسطل..يوقف تلفزيونيا واذاعيا ويمنع من الخروج ....صغيرا ام كبيرا ........وكذلك الفنجطة الصدرية للبنات ...ثبت انها تؤثر في الثدي وقوته ...وايقاف الاغاني الهابطة .....امثال الشحم دا......اللحم دا...... لانها تدل على التجسيم ... الشعراء القداما والمراحيم لم يتقاضو مليما واحدا عن شعرهم الغنائي او الحقيبي ....ويكفي الشخص منهم فخرا وشكرا وتقديرا ان تُغَنى اغانيه لهذا الشعب الطيب الذي يستحق ذلك..كما قال ابو عركي .....يا وطني يا بلد احبابي ......في وجودي... احبك وغيابي . اليوم الواحد لوكان فكي 5 نجوم او كوز ايضا 5 نجوم ممكن يكون في شك في وطنيته.....مش عارف ليه........ الطيب اللحيدب |
التحية للجار العزيز الأستاذ الطيب الأحيدب......الأسلوب السلس الجميل والناقد بسخرية..... لك التحيه من علي البعد
|
حليل زمن الفن الجميل حليل زمن الجاز... كان في واحد اسمو كمال كيلة(موش عارف ياربي كيلة بلح ولا عرديب ولا شيتاً كتر) اول ما تضرب الموسيقى على طول يبتدي الفنجطة ... معاه ناس كضومن منفوخة تقول بتاعين (كيتة) المهم الربة البتحصل دية بسموها جاز...ومعاه فرق ثانية سمت نفسها....... جاز العقارب- وكمان جاز الديوم .. هم بتاعين جاز قالو....... بس جازهم دا ما بمشى مع جازنا. وفي شرحبيل....ما معروف تصنيفو ...جاز.... بنزين...... او خلطة بنزوجازية.... المهم شرحبيل شخصية مهذبة.... وفاهم بقول في شنو وهو الآن فوق السبعين ..يعني عمر التخريف الله يستر. (كل فنانينا الكبارماشين بي مسمار واحد في كرسي النص بتاع المخ) يعني لو انفك ... تسمع حار ..... وتضوق سرعة سرعة .. كما قال بالي البرناوي ...... شرحبيل مابقدر على الفنجطة البعملها (كيلة) لكن محبوب جماهيرياَ... اكثر من حاجة اسمها جيلاني الواثق...... انا موش عارف واثق من ايه ......الموسيقى وفي وادي .......وهو في وادي... ونحن في وادي ... كما قال حمد الريح.. يمكن جاز المساطيل كدة......المهم دية جازنا .....وسوف يختفي مع الزمن ....... والجاز مباح فيه الصرخي والسكلي والوقفة الراجفة وكل ضروب الشقلبة والفنجطة مع صخب الآلات العاتية .. واهمية للربة اكثر من كلمات الفنان ...وحتى الآن ما في خلف..... لهؤلاء السلف... الفنان على الاقل اذا بتاع جاز او طنبور يفترض فيه الشكل المقبول ... لانو ممكن يسافر امدوانة او تنبول .... وبرة.. الرياض او سيول.... لانو بمثلنا وبعكسنا للناس دول ....... مش شكل زيداني .. او محمود عبد العزيزي..... بوجعني وبفك سدري .... الفنانات الملونات .....عرفنا الديانة بتغير الوش للابيض .. لكن الواحده لونا اخضر شديد ... تقوم تستعمل احمر شفايف ....شكلها يكون زي الزول الضارب كبدة ابل..... رجع احد الفلاتة للحلة بعد غياب طويل في الاغتراب.... ذهب للحفلة ......فوجد ان كل البنات لون ابياااااااض.....فقال ياجماعة وين بناتنا.....طبعا اللون كله بقى ابيض ما فيش واحدة سوداء..... ما عرف ولا واحدة ..... في النهاية عرف اللون الاصلي من التقليد ...وحكمة ربنا في مناطق في الجسم الديانا ما بتقدر عليها....حتى الناس مامقتنعة بي اللون بتاع ربنا ....الظاهر العرسان يحبونها بيضاء ....حليلك يا حمد الريح القلتا ....خضرتك ليمونة وتينة بل زيتونة ويحفظك مولاك...يعني الناس حاليا لو استمعو للأغنية دي.....حايقولو زمان ما كان في ديانا....... نعمل ايييييه .....في فنان بجي الاستوديو ببجامة زي فرفور........ نقول شنو لو الشايقية انفصلو وسحبو كل اغانيهم من الاذاعة والتلفزيون؟ .......بكون في عدم حنان ..... لا يا يمة ولا يا يايا......والفنانين بيكونو جعلين عيونم حمر من البطان ..... والمذيع البقدم ذاتو بيكون ضايق كم صوت مع الفنان طبعا...والحفلات ما في زول بقدر يربها .....لانو هي بدون ربة فيها جلد...... وجلدا حار......... يختفو الناس الملس...والحناكيش...والعاجبا ه نفسة من القبائل التانية لو عزموة حفلة جعلين بقول .... اي عذر....عندي حمى مثلاً....... .بيكون في تشنيق طواقي.....وتعلي للعمم .....وجكة مع تكية راس وتحمر مع طي وكرفسة يد العراقي او الجلابية فوق العضل..... تنعدم بعض الآلات الموسيقية وتكتر الدلاليك والشتم عند النسوان ويزدهر شعر الحماسة ... والحكامات حا يرفعو حرارة عيال جعل فوق.... بيتنشر فن قوي شديد ويختفي حنان الشايقية الظاهري في الاغاني...... والغني بيكون بتاع رجالة ساي ..... زي سمعنا خبرا في الهلالية ....14 سكو 400 ..... وناس دخلوها و صقيرا حام........ |
حليل زمن الفن الجميل : ابو عركي زمان قال ....جاييكي يا آخر المواني.......يا ظلمة البحر الممدد في الفراغ جاييك انا ودايس على ........ على الابر المسممة بالكلام ..... تلاحظ البعد الجغرافي والبلاغي في امتداد زرقة وظلمة البحر الى ما لا نهاية بالنسبة للناظر.... من ناحية افقية مع التقاء الافق مع السماء . وقال سيد خليفة........... اذا السماء بدت لنا ......واستعصمت بالبعد عنا.....تلاحظ بعد السماء المستحيل الراسي عنا ....... مع ان الناظر يري اللون الازرق ويتخيل ان السماء ....فوقه قريبة...........هذا الكلام غير عادي .... يقود الى كتاب البلاغة مباشرة ....وفيه بيفهم دارس البلاغة الفاهم ... ان الكلام دية من العيون البلاغية ...وهو كلام غنائي .....اذا الناس القالوه موش عاديين ...... والبفهموه دارسين القواعد البلاغيه....ولو ما درسوه كلامهم كدة..... والشعب البتغنى بالكلام ده ويطرب ليه ....هذا شعب لا خوف عليه في قيمة ودينه ولغته.... وبعض الفنانين امثال الخالد مصطفي سيد احمد ....يحتاج ان تفهم الرمزية البلاغية .....لانو المواعين الطالع منها كلام مصطفى .......مواعين تنضح ثقافة ...ذات مدارس شعرية افقي ورأسي............ وشعر الحقيبة الغنائي .......اذا نظر الانسان نظرة (ناقد) او تفحص اليه ....... يتحير من جماله ......وبلاغته...كيف انتج لنا هؤلاء الشعراء .....تلك الدرر البلاغية الغنائية ....قبل قرن في ظل عدم وجود تعليم او مدارس ....وهو شعر يحتاج منا في هذا الزمن ان نفهم البلاغة....بل ان بعض من تغنوه....كانوا اميين لم يدخلوا مدارس ولا خلاوي كمان ...لكن بيحفظو الكلام زي ما هو وبفهموه ...... والشعب البستمع ليه فاهم.... وعلى نفس مستوى الشاعر..... يعني الفن يرتبط بي تعليمك وفهمك لي لغتك وثقافتك ومجتمعك وفهم للبيئة مرتبط بهذه المكونات ..يعني الكلمة تدل على الماعون....الطالعة منو.. يعني انا كنت بغني في( اغنية) اذا جاز تسميتها اغنية .... الشحم دا..... اللحم دا...... ورا ورا ....... آيا...(الماعون الطالعة منو كيف فهمه وثقافته واحاسيسة ومشاعره وبعدين الهدف شنو وبتخاطب منو؟؟ الفن رسالة وقضية) وجدت انه لو قلتها لي اي زول تاني بخجل منها ....بعدبن وين البلاغة فيها ....بتخاطب منو.. بتخاطب فيني شنو.هل ديه الفن ... وسمعت هذه الاغنية......ورددتها لكي اتذوق طعم التخلف الذي وصل اليه الانحطاط ...الفني في مجتمعنا...... طبعا جاني ضغط....... لكن استمعت لعثمان حسين ..... شريط كامل ....حتى الضغط فكا.....وجبت مصطفى وقعدت اذاكر ....عشان افهم وازيد بلاغتي شوية.....وجبت ابو عركي ..... وقلت انا بتهمني الكلمة المعبرة عن احاسيسي ومشاعري المصبوبة في قالب بلاغي ...والتي تدخل وجداني .....تعبر عني في المحافل ...ولا اخجل ان ادندن بها مع نفسي والآخرين .....وهذا الذي اسميه فنان لانه يحوي فن بلاغة الكلمة من لغتي ... يبوح بما في نفسي ويطرب وجداني ..ولا اخجل ان يمثلني .. مثلا اتمنى ان تُغنى في كل المحافل الدولية اغنية انا سوداني ....... لانها عبرت عني بلاغة وثقافة وتاريخا ولانها لم تتدرك شئيا يخصني كسوداني لم تحكيه .... هذا بعض من كثير ممن اثرو وجداننا وغرسوا كلمات منيرة في درب الفن علها تكون نبراسا يهتدوا به ...... ولكن في زمنا هذا ....... زمن الفنجطة الغنائية ....خلطوا التبر مع الرماد....وكل من هب ودب ممكن يكون فنان .......بس المقياس يكون بيعمل ربة...... وممكن تجد واحد مسمنو شاعر غنائي ........تلاقيه صدفة يقول ليك .......الله ....صوتك جميل (ويكون الواحد هناق) .......تعال لي بعد الغدا بديك كلمات....لكن تسجلها وتغنيها بكرة....هنا على طول بيكون خوازيق البلد زادت في اكبر الاجهزة الاعلامية......... |
يا اخوي الطيب ...... المستمع نفسه اصبح فاسد الزوق..... تبعا لانهيار القيم..... بالعربي كده حليل زمن المستمع البيسمع للغنا الهادف..... والاستياء ده نتاج طبيعي للحاله المزرية التي يعيشها المستمع الملكوم.... وممكن نسميها جوازا Irony of Fate بأختصار هي حاله من الهزل سادت نتيجة الاحباطات المتراكمه..... وعدم مبالاة صنعها الوضع الراهن..... ولسان الحال قليل من الاسفاف يجدي.....
|
الاحدب صباحاتو
اري انك حصرت الغني بين الجعليين والشايقيه جعلت اغنية الوسط تخص عرقيتين اغنية الوسط كما سمعت في كثير من تحليل المختصين نتاج تمازج السودانين كلهم بغض النظر عن عرقياتهم وجعلت ايضا الاغنيه اما حنينه واما اغينة حماس وهنا ايضا لدي بعض الاعتراض اغنية الوسط بلغت شاوا بعيدا صارت اغنيه ملحميه تتسامق فوق النعرات القبليه وتجاوزت الجهات والعرق انت تجاوزت مساهمات اغنية الغرب الثريه بكل الالوان والتي ساهمت بقدر وافر في ظهور ملامح اغينة الوسط واثرت وجدان السودانيين |
الصادق محمد عوض الجيد
لك مني التحية. اتحملنا شويه..... الموضوع قرب يخلص وباقي فيه 250 بس... بالنسبة لعبارة The Ironic of Fate لم اجدها في الانترنت في قواميس الترجمة الفورية ولا القواميس العادية....ولا كتب القواعد.... بعد تحليل كل كلمة منفردة ومحاولة ربطها لغويا .... يعني بالعربي كدة افدنا وجزاكم الله خيرا.....من اي كتاب واي صفحة...وهي تركيبها اللغوي صفة متبوعة ب of. في انتظار الإفادة .....حتى استفيد واسميها جوازا The Ironic of Fate.. هل ممكن اقول جوازا ؟ ....The Black of Man |
الأخ الصديق الطيب قنبور لك التحية والأشواق .. ومتعك الله بالصحة والعافية كما متعتنا بالحلو من الكلام .. عن اخونا الفنان محمد آدم .. ياخي الراجل غنا كتير في حفلات الحلة وفي النادي وفي الكمبو .. ورجل لا يشق له غبار وله صوت جميل .. بس الناس دلوقت ــــ مش دحين ـــ بقوا عاوزين كركبة وأورغن لبع ونطيط وفنانات حجار مش فنانات غنا .. الناس عاوزة بس واحد أنقزهم .. الزوق والتزوق . والجلوس سارح مع الأغنية وزكريات الحبيبة والتوهان مع بنات الأفكار .. دي حاجات زمانا فات وغنايا مات .. ودمت الطيب فنبور .. وقبلما أختم .. لو بتتذكر الشطة في بعرة الحمار ولا مؤاخذة .. والعصار .. أرجو وأنت في معرض كتاباتك أن تخلق لها مناسبة وتحكيها للشباب الجداد ديل زي أخونا مأمون عبدالله ـــ طبعا راجل صغير وما تشوف الصلعة دي .. كاتلو الفهم ساي .. ودمتم
|
الاخ الطيب امكن للعجلة والدنيا مغارب والعيال ماشين الحديقة .... لكن الكلمة irony of fate وتعني سخرية القدر...... وليست ironic
|
الاخ العزيز عوض خضر اشكرك على رايك الجميل في اغنية الغرب وجمالها ... وكما ذكرت سابقا لست متخصصا ولكني ذوّاق للفن الجميل...وفي معرض كتاباتي الساخرة تطرقت لفناني غرب النيل وشرقه...وقلت انهم دبل ابداع لما انتجوه من فن يخص بيئتهم والآخرون......واغنية الغرب تتفوق على الوسط بسلمها السباعي في بعضها وتتميز بلهجتها الخاصة .( كلام مختصون) بعدين بيني وبينك الملاحم دية لو غنوها بأي لهجة غير الوسط ....هل بتكون طاعمة؟ ولهجة ناس الوسط .....ما فيها كَسرَة حلوة في نهاية الكلمة زي الشايقية كما يظهر في اغاني الطمبور....وماتبشبه اغاني غرب النيل (امثال عبد القادر سالم وابراهيم موسى ابا) اختلاف بيئة كل منطقة تصبغ فنها بلهجة اهلها .....وهذا يظهر جليا في اغاني عمر احساس) انا موش عارف حتى الآن واحد من ناس الوسط بغني او بقلد عبد القادر سالم وابراهيم موسى ابا .......لازم يكون بجيد اللهجة الكردفانية مثلا...ولهجة اقاصي الغرب .....زي ناس احساس.....وكيق يكون الوسط نتاج تلاقح؟.....بل الوسط في نظري يصبغ من اتي اليه بصبغة لهجة اهله ....يكفي عثمان حسين هو شايقي تغني بلهجتنا لكن عثمان اليمني على طول بكسرها.... بعدين ...حكاية زمانا فات وغنايا مات ..... اعتقد انك تريد ان تلغي التاريخ .......وتبدأ من حيث بدأ ينفنجط الآخرون فنيا.... بل بهذا المقياس تقف صفا واحدا مع الكاتب الامريكي الذي كتب( نهاية التاريخ).......يعني حليل زمن لينين وماركس وجيفارا....ومارتن لوثر كنج وكل مفكر ومناضل وكاتب وفنان في الماضي ...ومافي داعي الناس تكتب عن الماضي ولا تستشف منه للحاضر أوالتباكي عليه..تقتنع بالقوة السائدة والثقافة السائدة حاليا......وما في داعي الناس تناضل ...الا من اجل واقع وثفافة التاريخ الجديد.....تستسلم بس ..(انت استسلمت ولا شنو؟...) والنضال خشم بيوت ....في كل حاجة.... حتى الفن نضال...اليس هناك فنانون حوصرت اغانيهم في الاذاعة والتلفزيون وسُجِنُوا من اجل كلمة او اغنية...( ليست في الحبيبة).يعني هل دول ماتو وفنهم مات.؟...والفن ليس في الحبيبة والتباكي عليها والتخيل المتبوع بصمت فقط ..... هل كل اغانينا في الحبيبة فقط؟......الناس العاوزة تنقز بمسجل فقط ..دي عاوزة تفنجط....هل يعني كلامك اخوي عوض ان كل الشعب السوداني عاوز يفنجط بس في الوقت الحالي.... وما في ناس عندهم راي في الفنجطة دي.... خلاص دي النهاية يعني.......(اقوم افنجط بس مع اي مسجل) كده اعتقد بيكون في حكم والغاء لفهم كل الشرائح للفن...... الفن مرآه ...تعكس واقعك ...وثقافتك وتاريخ حياتك بنضاله وحروبه....ليس من اجل العاطفة فقط....(كلام المخضرم الشاعروالكاتب السر قدور للجيل الجديد في حلقات برنامحه الشهير في رمضان). بعدين في مليون مصري جايين الوسط بي فنهم وتراثهم..... فُرِضوا سياسيا.....يعني ممكن بعد شوية الاعراس بي 10 بلدي ....وتكون في اغاني مصرية في الاعراس ....وممكن احفاد الراقصة نجوى فؤاد بدل فنجاطاتنا...ثقافة رقص جديدة.....هنا اعتقد الفن الناتج بيكون نتاج تلاقح ثقافي والهجين الطالع بيكون(غريب).... يعني ان سياسة القوة لها اثر كبير في التغيير الديمغرافي متبوعا بكل شيء ثقافي...... فني .....الى آخر المسميات....يعني حايكون في جعلي امه مصرية ومصري امه جعلية... والفن ليس الجعلين والشايقية فقط ...لكني رمزت باستخدام كلمة لو...انفصل الشايقية ...والشايقية لو وجدو غابة لمارسو التمرد.... وهم اضعف الاتجاهات الجغرافية( درقةَ) يعني مكشوفين لا غابات ولا جبال ..... لو انفصلو وهم اضعف الاتجاهات ...هل ستكون الاتجاهات الاخرى موجودة؟...غير منفصلة؟ وهي عندها غابات وجبال ....وكلمة انفصال لم اعرفها سابقا .....إلا انها الآن واقع يهدد كل كيان السودان.....ما هو الاتجاه الجغرافي الذي لم يستخدم او يعلن كلمة انفصال ولو (تحت تحت)؟........وبما ان الوسط ديمغرافيا غالبية سكانه من الجعلين ...عند الانفصال ... اعتقد انه ستكون هناك ثقافة طاردة لكل الاتجاهات....كل يذهب لاتجاهه الاصلي..... ما الذي يبقى والفن الذي يسود في الوسط خاصة؟...... نحن في انتظار سيناريوهات ......قد تتمخض في نتاج....لا يعلم مداه الا الله فنيا وثقافيا الى آخر المسميات...يعني نحن مخطط لنا ان نكون يوغوسلافيا . يعني ممكن يكون في تبادل ثقافي فني بعد الانفصال بين دولة الجعلين والشايقية(حسب المخطط) ...والشايقية اغانيهم سائدة في الوسط الجعلي حاليا اكثر من اغاني الدول الاخرى الحاتتكون...نسبة لحنانها....يعني ترباس من دولتنا غني و قال يا يُمّا الله يسلمك ..... بس ام محمد كرم الله من دولة الشايقية..حنينة شديد.... اخ عوض كتاباتي هذه واقع مارسته سابقا ....باسلوب مرح يعكس الواقع الموجود....ولا اجد حرجا في تناول الماضي ...لفننا .......واعتقد ان الناس سوف ترجع له...... يذهب الزبد ويبقى ما ينفع الناس من فننا الجميل..... |
اخونا الاحدب
انا لم اعترض علي ماضي ولم اتحدث عن اللهجات واختلافها ولكن انا هنا اتحدث عن الايقاعات التي تشملها اغنية الوسط الدليب وهو خاص بالشايقيه الدلوكه ايقاع خاص بالجعليين ومن جاورهموالمردوم والجراري وغيرهما ايقاعات جاءت من الغرب ليس هناك ضروره لتعلم اللهجه الكردفانيه ليتغني احد بايقاع كردفاني الناتج ان تاثير اغنية الغرب الثريه في اغنية الوسط تاثير بالغ لايقل عن تاثير الاغنيات الاخري ولاوضح اكثر اغنية الوسط سبقت مفاهيمنا ونعراتنا القبليه وصارت تعبر عن سودانويه بعيدا عن التعرق تخريمه لم افهم حديثك عن الاستسلام واعتبرته خارجا عن سياق الموضوع الذي نحن بصدده ولك الشكر |
امس قلبت قناة النيل الازرق الموازيين
في سابقه خطيره من قناة سودانيه حيث دابت شاشاتنا علي عرض كل ماهو بعيد عن متطلبات المرحله اذ ان الشاشات ليس الا بوق للحاكم خالفت قناة النيل الازرق هذا النمط واستضافت ابنة الشاعر المعروف محمد عبدالحي رغم التسطيح الذي حدث في العجاله وعدم مقدرة المذيعتين القادرتين علي التزين بشكل ملحوظ علي الارتفاع الي مستوي موضوع الحوار مع فقر واضح في المعرفه بموضوع الحلقه الا انها سابقه تحسب للقناة مع شيراز استضافت القناة الناقد والقاص الشهير محذوب العيدروس وقرات الفتاة المتمرده شعر والدها الذي تمرد علي القوالب المالوفه وتم النبش قليلا في ارث مدرسة الغابه والصحراء والتي كان الشاعر الراحل احد اعمدتها الي جانب النور عثمان ابكر ومحمد المكي ابراهيم ومناسبة الاستضافه كانت طبعه ثالثه لديوان العوده لسنار بعد خمسه وعشرين عاما من اخر طبعه التي نفذت في الاسواق ورغم ان المتحاورين اشاروا الي ان القصيده لم تبارح مجالس الادب السوداني خاصة والعربي عموما الا اننا قلما سمعنا عنها من خلال شاشه تلفزيونيه وكانت اللفته البارعه هي زيارة منزل الراحل ومحاورة رفيقة دربه والتجوال داخل مكتبته والحق يقال رغم القصور استمتعنا باللقاء الذي لم يطول وكان العيدروس اضافه جيده للقاءاذ انه غاص قليلا في اسباب ثراء شعرالراحل عبدالحي |
اشكرك لمتابعاتك الثقافية لأحد ما يشار اليه بالبنان من شعرائنا في بدايات تاريخ تعليمنا الحديث حين بدأ شعبنا التعليم باسلوب منهجي في المدارس.. قبل منتصف القرن الماضي ...وغيره من شعرائنا العظام الذين طُمِرَت مؤلفاتهم في حفر النسيان علّها تجد من يخرجها من تلك( المطامير) ويزيح عنها الغبار وينثر دررها لمن يعرفون جوهر ووزن الكلمات .. واحي فيك روح المتابعة الثقافية... وسعة الثقافة والغيرة على الوطن ودماثة الخُلُق والعشرة والايثار والعطاء حتى صرت غيور على فطيس وأهلها اكثر مننا.. وهذا ديدن معدنك السوداني الاصيل ولولا وجودك في هذا المنتدى لكان احد الاركان مفقودا.... تتفقد الكلمات قبل صدورها.......كأنك ترسل زائرا يتفقدا.. وسنحت لي فرصة بسيطة في متابعة زوجة محمد عبد الحي( حينما كنت افنجط بين القنوات) وهي معلمة اجيال وتنضح ثقافة وكرما وتقدم دعوة مفتوحة لكل من يريد ان( ينفض الغبار) في منزلهم عن تلك المؤلفات ....ويكفي ابنته التي لم اسمعها سابقا وهي تقول في شعر وشعرها.......... قد يحتاج مني الى استاذنا الموسوعة محي الدين الفاتح .... لفهم مفرداته وشرحها ...ناهيك عن جودته كشعر..(فذاك الشبل من ذاك الاسد).وهذه سابقة تحسب كما قلت لتلك القناة في زمن كثرة فيه المطامير والتي يُمنع حفرها لكشف ما بداخلها إلا من اذن له السلطان..... ونتمنى هذا الحزو للقناة دوما والاخريات ...فهناك تبر من الكلمات لنوابغ من هذا الشعب في مجال الادب وغيره ....يكافح اهلها من اجل الحفاظ عليها ...فهي ارث لهذا الشعب العظيم من ذاك الكاتب او الشاعر العظيم.. وابت نفس زوجة الشاعرمحمد عبد الحي إلا ان تقول (وراء كل عظيم امرأة) وهو عظيم بما قدمه من شعر ... وقد تكلم عنه العيدروس...واثنى عليه كثيرا...في شتى النواحي.. اما بخصوص الدلاليك والدليب والتم تم ...هذه تخصصات في الايقاعات وبحر لا استيطع العوم فيه ...تخص الدارسين للنوتات والايقاعات .. (نحن فقط في حركة حزبنا والتي تعرفها سابقا .....حزب البهجة والمسرة جناح حنان بلوبلو سابقا) وتلاخظ في ثاني حلقة ذكرت ان بلوبلو مظلومة ونحن واقفين وراها وقفة رجال طول ما هي تاركة للفنجطة الصدرية والوسطية ) تختص بالسمات العامة للكلمة والدفاع عنها .....لا تتبحر في الالحان وتاثيراتها على الغير...(سوف اتطرق لهذا الموضوع في صفحة كاملة). ولقد كُرِمت حواء الطقطاقة على اعلى مستويات الجمهورية ليس لطقطقتها في الحفلات ولكن كانت لها طقطقة ترعب كلماتها الانجليز في ذلك الوقت ....والفنان له دور سياسي لا بد ان يحترم في ظل الديمقراطية ....لكن الشمولية دائما توسع مطاميرها.... وبخصوص استسلمت اقصد ان الفن عموما والثقافة اصبحت بيد سلطان هل نستسلم ام ان يكون هناك نضال من اجل الابراز للاوجة المطمورة اذا استسلمنا لن تكون هناك جراءة كتلك التي مثلا لقناة النيل الازرق......(ونهاية التاريخ) فكر شمولي ...يلغي الأخرين...ويشبه كل قوة تقمع الآخرين..عسكريا ..وسياسيا...وثقافيا..الى آخر المسميات... ولو استسلم دكتور عمر محمود خالد مثلا ... لكان الآن في طي النسيان...والحق الآن يؤخذ (غلابا) حق فني.... حق مادي..الى آخر الحقوق... الا توافقني بأن السياسة تؤثر في كل شيْ....وتريد ان تصبغ كل شيء بلونها... الا توافقني بان عبارة زمانها فات وغنايها مات ....هي احدى المطامير لفنان او كاتب او مفكر .... ومن اراد ان يقول الحقيقة او يأخذ حقه لا بد من يكون عكازه (جمبه).......في الزمن الحاضر.... اخ عوض اذا( نطحتك) كلمة مني فلك العتبى .....حتى ترضى......البقر مرات بفلت من الراعي...... |
حليل زمن الفن الجميل:
بنهاية مرحلة سوار الذهب ... وقبل حكومة الصادق المهدي.... الحكاية جاطط سياسيا .....احزاب بلغت 45 في عددها ....وفي عوض دكام وزيدان والفاضل سعيد ....عندهم حاجة اسمها (حزب البهجة) يعني 46 نحن (شعيبو) الطيب اللحيدب والاخ الجيلي الصديق المبارك (محاضر حاليا في كلية ابو حراز الزراعية ) من الكتير قرب طابت.... عملنا حزب البهجة والمسرة جناح حنان بلوبلو... رقم 47 ... طبعا 46 و47 غير مسجلات.... هذه هوادة ساي لزيادة الفنجطة السياسية في ذلك الوقت .... كنت انا الرئيس والجيلي الصديق نائب الرئيس..... ونبدأ المحاضرة (بعنوان بلوبلو في الميزان) هي ظاهرة فرضت نفسها في المجتمع السوداني ..يكفي ان كل البرنسات تحمل اشرطتها ...كل اغاني الاعراس تتغنى بي بلوبلو ...شريحة كبيرة من المجتمع السوداني فسحت لها مكانة في وجدانهم ...بل بعضهم كتبها على بصاته ولواريه وكواريه ....كيف تمنع هؤلاء من الاستماع اليها... لم يطربون لها ويتركون وردي وابراهيم حسين؟ نريد ان نبدأ العلاج افيدونا من اين نبدأ؟ والمحاضرة طويلة جدا..... وبهجة ناس زيدان فيها كل شئ ....نحن بهجتنا فقط في الكلمة الجميلة ....وهناك شعراء تغنى لهم الفنانين بكلمات (بلو بلية) يعني( بوظان الاعصاب) القالتو بلوبلو موجود في الكثير من اغانيهم ....ما يهاجمو كلماتها بس ويتركو حقهم .....كما قال الشاعر ....لا تنهي عن خلق خبيث وتأتي مثله....عار عليك اذا فعلت عظيم......ونحن طبعا كنا ناس (منضمة) وحجج وقلنا الحكاية عاوزة دراسة للاغاني ....ولا بد من سند كلامنا بي بوظان الاعصاب الموجود في الكثير من اغاني الاذاعة بغض النظر عن الفنان منو......... طبعاً اخوانا الكيزان يعجبوك في رمينا بأبشع النعوت... لكن كنا نمتص ذلك.......ونسأل كل يهاجمنا من هو فنانك المفضل ........طبعاً بعد القاء المحاضرة...وهنا نبرز للمهاجم بوظان الاعصاب من كلمات فنانه المفضل....ونوضح له ان الذي يحب لازم اعصابه تبوظ ....والا ليس بحبا......واسألو المحبين ...هناك من تبق فيه نار....كما قال صلاح بن البادية حبك نار وكلو ودار ومنو بقول انا آه يارب.....وقال ايضا ...معقول بس زول ما بحب يحرق وراك دم القلب......اذا الحرايق دي بي سببها.......طبعا الكلام دية للكيزان عشان حارقين دمنا زمان ..... اي محاضرة طالعين فيها برة هم ورانا.....وبياخدو زمن طويل جدا في نبزنا.... وانتهجنا هذا الخط الدفاعي عن بلوبلو ...لا حبا في اغانيها ....ولكن الفن فيه الكثير من عينة معاني كلماتها ....حرام على بلابل الدوح ....حلال للطير من كل جنس. المهم دخل في مظلة دفاعنا الكثير من الفنانات في ذلك الوقت ومنهم هاجر كباشي.....وكنا ندعي بأن بلوبلو هي الفنانة المفضلة لنا.......نكاية بالكيزان ....ونقول لهم ود اللمين ابوصلعة...اغانية من سنة 55 ما عندو جديد .....والفن تجديد .. صارت تقدم لنا دعوات لقيام محاضرات في معهد الكليات سابقا و جامعة الفرع ....وكانت لنا مطالب كثيرة ...يدعو لها الحزب في ذلك الوقت من ضمنها ....عدم مهاجمة بلوبلو فنيا....إلا بعد عمل المعايير الآتية...... 1- التأكل من خلو كل الكلمات الغنائية التي تذاع عبر الاثير من اي رجفات او خفقات قلب ولو كان التصريح (تحت تحت) خلافا لذلك سوف نستمر في مهاجمة الكلمات والشعراء والفنانين بغض النظر عن بيئتهم الغنائية هجوما لا هوادة فيه.... 2- سحب اغنية يا معاين من الشباك لود اللمين.....ووكت شفتك لوردي....ودية المجننا لعلي ابراهيم اللحو...هذا بداية ....وهناك لستة سوف تتبع لاحقا...سوف يتم ارسالها الى من يهمه الامر...... 3- سوف نقوم من جانبنا بالموافقة بوقف الرقيص الاهتزازي لبلوبلو والاعتماد على الكلمة المراقبة في حالة تنفيذ مطالبنا....... 4- ايقاف حكاية سرق مني وما بخلي يغني حقي...لان احفاد كرومة وسرور سوف ينتهزون الفرصة ويطالبو بفلوس من 3 اجيال غنو اغانيهم..... 5- ايقاف اغاني الجلد او جلدها لانه ثبت ان الجيل الحالي لا يتحمل سيطان العنج (ام قطران) وثبت ان تأثيرها يستمر شهور ويعمل (دروب في الضهر). 6- تصنيف الفنانين بصورة واضحة شعبي يعني شعبي يس.... زي محمد احمد عوض وعدم خلطه بالحديث زي ترباس...... ( ترباس ملخبطه باقي ليه حبة من يقلب جاز) الى أخر البنود والتي يتذكرها اخي الجيلي..... وكانت ايام متحفة بالمحاضرات .. في شمبات والفكي هاشم ببحري ...والجريف غرب...وناس اي رحلة بخلوها وبنضُّمو لينا ...بل كانو بشاركوا بالاسئلة....واحد قالي .....ماهو آخر انتاج حديث للفنانة بلوبلو؟ وهو راجل كبير في العمر...... قلت ليه ((الاخضر الليموني)).....طبعا بعد انتهاء الهجمات علينا...من كل صوب..وتقلب الاسئلة إلى انتاج وغيره.. كان الفن جميل...... الناس ذاتها ما بتمرض بي سهل..كان في حبوب منومة للتعبان زي ثنائي العاصمة .....كان في حبوب مغص عند عثمان حسين... وسوء الهضم عند ابو داوود...كانت الاذاعة صيدلية بتعالج كل الامراض...الموسيقى ذاتها بتعمل دلك لفلايت للروح.... دكتور نفساني بيوصف في علاج لواحد تعبان نفسيا من موجة الغناء الحالية ::: بقوليه في صيدلية الاذاعة لو لقيت حبة من نفحات الصباح لليلى المغربي حبة واحدة....ومايطلبه المستمعون زمان حبة بالليل ....وفي حقيبة مليانة دواء لو وجدتها...... حبة واحدة تكفيك اسبوع كامل من امراض الهناقين......ولو مالقيت ده كله ...طمبور الشايقية عليك به .....عليك به ...لانه اثبت فائدته لقوة المحنة واواصر المحبة.....وطارد لبلغم الهاقين من الصدور.... |
حليل زمن الفن الجميل:
بنهاية مرحلة سوار الذهب ... وقبل حكومة الصادق المهدي.... الحكاية جاطط سياسيا .....احزاب بلغت 45 في عددها ....وفي عوض دكام وزيدان والفاضل سعيد ....عندهم حاجة اسمها (حزب البهجة) يعني 46 نحن (شعيبو) الطيب اللحيدب والاخ الجيلي الصديق المبارك (محاضر حاليا في كلية ابو حراز الزراعية ) من الكتير قرب طابت.... عملنا حزب البهجة والمسرة جناح حنان بلوبلو... رقم 47 ... طبعا 46 و47 غير مسجلات.... هذه هوادة ساي لزيادة الفنجطة السياسية في ذلك الوقت .... كنت انا الرئيس والجيلي الصديق نائب الرئيس..... ونبدأ المحاضرة (بعنوان بلوبلو في الميزان) هي ظاهرة فرضت نفسها في المجتمع السوداني ..يكفي ان كل البرنسات تحمل اشرطتها ...كل اغاني الاعراس تتغنى بي بلوبلو ...شريحة كبيرة من المجتمع السوداني فسحت لها مكانة في وجدانهم ...بل بعضهم كتبها على بصاته ولواريه وكواريه ....كيف تمنع هؤلاء من الاستماع اليها... لم يطربون لها ويتركون وردي وابراهيم حسين؟ نريد ان نبدأ العلاج افيدونا من اين نبدأ؟ والمحاضرة طويلة جدا..... وبهجة ناس زيدان فيها كل شئ ....نحن بهجتنا فقط في الكلمة الجميلة ....وهناك شعراء تغنى لهم الفنانين بكلمات (بلو بلية) يعني( بوظان الاعصاب) القالتو بلوبلو موجود في الكثير من اغانيهم ....ما يهاجمو كلماتها بس ويتركو حقهم .....كما قال الشاعر ....لا تنهي عن خلق خبيث وتأتي مثله....عار عليك اذا فعلت عظيم......ونحن طبعا كنا ناس (منضمة) وحجج وقلنا الحكاية عاوزة دراسة للاغاني ....ولا بد من سند كلامنا بي بوظان الاعصاب الموجود في الكثير من اغاني الاذاعة بغض النظر عن الفنان منو......... طبعاً اخوانا الكيزان يعجبوك في رمينا بأبشع النعوت... لكن كنا نمتص ذلك.......ونسأل كل يهاجمنا من هو فنانك المفضل ........طبعاً بعد القاء المحاضرة...وهنا نبرز للمهاجم بوظان الاعصاب من كلمات فنانه المفضل....ونوضح له ان الذي يحب لازم اعصابه تبوظ ....والا ليس بحبا......واسألو المحبين ...هناك من تبق فيه نار....كما قال صلاح بن البادية حبك نار وكلو ودار ومنو بقول انا آه يارب.....وقال ايضا ...معقول بس زول ما بحب يحرق وراك دم القلب......اذا الحرايق دي بي سببها.......طبعا الكلام دية للكيزان عشان حارقين دمنا زمان ..... اي محاضرة طالعين فيها برة هم ورانا.....وبياخدو زمن طويل جدا في نبزنا.... وانتهجنا هذا الخط الدفاعي عن بلوبلو ...لا حبا في اغانيها ....ولكن الفن فيه الكثير من عينة معاني كلماتها ....حرام على بلابل الدوح ....حلال للطير من كل جنس. المهم دخل في مظلة دفاعنا الكثير من الفنانات في ذلك الوقت ومنهم هاجر كباشي.....وكنا ندعي بأن بلوبلو هي الفنانة المفضلة لنا.......نكاية بالكيزان ....ونقول لهم ود اللمين ابوصلعة...اغانية من سنة 55 ما عندو جديد .....والفن تجديد .. صارت تقدم لنا دعوات لقيام محاضرات في معهد الكليات سابقا و جامعة الفرع ....وكانت لنا مطالب كثيرة ...يدعو لها الحزب في ذلك الوقت من ضمنها ....عدم مهاجمة بلوبلو فنيا....إلا بعد عمل المعايير الآتية...... المراقبة في حالة تنفيذ مطالبنا....... وكانت ايام متحفة بالمحاضرات .. في شمبات والفكي هاشم ببحري ...والجريف غرب...وناس اي رحلة بخلوها وبنضُّمو لينا ...بل كانو بشاركوا بالاسئلة....واحد قالي .....ماهو آخر انتاج حديث للفنانة بلوبلو؟ وهو راجل كبير في العمر...... قلت ليه ((الاخضر الليموني)).....طبعا بعد انتهاء الهجمات علينا...من كل صوب..وتقلب الاسئلة إلى انتاج وغيره.. كان الفن جميل...... الناس ذاتها ما بتمرض بي سهل..كان في حبوب منومة للتعبان زي ثنائي العاصمة .....كان في حبوب مغص عند عثمان حسين... وسوء الهضم عند ابو داوود...كانت الاذاعة صيدلية بتعالج كل الامراض...الموسيقى ذاتها بتعمل دلك لفلايت للروح.... دكتور نفساني بيوصف في علاج لواحد تعبان نفسيا من موجة الغناء الحالية ::: بقوليه في صيدلية الاذاعة لو لقيت حبة من نفحات الصباح لليلى المغربي حبة واحدة....ومايطلبه المستمعون زمان حبة بالليل ....وفي حقيبة مليانة دواء لو وجدتها...... حبة واحدة تكفيك اسبوع كامل من امراض الهناقين......ولو مالقيت ده كله ...طمبور الشايقية عليك به .....عليك به ...لانه اثبت فائدته لقوة المحنة واواصر المحبة.....وطارد لبلغم الهاقين من الصدور.... 1- التأكل من خلو كل الكلمات الغنائية التي تذاع عبر الاثير من اي رجفات او خفقات قلب ولو كان التصريح (تحت تحت) خلافا لذلك سوف نستمر في مهاجمة الكلمات والشعراء والفنانين بغض النظر عن بيئتهم الغنائية هجوما لا هوادة فيه.... 2- سحب اغنية يا معاين من الشباك لود اللمين.....ووكت شفتك لوردي....ودية المجننا لعلي ابراهيم اللحو...هذا بداية ....وهناك لستة سوف تتبع لاحقا...سوف يتم ارسالها الى من يهمه الامر...... 3- سوف نقوم من جانبنا بالموافقة بوقف الرقيص الاهتزازي لبلوبلو والاعتماد على الكلمة 5- ايقاف اغاني الجلد او جلدها لانه ثبت ان الجيل الحالي لا يتحمل سيطان العنج (ام قطران) وثبت ان تأثيرها يستمر شهور ويعمل (دروب في الضهر). 6- تصنيف الفنانين بصورة واضحة شعبي يعني شعبي يس.... زي محمد احمد عوض وعدم خلطه بالحديث زي ترباس...... ( ترباس ملخبطه باقي ليه حبة من يقلب جاز) الى أخر البنود والتي يتذكرها اخي الجيلي..... 4- ايقاف حكاية سرق مني وما بخلي يغني حقي...لان احفاد كرومة وسرور سوف ينتهزون الفرصة ويطالبو بفلوس من 3 اجيال غنو اغانيهم..... |
الاحدب اتمني ان يكون صباحك
مندي وانا اتمني لك الندي في صباحك استطيع ان اتخيل شكل معين للصباح المندي تخيل معي ريحانه مخضره في اب سته سهت عنها فاسك ولكنك لاحقا شكرت السهو عندما تاملتها ذات صباح وراقك منظر حبات طل صغيره علي اورقها ثم تحسستها فتطاير رزاز بارد واصاب اسفل قدميك وانتابك احساس بالرضا وتجاهلت وجودها عمدا كانك عقدت معها اتفاقا غير مكتوب بان تتركها وتساهم هي في ابهاجك عند ضحويتك اشكر لك التقريظ ولكني اعتقد اني جزء من فطيس مهما بعدت المداخله كانت لاثراء الموضوع فحسب وهاهي تاتي باكلها كل هذا الانتراح المبهج هاهو الطيب الاحدب يزيح اخر ستار للتردد وينترح كابهي مايكون اليوم فعلا اضفت علي المنتدي القا مبهج طالما نحن بصدد حزب البهجه 49 ونبشت باقتدار في تلاطمات اخر ديمقراطيه وذي ما قال حميد ان كنت معاكم كنت بكون النوباويه لو كنا معاكم اكيد كنا انضمينا لحزبكم المبهج هذا اخونا الطيب لم تصيبني منك كلمه ولا اعرف لماذا خطر لك ذاك الخاطر وانما هو جدل يثري اي موضوع مطروح فاسمح لنا انا نجادلك بين الحين والاخر في طرحك الثر ولك الشكر |
في النادي
تربيزه شهيره تشكل مظهرا اساسيا من مظاهر النادي اذ من غيرها يبدو النادي وكانه غير مكتمل هذه التربيزه مرت عبرها الاجيال ولكن هناك بعض الوجوه ظلت ثابته ولفتره طويله كانت تضم عمنا مصطفي عبدالغني الذي اعتقد انه الان لاعب ماهر بالمعاش وعمنا ود النضيف ومبارك سلام ومحمد عظيم احمد وفيما مضي كان يؤمها الكثيرين غير هؤلاء هذه التربيزه ظلت ولفتره طويله محور للمناشط الاخري اي الوست والهارت والدومينو اذ دائما يكون اعضاء اللجنه الكبار ضمن الذين يرتادونها ورغم انها كانت مثار اهتمام الكل سوا من ناحية التسمع الي التعليقات الساخره التي تصدر من روادها اوشغف الجميع باللعب التي يمارسها رواد التربيزه اي لعبة الاربعة عشر الا ان اهميتها كانت تكمن في انها كانت نقطة ضبط النادي في كثير من الاحيان ولذلك كان الكل حريصا علي تواجد روادها وعدم التعرض لروادها باي نوع من التضييق والكثيرين ياتون اليها للفرجه لا غير هذه التربيزه كانها كانت تمثل تواصل الاجيال في النادي ويقيني ان روادها مازالوا ياتون اليها اتمني ان لا تتغير مكانتها وتظل مناره يهتدي بها الجميع في النادي وانشاء الله كما وعدنا اخونا مبارك سعد سنتعرض لموضوع النادي وتاريخه في هذه المساحه اتمني من اخونا الطيب الاحدب ان يكتب لنا عن تاريخ رياضة البنق بونق التي كانت لها شعبيه واسعه في اوساط النادي |
رواد التربيزه التي تحدثت عنها اعلاه
يحنون اليها منذ العصر ويبداون في التوافد باكرا ويجلسون في الظل امام الفرن ويبداون في تحديد ادوار اللاعبين حسب وقت وصول كل منهم ويرتفع صوتهم وجدلهم وتحدياتهم المازحه حتي يحين وقت صلاة المغرب فينصرفون الي اداء الصلاة بعضهم ناحية المسجد او فلنقل جلهم ام عمنا النعيم فانه يتجه الي الصلاة امام دكان عمنا حمزه علي يوسف وبعد اداء صلاة المغرب مباشرة يتدفقون ناحية النادي الذي يكون قد فتح ابوابه ويتسابقون ناحية تربيزتهم التي يعشقون ويلتفون حولها ويبداون مشوارهم المسائي المبهج ولايمضي طويلا الا وتكون هذه التربيزه قد اكتظت باللاعبين والمتفرجين الجالس منهم والذي يتفرج او ينتظر دوره وقوفا والضجيج حولها علي اشده صياح وجدل وضحكات صافيه لا تشوبها شائبه وطبعا في رمضان يزاداد الضغط علي هذه التربيزه ويكون لها في هذا الشهر الكبير اهميه خاصه ولعل جميع المناشط في هذا الشهر تكتسب اهميه ما بشكل وباخر والي جوار هذه التربيزه تقبع تربيزة الدومينو العتيقه اي التي يرتادها عتاولة لاعبي الدومينو وما اروع فرقعات قطع الدومينو ولهذه التربيزه ايضا عشاقها ولكنها طبعا لاتصل الي مصاف جارتها من حيث عدد الرواد انشاء الله لنا عوده لهذه التربيزه بتفصيل اكثر |
[/list]الســــــــــــيجة بعد الثالثة ونصف عصرا، في الباب الشرقي ( الصف الشرقي لسوق فطيس) حيث يمتد الظل شرقا فاسحا مكانا معتبرا لتجمعات رواد لعبة السيجة وام حفيرة ،حيث يشغلون مساحة تمتد من ظل دكان محمد صالح شامة جنوبا حتى قهوة المرحوم عمر البني عامر شمالا... في تلك المساحة تتشكل دوائر مقفلة باحكام من( السيجوية) حيث يكون اللاعبون جلوسا والمتفرجون وقوفا والبعض، من كثرة التزاحم ينحني شبه راكعا مراقبا الوضع بعيون جاحظة وفكر مشغول باندماج يضاهي اصحاب لعبة الشطرنج العالميين (كارابوف وكاسباروف.). وتختلف كل دائرة من الثانية من حيث عدد المتفرجين ......وكلما كانت الدائرة تضم امثال ود النضيف وعبد الحميد كلما كان هناك عدد اكبر من التدخلات الخارجية فالكل يفكر مساعدا احد المنافسين ... تفكير رياضيات ...وشطرنج....ليس تفكير عشوائي ....هناك تضحيات بالكلاب من اجل الفوز ( وموت الكلب في السيجة عند هؤلاء يعادل موت... بقرة) .. اي ان هناك معادلات تجري في رؤوس هؤلاء ....قبل تحريك المعطيات (كلاب السيجة)... ولفت نظري( التفكير السيجوي وام الحفيري المتقدم جدا) لبعض هؤلاء النوابغ في الرميات والتي يحفظون نتائجها مسبقا ..قبل ان تُلعَب...بمعنى يمكن ان يقول لك احدهم من نظرة واحدة لوضعيات (كلاب السيجة) ارفع اللعبة دي عندك كلب واحد حاتاكله....ترفعها ولا حا تضيع زمنا .....لامن تشوفو؟. هنا يطرأ للانسان خاطر بإخطار دكتور كمال شداد بتشجيع هذه اللعبة التي اصبحت (ظاهرة )وضمها للاتحاد العام وعمل اتحاد لها ....وتنظيم منافسات محلية ودولية .... في احدى المرات حاولت بنفسي ان العب مع حسب الرسول(صاحب كارو متقاعد) فمر بي النور حسن وقال لي ....المحيرني كيف تقدر تاكل كلب من الزول ده...ده عنده الكلب بساوي جمل ....ممكن تلعب للاستفادة بس.... فعلمت ان هناك اناس لو ساعدتهم الظروف مسبقا وهم بتلك العقلية لكانوا الآن من احد مهندسي ومؤسسي سد مروي او كبري بورتسودان جدة مستقبلا...... وهناك صيحات مع الاندماج في حالة اي تناطح فكري سيجوي حين لا يكون هناك مخرج لاحد الكلاب الا الموت....تخرج الصيحات والقفشات من المنظراتية الكبار..... وهناك عباقرة في هذه اللعبة من الضباب بلة احمد الحسن وعبد السلام احمد اضافة الى مساعد احمد الناظروود الرشيد من امدوانة.... هؤلاء ........اولمبياد منفصل.... في سكة حديد الضباب.. ولعبة ام الحفيرة مارسها المرحوم ناصر عبد الرحمن وعبد الله الكناس ... ولا ادري حاليا من يمارس هذه اللعبة....لكن عموما كل من مارس السيجة وام الحفيرة خبرة لا يستهان بها في شتى المحافل الدولية لو قُدِرَ لهم ذلك ....بل يجب من وجهة نظري ان يُعطى حسب الرسول درجة علمية رفيعة لمستواه الرفيع في الرميات وحفظها .... بل يساورني شك بان لهذا الرجل علاقة بآنشتاين صاحب النظرية النسبية....لتفكيره المسبق.... والصائب في ان قال كم كلب سيموت في السيجة ...صار ذلك واقعا بعد اللعب ومطابقا لكلامه .... بعد ضياع الزمن... ارى ان هؤلاء الرعيل لم يستفيد الجيل الجديد الموجود حاليا منهم .... يمكن الذهاب لهؤلاء والاستفادة من( رمياتهم ) حتى اذا كان هناك جديد في هذه اللعبة من اتحاد وغيره ..يكون لنا اشبال ُمدَربين .....لان هذه الوسيلة الوحيدة للدخول لكاس العالم للسودان وسيادة هذه اللعبة عالميا....ولا اعتقد ان هناك دولة ستغلبنا مع وجود مدربين بهذه العقلية.... ممكن الصين تاخذ ( صنج) مننا وامريكا تاخذ اعور(كلب واحد) والبرازيل ما تاكل ولا كلب من التصفيات الاولية.....ومافي داعي لكرة القدم وحرق العمم ... وهذه اللعبة لا تحتاج الى دعم مادي او استادات كبيرة ... بالقرب من اي ست شاي ممكن ......وممكن (مصاص ) شوال بلح واحد يكفي لمنافسات كل افريقيا مع (دُقَة ) من شوال فحم ككلاب سيجة سوداء..... |
الغريب اخي الطيب ان الصينيين معروفون بسرقة افكار الشعوب وصناعتها في شكل العاب وتباع لنفس الشعب صاحب الفكرة..... كالجلاليب السودانية المميزة عالميا..... فقد انتجتها الصين وتباع الان بالسودان وارخص من المحلي السؤال لماذا والي الان لم يصنع الصينيون لعبة السيجة من ورق وكلاب بلاستيك علي غرار الليدو ولعبة الثعبان؟؟؟؟؟ اظنهم الحكاية دي ما وقعت في عيونم.....!!!!!
|
الاحدب
الله يديك العافيه السيجه لعبه لها صيتها وشعبيتها في اوساطنا المحليه ومع كل هذا الزخم اظنها لم تثر اهتمام اوساط اخري يمكن ان تضفي عليها بهار علمي وهي لعبه تحتاج للكثير من الحذق والاجاده والخبرات ودقة الملاحظه والقدره علي التركيز وكما ذكرت انت الكثير من رواد اللعبه يحددون مصير المنافسه من ( الرصه ) ولكن ما يعطي السيجه هذا الالق هي ردمها لهوة العصر التي تعتبر فراغا عريض لكل من لا يمارس الرياضه او يكون مرتبطا بالزراعه والذي يجعل اماكن ممارستها مزارا يوميا هو الالتفاف الواسع النطاق حول روادها والمزاح الجميل الذي يضفي علي الجميع بشرا وحبور |
الاخ الصادق محمد عوض الجيد لك عاطر التحايا الشعب الصيني يكن كل الحب والتقدير والاعجاب للشعب السوداني ....لانو السودانين قطعو راس غردون باشا في زمن الانصار....وغردون كان بيستعمل الصينيين بدل الحصين لجر الكوارو..... هتلر بالنسبة للصينيين تلميذ في السادية مقارنة بغردون باشا.. لذلك بحبو الجلابية الانصارية شديد...... ولو سوقها ماش كان غرقو كل افريقيا بيها....بل كانو عملو ليها جيب ارضي...... ثالث.... الحين جل تركيزهم منصب فقط في الجلابية ذات (الدفع الامامي ) الجيب الامامي ........... ومن حبهم للسودانيين منتظرين كمال شداد او ابراهيم شمس الدين بتصريح بس انو لعبة السيجة لعبة شعبية وعندها اتحاد...... حايصنعو سيجة الكترونية ...... انا موش عارف كلابها بتكون كيف هذا متروك طبعا لذوقهم.....ولكن هذا بعد دراسة عقلياتنا الشرائية .... وكمية الناس البتلعب ...والبتتفرج......وبتكون ارخص من الصناعة السودانية ...ليه؟ ..... لانو الصيني لو اعطيته ثمن قطعة ارض في الخرطوم ....... لو ما مات من الفرحة في السودان........بيكون الوليد بن طلال في مقاطعته......نحن ارضنا اغلى من بكين وطوكيو.....كيف جلابيتنا تكون رخيصة..... نحن شعب (ادروباتو) بيطلعوا برجولهم وبدوسوا وبفنجطوا فوق شنط فيها مصاحف وهدايا بتتكسر .... بطريقة منظمة ومنهجية .... تقولي شنو ...تقولي منو......ونشتكي لي منو..... كيف جلابيتنا تكون رخصية.... نحن مشاكلنا لو جابو ليها اذكى مفكري العالم ......إلايستعملو بندول او اسبرين قبل بداية التفكير فيها........ولو فكروا إلا يبلعو حبوب زي بتاعة مستشفى التجاني الماحي ...... نحن فينا واحد قال ... وا اسفاي وا ذلي ...لو ما كنت من زي ديل ......... ديل الحين صار لو قلت انا منهم ....كل الاجناس الثانية يقولو (لا حححححححولة ولا قوة الا بالله) (دير بالك من السودانيين اراهو ... مجرمين وحرامية). الصفات دي جات من وين؟ ....... وكيف جلابيتنا تكون رخيصة...... نحن لو انتجنا عيش (ذرة) بندسو عشان المساكين تدفع الثمن ...ولو استوردنا حديد واسمنت كمان بندسو...تقولي شنو ....تقول لي منو.... وكيف جلابيتنا تكون رخيصة...... نحن الشركات الوهمية ..... والبصات الدائرية....ونحن يدنا ملوية بنشتكي لي ابو ايداً قوية..... اخ الصديق ليس الجلابية وحدها الغالية مع انها صناعة محلية في بلدنا ....... كل شيء غالي من ناحية مادية ...لكن هناك اسباب للغلاء واسبابه ليس كما اعتقد بل اجزم بجشع وطمع وعدم ضمير الانسان ذي كل الصفات السالبة الذي كل همه الحياة على حساب الآخرين.. مصاً للدماء وقتلاً.. اسمنت نافد ،بيض فاسد،دواء منتهي ومبيدات على كيفك .... حرمان الآخرين من الخبز وكل شئ ضروري .....الا بعد ان تدفع ثمن الاحتكار.... يعني العايشين في السودان الحين بعانو نو من امراض (اسألو المستشفيات)..... الواحد هو وحظه من السماء......فشل كلوي ...سرطان.... يعني الناس ميتة زي ماقال استاذنا (محمد ود الحسين) ...ميتة لكن راسها قوي ساي ماشا بالفرفرة....... ويا ليت اخ صديق نقدر نسرق الافكار الصناعية ... بس الحين جماعتنا نسو الصناعات كلها قالو بنتجو طائرات...وباقي ليهم اطلاق قمر صناعي بس ..الحاجات الصغيرة الصين بتجيبها...... صيني ميكانيكي تبع شركة صينية في السودان شاف بص ماش بمكنة تراكتور وكروزر(باربارا) ايضا بمكنة تراكتور ......قاليهم ده شنو يا جماعة ..؟ قالو ليه انت شفت حاجة.... في الخريف المكنة دي بتقلب طاحونة......نحن كده ....وعرباتكم دي ياما تشوف الويل وسهر الليل ......والله نشغلها دقاقات...بعدين اللساتك بتاعتكم دي بعد تنتهي......(نعلات) والسلك الداخلي بنستفيد منو...سراير (وقلابات) والخيوط الداخلية ....دبارة قوية للشوالات.. تقولي شنو ....تقولي منو.. نحن منافستنا في الاستهلاك...والفن المُحَيِر في الاستهلاك...... |
الاخ عوض خضر لك عاطر التحايا أري أن كلمات الاغنيات او القصائد التي ذكرتها ....كلمات رمزية ..سياسية...والرمزية لا تنشأ إلا في ظل دكتاتورية او طغيان سياسي .... وكلما زادت ابعاد الرمزية في التخفي خلف الرمز كلما دلت على ان الدكتاتورية في اوج طغيانها...... بمعني هو شعر خوف من التصريح.....واستخدام كلمات يمكن تأويلها ...وهو شعر ينطبق عليه ما ينطبق على الشاعر....من حيث المؤثرات التي تجعل له دافع لقرض الشعر..بمعنى لا يمكن ان تكون هناك قصيدة دون قضية .....فالشعر قضية...وهو انفعال تعبر عنه النفس بكلمات منظومة في لحظة زمن بكل مؤثراته السياسية والاجتماعية والجمالية ..الى آخر المسميات... ولا يمكن الغاء الزمن المؤثر او الماضي من قصيدة شعرية سواء رمزية او غيرها .... وهذا لا يعني ان عدم ذكر الشاعر للماضي ...ان الماضي غير موجود ...وان الشاعر هذا اتي بجديد في الاسلوب الشعري مخالف للذين سبقوه ...تخطى الزمن الماضي والحاضر بتأثيره.. وذهب للمستقبل مباشرة ....من اي كوكب هذا الشاعر....؟بأي شئ تأثر وانفعل حتى يكتب لنا هذه الكلمات ؟ ويخاطب من ؟ اذا كان من كوكبنا وشعره سياسي ..والقصيدة في زمن سياسي تأثر به ...وتخاطبنا نحن ... يكون هذا الشاعر من بلادنا ..وهو قارض للسياسة..... ومتأثر بها.... ..ويستخدم الرمز للمستقبل مباشرة ..... متجنبا عدم ذكر الزمن السياسي الذي هو فيه خوفاً ورعباًً...... ونفس الفنان تغني بكلمات مثل : من المدفع طلع خاذوق..... هنا ايضا رمزية ..لكن الخوف هنا اقل من سابقات الذكر...لانه هنا توجد رمزية مباشرة للدكتاتورية..العسكرية..... اي حكومة ذات سياسة دكتاتورية تولد دوافع للتغيير للافضل والافضلية لا تستورد من المدينة الفاضلة ..لا بد من ان تكون زمن في حياتنا نسعى لتغييره للافضل منه.....حتى ولو بالاغاني الرمزية......... إذا كان التباكي على الماضي والنواح عليه مثل نحن امة عربية نهضت في الماضي وكل الامم تعلمت مننا الطب والهندسة واصبحنا الآن نستورد كل شئ ونحكي الماضي لابنائنا ..هذه غيبوبة بل غياب عن كل محفل علمي في تقدم البشرية .... واذا كان قصدك بأن عبارة الزمن الجميل ...هي عبارة مضى عليها الزمن ..وهي متروكة للتقييم الشخصي لكل فرد ....حسب ما تأثر به من مؤثرات.... يجب نسيها والسعي الى الافضل...اي لا نلتفت للوراء واخذ العبر من الماضي لتغيير الحاضر وعمل مستقبل ....كانك تريد ان تقول الغو كل الماضي بكل ما فيه فهو افيون مخدر وتقدمو الى الامام...... لا اعتقد ان هناك غدُ يُنشَد دون دافع من الماضي او الوضع المُعاش .....الماضي هو الاساس للاتعاظ والاعتبار ....والتغيير.... حتى ان هناك قصص في القرآن الكريم تذكر قصص الغابرين للاتعاظ والتغيير الى الحق الافضل والباقي وهو الايمان بالله سبحانه وتعالى... اخ عوض ترباس قال ....جاي تفتش الماضي ...خلاص الماضي ولى فات.... لم يلغيه .....بل بنى موقف من الاستفادة من التجربة في الماضي واتخذ قرار للتغيير حينما تكمل الاغنية .... اصبح زول تاني...يحب زول تاني ....خلاص غيرللافضل..... وايضا الجابري ...قال ...ما نسيناك ....نسيناك ...جاي تعمل ايه بعد ما بدلت ريدنا... ايضا موقف من تجربة ...للتغيير ...فالماضي بتجربته المريرة دافع للتغيير ..... المحيرني في واحد بقول ......يالناسينا.... حن علينا .....جرب نساه واصبح ماضي...وبرضو ما عاوز ينساهو و ياخذ موقف للافضل........ |
البنق بونق
احي عمالقة البنق بونق فتحو الدنقلاوي لاعب البنق الماهر وتاج الدين الامير وكل الدفعة من احمد حسين وعمر الحسين ومحمد المبارك وكل من مارس معنا هذه اللعبة في ذلك الزمن الجميل.... إلا أنه فرقنا ......فمنا من رحل الى خالقه ....صديقنا وزميلنا صلاح احمد ابراهيم التوم (جرمة) له الرحمة واسأل الله ان يجعله من نزلاء الجنة..... ومنا من يلتحف الغربة وما زال في انتظار دوره لقدره المحتوم..... وانا اعتبر فطيس رائدة في البونق بونق على مستوي السودان وكل فرد من ذلك الجيل الذي اعرفه يمكن ان يمثل فطيس في اي محفل للبنق بونق ..وهوجيل مظلوم لانو مافي منافسات خارجية عشان يعرفو فطيس شنو في البنق... ويكفي فتحو الدنقلاوي ..كلما ذهب بورتسودان والخرطوم...بغلب الجماعة كلهم وبقوليهم انا واحد بس.... لو جوكم جماعتنا (تآمِنُو).. كانت هناك منافسة شريفة بيننا يتخللها نوع من التحديات وخاصة بيني وفتحو الدنقلاوي وهو رجل طيب وخدوم وحافظ دنمو النادي( مسمام مسمار) وكنت انا في ذلك الوقت في اوج عنفواني (البنقي) كنت بغلب ناس كتيرة .. وبكون ماسك المضرب ساعات طويلة ... لكن حينما يكون القيم خاصة بيني وفتحو الدنقلاوي ...له طعم خاص في التحدي....كان في الاول يغلبني ...ولكني تسيدت عليه لعبا ونتيجة بعد ذلك..... وحصل في يوم وانا ماسك المضرب لساعات بغلب في الجماعة .......اتي الى المرحوم العاقب عبد الله حسن ..له الرحمة والمغفرة والنُزُل في الجنة.......قال لي طالباً ان اساعده في ايصال (كيلتين دقيق للبيت) ضروري جداً...فقلت له بس العب مع فتحو القيم الجاي وامش معاك ...فانتظرني .....وبدأت اللعب مع فتحو ....طبعاً غالب او مغلوب ...حا أمشى مع العاقب....فبدأت لا اكترث لتركيزي .....فغلبني فتحو......( فقلت له عندي دقيق) ....فأخذ يصيح بأعلى صوته ...وهو يمتاز بحلقوم كوراكي كبير ....دقيق ... نغلبك تقول دقيق....وكان يقصد من ناحية اعلامية لكل النادي انه غلبني ... وانا بتاع حيل ... واخذ عمر الحسين ومحمد المبارك عبد الله عباس بترديد ..دقيق ...وقالو ممكن تكون عندي حمى وانا مش عارفها ..احسن اراجع نفسي.....طبعا الجماعة ديل كنت بغلبهم .. فرصة كبيرة جاتهم لاغاظتي ....فكل ما اجي النادي بعد المغرب....سلامات يادقيق... من عمر الحسين .... ومحمد المبارك ....الليلة كيف الوضع ....في نزلة ولا حاجة كدة.... بتحس بي شنو قبل ما تلعب معانا؟ طبعا فتحو خلاص نام عليها .....وما بجي يلعب ..واذا جاء يقول دقيق ويمشي..وانا زعلان لازم اغلبه .... وانا ماش في الشارع على الضباب ماش الجنينة بتاعتنا ..... اذا بلوري يقبض فرامل ذات صوت تفحيطي عالي جدا بالقرب مني...واذا بحلقوم بشري عالي ... وين يا...دقيق ...( فتحو طبعا)....طبعا زعلت في دواخلي وقلت دقيق في الشارع .. ودقيق في النادي.... لازم خطة لاسكات ناس الدقيق ديل كلهم... اخبرت الاخ المرحوم(صلاح احمد ابراهيم التوم) بانو اليوم انا حا اغلب فتحو ...بس تكورك وتعمل اعلام مضاد زي بتاع فتحو بصوت عالي .... (انا حلقومي شوية تعبان) كل ناس النادي لازم يعرفو انو انغلب بالشمال انا حا أغلبه بالشمال....وفتحو ماعارف انا ممكن العب بيدي اليسري....... في المغرب ذهبت ومسكت المضرب باليسري وبديت العب ...وعملت فيها اعسر بس. هنا قدم فتحو وقال لي تلعب معاي كدة بس؟ زي الجماعة اللعبت معاهم....بالشمال .....طبعا ناس دقيق استغربو.....قبلت التحدي .....انغلب فتحو..... واخذ المرحوم صلاح يكورك باعلى صوته ....ويولول....الليله فتحو غلبوه بالشمااااااال ......(.وييييييييو)........ بعد كده مفروض يخليهووووو ........بعد الاعلام القوي .... وناس النادي كلهم عرفو .....التفت الى عمر الحسين ومحمد المبارك ...... وقلت ليهم .........كان عندي دقيق زمان ولا ما كان عندي ..؟ وهي اتتنا من عمالقة سبقونا بداية بي حسين ابراهيم وصلاح عبد السلام وابراهيم دفع الله وبلة دفع الله والمرحوم عبد الله خير الله الماظ ... له الرحمة ونزل الجنة والاستاذ حيدر هاشم والرشيد خضر ثم جيل ناس على ابو قرن (دراب) وعمر وداللزيرق ثم جيلنا وخلفنا نور الدائم على محمد حسن وشريف حسين ...واكيد هناك ناس لعابين حاليا ...بس الواحد طول شوية من النادي...والمعذرة اذا لم اذكر كل الاسامي ..... وعموما طربيزة البنق بتاعتنا كبيرة جدا وهي للزوجي لكن نحن نستخدمها للفردي ...وكل من تعلم عليها يستطيع ان يلعب بامتياز على الطرابيز الفردية .....في اي محفل بنقي.... |
الاحدب من قال ان الشاعر الغي الماضي
ولا انا صرحت بذلك اظنك بنيت مداخلتك علي فهم خاص بك لما طرح ولان الاستنتاج خطأ ايضا النتيجه خطأ يظهر انك لم تتمعن في شطر البيت لمن يجي الزمن الفلاني وتسرعت في احكامك جزافا والغريب في الامر انك لاحقا تحدثت عن التباكي علي الماضي في مغالطه غريبه لما تحدثت عنه في بداية مداخلتك وحقيقه لم افهم هذا التناقض الشاعر او الشاعره تحلم بمستقبل باهر اجمل من حاضر متلبد بالغيوم اين العيب في هذا والشعر ليس قالبا جامدا ياخذ منحي بعينه وانما جمال الشعر في النزوع لتحديد اشواق بعينها ونسجها في اطار لغوي جميل اظنك لم تقرا المكتوب جيدا ارجو اعادة قراته وستكتشف ان الامر برمته ينحصر في اننا يجب ان نحاول صنع مستقبل افضل الرمزيه في الشعر ليست مربوطه بالقمع فقط كما تفضلت ولا بالسياسه فقط ولكن الرمزيه مدرسه ونمط والغريب في الامر ان شطر البيت الذي ذكرت لم يجنح كثيرا للترميز فالشاعر استجار بالزمن الاتي جهارا لانه قال لمن يجي وهذا يدل علي الاتي |
| All times are GMT. The time now is 05:02 AM. |
Copyright ©2000 - 2024, Futeis.com