النداء الاخير في رحلة شاشة النادي
الي كل المهتمين بامر النادي
بعد اتصالات مكثفه بين اخونا ابوعبدالرحمن والاخ سيف سالم تبين ان جمارك الشاشه تكلف قرابة المليون علما بان الشاشه مازالت قابعه في جده مع اخونا حسب الرسول ابراهيم ومازلنا ننتظر ان يتم انقاذ مشروع الشاشه |
ليكم خمسين جنية ياعوض خضر مساهمة مني
|
فيك الخير يااخونا ياسر دي المحريه فيك
نتمني ان يجد النداء من يستجيب له بمثل هذا الوعي |
نتمني المشاركات ولو بالقليل وقرش علي قرش مال . وياناس البلد دي حقتكم مافي زول ببنيها غيركم . |
اخونا عوض خضر ان شاء الله هناك استجابة ومنتظرين النتيجة في العيد دا تعيد معانا الشاشة .
|
اخونا ياسر كل سنه وانت طيب وكل السنه والجميع بخير
الاجابه علي سؤالك للاسف لاحياة لمن تنادي |
التحية للجميع .. أتصلت بالأخ سيف الدولة سالم .. وأقترح أقتراح أراه مناسب لحل معضلة الشاشة .. وهو أن من يحضر الشاشة يكتب عليها أسم سيف سالم وأن من يحملها ، يحملها للسيف .. وهو بدوره سوف يساهم في الجمارك . وأستطاع أن يوصل المبلغ الي 350 جنيه ..ـــ بالجديد طبعاً ــ زايد التحميل والشحن حتي فطيس يعني حوالي 100 ريال تقريباً .. فقط من يحمل الشاشة لفطيس من جدة ؟ الأمر عند أخوانا عوض خضر وحسبو ..
|
الاخ عارف.... حياك الله ...وبارك فيك وانت تحمل هم البلد
التحية للأخ سيف...ونتمني ان توضح...يعني لازم يحملها زول معاهو ولا ممكن تتشحن......وماهي هي تكلفة الشحن احسن الناس تمش خطوة خطوة. الشاشة هسه مع الاخ الخليفة كم تحتاج للشحن....إذا كان هذا هو الطريق الوحيد كم تحتاج اذا شالها معاهو زول بعد ما عرفنا انو الجمارك نقصد قدر دا .... نتمني ان يتحرك الناس ويلقطوها ان شالله ريال ريال |
ابوعبدالرحمن الله يديك العافيه
وانت تبعث الحراك في المشاريع التي تلفظ انفاسها الاخيره عبده ردا علي سؤالك اتصل اخونا ابو عبدالرحمن امس واتضح ان المطلوب مبلغ اربعمائة ريال فقط واحد العابرين للبحر الاحمر ليحمل الشاشه لاخونا سيف الدوله وكما عرفت من ابوعبدالرحمن ان هناك اكثر من مقيم من المنطقه بجده سيغادر للسودان في هذه الايام ولكن المهم ان نوفر مبلغ الاربعمائة ريال اخونا الاستاذ مامون اقترح من قبل ان يساهم من ساهموا من قبل مره اخري وانا اقترح الاتي 1- عوض خضر 100 ريال 2- مامون عبدالله النور 100 ريال 3- حسب الرسول ابراهيم 100 ريال 4- عبده مصطفي ابراهيم 100 ريال واعتقد هذا انسب حل في ظل تعقيدات موضوع الشاشه |
بالنسبة لي أخونا عوض بنسق مع حسبو بتصلو المية بسهولة إن شاء الله اليوم لو دخل لي ماسنجر بحلوها له على النت
وربنا يديم المعروف بين الناس ... ومشكور على كل مجهوداتك ياسيدي وما مشحودين على ذلك والشوق حاصل للمنتدى وأعضاءه الكرام |
دي المحريه فيك يااستاذ كذلك وافق اخونا حسب الرسول ابراهيم علي المساهمه وتبقي اخونا عبده
نرجو ان يدلي بدلوه في الموضوع |
بفتش لي في طريقة .... ارسلها يا عوض... ودا المأخرني في الرد
|
يا جماعة ما تشوفو لينا طريقا...نلز ليكم دي
والحاصل شنو....الناس وصلت وين |
عبده الله يديك العافيه ساتصل بابوعبدالرحمن اليوم وارد عليك لاني انشغلت في الفتره الماضيه عن الامر
ظهرت تفاصيل اخري في الموضوع |
اخيرا عبرت شاشة النادي البحر الاحمر رغم ان المسافه لاتزيد عن اربعمائة كيلو لكنها احتاجت لشهور عددا حتي تعبر
نشكر جميع من ساهم في مشروع الشاشه سوي بماله او برايه اوباي جهد ادي لوصول الشاشه الي محطتها الاخيره وعلي وجه الخصوص نشكر الاخوان عبدالرحيم نورين والناجي محمد الامين وعارف عبدالرحمن لتمكنهما اخيرا من جعل المشروع ممكنا كما نشكر اخونا حسب الرسول ابراهيم والاخ الاستاذ مامون عبدالله النور الذي كلما طلبنا منه المساهمه في المشروع لم يتردد ساهم في الجوله الثانيه كما فعل في الجوله الاولي الشكر للاخوان ياسر مهدي وعبدالمنعم معروف والطيب محمد عبدالقادر وكل من ابدي استعداده في اريحيه نادره لتسهيل مرور الشاشه الي الجانب الاخر من البحر نشكر الاخوان الذين ساهموا في الاول مره اخري اخونا دفع الله مصطفي وامير حمدان والصادق محمد عوض الجيد وعبده مصطفي ابراهيم ونقول للجميع ساكنه فيني بكل معالمك وامتدادك في الخيال والعصير صوتك يوشوش يهدي للجالوص بسيمه ونحن نتكرف عبيرك ونكهة الضل المرشرش وريحة البن البكاري جايه من عند طاقه تدوش والحسان في سرب ازرق والعيون حلمانه تبرق والقطن فاقع يقرقر قلبو قلبك يامواعيد الوصال |
اخونا عوض خضر نفحتنا اليوم بخبر سعيد وجميل ومفرح ونحمد الله ان عبرت بسلام ، وكما اشرت نشكر كل الذين زكرتهم وياها المحرية فيهم بالرغم من انك حشرتني معهم وانا منهم برأ ومتفرج ساكت ، علي العموم نشكركم علي المجهود المبزول في سبيل الشاشة .
ويا عوض اها بعد عبرت البحر بتاخد لية سندة في بورسودان ولا مرور ساكت تجاه النادي . |
Quote:
القطّع الشاشة البحر.......يوصلا الحلة ويكون رمضان ....بلونية اخري لرواد النادي والتحية للجميع |
فاتني ان انوه في العجاله اعلاه
بمساهمة الاخ الاستاذ احمد محمد البدوي في هذا المشروع بماله وفكره وهذا دأبه كلما سمع نقارة عمل يخص المنطقه فله الشكر والتجله اتمني ان يجد لنا العذر كل من ساهم في هذا المشروع ولم يذكر اسمه في هذا التنويه |
مبروك عبور الشاشة وانشاءالله ما تنتكي تاني الا في النادي قولوا آمييييييييين
|
سلام شباب كوووووووووولكم على قولة الفاتح جبرا
الحمد لله على سلامة وصولها أخونا عوضين وعقبال ما تصل بقية الحاجات دمتم احبتي موضوع رمضان السنة مالكم يا ناس .... وصل سكر الحلة بس الناس منتظراكم والله |
ام محمدمبروك عبور الشاشة وانشاءالله ما تنتكي تاني الا في النادي قولوا آمييييييييين
{اممحمد /مبروك عبور الشاشة وانشاءالله ما تنتكي تاني الا في النادي قولوا آمييييييييين} امييييييين والف الف مبروك وصول الشاشة وشكرا كل من ساهمو في هذا المشروع |
مبروك للجميع الشاشه وصلت الحله متاسف لتاخير الرد المعلومه كانت ما مؤكده ولكن الشاشه ستكون ضمن فعاليات النادي في رمضان
كل سنه والجميع بخير |
نحمد الله بالوصول للمحطة الاخيرة ونسال الله ان يخلف بالبركة لكل من ساهم بمالة وجهدة .
|
شاشه النادي مره اخري
وردني اتصال اسيف من البلد يحكي ان شاشة النادي التي سمع برحلتها القريب والبعيد قد كسرت ولااحد يعلم التفاصيل ( بس الشاشه جينا الصباح لقيناها مكسوره وقد انبري اكتر من شخص للشهاده بذلك ) عليه نقول الجاتك في شاشتك سامحتك وقد علمت انهم لم يجدو قطعة الغيار اللازمه بالسودان ( شاشه بديله ) وعليه نناشد من جديد ان يتبني المنتدي الموضوع علي ان يتغير عنوان البوست الي شاشة شاشة النادي مره اخري والله من وراء القصد ولا نامت اعين الناس الزاقو المره الفاتت
|
هههههههههه والله خبر مفجع
طيب يا ناس جماعة لجنة النادي ديل مش مفروض يفتحوا ليهم نفاج للمنتدي دا عشان يشرحوا مشاكلهم الطارئه منها ذي موضوع تحطم الشاشه والمستمره يعني ضيق ذات اليد وكدا بعدين في اسئله قد تتبادر للذهن فور قراءة خبر اخونا الخليفه متي ولماذا واين وكيف اليس للجنة النادي القدره علي الشرح علي الاقل للجمهور الذي ظل متفرجا شهور علي لعبة الشاشه وتابعها بكل جوارحه ام ان الناس هنا عباره عن حصالات نقول لهم ادفعوا فيدفعوا علي لجنة النادي ان تكون شفافه تجاه عضويتها وتجاه من يحاولون دعمها من بعيد اتمني من احد الاخوه اعضاء المنتدي بالداخل نقل شرح كيف تطاير حلم الشاشه هباء يعني معقول كده بس الشاشه ماتصل العيد التاني وبعدين اذا اصلوا بتتكسر الشاشه بالسهوله دي ومافي حد بكون عارف السبب ايه الضمان انو الناس تتقطع انفاسهم مره اخري لتوفير الحل وتاني يتكسر الحل دون ان يعلم احد بالاسباب يااخوانا انتو عدوي الفشل في ادارة الامور مالها منتقلها بالسرعه دي من اعلي الي اسفل انا كنت قايل البوست دا اتقفل خلاص لكن الظاهر يادوبو بدا هل من وجيع |
ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ههههههههههههههههههههههههه ه
أحي أنا أنا قلت لي شنو يا حسبو ههههههههههههههههه عوضين الحقني فشفشاي إنقد عديل من الضحك ... |
سلامة فشفاشك ياخي والله انا مستغرب في الناس دي زول جاء واستجاب لي نداء عوضين مافي عشان يقولو وصلو وين في موضوع شاشة شاشة النادي يكون النادي ده مافيه لجنه ولا شنو
|
ههههههه انت يا حسبو بتقترح ساي ما تسال الجماعة الكسروها اول امكن عاوزين بدلها طحنيه ؟
|
سلام ياحبايب..
المعروف ان النادى به كرت الجزيرة والدوريات الاوربية تجذب الجميع ولانى شاهدت احدى المباريات باجازتى السابقة قبل وصول الشاشة التى انتقلت الى جوار ربها اثر عاهنات مجتمعنا الذى لايعئ كيفية المحافظة على مكتسباته وارجو ان يكون هناك رسم شهرى للاعضاء كما فى جميع الاندية لتوفير الضمنة والكشتينة والخدمات عامة ورسوم ولو رمزية اى جنيه لمشاهدة المباريات المشفرة والتجربة لدينا فى مدنى باركويت اسهمت فى تحويل غرفة وسور 30 فى 50 متر الى نادى مشجر ومنجل ومن الدخل تم تشييد غرفتين وصالة ضخمة واصبح النادى قبلة للجميع من الاحياء المجاورة لوجود بروجكتر وهو بنفس سعر الشاشة فقط يمكن ان تتحكم بحجم العرض الذى سيتناسب وعدد المشاهدين وبما ان الخدمة قدمت من المغتربين وتم وأدها نرجو ان يكون هناك تواصل مع لجنة النادى للوصول لاتفاق فى حال ارسال شاشة اخرى او بروجكتر فى كيفية اسهام الدخل الوارد منهم فى القرية وذلك هو الاهم ونرجو ان لايكون الهم ايجاد البديل دون النظر لانسان المنطقة |
ود المامون يديك العافيه فكرة الاشتراك معمول بيها في النادي ومن زمان وكل مباني النادي ومعداتو تم توفيرها بذات الطريقه ولكن في الفتره الاخيره حصل عزوف بصوره كبيره
وقل عدد الرواد دعك من العضويه الملتزمه وفكرة الشاشه اساسا كانت من اجل اعادة الاعضاء وزيادة الدخل من خلال المباريات كاستثمار . يا مانجويا مانحن اساسا عرفنا منهم انا ماذكرت في المداخله الاولي انه وردني اتصال منهم بيقولوا انه مالاقين اسبير في السودان لذلك جاءت مناشدتي وطبعا انا سألت عنها ولقيت سعرها قريب من الشاشه نفسها. لذلك انا مع اقتراح محمد المامون المتعلق بالبروجكتر . عليه اقترح تغيير عنوان البوست مره اخيره مع وعد مني انه اخر تغيير ( رحلة بروجكتر النادي) |
((لست من نور لتغفر انت من طين لتبنى ,,,فأبنى لى بيتا لنا ..لك...للصغار القادمين)) الصادق الرضى
|
All times are GMT. The time now is 04:07 PM. |
Copyright ©2000 - 2024, Futeis.com